龍翔酒家 (屯門)

耐唔耐會響呢度一大班人食飯,
呢日年初4, 黎到呢度食個團拜飯,
好多人! 等左差不多20分鐘.

今日一行12人, 叫左好多送,
分別有一隻燒鵝, 白切雞例, 滑蛋蝦仁, 魚肚羹, 清蒸鎗魚, 發財好市生菜,
沙鍋魚頭煲 另外仲有幾味家常小菜.呢度D鵝過得去, 想頂住癮的話絕對無問題.味道普通

滑蛋蝦仁貴! 88蚊! 味道咸左D, D蝦好大隻, 不過味淡.

清蒸海上鮮(鎗魚)唔大條, 味道可以, 肉質的確幾鮮.

如果鐘意食魚頭, 可以一試, 呢度個沙鍋魚頭煲都幾好味架~

呢度小菜黎講完全合格, 街坊價, 食完仲有糖水送, 呢度D糖水都幾好味架~

新年關係所以價錢都貴D~ (預左~)

新釗記 (北角)

新釗記, 相信大家都有幫襯過.
今日黎到天后, 因為女友唔舒服想食粥, 又趕時間, 所以黎左幫襯~

我地叫左一個時菜排骨炒河 ($38 包例湯)
一碗免治牛肉粥. ($24)時菜排骨炒河黎講食入口就覺得唔夠鑊氣, 排骨冇排骨味, 反而條菜就幾好味.
河粉份量較少, 即叫即炒拎到出黎竟然都唔夠熱.

24蚊一碗免治牛肉粥, 老實講, 唔平,
算幾大碗, 味道有D住家STYLE (姐係自己煮都有既水準)

如果唔係女友唔舒服話要食粥,
基本上晚飯唔會選擇呢一度.

大利清湯腩 (天后)

過份!! 加價加得太過份!
食左咁多年, 都係大概28蚊食碗麵.
呢日去到見到D價錢加晒. 仲要增幅很誇張
唔怪得冇咩人食.

好老實講, 碗麵只係好一般,
清湯腩雖然味道係好清甜, 可惜肉質很"鞋", 很"靭"....幸好呢度既辣油味香, 牛腩先覺得可口.
如果要我比$33蚊一碗單拼河粉我覺得一D都唔值....

另外本來想叫個腩汁蘿白, 但由10蚊一加加到15蚊真係太過份.....呢個就係新MENU.
大家可以試一試.
今非昔比......

貴川風味館 (旺角)

12月份洗太多錢了...
真係想平平地食返餐算....

咁岩行過呢度就入左去食,
其實都鐘意食小鍋米線,
呢度既小鍋米線就20蚊起我果碗加左豬潤同豆卜!!
一黎到就見到好大碗, 三十幾蚊咁大碗米線依家真係好難得.
仲有都算比足料架, 你睇有幾多豬潤同豆卜,
d豆卜浸耐d先食真係好入味架

另外果碗係紅薯粉, 口感好特別~ 唔係難食~
不過我都係鐘意食返米線多d.,
呢碗加左腐皮角~ 味道唔錯~

雖然男仕黎講可能睇落會唔夠飽, 但其實呢度的份量都真係幾大的.
就算真係唔夠飽都有好多唔同款式既小食~~

今次我一碗夠了

蛇王二 (銅鑼灣)

如果成日黎銅鑼灣食野, 冇可能未食過呢一間蛇王二,
大大話話我都幫襯左5,6年.

最鐘意當然係呢度既叉燒, 脆皮潤腸, 燉湯~~~
今次黎到叫左一個蛇羮餐 (蛇羮一碗, 生菜一碟, 加錢叫左個潤腸燒鵝脾飯)
另外一個燉湯餐 (叉燒燒肉飯, 天麻燉魚頭) 你睇佢地幾吸引!
潤腸真係脆皮, 冇介紹錯, 如果鐘意食潤腸, 黎到呢度一定要試
燒鵝脾肥瘦適中, 我的至愛
燒肉, 普遍貨色, 不過keep到個皮脆, 可以
叫叉燒的話記得一定要叫肥叉! 如果唔係瘦奀奀點咬, 同埋呢度既肥叉唔會真係好肥.

呢度既蛇羮其實味道一般,
想經濟一點的其實我推薦大家叫燉湯餐 五十幾蚊,
天麻燉魚頭 / 陳腎西洋菜 / 豬肺湯 呢幾隻都好好味.

食完就覺得呢間野好少味精, 因為食完一d都唔口喝.

臨走我再叫多一斤潤腸返屋企, $138蚊 (都有成15條)
但要識整, 我響屋企就整唔到脆皮喇 =.=" 佢地一定有特別既方法整.

呀仲有, 黎得呢度唔好諗住坐得舒服, 因為地方細,
都唔好要求服務好好, 當呢度食快餐咁. d Uncle 雖然有點粗魯但其實佢地唔係冇禮貌的.
最緊要d野食好食! 如果唔係我都唔會幫襯咁耐啦