源記餐廳 (尖沙咀)

聽演唱會當然要揀近紅館啦! 喺尖沙咀見到呢間茶餐廳!

茄燴豬扒意 - 用埋新鮮蕃茄做燴汁加埋洋蔥都唔錯, 豬扒腍, ok.

茶走 - 茶味太濃, 而且沖得麻麻.

服務員忘記比餐具我, 到我叫嘅時候, 個义濕不特止, 上面...
嘩! 餐廳最好留意呢d 情況, 而且有待改善呀!

沙嗲王 (荃灣)

沙嗲王 - 記憶中係一間開咗好耐嘅食肆, 依家仍然有佢嘅生存之道.

沙嗲牛肉粉絲 - 呢度我最鍾意叫嘅, 濃濃嘅沙嗲醬淋喺灼得啱啱熟嘅牛肉上面, 粉絲爽滑加埋牙菜, 好味呀!

印度薄餅配咖哩汁 - 呢度嘅咖哩都係唔錯嘅選擇, 跟埋印度薄餅, 真係細心.

越南豬肉粉卷 - 蒸乾咗d, 粉卷唔厚, 都ok.

日式炸蝦餅 - 一咬開, 好香嘅蝦味, 因為成塊蝦餅都係蝦, 粉醬又啱啱好, 唔錯.

椒鹽軟殼蟹 - 呢度話係自己養既. 果然好肥美, 薄薄一炸配腰果, 茄子, 肉鬆, 好夾味道.

白咖哩豬扒飯 - 白咖哩唔係度度都有得食, 不過呢度嘅白咖哩甜甜地, 豬扒腍身都唔差.

青檸柑梅蜜 - 青檸加柑桔同梅, 入口清甜, 感覺幾潤, 如果有熱飲重好.

椰汁黑糯米 - 叫熱既, 但好似係凍嘅番熱, 唔太甜, 黑糯米煙煙韌韌.

長來食坊 (元朗)

朋友話呢度嘅雞煲好味, 所以抵著9度低溫坐街邊品嚐呢個惹味雞煲.

涼伴豬耳 - 用蒜茸, 青瓜, 芫茜加上麻油, 辣油...等等, 豬耳爽脆, 佐酒一流.

涼伴雞腎 - 同涼伴豬耳做法一樣, 都係咁好味! 朋友已經飲咗幾杯酒lu.

雞煲(半隻) - 半隻雞都唔細鍋喎! 個雞煲落咗芫茜, 洋蔥, 乾蔥, 薑片, 八角....等等, 好惹味呀! 又有冬菇添, 雞件又滑! 正!

另加嘅配料中肥牛真係犀利, 比手掌重要大, 肥瘦平均, 牛味夠又爽口!
其他嘅配料好似薯粉咁, 又係一流, 爽滑, 放入個鍋度吸收晒雞煲嘅味! yummy !

後記: 呢度真係食過番尋味, 下次一定要叫多d 朋友o黎食!

四海遊龍鍋貼水餃專門店 (荃灣)

煮飯有時都幾辛苦, 所以今日叫媽咪放假一天, 出去搵食!
見屋企附近開咗間新店都未試過, 就去啦!

豆漿 - 豆味濃而唔甜.

牛肉麵 (牛肉湯) - 5片牛肉用"月展" 嘅部位, 所以好腍, 好味!

招牌水餃麵 (牛肉湯) - 5隻椰菜豬肉餡水餃, 皮薄, 而且個餡味道適中, 麵條粗粗有口感, 配牛肉湯, 唔錯.

滷水大腸 - 份量小咗d, 不過跟餐優惠$6都好抵, 滷水好入味, 但肥咗d.

**中間我哋叫咗蚵仔煎, 服務員話賣晒, 無問題啦! 點知事隔20-30分鐘鄰坐食客叫同一食品, 竟然有喎! 我即刻問服務員點解先前話無, 依家又有?
服務員有趣地答: "之前廚房個阿姐唔喺度, 所以以為無, 依家返咗o黎而又得一碟份量嘅蠔仔, 咁唔好意思呀!" 算啦!

到埋單牆上貼有附近屋苑住戶優惠, 只要出示住戶證有9折, 有優惠當然要問下啦! 我問:" 請問住公屋無住戶證咁點先有優惠呀?" 服務員又一妙答:" 吓? 你個屋苑無住戶證呀? 唔...." 我再問:" 公屋當然無住戶證啦! 唔通要用租單? 服務員無再答. 我亦無再問. 其實我都只係問下, 有咪有無咪無囉!

服務員應該要清楚公司嘅優惠, 而公司提供優惠嘅時候, 亦都要清楚"市況", 否則優惠只係形同虛設!

吉野家 (葵芳)

媽咪有約無飯食, 難得可以同朋友仔撐枱腳, 去完葵芳買完除夕抽獎嘅禮物就o黎呢度啦!

特切生牛肉鍋(配烏冬), 日式濃湯底, 汽水 ($47.5)
個湯底未落牛肉前都唔覺佢係濃湯, 不過滾下滾下d 味出晒o黎, yummy! 牛肉嫩, 烏冬彈牙, 而鍋入面有雪埸蟹柳, 芝士年糕, 冬菇, 粟米, 紹菜, 南瓜, 芋絲, 豆腐, 豆卜, 金菇.

再加多一份牛肉($19.50)
菜肉餃($7/4隻) - 皮適中, 味道都唔差.

**其實個鍋都幾多料, 而且味道唔錯, 最鍾意係佢嘅芝麻醬配牛肉好得.