當奧豐素意式料理 (南灣)

早前於佳節好評大賞有幸贏取澳門之旅，先要在此再多謝支持投票的朋友，把握今次免費旅程機會，我希望可以將澳門之行食到的都給大家分享，可惜撞正春節假期，多間目標食肆仍未啟市，可以話係出師不利。幸好今次有機會可以食到當奧豐素1890意式料理，呢間榮獲南意大利米芝蓮星級餐廳最高評價，果然係非同凡響，亦係我目前食到最高水準嘅意大利餐廳！當奧豐素1890意式料理位於新葡京酒店三樓一個角落，由於餐廳座位不算太多，建議先預訂位置。而網上除設有訂位服務之外，大家更可以先預覽一下餐單菜式及價錢，非常方便。今次我訂位到來食午餐，記得我電話訂位時，侍應再三提醒男士唔好著短褲，亦唔好著露趾涼鞋，不過圓領衫跟牛仔褲係無問題，相信主要只係提醒酒店住客進場唔好著得太隨便。餐廳環境佈置得相當華麗，雖然樓底唔算高，但精緻嘅吊燈及壁上油畫別具氣派。突然覺得眼前畫面跟杜拜Burj Ai Arab房間極為相似，甚至餐具亦同樣用上Hermes出品，後來才知道兩者同出自著名室內設計師Khuan Chew手筆，怪不得有似曾相識嘅感覺。每一張大餐檯之間有相當嘅距離，私隱度可以更高之餘，感覺亦格外高貴。每張檯上都放有一款唔同嘅擺設，雖然我唔係呢方面專家，但起碼知道呢個精美擺設應該唔係一般貨色。

呢度午餐Lunch Set分兩個Courses(MOP280)，三個Courses(MOP380)及Full Menu(MOP480)三種，三個同樣都跟甜品。之前雖然參詳過前輩嘅午餐攻略，但我地最後都係抱住一人世物一世嘅心態，加上非常肚餓，所以都係叫左一份三個Courses加一個Full Set。頭盤未到之前，先送來一籃香噴噴嘅麵包。侍應將六款麵包介紹後，再為我地準備特純橄欖油，芝士味牛油及黑醋。呢款意大利黑醋實在不得不用多少少筆墨去寫下，用白葡萄搾汁後，再經過25年古法釀製而成，屬Gold Label最高級數。平時我地用來混沙律食嘅黑醋亦只係三至五年貨色，呢支用來蘸麵包食真係好食到不得了，搞到我唔好意思要求侍應為我再次添加，如果大家有興趣的話，亦可以將黑醋買走，每支盛惠MOP390。至於呢個價錢去買一支調味料值唔值得，大家試過後心入面應有一個答案。

講返個麵包籃先，胡蘿蔔包，馬鈴薯包，菠菜包等咩都有，單係聞到陣味都知有一定水準，最後在黑醋誘惑下我每款都有食過。其中最吸引的應該就係上面印有1890字樣嘅薯仔包，咬落鬆軟又滲出淡淡馬鈴薯香味，實在非常好食，怪不得咁多人未食頭盤早已飽左一半。享用完麵包籃後，先來頭盤"魷魚配玉米蓉，芝麻菜及25年陳年意大利黑醋"，芝麻菜即係港人俗稱嘅火箭菜，本來我好怕呢種菜果種苦澀味，不過混上黑醋後感覺截然不同，感覺唔錯。而魷魚屬於BB體型，咬落鮮嫩富彈性，加埋底層玉米蓉嘅幼滑質感，整個頭盤來得既簡單又不平凡。另一份頭盤選擇左"地中海章魚沙律配豆蓉及海蜆雲吞"，將章魚片跟海蜆放在意大利雲吞面層，再配上豆蓉作伴，賣相極美，放入口每啖在豆蓉粗糙之中夾雜海產鮮味，感覺實在好美妙。餐湯方面可以三選一，我一向最怕青豆湯為左加強口感而刻意落太多奶油，呢度嘅青豆蓉湯伴辣根、紅蝦及豬面頰肉就無呢個問題。湯身口感柔滑討好，紅蝦肉新鮮爽甜，呢個組合一紅一綠令人相當驚喜。本來豌豆湯唔算咩高貴菜式，但偏偏呢度嘅意大利豌豆湯伴帶子就帶出不一樣嘅精彩。豌豆味道較濃鹹，混上湯面上香料，飲落綿密之餘，亦帶著濃厚感覺，而帶子好厚身，咬落鮮甜味美有嚼勁，係我最喜愛果種質感，好味。Middle Course之中，以呢個意式雲吞釀黑豚肉配開心果露最為吸引，賣相雖然只係一般，但日本黑豚肉跟意式雲吞得出來嘅化學效果係如此有趣，釀入黑豚肉嘅雲吞食落少少似餃子，豚肉味唔算太濃，不過肉香依然，加上雲吞皮薄爽滑，實在係高水準作品。

講左咁耐終於到主菜出場，首先係呢份意大利香草羊排配特色薯餅，我一向唔讚成食羊要落薄荷醬，因為薄荷醬味太濃郁，完全搶去肉本身應有味道，所以呢度亦無薄荷醬提供，等你可以慢慢細嚐嫩滑羊肉羶香味。特色薯餅中間夾雜茄乾，每一啖都食到薯片香脆同埋蕃茄甜味，呢個廚師似乎落左唔少心機，值得一讚。另一份主菜好多人都有試過，就係呢份牛仔膝配特色意大利飯。除左金黃色嘅意大利飯外，唔好以為炆得入味又夠腍嘅牛膝肉係焦點所在。真正主角並唔係佢地，而係最右手面果條牛骨...上餐前侍應特意呈上一隻細細隻銀匙羹，用意係俾你將牛骨入面嘅骨髓取出黎享用。骨髓獨特香濃嘅油質，滑入口中果一剎那，雖然有股唔係個個都可以接受嘅牛羶味，但實在係美味無窮，非常好味。牛骨髓屬於高蛋白、低脂肪而且極富鈣質，營養價值非常高，如果唔食就真係浪費了！到甜品部份，餐牌上寫住呢個熱朱古力蛋糕配香蕉雪葩及橘子果醬，唔駛多考慮就決定...要！軟心朱古力蛋糕內流著微暖朱古力漿，味道濃郁，絕對係水準以上，但又未算為最好。但香蕉雪葩做得非常出色，蕉味芳香不過火位，混上中間作「橋樑」嘅橘子果醬，Perfect Pair！另一個在Lunch Set甜品當中有個好長嘅名字，就係意式雲吞釀香梨、松子、葡萄乾伴水牛芝士雪芭及紅桑子汁。嘩！個名長到...意式雲吞內香梨混上葡萄乾，清甜好味，最特別都係上面嘅水牛芝士雪芭，口感幼滑，但甜中又帶有少少芝士鹹味，混埋紅桑子汁嘅酸，非常特別。當奧豐素最具人氣嘅甜品"Neapolitan" 脆葉釀玉桂忌廉及櫻桃(MOP90)並無出現在Lunch Set入面，意猶未盡之下決定Side Order一客。將Neapolitan酥皮一切落去，已被果種聽得到嘅鬆脆聲音吸引住，蘸上櫻桃醬後放入口中，一陣陣肉桂香味隨香脆鬆皮湧入口腔，非常誘惑，絕對不試不可！食過呢餐豐富完美嘅午餐後，侍應引領我到自助甜品吧，每樣甜品好有耐性向我介紹，可惜我胃納有限，未能逐樣試清楚。不過，我絕對唔會辜負侍應一番心機，所以點都拎少少返去試下...其中呢個薰衣草味糖果，食落唔覺有薰衣草味，反而有少少薑味，細味之下都幾醒神，作為一個終結，實在最好不過！

今次當奧豐素之旅，的確係我食過最好嘅意大利菜，用永世難忘亦絕無誇張。所以今次食評篇幅較長亦無可厚非，其實仍有好多想講想同大家分享，不過...大家都係親自感受吧！呢個體驗，無可能會後悔的！

禮記雪糕 (荷蘭園)

記得細個果陣，我好中意食雪糕三文治，放學時婆婆帶我返屋企前都會到士多買一份，味道雖然已不再清晰，但感覺絕不模糊。今日，如果想再食呢樣野，喺香港真係非常困難，所以今次澳門之行，特意到呢間有賣雪糕三文治嘅舊式冰室，希望俾我重拾當年回憶...如果論味道，禮記雪糕只係一般貨色，甚至被其他外國品牌完全比下去，不過雪糕中果種自家風味同粗糙感，反而吸引到唔少遊客幫襯。雪糕三文治(MOP10)用一個好傳統嘅小紙盒入住，內裡三種雪糕口味絕對係隨機，唔駛大家費神選擇。是日我試到嘅分別係椰子、蜜瓜、芒果，縱使唔係心目中理想組合，但仍對呢件古董充滿期望。三款雪糕味道非常清淡，蜜瓜跟芒果更加係試唔到有咩味，只有靠微微嘅椰子香味，我先至辨認到佢嘅存在，而外層威化餅薄而不脆，令人頗為失望，整體上味覺不可能滿足。反而雪糕紅豆冰(MOP15)有少少驚喜，紅豆大粒又夠腍，味道相當唔錯，有水準。而菠蘿雪糕淡淡的浮在冰面，只屬閒角一名，錯過亦無損失。純粹為懷舊嘅話，到禮記飲個冰，食杯雪糕，的確有一番風味，但如果你為滿足味蕾，便利店已有好多選擇等緊你...今次到來，絕無後悔，因為兒時我跟婆婆生活嘅小片段，腦海出現了！禮記...多謝你！