海南少爺 (尖沙咀)

聽講呢度可以望住個海景食飯，今次未有機會堂食，但都買左啲外賣返屋企食🤤，外賣好抵，主餐牌有85折，於是就試下啲招牌菜式


🐽招牌海南雞飯 $117
食星馬菜梗係要食海南雞飯😍，小編加$8轉左雞脾，每一舊都啖啖肉，而且又滑，例牌都係有三款醬汁，有黑醬油、酸辣汁同薑蓉，沾酸辣汁最為惹味，另外仲有菜同湯，雞湯清清地幾解膩😋


🐽菠蘿蜜山渣糖醋肉排 $136

夏天會想食啲酸酸甜甜既野，呢個糖醋肉排醬汁整得幾好味，酸甜適中，可以食多碗飯，肉排既份量都好多，另外仲會有啲大樹菠蘿同三色椒，同個醬汁好夾😛


🐽印尼炒飯配沙爹串燒 $102

拎到返屋企個賣相都仲係好靚仔😎，除左炒飯，仲會有隻蛋、2串串燒、3隻大蝦、蝦片同青瓜，炒飯既味道有啲似醬油炒飯，夾雜左啲雞肉，再撈埋隻蛋隻，個人幾鍾意😙，串燒都唔錯，沙爹汁好香


🐽星洲滷水花生雞腳 $51
唔好見佢細細兜咁，其實都有成6隻雞腳，雞腳煮得夠淋，見到隻隻都上哂色就知好入味，仲有啲鹹酸菜同花生


🐽 印度薄餅配咖哩汁 $54
薄餅煙煙韌韌，不得不讚個咖哩汁，香而不辣，剩低既汁甚至攞黎撈飯食🤗


🐽 新加坡蕃薯喳喳 $51
最後仲叫左個甜品，喳喳好仲料，有蕃薯、芋圓、西米、芋頭同椰漿，整體唔會太甜，食多兩啖都冇問題🤤

和牛燒肉一郎 (將軍澳)

早幾日去左新都城既和牛燒肉一郎度食燒肉😋同男朋友都諗左一陣食邊個餐好，還掂都係食，就食最貴個個餐，可以試到哂所有既日本和牛😍食足120分鐘，呢度既送餐方式都好有趣，用左列車方式，食物一到，就會響音樂，跟住就要禁開關去攞


坐低會先上舟 •盛合、桶•盛合、是日寶箱、
極上花盛合、4天梯同極上夏多布里昂部位



🐽 舟 •盛合係一隻好壯觀既船，裏面有啲特選既美國牛、雞、豬同海鮮，打卡既朋友仔記住準備定相機


🐽 桶•盛合就有牛肋肉、牛脊肉、雞同豬


🐽 是日寶箱就每日既款式都唔同，今次就係和牛西冷，可以見到牛脂分佈幾靚，食落油香味重，肉質都好軟淋😋


🐽 極上花盛合賣相都好靚，將啲肉捲到花花咁，裏面就有兩款和牛既肉、牛兩款美國牛肉、牛舌、豚肉同蔬菜


🐽 4天梯可以一次過試哂4款和牛，包括和牛肋條、和牛肋肉、和牛西冷同和牛里脊肉，店員告知要由下至上咁食，四款都好味，但個人比較鍾意和牛肋肉同和牛西冷，油脂感較重，有啲入口即溶既感覺🥰大家可以試清楚自己鍾意邊款肉，跟住就可以主力叫encore😎


🐽 夏多布里昂是好珍貴既部位，只會上一次，店員會幫手燒，燒到五成熟就可以食，肉質非常嫩滑，個汁係錦上添花，舊肉入哂味🤩，仲留低左個汁燒其他肉，而家諗返起都想再食


👍🏻燒既肉類小編好推介厚切牛舌，雖然見佢好厚，但原來一啲都唔會韌，仲有款叫和牛薄炙壽喜燒里脊肉都好特別，配埋溫泉蛋同個醬汁，就好似真係食緊壽喜燒咁，里脊肉大大塊沾落蛋漿，好滑好香😙呢度既海鮮都唔錯，帶子同蝦都夠大隻同新鮮


除左各款燒既肉類，仲會有和牛刺身，小編都試左幾款，有啲似食緊吞拿魚咁，都幾得意😂另外仲有一啲炸物、前菜同熱食，炸蠔同可樂餅都好味，熱辣辣好香脆😍，前菜就試左泡菜，食咁多肉食下泡菜可以解下膩，最後仲叫左一碗辣牛肉拉麵，非常滿足☺️


🥗自助區有飲品、沙律同甜品可以攞，飲品都幾多選擇，有啲自家製既水果茶、果汁同汽水，甜品就有細細杯既甜品杯同日本雪條，試左四款，個人都鍾意牛奶布甸同焦糖布丁，牛奶布甸奶味濃及滑，而焦糖布丁焦糖味都好香，一定要留肚試下😝

價錢：星期一至四 $888（另加一）
星期五、六、日 $938 （另加一）

燒蝦蝦 (元朗)

好掛住泰國🥺，上個星期就去左元朗既一間任燒流水蝦同海鮮既餐廳止止癮，整體既用餐體驗都唔錯🤣


🐽海鮮
海鮮既種類都好多，當中小編係咁encore既有扇貝、生蠔同一啲貝類，可以自己係出面夾，扇貝隻隻都好大隻，上面仲可以加啲蒜蓉辣椒，好香好惹味，生蠔都幾肥美，燒完唔會縮到好細，而啲貝類建議可以放入錫紙兜裏面再加啲湯燒，咁就唔會燒到乾哂，仲仍然保持到水份🤤


當然唔少得重頭戲-流水蝦，啲蝦係水缸入面十分生猛，大家記住要先將佢地放入冰水🙇🏻‍♀️，然後先再燒，蝦頭既膏好正，肉質爽彈😋


🐽自助區
除左海鮮，仲有好多肉類，例如牛仔骨、豬扒、羊架、雞全翼、雞軟骨、雞腎、煙鴨胸、丸類、蔬菜等等，仲會有啲炸物熟食、湯同已經烹調好既海鮮可以比大家攞🤣🤣等緊野食熟既同時都可以食住先😎


食到最後當然要食埋甜品先滿足，呢度有各或各樣既雪糕雪條，仲有啲細細個既撻仔同甜品杯😋


順帶一提，醬料可以自由搭配，而有個泰式酸辣汁點大頭蝦真係好夾😜


價錢：$298（另加一）

Olive Cafe (荃灣)

呢間cafe外面大大個招牌🤣，裏面既裝修都好靚，上面有啲植物同燈泡，好有feel😆，同朋友叫左個2人餐（$268），價錢唔貴，十分抵食😎


🐽餐湯&沙律
餐湯係雜菜湯，好足料好好飲，沙律菜亦都好新鮮，加上個醋，酸酸尾尾好開胃🤩


🐽明太子軟殻蟹忌廉汁意粉

份量好足，明太子忌廉汁好creamy，啖啖都好香濃，軟殻蟹已經分左兩邊，食落好方便，而且脆而不油😍


🐽 牛隔肌拼燒春雞
可以一次過試哂兩款，牛隔肌都幾軟淋，唔會韌，燒春雞都有半邊，雞脾都幾滑，因為係鐵板上，上菜時會渣渣聲，可以調節生熟度😝


🐽手打牛漢堡配黑松露薯條 $108
牛肉好厚，亦幾重牛味，漢堡仲夾左菜、蕃茄、芝士，薯條係粗薯，唔點醬都好夠鹹，黑松露汁都十分香，令人一條接住一條食😋


🐽氣泡三色果凍
幾特別既甜品，幾隻唔同味既啫喱再加啲氣泡水，飲得又食得🙈


🐽Fruit Punch $48
由橙汁、菠蘿汁、紅石榴糖漿同梳打水製成，橙味比較多，整體會甜啲


🐽Blue Hawaii $48
由橙汁、菠蘿汁、藍柑同梳打水製成，味道幾清新，好解渴🙈

爆丼屋 (九龍灣)

小編非常鍾意食刺身丼，可以係一個飯裏面一次過食幾款唔同既刺身，呢間餐廳既選擇都幾多，有魚生丼，亦都有熟食丼🤩而且環境都幾寬敞，坐得好舒服


🐽三重大極上丼 $398

呢個丼有齊日本海膽、極上拖羅同蟹肉，海膽好甘香，新鮮冇腥味，而拖羅亦入口即溶，冇筋超肥美，有成6-7舊，超級滿足，側邊仲圍左一層蟹肉，十分鮮甜😍😍飯既份量都唔少，食完其實都夠飽，另外仲會送個麵豉湯，用左好多蔬菜去煲，好足料🤣


🐽重量級燒牛排盛丼 $238
唔食魚生既朋友仔都有其他既選擇，今次就叫左個牛排丼，岩哂食肉獸既人，上面鋪滿厚厚既牛排，肉味都幾濃，質感偏有咬口，醬汁甜甜地，幾好餸飯😝