辣辣屋 (粉嶺)

🐽泰式冬蔭功烤魚 $298
呢度既魚係用嫩滑少骨既江團魚，冇腥味，冬蔭功湯好夠味，酸酸辣辣，愈食愈開胃，仲會有啲菇、蕃茄仔係下面，好好食😋另外仲加左鴨血同薯粉，鴨血新鮮，薯粉都好煙韌🙈


🐽流口水臭豆腐 $48
竟然有得食臭豆腐，佢唔會好臭😂豆腐上面有啲鹹蛋黃碎，多左啲鹹香味，仲有埋辣醬同甜醬可以點，港式得黎又帶啲新意🤗


🐽口水雞 $48
份量都唔少，啖啖肉，個口水雞汁好頂癮，辣度好正🤤下面仲墊左啲青瓜


🐽蒜燒茄子 $38
係重口味人士之選呀，超多蒜係上面，好香，茄子肉都好淋🤩


🐽估唔到好味青瓜梳打 $38
飲品超大杯，有成1300ml，夠哂兩個人飲，青瓜梳打飲落好清新，裏面仲有啲青瓜粒，感覺好得意🤣

牛大人台灣火鍋吃到飽 (荃灣)

隔左排冇食牛大人，今次去到荃灣大鴻輝食，近排牛大人同蠟筆小新合作，餐廳裏面有好多打卡點，仲可以買小新精品，沙田店有得自費影小新即影即有添

小編叫左極上和牛吃到飽套餐，湯底試左紅燒牛骨鍋，濃郁得黎唔會太鹹🤣勁鍾意呢個湯，就咁都飲左好多啖，必點既肉類有M5和牛牛肩卷、安格斯牛小排同SRF極黑牛板腱，和牛牛肩卷油脂分佈平均，幾軟滑，其餘兩者牛味都幾濃😆

另外啲沙白好大隻好鮮甜，完全冇沙，都叫左好多轉😂上次試過老油條好好味，今次都要再點，炸得香脆，浸幾秒湯，都仲食到個口感☺️

打邊爐點少得飲啤酒，見佢有流水落花手工啤，點左一杯飲，好易入口，帶有果香味😆

價錢：$298（加一）

漁初．魚丼 (佐敦)

冬至個日屋企人冇煮飯，小編負責買左啲日本野外賣反屋企食，餐廳既裝修好似整到漁市場咁，出面仲有啲許願牌，身處係日本一樣，仲有大大個牌寫住外賣壽司滿 $150減$20， 滿 $300減$70， 滿 $500減$150，真係好抵食，所以我咩都買左啲試下🤩


🐽自選魚生飯 $120
本身佢有啲配搭好既魚生丼，但見佢原來可以自選，就揀左啲自己鍾意既餸，一共叫左4款，包括油甘魚腩、三文魚腩、三文魚籽同赤蝦，油甘魚腩同三文魚腩都好新鮮肥美，三文魚籽好好撈飯，唔會有腥味，赤蝦好大隻，蝦頭多膏，有膠質😋


店員仲同我講佢地而家星期一至四12:00-17:30 （假期除外）堂食自選魚生飯有八折，即係$100內就食到呢個丼🤑


🐽秘製牛舌塔丼 $88
呢個丼好誇張，牛舌真係食極都仲有咁，口感軟熟，一啲都唔韌，加埋個甜甜地既醬汁，真係幾好食，如果堂食個丼會砌到成個塔咁高，好壯觀😆


🐽明太子雞翼 $68
雞翼裏面釀左明太子餡，辣辣鹹鹹，幾惹味😙


🐽櫻花蝦豆腐 $58
外面全部都係櫻花蝦，十分香，但整體味道再鹹啲會更好😳


🐽吉列軟殻蟹反卷 $88

上面有啲牛油果、沙律醬同蟹籽，入面包住吉列軟殻蟹，小編拎到反屋企都仲脆脆地，可能有牛油果既關係，多左份油香😍


🐽壽司 $226

另外仲叫左啲壽司，有甜蝦、三文魚、火炙三文魚腩 、北寄貝、馬刀貝 、象拔蚌、帶子、火灸鰈魚邊 、油甘魚、墨魚、芥辣八爪魚、螺肉，最鍾意既係火灸鰈魚邊，好肥，入口即融🤤🤤，油甘魚、帶子同芥辣八爪魚都幾好，新鮮鮮甜😎

圓仔記 (旺角)

去旺中行街，行行下見到有間賣芋圓甜品既小店，上網睇返原來呢間店本身由網店做到實體店，真係好犀利🤣佢除左賣甜品，仲有
餃子同手抓餅，全部都好吸引，但因為真係食唔到咁多，所以淨係試左其中兩樣


🐽 招牌包心三色芋圓仔 $45
裏面有仙草、2粒地瓜包心芋泥球、芋泥同三色芋圓，食完真係好飽好滿足🤣芋圓好煙韌，分別有紫薯、芋頭同地瓜味，芋泥綿密，最鍾意佢唔會太甜🤤而地瓜包心芋泥球其實就好似湯丸咁，只不過係包住芋泥，都幾特別😝仙草底就比較淋同滑身


🐽泡菜豬肉餃/韭菜豬肉餃 $40 （8隻）
另外仲買左佢地既煎餃，叫左比較少見既泡菜豬肉餃同大路既韭菜豬肉餃，兩款都煎得十分香脆，小編覺得泡菜豬肉好有驚喜，辣辣地，惹味可口😋😋

中國廚房/台灣牛肉麵 (尖沙咀)

今日黎到尖沙咀，突然好想食牛肉麵，見到呢間餐館幾有歴史，而且又咁多名人到訪過，於是就坐得試試😝店員非常友善及熱情，而餐廳都坐滿哂人，見到比較多係一圍圍既聚餐🙈


🐽紅燒牛肉麵 $79
湯底香濃，飲到牛既鮮甜味，牛肉好夠淋，每一塊都有肉有筋，軟淋得黎又帶點筋勁🤤，麵條既份量都唔少，口感偏軟滑，所以食落會較入味


🐽四川排骨擔擔麵 $72
花生味唔會過濃，食哂成碗都唔會覺得漏，有時出面有啲擔擔麵湯底會非常濃，但食到一半就未必會想繼續食😳，排骨炸得香脆，裏面仍有肉汁，調味都夠鹹😆


🐽涼菜三小伴 $58
叫左個前菜，可以任選三款，小編就揀左油燜荀、蠔汁烤夫同蛋白豆腐干，荀燜得好淋而且冇渣，蠔汁烤夫會有啲麵筋、菇同雲耳，索哂啲汁好入味，豆腐干就幾香豆味🤩