家後 (深水埗)

🐽韭菜豬肉煎餃 （+套餐） $55
叫左個套餐C，有8隻煎餃同2隻鹵水雞翼，餃子煎到好脆好香口，每隻都好大隻好足料，裏面都好juicy，豬肉同韭菜既比例岩岩好，齋食餃子會比較漏，枱上就有醋可以沾🤣

鹵水雞翼都好推介，唔好見佢既色淡淡地，其實鹵得非常入味，雞肉都唔會鞋🤤


🐽芫茜豬肉餃 $40

另外仲叫左芫茜豬肉煎餃，芫茜味好香，小編認為呢款應該會煎好食過湯餃，原汁原味😆，肉汁都係好多，如果驚唔飽既朋友仔可以配麵，麵種都有好多唔同款揀


🐽雲耳椰菜豬肉湯餃 $36
試左佢既湯餃，有得揀豬骨湯同是日例湯，今次揀左豬骨湯，味道唔會過濃，避免左搶哂餃子本身餡料既味，雲耳椰菜呢款好好食，雲耳同椰菜都好爽口，而且兩者都好夾🤣


🐽日式手作芝士蛋糕 $ 25

見到好多人都會黎食呢個蛋糕，但佢係限量供應，買哂就冇，建議如果想食，就要早啲黎食，估唔到真係好正，芝士味好濃郁，蛋糕仲係好濕潤，比較滑身既口感，不好甜品既男友都食左幾啖😂

丼燃食堂 (旺角)

🐽挑機丼燃大胃王 $208
大胃王一定要挑戰下呢個丼飯，可能就咁睇唔到有幾多飯同幾大碗，真係有2-2.5碗正常Size既飯咁多，上面有各式各樣既刺身，有油甘魚、三文魚、帶子、鮑魚、 蟹肉、蟹籽、甜蝦同拖羅，全部都好新鮮同魚類都幾肥美🤤


🐽虎燃丼 $68
呢個都幾抵食，係午餐黎，有三文魚、甜蝦、蟹棒同蟹籽，有得選擇需唔需要火炙，小編當然選擇火炙，醬就揀左明太子醬，另外有隻芝士蟹籽醬都好吸引😍，下次想試，辣辣地好惹味，同啲刺身幾夾，食完都幾飽😳


🐽金龍卷 $68
視覺效果十足😆店員會用火槍燒碟側邊既鹽，卷物上面係天婦羅鰻魚、沙律醬同蟹籽，裏面包左炸蕃薯同青瓜，幾特別🤤


🐽吉列蠔 $22
叫左兩隻吉列蠔，炸得好脆好鮮味🤩


🐽白桃冷泡茶/桂花冷泡茶 $10
呢度竟然有冷泡茶，兩樣都好飲，好解膩😋

Miss.JapJap (銅鑼灣)

又就快到聖誕節啦🥳，上網見到呢間係新開既和洋食餐廳，用左聖誕主題去佈置，即刻同閨蜜去試試👭


🐽火鳳凰 $118
其實係味噌蜆肉烏冬，冬天最好就係食啲熱辣辣既野，會用個鍋上同蠟燭座住，湯底好夠味，除左蜆肉同烏冬，另外仲有啲日式魚蛋、豆卜同菇，所有配料都好入味🙈


🐽聖誕彩帶麵 $138
呢個係梅素麵配清新柑橘柚子汁，首先賣相已經好吸睛，真係充滿視覺衝擊，麵條半空懸浮左係筷子上，真係好有趣🤣而個碗上就有啲柑橘柚子汁，味道係比較偏酸，幾清新


🐽焦糖雞翼 $79
雞翼多數都係用蜜糖黎整，呢度就比較特別，係用焦糖整，食落去成日營住好似食緊爆谷咁🤣，但都冇違和感，味道都唔會太甜🤩

農 (沙田)

今日去到科學園食飯，見到呢間餐廳係食啲新派中菜，有啲菜式都幾特別，而且價錢相宜，店員問我地想坐入面定出面，本身揀左入面，但見個景幾靚同幾清幽，最終都選擇左坐出面🌿



🐽爆汁乳鴿
同個菜名一樣，食既時候有好多肉汁流出黎，外皮炸得香脆可口，肉質岩岩好，唔會乾柴同老🤤


🐽牛榛仔
呢度有好多好得意既動物包🤣小朋友一定好鍾意😻牛榛仔入面係流心榛子朱古力醬，甜度岩岩好，記住要襯熱食，但要小心辣口


🐽黑金蟹粉小籠包
小籠包既精髓就係入面既湯汁，湯汁非常鮮甜，再加上豬肉同蟹粉，很不錯的小籠包😆


🐽滷水墨魚
將啲墨魚厚切，再用滷水汁去整，本身都好驚啲墨魚會韌，但結果都好易咬😜


🐽滷水金錢肚
金錢肚都係切得比較大塊，但炆得夠淋，比起墨魚仲更加入味，幾好味😙


🐽爽脆海蜇頭
非常開胃嘅小食，用左醋去調味，酸酸尾尾咁，海蜇頭爽脆，份量都唔少🤩


🐽蝦乾炒豆苗
有啲大蝦乾同櫻花蝦，豆苗都好多，夠油份，唔會旱😎


🐽烈焰菠蘿炒飯 $128
上到枱，店員就會用火槍燒菠蘿上面既蠟，變左著火既菠蘿，打卡一流，裏邊其實係瑤柱菠蘿蛋白炒飯，飯炒得夠乾身，一粒粒，本身瑤柱蛋白炒飯就比較清淡，但加埋啲酸甜既菠蘿肉，就會提升咗個層次，小編好鍾意呢個炒飯😋


🐽玫瑰花糕 $32
賣相好靚，外型係一朵玫瑰花，仲混合左啲花瓣，好清香既玫瑰花味😊

云手工火鍋店 (尖沙咀)

今日同屋企人去到呢間位於瑞生酒店既火鍋店打邊爐，環境裝修好靚好舒服，食材都好高質，有刺身、海鮮、肉類同多款配料選擇🤤



🐽 金湯花膠雞鍋 $368

呢個湯底真係十分推薦，鍋底有啲娃娃菜，中間個個係腐皮包住花膠、半隻雞同素翅，店員會先剪開腐皮，再將啲雞湯倒落去中間，等佢滾起就可以先飲碗湯先，湯底好鮮甜，好好飲，再連埋啲配料食，食完都飽飽地🤣


🐽紐西蘭羊肉片 $138
大概都有8-10塊，每塊都有厚度，唔會薄切切，而且羊肉味唔騷😜


🐽自家製響鈴 $68
響鈴即叫即炸，上枱時仲係熱辣辣，啱啱炸好，超級脆，浸左陣湯仲煙煙韌韌，唔會好快爛😍😍


🐽手打鹹蛋黃蝦丸 $52
見到有鹹蛋黃加蝦咁特別既丸，就叫左半份試下🤩蝦丸彈牙，中間會有啲鹹蛋黃，加埋有啲似食緊蟹膏味咁


🐽牛骨牛汁丸 $52
小編本身都好鍾意食牛丸，呢度既牛丸真係超級juicy🤣，裏面充滿着牛肉汁🤤🤤


🐽 招牌新鮮鵝腸 $108
睇啲色已經知道係好新鮮，而且仲有啲肥膏係入面，好有鵝既油香味，口感都好有咬口😍


🐽黃沙豬潤 $68
切得比較薄少少，好軟滑既豬潤，唔會鞋同硬😆


🐽冬瓜片 $48
每舊都切得好靚好整齊，冬瓜片用黎打邊爐真係好好食，淋哂又索哂湯


🐽日本稻庭烏冬 $48
有2個稻庭烏冬，係比較扁身少少，煙煙韌韌，配埋個雞湯超夾，食完好暖身☺️


🐽酸梅湯 （一榨） $68
酸味好夠，解渴又解膩😎