之前次次去金華d侍應都正正常常，有d係nice 既，有時唔記得拎漏野，提多佢一次會say sorry 番比你。 星期日中午12點半去買個豬扒菠蘿包，門口兩3個人等緊。我比左錢就企埋一邊等，好快有包，個年輕侍應就拎出黎叫「豬菠蘿！」，咁我就上前話「係我呀」想接，個痴線呀姐一野衝出黎搶走左個包，用質問語氣岳高頭問我：「個包幾多錢？」我明明比左錢，真係唔明佢講咩，話：「下？咩呀？」佢話：「我問你比左幾多錢？」我話：「21蚊囉！」佢先比個包我 -_- 我已經無出聲嬲嬲地走，佢仲大力瘋狂拍個麵包架對住我走左個方向大叫：「咁我唔知丫嘛！」唔知以為金華依家新增菜色係痴線呀姐，仲要放出門口賣。其實你做茶餐廳憑咩覺得人地會厄你個包呢？你咁醒驚人地偷拎你d包就出飛仔，憑飛仔拎包啦！同埋其實都幾十歲人，唔該好好面對自己。如果你做咁耐都唔知個包幾多錢，執包伏走啦。如果你明知幾多錢仲要咁樣質問個客，我祝你今世下世再下世都做茶餐廳 呢個呀姐皮膚白白地，及肩長度鬈頭髮。

早幾年係理工大學讀書時期，窮學生想喺尖沙咀食平啲就會去香檳大廈，一係芝士麵，一係蕃茄麵。不過小妹一直唔多欣賞芝士麵，一來圓枱坐得唔舒服，環境舊但無味道，二來真心唔特別好食，三來蕃茄麵個蕃茄底真心出色，永遠會揀蕃茄而拼棄芝士。

近幾年發覺，芝士麵質素低左好多，小妹已有起碼兩年無去過。今日想食蕃茄，但蠢左唔知星期日休息。摸門釘又行到好攰，就一試芝士麵。

哈！唔食由自何，一食就大獲，激起小妹打第一篇食評。

小妹與男友各點了一個蕃茄雞翼螺絲粉和終極芝士麵，等了又等，足足呆等左三十分鐘，咁都算。先講男友碗麵，話「終極」，有幾「終極」咁呢？其實就係四塊豬頸肉，四至五塊紅腸，加隻煎蛋，完。豬頸肉，話係招牌之作，但硬而乾，唔通係新製品---豬頸肉乾？紅腸同煎蛋正常野，芝士味呢？有但唔濃，或者應該話無以前咁濃，吸引之處都無左，其他野食又普通到唔普通，咁點呀？重點在於我碗蕃茄麵，蕃茄粒幾粒，再用叉沾少少紅色汁一試，下？茄汁黎既？即係煮熟螺絲粉再加茄汁呀！食到我無言。兩碗加埋$94。

其實是但搵間茶餐廳都OK過佢，小妹同男友都表示以後唔會再幫襯～