係廣華忙足半天，臨場加演爭分奪秒添。早餐捱至五點幾，忙完第一時間當然係醫肚，帶左阿毛去哩度，雖則明知唔係咁ｏ岩佢口味，但作為「試新野」同食番個「下午茶」，阿毛一句怨言都無。

今次試了德國脆皮腸跟多多薯條超值套餐，唔知係胃口壞了還是餓過龍，味道無豬柳腸咁惹味，可能係少了洋蔥同酸瓜（Toppings 真係唔可以慳ｏ架），硬係差咁ｏ的野；

脆皮腸：個人口味嫌佢唔夠脆唔夠香口，見阿毛係豎遷就一番，烘得「一般」就算數喇；

麵包：無要求烘，軟身兼熱一點阿毛會易入口無咁乾；再加埋杯熱檸超溶茶，不失為一個九秒狗下午茶丫。

店員好醒目，知道係Share食，切開分別入袋，食既時候方便又企理。

黃昏下的HotDogLink，堆滿了家長學生及下班一族；是日反串為一個「家長」帶著我ｏ既「小朋友」忙碌了半天。

多年前每逢赴考必到九央挑燈夜讀，已知上址，奈何一直未能光顧。是晚相約烏蠅作「交收」，順道買番隻熱狗打道回府與太上老君共賞。


一張A4 size餐單寫得密密，單單腸都有成廿款之多，toppings有六七款；另有小食：薯蓉、薯條、沙律、三明治、多士；還有各式飲品；實在舖頭細細，五臟俱全。


細問店員介紹詳細，就自己口味選了香蔥豬柳腸，加甜酸瓜，（有$25超值套餐，任何熱狗＋薯條／餅／toppings＋飲品），只想試熱狗，所以放棄了套餐。


由於回府需時，熱辣辣ｏ既熱狗被倒汗水弄得一塔糊塗，有礙觀瞻，請見諒。麵包應該係老嘉ｏ既，嫌烘得唔夠耐（下次請早揚聲），若即食的話，係有少少脆身；豬柳腸如店員所說係幾惹味（客人捧場之選），脆皮就無喇，可能太耐先吃啦！芥辣、茄汁加酸瓜永遠都係我至愛熱狗ｏ既原因。


其貌不揚，快餐店格局，只有bar檯，位子不多，勝在多選擇，味道好，店員服務佳，冀望再有機會試哂所有款式。


p.s.
1.唔愛吃包者可選on stick食淨腸，價錢平ｏ的主力攻擊。
2.亦都不其然見到果塊木刻，心裡有「莫名」。

嚷了一段日子ｏ既北角鳳城，終於有機帶同太上老君、少奶同少爺仔拜會一番。
話哂千里迢迢坐完潛水巴，嘔到大家誇啦啦，一埋檯嘆多幾杯茶先；安頓好就狂風掃落葉。


鳳城炸粉果、灌湯餃：目標所在，不到黃河心不死，就連太上老君贈我一句：「還你心願，等你死得眼閉！」唉，話雖如此，當大家（過過上湯）咬落脆脆炸粉果一剎那，跟大大粒蝦ｏ既時候，鴉雀無聲點點頭讚好，果真鬆脆。


上次在太子尋找「鐵片」不遂，今次來到，一定要見識見識；幾高難道放係碗仔（驚整穿餃裡面ｏ的湯浪費嗎），小心奕奕落埋紅醋一啖咬落去，味道／料雖無乜特別，湯頗甜，但能做到真正「灌湯」ｏ既餃，分數我係比唔少ｏ架！


四寶扎、牛柏葉、鳳爪、叉腸、蛋撻仔：一般酒樓ｏ既點心，相比之下，覺得四寶扎都幾好「油水」，可能係有一舊大肥雞啦，好油下；
牛柏葉，見太上老君好耐無食過來一個柯打，食落唔韌夠淋身入味；
鳳爪，雖只得寥寥幾隻加一舊吸味生根，但隻隻鳳爪都頗巨下，唔怕蝕，另最愛吸味生根，精華之所在；
叉燒腸，熱辣辣，皮薄餡多，甜豉油，選擇之一；
蛋撻仔，我就一個都無食過，少爺仔一手一個，將自己個口塞得滿滿，睇怕唔會差得去邊ｏ既！


見尚有「空檔」，即管叫個脆皮乳豬醫口痕；爽呀，脆到笑，就連嚷住要走ｏ既少爺仔都攪得掂，仲同我地爭食添！


服務都唔差喎，有禮貌、勤力；總好過一般酒樓「視而不見聽而不聞」作風丫。


茶正濃、人情味更濃．．．係時候嘆番兩杯，懷舊一下先！

（無緣試西米布甸，只能晚市預訂．．．）

蘭桂芳we嘩鬼叫完，跟友天使選擇了僻靜路，上了蘇豪，比預期ｏ既少「鬼」，最終落腳於「玉葉」。


叫了冰凍海帶綠豆，甜度適中，大大塊兼超多海帶，食落透心涼，最鍾意食大大粒薏米，煙煙韌韌咁，ｏ趙下趙下，的確過癮。


食罷始醒起自己仲咳緊，食寒涼野一定中招，話口未完，咳到番屋企．．．跟友天使歸家一段路仔都未能出一粒聲，這個萬聖節，我真的好「鬼」病。

「通頂」第二日仲要直踩番工，硬係覺得周身唔聚財；一放工最理想當然係回家大覺ｏ訓，但見有ｏ的空檔踱左一陣，鼠左上黎．．．


晚七點霸正對號位，面向「時代大螢幕」（隔聲又幾好喎！），哩幾個月飲慣齋啡ｏ既我，是晚選擇有點猶豫，見有點「頭重重喉嚨痛」，放棄啡類要甜野，揀了熱蘋果特飲（Caramel Apple cider），落Pub飲過下Apple cider，今次熱飲仲加焦糖，即管試下係點先～


環境：格調都好好，尤愛掛牆粉筆字menu；


賣相：幾討好，最欣賞器皿ｏ既設計，的確幾特別；


味道：慣性咁嗅一嗅，醒起唔係咖啡亦唔係花茶，加上近排個「虧鼻」，嗅乜鬼哩？倒不如大啖一唊；熱熱地，果真夠哂甜，仲有ｏ的酸添！飲左半杯，對於一個唔好「甜」ｏ既我黎講，已到顛峰！焦糖混apple cider哩個配搭幾好，只是個人口味唔多ｏ岩。


望下對面街、打書釘ｏ既人．．．menu有一段字仔，除左咖啡香，仲可以享受書香，但是晚我選擇了「閉目養神」，叉了電繼續上路享受營役～


P.S滿三十蚊可蓋印，儲十個有優惠。

緣聚紮了「豬手」ｏ既華dee，本來食得「清」ｏ既佢，是晚更甚；豈不是奀googoo餵佢食？！

諗到頭都爆，清清地又可以補補、兼方便「起筷」ｏ既，就黎左哩到食拉麵，兩間拉麵並排，介紹華dee食歡會門豬骨拉麵，貪佢夠淋（連軟骨都係），夠「膠質」，應該會ｏ岩佢口味，順道係隔離左右拎隻叉，所有疑難解決哂，唯獨煩自己食乜！

左度右度，過左隔離阿久根，直截了當問店員最哂家係乜，店員推介喜歡「肉」ｏ既可以揀「叉燒湯麵」；唔好肉，就食「飛魚蛋」．．我選了「叉燒」。

湯底：見佢標明「飛魚湯底」，唊了一啖，恕我唔多識「好野」，覺得咪還是一樣的「普通」，食完仲好鬼口渴添！


麵身：算係幾好（跟歡會門比，我喜歡「歡」多一點）；


叉燒：唔吝嗇都比左好多塊，肥瘦肉適中，唔太肥，ｏ岩哂胃口，但味道無乜特別；


配菜：對我黎講，最簡單ｏ既芽菜、鹵蛋、木耳、荀、海帶、蔥粒、粟米．．反而係「上菜」；

服務：果真麻麻，阿姐唔憂做，懶得向你推介（落咀頭），相反隔離妹妹仔夠醒目見友人紮了手不忘推銷豬骨拉麵。


華dee 非常滿意是次推介，不忘告知我一個小消息；是與非，願一切安好。

相信還有一段日子用餐係美景，試過其中一間大茶餐廳，水準麻麻，勝在有波睇、碟頭大，但口味真係唔多ｏ岩食，長此落去真係唔多掂。


有見及此，今日搵左檔車仔麵，滿廿蚊送豆漿，廿五蚊送汽水；每款“食送”四蚊，叫左四“食送”一粉剛剛好，有豆漿飲。


哩豎衛生環境唔係好，簡簡單單一間小店，賣下炸野、魚蛋、三寶、碗仔翅．．．街坊生意，心理上預左唔會好「掂」，一大碗車仔麵擺係眼前，又的確幾「意外」，ｏ的乜丸物丸大大粒（仲要係比成四粒，出面通常兩三粒），牛腩、豬腸、雞翼尖都唔吝嗇，驚死你唔夠“食送”咁，三條友將ｏ的“食送”撈亂食，果真唔錯。


豆漿唔知係自製定係「糖水現貨」喇，但的確濃「豆」味，亦無渣，甜度適中，算係幾好喎。

捱驢仔ｏ既第一日，食番餐豐ｏ的ｏ既，去左必勝客。
離遠望埋去，新格局差ｏ的認唔到，實在太耐無幫襯必勝客喇，唔知各分店係咪都煥然一新哩？！

要左個意亂情迷二人乙餐＋香烤嫩豬仔骨拼越南春卷，話雖二人餐，四人份量都夠食。


超級至尊芝脆批：芝脆批相信係新推介，「脆軟兩極新口感」我就唔多覺喇，唔係咁脆ｏ者，「軟」口感做得到，芝士溶溶地，都唔錯；


千層肉醬闊麵：一向覺得佢地ｏ的意粉飯只供「飽肚」之用，屬「麻麻」系列，同學們一致嫌薯蓉份量多過闊麵，我則無乜所謂，反正兩樣都喜歡食；


香烤嫩豬仔骨拼越南春卷：賣相精緻，味道就一般，春卷口感怪怪地，因為咬落去唔係脆卜卜，而係淋patpat，至於兩舊豬仔骨，算係「嫩口」，唔知用咩烤哩，咬落去有少少花生醬味。


值得一讚ｏ既係，每位服務員雖算係junior，但絕不「失禮」，兼保持笑容，大家不忙互相提點一番，發揮團隊精神喎。

上星期「酸辣湯」癮起，第一時間梗係諗起「上海佬」。

滿心歡喜跟同事決定叫什麼「外賣」，隨手打電話，心沉了一截，電話竟是「長響」！！！

唯獨是我心有不甘，打電話去問「明珠」（因想起係「左鄰右里」），鬧出連場笑話，同事們聽畢全程電話對話，笑足整個午飯時間．．．

若不是我這種「傻勁」，又點換來免得白行一趟o既「明珠嬸嬸」一句：「上海佬執左喇～」

以後酸辣湯癮起，你話點解決？！

（後記：經同事親身證實，上址已變成一間中華食店）

睇完「火龍」，牛友人要醫肚，醒起我之前提開ｏ既杏花樓炸鯪魚球，主動提議行去「明珠」果間。

硬係覺得招牌怪怪地，平時食開「杏花樓甜品」，心裡確實有點疑惑（依稀記得銅鑼灣係有分店，但就唔知正確位置，而牛友人話「明珠」有）。一坐低牛友人以menu 有炸鯪魚球確實其「身分」，我亦倦到懶理「真偽」，但求解喝兼「過冷河」，於是只叫了凍綠豆沙。

凍綠豆沙：不濟，莫講話臭草丫，無不特止（雖則未必每間都有），海帶綠豆真係無料到，完完全全唔知自己食緊綠豆沙，唉！


鎮江骨菜飯：牛友人本來一心試抵食套餐，誰不知六日公眾假期係無，唯有散叫。睇賣相係幾得，但牛友人評價係「又酸又咸」，我就不敢妄語。


整體上係bad list左，由一坐低已經唔鍾意：衛生環境差、服務麻麻、以為張梳化好坐，但就有點兒污漕，唉！牛友人「為我著想」地以為我想食炸鯪魚球，否則過檔「別府」；心想：「拉麵？！口味價錢ｏ岩先過檔啦～」


後記：回來寫食評，始知這間屬無「樓」系列，有「樓」係渣甸坊有分店，唔好攪錯喇！若自己一條友肯定幫襯「大坑尚．連奴」煲丁麵（可惜已收舖），「獨行俠」自在／即興得多。