帝樂 - 德國餐廳 (赤柱)

入到赤柱, 大概4:30, 因為無book 檯既關係, 我地又無食lunch, 所以去King Ludwig Beerhall 食個早飯. 聽到有個家庭想book 夜晚食飯, 侍應己經話今晚full 晒無得book. 證明我地既決定無錯. 4點幾5點

有好多位, 可以選坐出面定入面.太陽已經唔猛烈, 又有d 風, 決定坐出面欣賞海景.農夫包一個$25, 一個醬(牛仔肝醬or 芝士醬)$15. 但佢有個set $40 有農夫包連2個醬.
農夫包上檯既時候係微暖, 算鬆軟唔un. 不過再熱d 會好d. 點牛仔肝醬或芝士醬都好味. 不過牛仔肝醬會香d.德國麵包圈 $38, 佢menu 寫一個, 不過佢黎係一份2個.
德國麵包圈黎既時候係室溫, 好軟熟. 個人覺得農夫包好食d.豬手($215)等左好耐, 差唔多9個字, 吹佢佢話再要等多3分鐘. 上檯既時係熱辣辣, 侍應仲問我地切之前使唔使影張相. 咁當然好啦.切好啦, d 皮好脆, 入口鬆化, d 肉有少少得意, 一絲絲, 不過係嫩滑既. 而佢係豬手唔係好咸, 皮脆肉嫩, 墊底既酸菜只係微酸, 開胃得黎又易入口. 伴菜既薯仔香口好味. 不過已經好飽, 所以都食唔晒.

上菜好慢, 本來佢俾2個鐘時間我地, 我地念住唔使咁多時間. 個個時間, 客唔多, 點知等包又等左15分鐘(但係d 包唔係熱). 隻豬手又等左成45分鐘. 食完真係剛好交檯.

Oliver's Super Sandwiches (屯門)

去親SUPER SANDWICH 食早餐, 9成都係食自選,
以前佢會SHOW 晒自選有咩CHOICES, 不過依家水牌就無左自選呢個項目, 不過就仲有得叫.
我念唔食開就唔會叫得到. 因為自選真係最抵.
$32 有2個CHOICE,
$36 有3個CHOICE
每款大部分都係打孖上, 好似腸仔有2條, 火腿有2塊. 如果睇佢水牌上面個d 款, 就得一條or 一執.佢有好多款腸仔, 好似早餐腸(白色, 重胡椒味), 煙豬肉腸(深紅色,偏咸), 我最喜歡都係法蘭克福腸, 粗身, 無咁咸.
蜜味火腿, 煎得乾身, 有少少甜味, 幾好味.
炒蛋今日炒得幾嫩滑, 加埋少少鹽同黑胡椒, 正!佢既熱檸水係要自己搾汁, 不過都有成1/4 個檸檬.

銀龍粉麵茶餐廳 (尖沙咀)

有一排無黎過銀龍食早餐, 係尖沙咀食早餐, 佢既價錢都算合理.
$24 一個單拼湯粉麵跟野飲, $27就雙拼. 加$5 有牛油厚多士. $6 有腸仔蛋一碟.
我地叫左2個沙嗲牛米, 加牛油厚多士 同腸仔蛋 share.沙嗲牛米味道正常,茶餐廳口味. 份量算多, 夠味又夠多牛肉.牛油厚多士, 係全塊(2件), 如果唔係share, 食個麵再加一份厚多, 都幾飽.
牛油係佢地搽左, 都搽得幾平均, 夠牛油味.而且熱辣辣食, 好味腸仔蛋就好油, 好似油浸咁, 好彩桌上有提供紙巾, 真係要索左d 油先好食......柚子蜜好夠味, 我仲覺得甜左d, 溝多d 水先飲
加呢樣加個樣都係$29.5 一個人, 算好多野食, 飽飽咁離開.

肯德基家鄉雞 (KFC) (尖沙咀)

尖沙咀既kfc唔多人, 晚飯時間黎更悠閒. 大概只有3-4成滿.
帶左優惠卷黎, 叫左最抵個個餐有蜜蜜燒雞翼x2, 家鄉雞x2, 巴辣香雞翼x4, 蘑菇飯(大), 白汁雞皇飯(大) & 粟米 x2.
最愛蜜蜜燒雞翼, 蜜汁味夠, 皮脆肉嫩, 好味又夠大隻.
家鄉雞就比較熱氣, 都係搣左層皮先食.
巴辣香雞翼就同家鄉雞差唔多啦, 係位置唔同.
食左好多年kfc, 覺得佢最唔掂係d 飯, 雖然係熱, 但係又硬又一堆堆, 佢個膠盒一直焗住個飯, 更加唔好食. D 汁都係麻麻, 其實都只係咸味同胡椒味, 好plan.

呢個餐真係抵, $69 咁多野食, 叫個一人餐都成$3X-$40, 得一個飯, 加件雞.
 

帝苑餅店 (尖沙咀)

有人請食帝苑既CAKE, 心情非常之好.2個人, 總共食左4件甜品, 好滿足, 而且無想像中咁漏.
佢第一次試fine foods 既cake, 而我只係食過一次都係人地請既拿破崙.
穩陣起建, 一定選返好好食既拿破崙.同第一次食到既拿破崙一樣, 皮十分之脆, 而且酥香味美, 佢既吉士醬唔算好甜, 不過如果少D D 仲好, 士多啤梨都算甜, 好味!第二件選人氣極高既青蘋果芝士蛋糕. 外表精緻, 非常吸睛. 外面係白朱古力, 而入面就係甜甜酸酸既cream cheese, 而cheese 既下面有蘋果肉, 酸酸地, 無咁漏, cheese 上面既脆粒就有d 牛油香, 唔錯. 不過佢表層既白朱古力就太甜, 可能我地對白朱古力麻麻啦, 最後食晒d 涵, 剩返個殼.第三件係白桃柸. 上面2片白桃好香好甜. Jelly蓉既質感好實在, 雖然係蓉, 但係唔鬆散. 中間有層應該係奶凍, 因為唔鍾意食奶, 所以skip 左. 最下面個層就係完整既jelly.最後係芒果mousse cake: 外面有macaroon包圍, 食唔出係咩味, 不過唔係好甜, 比起平時食到既macaroon 易入口. Mousse 好香芒果味, 都係唔太甜, 而且夠軟滑, 中間既底層係朱古力味又有少少脆脆既蛋糕. 應該係dark chocolate, 因為有少少苦味. 不過係易入口既.
食完4件, 各有特色, 不過最愛都係拿破崙, 而青蘋果如果係自己俾錢應該就唔會買, 因為太多地方唔食, 好浪費…..