悠閑閣餐廳 (屯門)

呢晚要去屯門, 睇過呢間餐廳幾高分, 又便宜. 所以就選左呢間.
去到個屋園商場, 行左個圈, 終於搵到佢.
其實成個 商場都幾靜, 人唔多. 剛入到去得2檯客, 坐坐下都多返D 人(~5-6檯).
我地太心急, 一去到睇到佢個晚餐餐牌就叫左, 其實佢個main manual 都有好多野食, 都係有跟餐湯同餐茶.佢d 餐幾平, 大部份由$40 至到据扒~$80. 仲有小食都好抵食. e.g 蒜茸包 $10, cake $13, 湯$10.
我地叫左XO醬海鮮扁意粉 同埋香蒜火腿雞絲意. 跟餐湯(連蒜茸包 )同餐茶(可選$13 特飲).餐湯可選南瓜湯或磨菇湯. 磨菇湯都足料, 飲到好多粒粒, 除左磨菇粒好似仲有薯仔粒? 好味. 蒜茸包味ok, 不過凍左, 有D 硬. 如果係熱上應該好好多.XO醬海鮮扁意粉, 夠香同野味, 海鮮雖然唔大粒但應該唔係用雪貨, 因為都有鮮味.香蒜火腿雞絲意, 好味, 如果蒜味再多d 更好, 火腿雞絲都算多.最開心係佢個甜品, 睇餐牌見到$13 一件已經覺得好抵. 出去選cake個陣見到, 如果叫左餐只須加$10 就得. 最後點左雲石芝士蛋糕 同藍莓芝士蛋糕. 佢d 芝士蛋糕好特別, 一般cheese cake 既餅底係用餅乾碎整成, 佢係用海綿蛋糕做底, 雖然好唔正宗, 但我好鍾意呢個. 因為感覺無咁油. 佢個雲石cheese cake 有d朱古力味, 有d 似黑森林蛋糕, blueberry cheese cake 就似多d cheese cake 味.
最後食左咁多野, 埋單都係$ 102, 唔使加1, 真係好抵食!

Deli-O (上環)

上環既Deli-O 原來係尖咀Deli and wine 個frd.

喜歡尖咀既Deli and wine. 所以去上環見到佢個姊妹店即刻想試下.

選了龍蝦汁海鮮意粉加左個是日湯( 龍蝦湯), 同埋一個常餐.龍蝦湯味道唔錯, 有鮮味, 係稀左少少.海鮮意粉都幾足料, 有魚肉, 大蝦, 帶子同青口. 個汁味道幾好, 不過多左少少. 同埋d 魚肉有粉醬炸過, 浸住d 汁之後就鬆泡泡, 感覺有點怪. 不過整體黎講算ok 好食.常餐有炒滑蛋,火腿同多士加一個叉燒湯意. 炒滑蛋夠滑好味, 火腿同多士正常.叉燒湯意個湯夠濃.最後唔夠喉, 加多左個雞肉牛油果沙律潛艇配薯條. 個潛艇好脆好好味, 雞肉份量ok, 加埋牛油果同沙律醬, 唔會太膩. 薯條係粗身, 而且炸得幾好, 唔算油, 唔錯.

食物好食, 不過衛生可以再好D, 隔離檯地下有小強走過, 待應知道後面不改容立刻踏死佢......

金蒂餐廳 (灣仔)

因為去書展, 一早Check去灣仔食咩好. 睇中左呢間金蒂餐廳食海南雞. 睇左食評, 做左功課, 知道好多人去食, 一定要book 位. 因為除左要留位仲要留埋雞脾.

準時去到, 同佢講book 左. 待應就帶我地去reserved 左既檯(真係寫住我地book既info, 好有心既留檯!). settle之後就問我地係唔係真係如留位咁講要一個海南雞脾飯.

佢地既海南雞係唔同部位唔同價錢既, 最貴係雞脾, 之後係胸, 最平係雞翼. 本來想要多一個海南雞脾飯, 不過佢同我地講如果要多一個就無, 雞脾賣晒 (再一次覺得佢地既留位or 留脾係真係有做野).
唔緊要, 我地最後要多個豬頸肉飯(個飯可選白飯or 蒜香飯).個海南雞脾飯好好味, d 雞好滑, 一碟有5舊無骨既雞脾(都算大舊). 油飯好有味, 連埋佢酸酸地個個汁食, 好正, 好鍾意佢個汁.個豬頸肉飯都幾好味, 蒜香飯好香, 頸肉飯都好野味.
Overall 感覺好好, 野食都好味, 待應都幾nice.
 

肚餓了串燒烤焗專門店 (尖沙咀)

見到個名咁有趣既肚餓了打入左tst 既3甲, 即刻去試下.

上到去, 鋪位好細, 坐位幾窄. 待應同我地講d 檯大部份都俾人book 晒, 得返d 排排坐望窗口 or 面壁位.
好彩我地早上去, 當然選望窗, 不過如果坐滿人, 都唔敢想像佢個轉角位點坐?

冬蔭公焗海鮮珍珠飯. 冬蔭公味道唔係想像個種味, 不過都係酸酸辣辣, 好醒胃. 海鮮係d 細細粒既雪藏貨式, 有蝦, 魚肉, 青口仔, 墨魚, 蜆肉. 好彩個汁好味, 挽回不少分數.餃子雞翼好細隻, 我以為叫左燒雞翼尖. 同埋醬汁太多, 我食唔到入面係咩涵!厚切牛舌好好味, 好軟熟, 個味都好好. 不過 $4x 就真係太貴. 我去蜀一燒都係$18 一串, 雖然無佢咁淋, 但係抵太多.蒜蓉海鮮d 蒜蓉味好正, 海鮮都有鮮味, 不過都係細隻左d 同埋貴.其實呢餐食左成$400 但係唔飽.....味就一dd 好食, 但就真係幾貴.

夢甜品 (尖沙咀)

上次食完, 見咁抵食, 即刻再買多2張團購($35 買$70現金卷)

入到鋪頭, 依然有好大陣火鍋味

今次試下d 未食過既.
椰皇河粉小丸子. 味道唔錯, 感覺清新, 椰青味濃. 不過河粉同小丸子既份量唔多. 除左河粉同小丸子, 入面仲有好多jelly 狀既半透明物, 係好味既, 我地估係椰青水整成既jelly.再黎芒果腸粉. d 芒果好甜, 其實成碟甜品係ok好味既. 不過諗諗下, 佢個個白色腸粉其實無咩味, 我地只係好似食緊一個好甜既芒果. 咁樣念, 俾$32 食個芒果, 好貴. hahaha.....原價$77, 用左團購卷補多$7
Total only $42.