別號「Mad Pink」嘅舞伴發現銅鑼灣Midtown大廈天台有打卡新熱點「Arcadia」，得悉網上訂座可享八五折優惠，即相約爛蒲小組探索一番！酒吧餐廳合共兩層。有瓦遮頭嘅三十樓接待處旁有隻巨型啤啤好嘆咁hea咗喺個浴缸度。門口兩旁為酒吧區域。用餐大堂樓底高高，面積十分寬廣，上下內外嘅主題都一樣咁花花世界。厚墊絨櫈相當舒適。人少少的話，最正係坐到窗邊個輕氣球位，入夜後著埋燈更覺情調尤甚。人多就梗係入房玩最盡興啦，最低消費$5,000一啲都唔難過！通往粉紅天台可行上裝飾別緻嘅樓梯。不接受網上預訂嘅天台室外散座都配有大大把沙灘遮，只係炎炎夏日，未必人人頂得順三十幾度嘅高溫。大家要留意，不同時段嘅用餐限時及最低消費都有所不同。蕃薯uncle嫌熱唔肯上上落落，小肥就快速幫Mad Pink女神喺個粉紅鞦韆位影咗幾幅靚相後即閃返落樓下。厚本酒牌列出多款世界各地出產嘅氈酒，明顯係主打。酒鬼們早就打聽到新店下午三點至六點玩緊瘋狂時光優惠，指定酒酒$28/杯，款色每天不同；當日碰巧有名牌Hoegaarden生啤飲喎，堅抵玩！只可惜XO仔早極都要五點先收得工，開行turbo六點前都只能飲到四杯。好似唱K咁，除咗另收加一之外，每位客人係要收$30果仁錢嘅，即使小弟有果仁敏感都一樣要收！脆炸薯條配黑松露醬（$58）：因為唔食得果仁，瘋狂時光先點咗客香脆嘅黑松露醬薯條送酒酒。懶得轉場嘅三口子結果從兩頁餐牌點埋晚餐，因為經網上訂座可享八五折優惠。松子羽衣金藍配香梨汁（$98）：菜后大讚羽衣金藍幼嫩，拌入輕盈嘅香梨汁及白色嘅酸梨片份外清新開胃。生牛肉他他伴黑松露配10年陳醋（$168）：惹味嘅牛肉他他不單量足，撈入生鵪鶉蛋黃成功添上香滑，以彩美嘅食用花點綴仲襯埋餐廳四周個花花裝潢。芝士焗大燒烤菇伴新鮮海膽（$128）：成餐飯最唔掂係個菇菇，一啲鮮味都冇，完全食唔出入面有海膽囉，絕對唔值$128！香烤加拿大 “保濕技術” 豬鞍配伯爵茶汁（$368）：意外地，豬鞍厚肉得黎勁爽脆，而且肉汁豐沛，「保濕技術」果然有料到！銅鑼灣頂樓酒吧餐廳「Arcadia」開揚闊落，幽閒有特色，服務生友善且樂於助長者，西餐菜式精美味佳。有心食肆勁多優惠，相信瘋狂時光應該算係區內最抵玩，爛蒲一族一定要支持啦！

蕃薯uncle約咗幾隻麻雀腳去銅鑼灣「睿私房菜」飲茶，叫細佬幫忙訂位，嘻嘻，好人獲得嘅酬勞係免費午餐！位於二十八樓嘅中菜廳佔用面積全層，一邊對住跑馬地馬場，絕對有景睇。光鮮企理嘅用餐大堂並無花巧之裝潢，餐桌與餐桌之間有足夠嘅活動空間。每位席上都有齊備嘅自用及公用餐具，十分衛生。午市點心款式唔算特別多。大路嘅蝦餃同燒賣每籠正常有四隻，經理哥哥好好人，特別安排夠五隻俾五口子一人一隻，極俱變通能力，長輩都非常感激。冰鎮咕嚕肉（$188）：由於細佬最後一個到，所以唔知咕嚕肉嘅份量有幾多。咕嚕肉皮層冰脆，肉質尚算鬆爽。鮮蝦蝦餃（$85/五隻）：蝦餃層餃皮厚得黎好黏，雖然個餡都好鮮嫩，敗筆在於食落黐住哂啲牙仔。特色燒賣皇（$75/五隻）：燒賣就偏實咗少少，唔係好夠油潤，莫非特色在冇落肥豬肉？！香脆咸水角（$58/三隻）：咸水角外脆內煙韌，味道都唔差。香煎手工蘿蔔糕（$68）：蘿蔔糕個賣相有啲爛溶溶，辣味多過蘿蔔味，不過起碼食落唔硬唔實嘅。XO醬炒腸粉（$118）：腸粉軟潤滑溜，auntie們只係略嫌XO醬份量唔夠多，未為最惹味。生炒臘味糯米飯（$168）：上枱先發現糯米飯用咗花生炒製，小肥因敏感問題就冇試到。樓上中菜「睿私房菜」服務優良，無奈點心質素平庸，只有價錢最高級，中午時份拍哂烏蠅實不無道理。

疫後遊東京，同對上一次一樣繼續選乘「全日空航空公司」。「全日空」於香港國際機場並無設置貴賓室，暫時商務艙嘅搭客可享用「環亞優逸庭貴賓室」（Plaza Premium First Hong Kong）。由於辧理手續時航空公司職員冇提過，登機證又冇注明，小肥都係去錯咗先知鄰近一號登機閘原來有兩個「環亞機場貴賓室」（Plaza Premium Lounge Hong Kong）！其中門外打蛇餅嗰個係普通版，除咗可以俾錢入（$640/成人；$448/小童；2歲以下免費），出示指定信用卡更可免費入場。或許因人手短缺問題，暫時只限指定航空公司高級會員、商務艙及頭等艙乘客享用嘅「環亞優逸庭貴賓室」係半隱蔽於走廊，冇咁遠嗰間。周圍探索，發現貴賓室原來喺2018年先開，應該好新吓喎。樓底偏矮嘅「優逸庭」唔算特別大或者豪華。指示牌所示，除咗有浴室、酒吧同餐室，其實仲有暫停中嘅按摩服務。室內最光猛搶眼就係個酒吧。晨早七點幾已經有紅、白、啤酒飲。可惜日本啤酒機同按摩服務一樣玩緊暫停。媽咪真係心水清，一眼就留意到陳列出嘅酒品中冇一款係背景提到嘅單一麥芽蘇格蘭威士忌。XO仔都係第一次見到可樂同雪碧用透明容器裝住，唔睇牌仔仲以為係椰水同凍啡添。最入嘅自助飲品區有凍水、熱水、茶、奶、橙汁同咖啡機。自選食物質量及選擇比較一般，有大路嘅沙律、香腸、烚蛋、薯餅、粥等。當中只有熱辣嘅魚蛋米啱口味。由於湯中嘅椰油味太突出，所以估佢係星馬泰代表，冇諗到標籤竟然係「港式魚蛋河粉」！細佬真係未食過有椰香嘅港式魚蛋河，而且睇相都認得出湯入面嗰啲係米粉喎，莫非係廚師hea煮，定係標籤hea呢？！香港國際機場內嘅「環亞優逸庭貴賓室」離出境檢查大堂非常近，位置堅方便。可能係因後新冠影響下，貴賓室以接待處最為專業，室內環境及餐飲質素冇乜獨特標青，酒酒毫不吸引，感覺各方面都好hea，完全唔似商務或頭等囉！

閉咗關咁耐，週末唔洗返工就決定要玩盡少少，起身同契妹食完個下午茶就去咗時代搵蕃薯uncle尋歡，點知佢揀嘅地方正正就係小肥晚餐飯局嘅西餐廳「Club Albergue 1601」。Uncle原來係被門口推廣緊每日下午三至六嘅歡樂七折迷倒。優惠依家野細佬絕對支持架，何況同一個地點走兩場可以慳埋腳骨力，掂呀！「1601」面積寬廣到可以分開不同區域。正門身後好似一個客廳咁。當中最受歡迎就係室外座，不過掛住飲所以唔記得咗影相。最中央有個光亮嘅橢圓形酒吧，頭頂有個電視機俾球迷觀賞賽事。內側嘅用餐大堂一樣咁寬闊。先由黃昏前嘅頭場講起，厚厚嘅飲品餐牌共有十七頁之多，其中只有限定款式可享七折歡樂優惠。平心而論，$62/杯三得利黑啤唔算特別平，仲要唔係大杯裝攞！飲得烈酒嘅蕃薯uncle更驚嘆威士忌竟比紅、白、汽酒抵飲。送酒小食共有六款可選。新鮮熱辣嘅「炸薯條」（$118）金黃乾巧，外脆內軟且唔係好油膩。到咗晚餐時份，點菜任務全交由冇乜酒意嘅契妹包辦。香煎法國鵝肝伴八珍甜醋汁（$168）：大大碟頭盤上枱後，四口子第一個反應就係搵鵝肝，好在都唔係收得好密。配角麵包夠香口同鬆，鵝肝則皮脆肝嫩滑；好就好食，只係份量少咗啲。香草包糠炸牛舌（$168）：以薯蓉墊底嘅炸牛舌層炸皮硬咗少少，牛舌亦偏嚡同咸，不吃也吧。烤西班牙乳豬（$398）：整晚之最必選超級脆皮、肉香軟熟、肉汁豐沛嘅招牌乳豬，必吃推介也！烤大啡菇（$98）：兩件大啡菇軟腍易入口。北海道元貝蟹肉意大利燴飯（HK$288）：海鮮燴飯濕潤有嚼口，四件厚厚嘅帶子厚嫩鮮美，個人只係略嫌調味過酸同微微苦澀。64%黑朱古力心太軟配雪糕（HK$128）：如相所示，心太軟真係流心嘅，不過64%黑朱古力黎講算幾甜。榛子朱古力梳乎厘（$148）：契妹大讚榛子朱古力梳乎厘清香鬆軟，特別在伴配朱古力碎供食客自行加上，不錯之選。「Club Albergue 1601」屬走高級路線嘅商場餐廳，環境闊落時尚，服務生雖未有黑面，但同參差嘅食物一樣仍有頗大嘅進步空間。

兔年拜年時講開食經，提到疫情告終，多間人氣店已出現訂座困難嘅狀況，連限制多多嘅馬會餐廳「鐵板燒一勝」電話一接通時連候補名單都滿埋，誇張到呢！真係冇諗到嬸婆對跟晚輩嘅對話咁上心，幾日後即誠邀肥肥家族於會所晚膳，感恩之情實難形容。「一勝」位於跑馬地新會所六樓，門面嘅木造屏風設計滲透出傳統和風味，經過電動門彷如穿越時空般，進入裝潢暗黑前衛嘅大廳空間。馬會限定每個會員最多訂六個位，但堂內共有十四個寬闊嘅吧位，均面對著以射燈照亮嘅三個鐵板舞台；一塊鐵板一個師傅，四六四嘅排陣中只有最中央嗰塊鐵板可容納上六位客人。值得一提嘅係開放式鐵板爐前及橫樑上同時安裝有強勁嘅抽氣系統，飯後都唔覺身上有太大陣油煙味，衛生尤甚。吧枱每位席上都有塊金亮嘅餐墊，彷彿正對比著師傅嘅銀色鐵板。墊上除咗有自用嘅餐具及餐巾之外，頂面以金線綁住嘅絹紙印出預訂之十道菜海陸盛宴「ISSHŌ 9」（$1,988/位），氣派確真非凡。深知主人家最愛十四代清酒，大肥早就預備定枝佳釀襯托日式美饌。會所餐廳對品酒極為講究，開店時特別訂製咗一批斜口型清酒杯，設計獨特在一邊係用黎聞酒，另一邊用黎飲酒嘅，不過已經絕咗版，想加訂都唔再生產。有得用絕版靚杯飲靚酒，咁開瓶費設為$200/樽標準裝紅、白、汽、清酒，及$500/樽1.8L清酒又唔過份喎。師傅同樓面年紀輕輕嘅服務生非常團結有默契，而且專業周到。客人一到齊先道出餐廳理念為「一起勝利」，因日文「ISSHŌ」可譯成「一起」或「勝利」兩個同音字，故鐵板料理全為節令之選。料理人之一嘅黃師傅強調食材清一色源自日本，包括海產、和牛、蔬菜及生果，烹煮前當然係要哂一哂冷並作出簡介啦！高級餐廳將飯前洗手嘅步驟新潮及互動化，以小茶壺承載適量嘅櫻花味消毒藥水，再交由食客斟上乾紙巾上；只係遇上耳力麻麻嘅年長食客冇聽清楚指示，差啲將消毒藥水加咗落杯茶，幸好細心嘅Txxxx哥哥發現得早先冇人中毒。會所餐廳除咗侍酒師之外，駐場仲有一位自稱唔係王子嘅「茶理師」Nxxx哥哥，嘻嘻，顧名思義其專門為「泡茶」！「工欲善其事，必先利其器」，單憑茶理師介紹選用嘅特別岩礦茶器足以說服賓客嗰晚沖出黎嘅茶會特別滑。未有食物落肚前，先有新鮮泡出嘅靜岡「福茶」。對少呷茶嘅XO仔黎講，此杯綠茶嘅茶味較為清淡，滑唔滑真係唔識分，不過有得揀絕對係飲十四代清酒。饗宴頭炮派出斤兩十足嘅青森縣嘅栗蟹作冰鎮頭盤，以魚子醬及金箔點綴閃出矜貴，顏值絕對滿分！紅紋白肉嘅蟹蟹幼嫩鮮美，不用多點醬油已嚐到天然嘅海水味，簡單掃上紫蘇花碎即成功添上芳香。第一道鐵板菜式甘目鯛源自靜岡縣伊豆半島，師傅話因屬刺身級嘅新鮮貨，一般只會燒到七八成熟，除非客人要求煮熟啲先會調整，並重申剩下嘅魚頭同骨只混入咗北海道嘅鮮百合𤉶成奶白色嘅秘汁，不含任何忌廉或奶嘅成份。配角新潟縣節令嘅白舞茸菇清脆輕盈，甘目鯛嘅賣相則不甚起眼，但食落去魚皮超脆，魚肉軟滑，最意外就係新鮮百合竟可造出如此濃潤嘅汁汁，確真妙絕！睇住黃師傅即場為伊勢龍蝦去殼，少少牛油都冇加過！上枱前一刻先淋上龍蝦汁。由透明煮至雪白嘅龍蝦肉爽脆多汁，生熟程度恰到好處。海陸交接間，中場有健美嘅六色時蔬，建議由左邊起食，順序即高知縣青椒、福岡春筍、京都大黑菇、佐賀新玉洋蔥、鹿兒島金時蕃薯、北海道白露筍。配備自家調製嘅麵豉蛋黃醬甜甜潤潤。接棒仲有涼浸浸嘅梅酒啫喱伴紫蘇雪葩，帶有陣陣薄荷香嘅紫蘇味雪葩淡身得黎好清新，新穎嘅組合芬芳可口，正好為味蕾洗滌一番。整頓晚餐唯一嘅紅肉就係雲石紋理分明嘅宮崎和牛。和牛紅潤鬆厚。最簡單嘅食法可以黏上磨得極之幼細嘅喜馬拉雅粉紅岩鹽。鍾意惹味啲嘅可以加配微辣而唔攻鼻嘅生磨水種山葵，或者係炸到好似薯片咁脆嘅青森蒜片、用和牛油脂焗過嘅青森蒜粒，最重口味可選伴師傅用海鹽自家醃製咗兩個月，咸咸辣辣呈黑色嘅青胡椒串。單尾炒飯嘅飯底原來係用鹿兒島溫泉水所煲出，叔公真係幽默，話希望啲溫泉水未俾人浸過啦，呵呵呵！金黃乾巧嘅炒飯毫不油膩，撈入脆卜卜嘅櫻花蝦直令炒飯更有口感同層次。伴配爽脆嘅漬物。龍蝦麵豉湯只屬和暖，似乎較為失色。甜品環節以拼盤一次過上，前方為賓客自選嘅三款節令生果，當中紫紅色肉嘅愛嬡縣血橙勁酸，怕酸嘅人真係試唔過！橙色嘅富有杮十分爽甜，同和牛一樣黎自宮崎嘅芒果就好清香。右上角嘅兩件抹茶及士多啤梨味蕨餅微甜煙韌，可口不溜滯。左上角嘅小杯中為師傅自家製嘅十勝紅豆抹茶奶凍，清涼甜潤夠輕巧。為晚宴結尾有杯日本靜岡頂級綠茶「玉露」，跟正宗日本茶道禮儀一樣連同一羮泡過嘅茶葉上枱。據悉，此茶營養價值高，有降血糖及血脂之效。可愛嘅葉形小碟上隻岩鐵茶杯非常重身墜手，正當老人家形容綠茶有回甘時，細佬只覺茶茶苦澀得黎有陣微咸嘅草青味，明顯不懂品茶。個人反而更欣賞細嚼幼嫩甘香嘅玉露茶葉。馬會會所名餐廳「鐵板燒一勝」環境高雅簡潔，闊落舒適，服務生體貼入微，海陸鐵板晚餐選用之全日本食材高質鮮美，師傅零牛油之烹飪令貴客感覺食得健康，襯托埋茶理師精湛嘅茶藝演繹確真勝得有理！

契妹出門前相約小肥結伴一戰中環名酒店咖啡廳「Garden Lounge」嘅人氣下午茶，真係冇諗到未放寬得哂都要等成個幾月先有位。紅棉路上嘅美利酒店看似隔涉，但如果有喺該區行過公園同天橋，其實都唔難搵到。咖啡室週末嘅下午茶分兩輪，頭輪由下午兩點九食到四點三，可能因用餐時間限定為九十分鐘，而且當真全店滿座，貴客大多都選擇早到排隊等埋位。訂座時已預先點選以酒店起名嘅「美利下午茶」（$728/兩位包括咖啡或JING茶），並提及自己對果仁敏感。入座後只需揀餐茶或咖啡。哥哥仔呈上下午茶時，講明師傅已經換走哂含果仁嘅小點，幸好契妹對眼堅利，一睇即發現架上有不少果仁嘅蹤影。。。得悉犯下錯誤，哥哥仔及其上司即連聲致歉，並急忙作出更換，態度誠懇認真。三層架上最頂嘅四件甜點唔算特別精美，客氣啲講句優點係一口一件唔溜滯。中間四件咸點同三文治就略為偏乾同硬，完全冇高級酒店嘅氣質。另上嘅野蘑菇法式蛋批外脆內軟，敗筆在於淡而無味。英式提子鬆餅同橙子鬆餅色澤金黃，雖然唔係話好正，起碼食落唔會太實。如果唔夠食，旁邊張枱仔仲有啲任食嘅餅乾、朱古力、蛋糕仔等小食，只係細佬見到有不少果仁款式，為安全起見就冇試到。酒店咖啡廳「Garden Lounge」環境雅致開揚，服務優良，唯獨下午茶套餐論賣相同質素都欠缺特色及話題性，價格一啲都唔平，如果唔係有網購優惠，相信冇乜可能做到咁旺場囉！

舞伴得知小肥四月將外遊，早就約定出門前一試銅鑼灣新店「Sushi N」，為細佬預祝生日，堅有心。樓上壽司店嘅門面潮中帶禪，石池上嘅兩個小僧侶公仔祥和得尤其可愛。通往餐廳有三步石春小徑。以木為主嘅裝潢及間隔通爽企理，和風味濃。週四晚全店滿座，由於女伴訂位時未有要求坐壽司吧，即使早到都臨時難以安排，不過佢都仲好客氣地堅持要請食廚師發辦套餐「N」（$1,580/位）。前菜三品正式為晚餐打向頭炮，其彩石擺盤精美尤甚，同餐廳門面設計極為相襯。應建議由右下方起逆時針方向食，小鉢中嘅忌廉芝士以晶瑩閃光嘅三文魚籽點綴，軟濃嘅配搭十分新穎。充滿立體感嘅灣月形碟中兩件布甸蛋蛋香軟有彈性，甜美可口。帶子沙律嘅帶子粒粒爽厚潤甜，橙味醋汁清新惹味。接著嘅節令刺身七品分開三段上，頭輪長碟先拼出三款。最右方兩件真羽太刺身要捲入頂面嘅土佐醋啫喱及蔥花一齊食，組合微酸帶甜，輕巧醒胃。型格碟盤中嘅光環主角位為師傅以甜蝦打出嘅甜蝦他他，精髓在於他他仍保持甜蝦半爽潤嘅狀態，簡單塗上脆薄嘅鱈魚乾上好似多士咁食落口，效果集酥化鮮嫩於一身，超！唧上青檸汁嘅西班牙生蠔肥厚滑溜。中途間場有四式爽脆嘅漬物。另上嘅山葵為新鮮生磨貨色，絕冇馬虎。第二輪刺身拼盤同樣有三款，建議由左食到右。小杯中呈粉紅色嘅為劍魚刺身，黏上墊底半凝固嘅蛋黃漬後再用紫蘇葉包住，DIY卷物外層清脆芬芳，魚肉則頓變柔滑，實滋味無窮！中間兩件金目鯛橙亮奪目，油香豐沛。閃出銀光嘅深海池魚滲透著松露香。透明玻璃碟上兩片鰤魚肥美潤澤，以薑蔥調味即倍添惹味。熟食燒魚金目鯛一夜干肉質幼嫩鮮甜。冇吧位坐，壽司七貫唯有一碟過上。妹妹提點鮮濃軟嫩嘅海膽壽司有塊紫菜包住最易腍，一定要盡快食。半溶於舌上嘅拖羅粉嫩鮮美。白雪雪嘅銀雪魚嫩滑潤澤，鮮甜香濃！火炙梳子魚則爽厚帶脆。赤貝爽脆鮮甜。松葉蟹肉蟹膏手卷嘅蟹肉極為幼嫩，不用加點醬油本身嘅海水味已夠鮮濃。食完多款魚生後一碗清甜嘅北寄貝清湯特別暖胃，內含爽厚脆潤嘅北寄貝都一樣係真材實料！結尾嘅甜品二重奏有爽甜嘅蜜瓜及清甜嘅自家製菠蘿雪糕。樓上壽司屋「Sushi N」環境高雅簡潔，服務生友善周到，晚市廚師發辦嘅刺身及前菜賣相同配搭彷彿正表達店名中之「N」字可解作為融入西方飲食文化嘅「Nuevo」風格。請容許小弟在此再次感謝舞友盛設款待，三月尾已經開始慶生活動，當真歡樂無限！

因手持快將過期嘅住宿優惠券，上星期再次去「香港萬麗海景酒店」玩多次Staycation，做咗萬豪旅享家後連間房房都升埋級，入住超級豪華嘅海港景套房！傍晚時份於貴賓室享用歡樂雞尾酒時跟接待生閒聊，得知「萬麗咖啡室」晚市啱啱換咗個以和牛及龍蝦作主角嘅強勢海陸自助餐，成人原價$833.8/位（已包加一）；另加$100或$168可以玩埋任飲限定汽水、果汁同酒酒，重點推介週一首晚嘅菜式會最齊全之外，仲提點網上訂座可享最抵嘅七五折優惠（七五折後$644.3/位），三小時任食和牛喎，明明減緊肥都決定要孖哥哥一試！酒店咖啡廳用餐大堂寬廣開揚，自助食物區企理衛生。海陸主題最值回票價嘅先有每人一件肥潤清甜嘅磯煮鮑魚！再有成隻碟咁大，同樣係每人一隻，爽脆厚肉、膏甜鮮美嘅新鮮蒸焗波士頓龍蝦！和牛均源自澳洲，個人首選菜式就係要排隊即點即煎嘅和牛牛板腱扒拼烤馬來西亞大蝦！橙美嘅蝦隻爽口彈牙；兩三成熟嘅和牛色澤紅潤，肉香軟腍，且肥膏不多，如果唔係先食咗幾輪冷盤的話，一定唔止食三碟咁少，呵呵呵！唔怕生的話，魚生除咗有大路嘅刺身同壽司款式之外。。。亦有兩款濃甜嘅火炙和牛壽司同和牛卷。凍食嘅和牛選擇中以意式生和牛薄片最為軟嫩，捲入沙律菜苗及芝士碎即倍添香濃。其餘三款和牛沙律入面嘅和牛生熟度都唔一樣，哥哥就鍾情只係輕輕燒過嘅「Seared wagyu Steak Mango and Radish Salad」，覺得酸酸地嘅芒果配櫻桃蘿蔔及羽衣甘藍清爽醒胃。意外地，全熟嘅泰式和牛沙律帶有微微辣勁，清新惹味得最啱細佬歡心！拌入薯仔同火箭菜嗰款可能感覺最飽肚，所以都唔見太多人攞。唔想食咁多肉，沙律可自選配搭。凍肉中，個人誠意推介以紅菜頭醃製，軟滑惹味嘅三文魚薄片「Marinated Beetroot Salmon Cured」（下圖左方紅色嗰件）。預先撈製嘅沙律部份含果仁，由於此乃普遍嘅致敏原，建議餐廳於標籤上加以註明。小弟一向唔好芝士，不過望落覺得三款嘅賣相都幾得。最多人排隊係冰鎮海鮮區。當中最受歡迎始終係膏多奪目嘅波士頓龍蝦。今期麵檔吻合地以和牛做主題，以濃郁嘅牛肉湯煮出越南和牛湯河。兩片薄薄嘅生牛肉淋上滾湯立即灼熟，一片軟滑一片有嚼口，個人偏愛前者。三款熱湯中以足料滋潤嘅沙參肉竹螺頭湯輕易取勝。和牛熱盤都比較重口味，好自然地想跟碗白飯，不過當晚嘅印度香米更為健康。慢煮和牛牛尾相當腍滑，就連配菜蘿蔔都入哂味。厚切嘅紅酒燴和牛面珠墩厚身得黎質感鬆軟細緻，潤腍不肥膩。請恕小弟直言，有比較下，難免會覺得蒜香和牛牛柳及川味紅燒牛腩普通咗少少。餘下嘅熱食有專人代切嘅原條烤魚、牛肋骨、烤牛肉、羊腿同燒雞。亞洲菜有咖哩羊、芝士焗蠔、蟠龍鱔、燒味、避風塘炒蝦、荷葉飯等。配菜仲有脆卜卜嘅炸蝦片、香口嘅芝士焗釀香菇、露筍、雜菜等。講真食完多味和牛及龍蝦菜式，甜品真係要精挑細選，其中必吃推介為即點即燒、巧薄香口嘅法式可麗餅，內外都可以按個人喜好加配鮮果、忌廉、朱古力醬等配料。嘻嘻，加埋球Häagen-Dazs雪糕可堪稱為完美呀！甜品杯同蛋糕仔都有好多款揀。簡單嘅有芒果芝士蛋糕同朱古力撻。特別啲有微甜嘅奶茶奶凍（下圖中最左方）。無添加則可以揀食生果粒粒。仲有不同口味嘅原個蛋糕及糖果。「香港萬麗海景酒店」各部門嘅服務都極之周到，「萬麗咖啡室」春季嘅和牛龍蝦海陸自助餐豐富味佳，網上訂座嘅七五折尤其優惠！當晚驚喜一浪接一浪，原本買唔到五月天演唱會飛失落咗好一陣子，勢估唔到與同為五迷嘅客戶主任閒談時發現酒店推出咗個連兩張五月天$1,380門票嘅房間優惠套餐，XO仔仲即場成功訂埋房加演唱會飛添，當真活現「運氣就像抽獎。。。你的神曲開唱，唱到你老到撐拐杖還拿螢光棒！」

三月初與家人過海辦事，晚飯索性留喺尖沙咀，並應友人推介一嚐樓上壽司屋「遖」。跟住地址前往漆咸道南，去到先發現115號原來係要轉入橫街嘅，幸好大廈正門嘅螢光幕廣告夠突出，結果都唔難搵到。由升降機通往餐廳之小徑舖滿小石春，禪味濃厚，木板寫上「路面不平」以提醒貴客要小心，同個和式設計好吻合。佔用七樓全層嘅店子開揚通爽，可見十個闊落舒適嘅吧位圍繞著師傅嘅大舞台，坐迫啲應該坐得落十二人。長輩們大讚男女共用嘅洗手間寬敞衛生，而且配套齊備。估計老闆屬愛貓之人，室內嘅小擺設中，除咗有應屆生肖兔兔之外，其餘全部都係貓貓。就連餐桌上嘅筷子座都係形態及大小不同嘅招財貓，菂薂趣緻得黎堅好意頭。大型雪櫃內陳列出多樽清酒佳釀。如客人欲自攜佳釀，每樽720ml或以下嘅清酒開瓶費為$200/枝，720ml以上則為$400/枝。雖則第二朝早要返工，六口子不經不覺竟然飲咗一樽大加一樽細，加埋即係多過2.5L，嘻嘻，睇返都覺得有啲過份。晚市只有兩款廚師發辦套餐可選。當中$1,680嗰款比$1,380多清酒煮鮑魚、北海道毛蟹及燒太刀魚。兩位師傅良哥同培哥忙於備製魚生時，經理姐姐好客氣地送咗啲香口小食比大家送酒酒！小肥唔敢食原條炸嘅豆池魚，不過其餘嘅鱈魚干巧薄乾脆，有窿嘅炸獅子狗圈圈脆身得黎微微煙韌，尤其新奇得意。為晚餐作序嘅頭兩味前菜打孖上，前方嘅魚籽醬海膽豆腐軟嫩滑溜，鮮濃洋溢。後方嘅汁煮八爪魚爽彈有嚼口，伴配丁點兒柚子胡椒散發出微微辣勁，惹味尤甚，送酒一流。肥嘟嘟、脹卜卜嘅真蠔爽厚嫩滑，連同頂面晶瑩剔透光嘅青檸啫喱食落去即倍添清新。方形碟盤上美如手帕嘅菜式以牡丹蝦壓製而成，建議可用配備嘅羮仔分別捲入黃色嘅蝦膏、山椒葉同魚籽醬黎食。純粹個人感想，功夫菜雖外表吸睛，柔韌得黎唔會漿住個口，但就欠缺咗牡丹蝦原有爽脆潤滑嘅質感，疑似失掉靈魂般。廚師發辦嘅精髓在於師傅選取嘅節令食材，當晚印象最深刻嘅相信就係初春嘅子持魷魚！半生熟嘅汁煮魷魚鮮味濃郁，軟糯中帶點兒爆脆，爆脆嘅原來係魷魚蛋蛋，「子持魷魚」之名其實已道明此乃懷孕中之魷魚媽咪。第一節壓軸出場嘅拖羅件燒至六成熟，以銀箔點綴外觀更顯矜貴。拖羅肉厚鬆腍，入口絲毫不油膩，沾上金碗底嘅蛋黃醬及魚肉面嘅海膽及魚籽醬即增添柔滑與鮮香，吃畢齒頰留香也！壽司七貫續一上場前先有爽脆消滯嘅醃蘿蔔、薑、同苦瓜。或許第一段嘅菜式味道都比較濃烈，已調好味嘅壽司似乎相對地略為遜色。第一件北寄貝入口爽脆，芳香清新。輕輕燒過嘅金目鯛金光閃閃、油潤有光澤，唯一食落唔係好夠味。橙美嘅赤貝爽厚脆潤，鮮甜無比！XO仔頭腦比較簡單，對食物嘅要求著重於「新鮮」二字，對現時潮興嘅熟成牛肉同魚生直認未懂得如何欣賞，心覺「熟成」咪即係擺咗好耐唔再新鮮，尤其係食拖羅喎，當然係想食佢最新鮮肥美嘅狀態啦！好在面前熟成咗兩星期嘅拖羅仍富足夠油脂，入口爽潤，只係魚肉冇溶於舌上咁過癮而已。熟透嘅赤竹蝦紅紋白肉，大大隻好厚身，可惜帶脆得黎實咗啲啲，而且蝦味唔夠鮮甜，甚為失色。量足滿瀉嘅赤海膽壽司色澤鮮亮，幼嫩軟滑。修長嘅火炙赤鯥魚肉香肥美，美中不足都係嗰句，味道偏淡。形似海綿蛋糕嘅蛋蛋十分鬆軟，長輩們卻略嫌蛋香過份輕巧同偏乾咗少少。熱辣辣嘅茶碗蒸質感軟滑，伴配嘅蝦隻亦爽脆甜美。以葫蘆瓜捲製嘅干瓢卷清脆可口。食完多件魚生後一碗麵豉湯特別暖胃。作結嘅蜜瓜潤甜多汁。尖沙咀樓上壽司店「遖」環境高雅，服務專業周到。細問下得知店名「遖」可譯作為「做得好好」，驚嘆時所用之形容字句；綜合家人嘅食後感想，晚市廚師發辦最值得驚嘆嘅為賣相精美有心思嘅前菜小碟，深覺比壽司更為出色味佳。