疫情下為契妹同哥哥慶生，一眾長輩決定避開人群去遠少少入沙田，一嚐有名嘅酒店中菜「沙田18」 。「香港沙田凱悅酒店」位於大學站旁，即使由港島區出發坐地鐵都好方便。五星級家庭渡假酒店樓底極高，用餐大堂開揚通爽，空間感足。十人派對安排於廂房內進行，光線充裕，闊落舒適。雖然限聚令下要分兩張枱坐，但勝在私隱度高，有好多梳化位擺放隨身物，仲有專人招待，經理Raymond哥哥更親自跟進，酒店級服務實在周到。房間設有最低消費額，週一至四為$6,500，週五至日及公眾假期為$8,500，精明嘅XO仔當然係預訂好菜單啦！（52頁餐牌可於網頁上下載：https://www.hyatt.com/content/dam/hotel/propertysites/assets/regency/shahr/documents/en_us/dining/sha-tin-18/Sha-Tin-18-A-La-Carte-Winter-Menu.pdf）精選酒品價錢合理；如顧客有意自攜佳釀，紅酒、白酒、汽酒之開瓶費為$400/枝標準裝及$800/枝雙瓶裝。每位席上都擺有齊備嘅自用及公用餐具。所有食物由服務生於一旁代為分派，作序嘅三款前菜先以拼盤呈上。麻醬拌菠菜（$128）：以麻醬調味嘅菠菜冷盤濃甜香嫩。話梅冬瓜（$128）：同樣凍食嘅冬瓜條清爽多汁，散發出嘅話梅味酸甜芬芳，新穎嘅組合醒胃消暑，勁啱auntie們口味。鮮紫蘇蒜醋帶子牛油果（$205）：牛油果真係好少喺中菜出現，新潮地配上軟嫩嘅帶子，當中嘅紫蘇及蒜香提鮮得黎相當輕盈。湯品共點咗兩款，其中鮮腐竹龍躉斑片勝瓜魚湯（$120/位）可續碗叫。分開坐嘅番薯uncle同哥哥都讚賞奶白色嘅魚湯柔滑清甜，應該都飲得過。八寶冬瓜盅：壽星女點嘅冬瓜盅原盅上，以示其真材實料！厚厚嘅冬瓜件半爽半腍，混入咗瑤柱、蟹肉、瘦肉、青瓜等煲製嘅高湯鮮濃甜美，絕對足料。傳統北京烤填鴨（$658/隻）：鎮店名菜之一嘅北京填鴨雖然唔洗預訂，不過餐牌上寫明製作需時約七十分鐘。原隻叫有師傅即場堂片，帶哂手套都片得勁快手，邊片啲煙即從鴨肉上飄出，明顯鴨鴨熱力十足！「一食」包咗片胸皮、胸肉及腿肉，另跟薄餅、青瓜、大蒜絲、黃麵醬、蒜蓉及白砂糖。片皮鴨傳統食法同細佬平時食開嘅不同，應建議於鴨胸皮灑上砂糖後就咁食，有厚度嘅胸皮咬落脆巧得黎半化於舌上，酥香尤甚。第二碟左邊嘅鴨胸肉嘅皮已經起哂做第一碟，右邊連皮嘅則為鴨腿肉，應自己嘅喜好加入青瓜及大蒜絲，塗上甜醬及蒜蓉，再以軟薄暖手嘅薄餅皮包住黎食，DIY北京填鴨卷肉香鬆潤，可口味佳。風味椒鹽鮮魷（$285）：炸至金黃嘅椒鹽鮮魷外層酥化，鮮魷彈牙有嚼口，送酒佳品也。避風塘鱈魚粒（$428）：鱈魚粒外脆內嫩，香辣惹味。禮雲籽鮑粒煮滑豆腐：豆腐粒香軟滑溜，以鮮濃嘅禮雲籽同柔韌嘅鮑粒點綴不單令菜式更鮮，同時亦可令口感更豐富及有層次。鳳眼果紫蘇花螺肉爆炒鮮豬腿筋（$338）：爽彈嘅花螺肉拌炒煙韌帶脆嘅豬腿筋外表看似平平無奇，但配搭卻鮮濃芳香得很！生炒豬油渣菜心（$180）：油光閃閃嘅菜心色澤翠綠，幼嫩得黎同舖面啲豬油粒一樣咁脆卜卜，席上無一不讚，香口正菜當真必吃！堂弄玫瑰露叉燒豬油撈飯（$100/位；六位起）：必先預訂嘅懷舊飯品只限貴賓房內供應。堂弄叉燒嘅火焰效果震撼非常，大師傅快速嘅刀功亦是一絕，男女老幼嘅觀眾都咁投入興奮！明明未食到單尾個個已經話飽飽，睇完精彩嘅表演後，面前嗰碗熱辣辣嘅叉燒飯實在魅力沒法擋，八成人都成碗食哂咁堅！砵中嘅白飯粒粒肥潤飽滿，撈入另上嘅甜豉油及豬油足以添上香滑，頂面嘅叉燒肉厚少肥，肉汁豐沛，每件同樣鬆潤甜美，絕對係XO仔食過最正嘅叉燒，相信食神都要行埋一邊呀！鮑魚北菇撈麵（$295）：長壽撈麵軟腍入味，鮑魚及大大隻北菇均厚潤鮮美。爵屎壽星女揀咗酒店聞名嘅「沙田蘋果批」做生日蛋糕，全程力撐MY APPLE PIE！同時用上青蘋果及紅蘋果製出嘅招牌蘋果批混入咗天然蜂蜜，故其酸甜度分外和諧，加上批皮香口夠鬆，食落一啲都唔膩滯。甜品環節同前菜好對稱地以拼盤呈上，其中打包唔到嘅「五糧液朱古力雪糕」（$48）醇香微甜。不過小肥真係食唔落其他兩件「焗黑芝麻湯圓酥皮批」（$68）及「腐乳芝士泡芙」（$68）。酒店中菜廳「沙田18」雅致衛生有氣派，服務生體貼好客，集齊懷舊、潮派、傳統嘅菜式高質美味，於廂房內用膳可大飽眼福之餘，以指定信用卡付款更可享九折優惠，平均每人約九百大元個個都話抵食，雖遠赴沙田都深覺不枉此行！不過下次再黎可以減去甜品，以控制打包量。

自從表妹轉咗長工後，晚晚都要OT，就連慶生都要成個幾月後先得閒玩補祝，為咗令其輕鬆用餐，地點就揀咗喺灣仔新開只有兩個月嘅樓上西餐廳「The Victuals」。佔用三樓全層嘅店子面積寬廣，玻璃門身後先有個中型酒窖，酒品嘅價格寫於酒樽面，非常清晰。架上嘅招財貓家族可愛得很！用餐大堂開揚通爽，以木為主嘅間隔簡潔樸實。中央擺出多張二至多人合併式散座都仲好有空間，聖誕包場應該會好搶手。一人用餐可寫意地坐於窗邊，面向修頓球場睇球賽。餐桌上有齊備嘅自用餐具及餐牌。每枱仲有一樽溫水，溫婉友善嘅妹妹仔全晚不停添加，非常細心。餐牌共有八頁之多，頭六頁全為食物菜式。最後兩頁為飲品。細問下，得知酒品項目其實仲有好多，不過好多客都會自己帶酒，因為開瓶費一率$200/枝，大小同價，幫襯餐廳買一枝酒更可免一枝開瓶費，合理得很！The Victuals Oysters（$86/隻；$478/半打；$908/一打）：招牌生蠔最少叫兩隻，不過半打或成打咁叫就抵食得多。肥嘟嘟嘅生蠔本身爽厚潤滑，唧上綠色嘅蔥油精華，再黏上暗藏於蠔底嘅忌廉秘醬，成功令蠔隻更加鮮濃甜美，必吃推介也！Sous Vide 24 Hours Iberico Pork Rack（$348）：厚厚嘅伊比利亞豬鞍經慢煮過二十四小時，故靚肉熟透仍呈淺美嘅粉紅色，咬落鬆潤爽彈，肉汁豐沛，簡單配上甜甜嘅燒汁已夠可口。伴碟中間有件惹味嘅千層薯；前方以鴨油封乾嘅椰菜外焦內嫩，香口甜美。Gary’s Carrot Tart（$128）：以甘筍造出嘅五重奏甜品主角為圓圓嘅甘筍撻，撻品嘅曲奇餅批乾巧脆身，當中嘅甘筍絲餡清爽嫩脆，最正就係撻面濃甜軟滑嘅mascarpone芝士，配上柔軟微甜嘅甘筍雪糕、甘筍果蓉及甘筍脆脆，直令甜品嘅口感更豐富及有層次，組合輕盈不溜滯。灣仔新店「The Victuals」環境闊落企理，服務生有禮周到，西餐菜式質高味佳，加上酒價及開瓶費經濟實惠，包場開P最適宜。

因深知XO仔午飯時間僅有一小時， 居九龍嘅Auntie M為咗要請細佬食晏，專登喺灣仔揀咗間新開嘅日式一人一鍋店「本延鍋物」。小店白色嘅門面鮮明搶眼，不難找到。牆上圓角木框嘅窗口有啲似太空船咁，好得意。正門凹入去嘅設計時尚獨特，途人行過都不禁會望多兩眼。門外展出嘅兩頁餐牌中英對照，簡單易明。午市只提供「關東風壽喜燒套餐」，包有肉、綜合時蔬、蝦滑、甜點、白飯；肉肉主食共有三款可選，分別為「特選牛板腱」（$168）、「日本A4黑毛和牛」（$238）及「上選日本豚肉」（$168）。用餐大堂一眼睇哂，簡約嘅裝潢及飾物流露出和風味。窗口旁有四個對住街嘅獨立座。散座中最特別就係左方同門口設計一樣凹咗入牆嘅兩組四人枱，不過因坐有貴客，小弟未有拍照。話明係一人一鍋，所以餐桌上每個位都設有一個電爐。落單後不久，服務生隨即送上熱鍋、蝦滑、蔬菜籃及調味嘅生雞蛋及芝麻醬。籃中嘅新鮮雜菜量足且款式多，有大冬菇、大蔥、秀珍菇、紹菜、皇帝菜、日式蟹柳、金菇、紅蘿蔔、粟米、豆腐、芋絲等，大多清甜爽嫩。配料中auntie勁欣賞爽彈鮮甜嘅蝦滑。跟餐有碗白飯，不過食客亦可加$15升級要烏冬。兩款牛肉主菜同樣切到好似紙張咁薄。油脂較少嘅特選牛板腱紅白紋理分明，食落有微微嚼勁，黏上蛋漿及芝麻醬即能添上香滑。色澤粉嫩嘅日本A4黑毛和牛則半溶於口腔，軟潤無比。結尾兩件抹茶蕨餅煙煙韌韌，微甜輕巧。灣仔新店「本延鍋物」嘅裝修極富時代感，室內簡潔企理，服務生友善有效率。網上訂座及電子點菜流程簡易快捷，一人一鍋嘅靚牛壽喜燒午餐用材高質，輕盈可口，價格合理，相信天氣凍啲會更受歡迎，大家不妨一試。

水星Auntie宴客，全權交由美食饕客嬸婆代為策劃，為隆重其事，長輩特選於酒店中菜廳「紅棉」設席。五星級酒店位於中環紅棉路上，區內有多棵紅棉樹，餐廳係順理成章地以其起名，入口處可見名花作擺設，到題得黎流露出雅麗嘅氣質。樓底高高嘅用餐大堂空間感足。十一人派對於闊落嘅私人廂房內進行，有專人貼身招待，私隱度更高，舒適衛生得很！據悉，可容納十或十二人嘅廂房最低消費額為午市$8,000及晚市$12,000，可容納上六人嘅細房最低消費額則為午市$5,000及晚市$6,000。席上嘅賓客求知慾真係強，見到牆上嘅書法咁有勁，即紛紛議論四個大字嘅讀法。正當有人讀出「芒果決明」時，駐場嘅經理哥哥即糾正四字應為「節果決明」，成為咗當晚嘅笑話。嘉俊哥哥解釋，「節果決明」乃置身於酒店內嘅百年古樹之名，罕有名木屬保育地標之一，每年春季開滿粉紅嫩白嘅花花時，都會擠滿人群打卡。在場嘅女仕們都聽到心郁郁，仲話到時應該相約午聚一賞「白與嫣紅雨」，務求大包口福同眼福！菜單列出九大簋盛宴，實在令人期盼萬分。桌上可見齊備嘅自用及公用餐具。所有餸菜都有專人預先分埋續位上，就連靚茶都係由服務生斟添。前菜薈萃：為晚餐作序嘅四款前菜以拼盤呈上，由十二點方向順時針數起，分別為蘋果木煙燻素鵝（$138）、擔擔鴛鴦雞（$208）、燒椒醬流心皮蛋（$108）、英芥椒香瀨尿蝦（$488）。第一件三色素鵝內含清新爽脆嘅紅蘿蔔絲、菇絲同筍絲，可惜牙力不淺嘅叔公直評點心顏色就靚啦，敗筆卻在於腐皮外層偏韌，難以咬裂。如相所示，雞件方磚層次分明，上白切雞下烏雞嘅鴛鴦雞肉相當軟潤，黏上微辣嘅擔擔汁液足以吊出鮮香。並非初次光臨嘅長輩提到，美中不足係哥哥仔未有於分餸前先讓貴客一睹貌似黑白棋盤嘅賣相，似乎棋差一著，幸好之後嘅菜式有得玩相機食先。皮蛋香濃流心，不過大家要留意個燒椒醬真係幾辣。白肉紫紋嘅瀨尿蝦不單肉厚爽彈，最難得就係每件中間都夾有鮮橙量足嘅瀨尿蝦膏，簡單以英芥椒香點綴即有提鮮之效。松茸浮萍菊花（$188/位）：單睇咁有詩意嘅餸名腦海中其實已經呈現出一幅秋菊花海圖，真係冇諗過師傅竟能將纖細嘅豆腐切成勁多花瓣嘅菊花，於湯中飄逸嘅形態更是栩栩如生！松茸清湯反哂光咁清澈，明顯半滴油都冇，菊花豆腐幼嫩滑溜，巧奪刀功嘅湯品芳香四溢，沁人肺腑！蝦籽葱蔥燒脆遼參（$408/位）：脹卜卜嘅遼參鬆化爽脆，乾巧不油膩，碟上嘅蝦籽燒汁惹味鮮香，加多一球白飯可索盡剩餘嘅精華，實滋味無窮。花雕雞油蒸馬友（$468）：開邊蒸煮嘅馬友每條約可供六至八人享用，所以嬸婆早已訂定兩條。魚魚上枱時散發出芬芳撲鼻嘅花雕香，銀光閃閃嘅魚皮油潤軟滑，白雪雪嘅魚肉幼嫩鮮甜，吃畢仍齒頰留香，好魚也！紅棉蔥油脆皮雞（$398/半隻；$668/隻）：浸浴於蔥油湖中嘅招牌名雞呈半球形狀，蓋頂嘅雞皮紅亮巧薄，香脆得黎化於舌上，最正就係師傅預先為雞雞起哂骨，無論係黑肉定白肉都軟嫩無比。據Fred哥哥所講，原來蔥油湖除咗青脆嘅碎蔥粒及油潤嘅蔥油之外，入面仲混入咗黑色嘅乾蔥，唔怪得知食落咁惹味啦！刁鑽咕嚕肉（$308）：咕嚕肉嘅外皮香脆有光澤，肉質鬆爽甜美，就連伴碟嘅無花果肉都好清新爽甜。多得賓客們極富好奇心，細問其餸名何來，先知其刁鑽精髓在於豬肉乃用上菠蘿乾磨成嘅菠蘿粉末所醃製，方可令每件咕嚕肉都沾上甜甜嘅菠蘿香，造出融入分子元素嘅潮派中菜。啫啫蝦乾芥蘭（$238）：短小精悍嘅芥蘭度翠綠香脆。元朗大孖頭抽海鮮炒飯（$298）：顧名思義，單尾飯品用上名牌元朗大孖頭抽豉油炒出，炒飯夠乾身，米粒飽滿彈牙，撈入蝦仁及帶子粒粒已能調出鮮甜。生磨芝麻卷（$88/三件）：結尾嘅甜品薈萃共有三款，俗稱「菲林」嘅芝麻卷唔會過厚，一口一件，微甜不溜。山楂糕（$88/三件）：意外地，看似為紅色版「菲林」嘅山楂糕微酸帶甜，新奇得黎反而有消滯之效。木桶豆腐花（$138/桶；四位用）：可令全場人無一不讚嘅竟然係大家由細食到大嘅豆腐花，嘻嘻，睇黎大師傅煮理豆腐真有一手喎！樸實無華嘅豆腐花幼嫩滑溜，簡單配上薑味糖水及灑上金黃橙亮嘅黃糖已能錦上添花，俘擄人心！置身於山上嘅酒店中菜「紅棉」彷如世外桃源，環境優雅有氣派，服務生客套周到，玉盤珍饈用材高質，美味絕倫，即使價格略為偏高，春季有古樹靚花作伴，相信美食歷程可更上一層樓。感激長輩們悉心安排及盛設款待，具娛樂性嘅聚會令一眾親友渡過難忘嘅晚上！

三號風球下同舞友睇完戲戲後喺時代附近覓食，行行吓突然見到有位小丑揮手招客，告知其新店「Exotica Gelatea」開幕只有數天，見佢咁有誠意就膽粗粗入咗去試。門外黑板所示，餐廳主打漢堡、咖啡及意大利雪糕。其中一塊黑板上其實劃有漢堡包嘅解說圖，但就被上面嘅中英文地址資訊搶咗少少風頭。小弟愚見，不如刷走咗啲地址，將個漢堡包圖變大，宣傳效果應更有效益。落地玻璃窗後嘅左右兩旁設有兩張四人散座。單憑樑上嘅仿羅馬藝術磚塊、古堡式吊燈及牆上精緻嘅洋畫、小丑等裝飾，睇得出店主於室內設計方面花下不少心思。真係冇諗到後門更別有動天，震撼嘅壁畫面對嘅洗手間乾淨企理且光線充裕。入面塊魔鏡仲識著燈架，有趣得很！黑板餐牌上列出嘅四款漢堡包中兩款係豬，兩款係牛，均可單點或跟餐要埋薯條及指定餐飲。飲品嘅選擇較多，除咗多款咖啡之外，招牌特飲原來係以意大利雪糕調製。意大利雪糕中竟然有榴槤味，小丑哥哥似乎都幾重口味喎！個子高高嘅大廚極之友善好客，為感激幾口子打緊風都幫襯，所點嘅兩份招牌牛肉漢堡套餐仲專登加料，嘻嘻，XO仔當真口福不淺！杯碟上都印有品牌嘅金漆標誌，真係冇諗到小店選用嘅餐具會咁別緻。Exotica Wagyu Burger（單點價$109；套餐價$179）：招牌和牛漢堡賣相鮮美吸睛。底面嘅包品都好鬆軟，焦香咗嘅芝士芳香尤甚，加料嘅雙層和牛餡心爽潤多汁。不過細佬都係第一次食漢堡包係夾咗煮熟咗嘅蕃茄同唐生菜，大廚哥哥解釋依個就係Exotica理念中嘅異國風情特色，咁咪即係玩fusion漢堡？！跟餐嘅薯條金黃修長，明顯並非以千年油炸出，讚！新鮮炸出嘅薯條熱力十足，咬落鬆脆乾巧，而且一啲都唔油膩，勁啱小肥口味。Exotica Cauldron Burger（單點價$109；套餐價$179）：另外一個招牌漢堡用上美國安格斯牛造出餡心，並換上chimichurri醬調味，平心而論都好唔錯，但因有比較下個人就覺得和牛漢堡嘅肉香同肉汁更為出眾。跟餐嘅炸洋蔥圈酥化香脆，如果可加配一杯生啤就冇得頂囉！據悉，新店仍在試業階段，估餐牌亦會不斷更新，當中甜品除咗有意大利雪糕之外，其實仲有清新爽甜嘅蘋果可麗餅。Affogato（$99）：自己斟添嘅意式特濃咖啡十分醇厚，自選嘅香蕉朱古力味雪糕則芬芳微甜，組合香甜可口。銅鑼灣新店「Exotica Gelatea」歐陸式嘅設計精巧，透明度高嘅環境感覺尤其衛生，以小丑角色邀客入座嘅手法新奇有趣，潮式和牛漢堡豐厚味佳，大家不妨一試。

九旬叔公最愛食翅翅，嬸婆每次覓到好翅更會宴客推舉，專家地位冇人能敵。今期介紹嘅「潮家宴」隱藏於上環一幢商廈內，冇人帶的話真係未必會留意到佢嘅存在。金漆招牌上嘅「中出會所」原來乃「中華出入口商會」之簡稱，但其實餐廳並非會員制。樓上潮州菜館面積唔算好大，但勝在光鮮衛生，服務生細心周到。室內並無花巧之裝潢，牆上只係貼出是日推介菜式及招牌餸菜嘅靚相。防疫措施放寬後，十二人終於可同枱食飯，主人家安排派對於廂房內進行，空間感同私隱度足，餐桌上嘅銀線枱布襯上金色嘅椅套，雅致得黎幾有氣派。每位席上都擺有齊備嘅自用及公用餐具。菜單早已訂下，賓客可輕鬆用餐。大地魚芥蘭心：幼身嘅芥蘭翠綠有光澤，咬落十分爽甜，拌入香口嘅大地魚即倍添惹味。招牌紅燒潮州翅（$642/三兩；$428/二兩）：以蠟燭暖住上嘅招牌翅翅非常足料，原來每碗均足三兩翅，絕無花假，潮州靚翅腍滑香濃，堅掂！六頭乾鮑魚（$1,680/隻；需提前預訂）：嘩，食完正翅，姐姐仔隨即呈上六隻拳頭咁大嘅六頭乾鮑魚，震撼程度同正翅不相百仲，叔公嬸婆當真客氣得很！勁量級嘅鮑魚厚潤滑溜，溏心黏軟鮮甜，上品實在冇得頂呀！蘿蔔灌章（$98/六件）：脹卜卜嘅蘿蔔灌章金黃鬆化，外脆內軟潤，就連墊底嘅芋頭絲脆脆都咁香口不油膩，送酒一流！煎封鷹䱽魚（$1,280）：長輩大讚鷹䱽厚肉結實有口感，魚味鮮濃甜美，第二個圈都未轉完已成功清碟，好魚果然搶手過人。方魚肉碎粥：以方魚及肉碎煮出嘅粥品清甜暖胃。黃金糖醋麵（$128）：兩面黃煎得好夠香脆乾巧，麵條半脆半煙韌，唔會一夾就散，自行塗點砂糖及醋汁作適量嘅調味，效果酸酸甜甜，消滯易入口。反沙香芋（$138）：夠乾身嘅反沙芋糖衣外皮酥香，香芋粉嫩，秋天嘅芋頭真係特別靚。銀杏綠豆爽（$38/位）：糖水可口清潤，簡單味佳。隱世「潮家宴」環境企理衛生，服務生溫婉體貼，傳統潮州菜餚及珍饈海味均質高美味，價格合理，全面性壓到市內其他潮州菜館！嘻嘻，得知開瓶費設為$100/樽，肥肥家族已訂好位下週試埋啲鹵水菜式同凍蟹，真心地捧場！

未放暑假，XO爸B即約定家中兩個小寶貝於開學前擦餐勁嘅，地點揀咗表哥愛探險嘅女朋友提議嘅「すき焼 森」（Sukiyaki Mori）。疫情下開業已屬冒險，最難得可保持人氣指數高企，所以特別想見識一吓。如果之前有去過「YakiniKuu」的話，應該會留意到隱蔽於歌賦街盡頭一角嘅小店其實就係燒肉店分割出黎，兩店之親戚關係非常明確。餐廳裝潢簡約，以木為主嘅間隔流露出和風嘅氣息。訂座時講明八人要坐吧位，因深知小朋友睇住師傅烹調美食會感過癮，大人則欣賞食物夠新鮮熱辣辣，各得其所。圍牆擺出嘅二至四人散座中，相信卡位最為舒適闊落。打聽到開瓶費大小同價，一律設為$250/樽，合理過合理！嘻嘻，肥肥家族六個大人飲一樽1.8L清酒份量啱啱好，而且最抵玩。午市餐牌只有兩頁，小肥早就安排好全體清一色點選必先預訂嘅「すき焼 セット」六道菜壽喜燒套餐（$580/位），另加牛舌（$100/位）。廚師全權掌管上菜嘅速度，餸菜續道煮好後即用新嘅碗碟上，故每位席上只有一雙木筷子，簡潔得很。前菜：為午餐作序嘅茄子燈籠椒前菜清新開胃，伴配晶瑩透光嘅醬油味啫喱效果連細路仔都話好得意同易入口。蒸し物：小碗中嘅燉蛋特色在於以昆布舖面，軟滑輕盈嘅蛋蛋滲透出芳香與清甜，又潤又暖胃。動手備煮食物前，師傅先展出食材並為其略作簡介。木盤上有節令嘅蔬菜。大碟上紅白雲石紋理分明嘅手切A4和牛源自近江。相中最左方嘅碟仔上則為另加嘅牛舌。師傅手勢純熟地攪拌橙美亮麗嘅蛋黃及燒煮和牛，並告知雙眼發光嘅小朋友們面前嘅日本蘭王蛋別號為「蛋中之王」，視覺效果有埋現場嘩聲音效，成功造出氣氛！すき焼：每道壽喜燒和牛都會配埋菜菜。除咗蛋蛋之外仲跟咗一碗白飯，唔夠可以無限添加，不過大家記緊一定要留肚食單尾碗滑蛋牛肉飯啊！四碟熱辣辣嘅和牛牛肩及西冷有嚼口得黎肉汁豐沛，肉味濃郁，黏上蛋黃醬即倍添香滑，伴配不同時蔬嘅組合均有提升爽脆惹味之效。牛舌（另加$100）：追加嘅牛脷巧薄脆身，同樣美味可口！野菜：以鍋中剩餘嘅壽喜燒秘汁煮製嘅豆腐、冬菇、雜菜、洋蔥等全部都入哂味，軟腍甜潤。當中最得細佬歡心嘅就係煙韌幼身嘅水粉絲。御飯：金黃鮮美嘅蛋蛋喺鍋中滾拌成滑蛋，學緊煮飯嘅小妹妹覺得尤其精彩！飯品連暖胃嘅麵豉湯及醒胃嘅醃漬物一齊上。壓軸上陣嘅滑蛋牛肉飯嘅白飯底粒粒飽滿肥潤，滑蛋混入和牛邊邊同肥膏炒出，入口集芬芳、柔滑、鮮潤、甜美於一身，屬色香味俱全之作！甜品環節XO仔揀咗簡單嘅綠茶雪糕同熱咖啡。隱藏於九如坊內嘅「すき焼 森」面積雖少，但勝在環境簡潔，服務生及廚師們親切有耐性，即使面對住老中青嘅食客要多次重複對話都仍能保持專業嘅態度。預訂嘅壽喜燒午餐高質美味，份量恰到好處，價格合理得很，小店嘅十個吧位難訂都在所難免，絕對值得一試！

契妹今年生日精挑細選咗間法日料理「GAIJIN」，網上訂座可享全單八五折優惠，流程相當簡易。西餐廳佔用面積全層，室內光線柔和，不用花巧之裝潢已覺時尚，簡單嘅留聲機擺設流露出復古嘅西洋韻味，架上嘅清酒瓶及洋酒樽剛好配合返法日料理嘅主題。用餐大堂排出嘅二至多人合併式散座均以抗疫膠板隔開，不同角落亦設有空氣淨化機，衛生企理得很。每位席上都有自用嘅餐具及餐牌。年輕嘅服務生細心周到，而且好有耐性，為各人安排好水水後，即講解晚市套餐基本為四道菜，含頭盤、湯、主菜及甜品，價格由主菜而定，如果想食多個頭盤的話可升級為五道菜。廚房備製晚餐時，哥哥仔先送上暖手嘅麵包。圓碌碌嘅忌廉芝士麵包好軟熟，另外件牛角包則夠鬆。伴配嘅黑松露蒜蓉牛油都好香滑。油甘魚刺身：前菜共有三個選擇，XO仔所點嘅油甘魚刺身完全不比壽司店嘅出品遜色，以柚子醋調味嘅油甘魚鮮爽柔潤，伴碟嘅心裏美蘿蔔薄片及紫蘇葉芳香輕盈，組合清新醒胃。其餘兩款「清酒牛油炒鮑魚」及「北海道忌廉吉列蠔」雖然自己冇試到，不過都影咗相相同大家分享。升級成五道菜可加點「和牛他他」（$98）或「香煎法國鵝肝」（$108）。是日餐湯為「南瓜忌廉湯」。法式龍蝦湯（另加 $48）：龍蝦湯嘅味道猶如其色澤般醇濃，以脆卜卜嘅櫻花蝦點綴即為厚滑嘅湯品增添口感。主菜款式太多，六口子未能一一盡試，不過最難得嘅就係一向唔好西餐嘅大肥不停讚嘆廚師推介之一嘅「鹽燒油甘魚魚頭拼魚骨」（$398）鮮甜幼嫩，日式嘅元素果然有魔力。是日新鮮魚柳之甘鯛立鱗燒（$398）：燒至金黃嘅甘鯛乾巧不油膩，白滑嘅魚肉鮮甜無比，豎起哂嘅魚鱗香脆酥化，！壽星妹大讚潮派長壽麵「北海道海膽帶子意粉」（$398）煙韌彈牙、海膽鮮濃橙亮、帶子肥潤甜美。媽咪同哥哥分咗客「厚燒M6有骨和牛肉眼扒」（$898兩位用），上枱一刻先由哥哥仔以火槍燒香頂面嘅秘製牛油，甚有睇頭。分開上嘅配菜份量都好足。據悉，店子嘅甜品均為自家製，當晚嘅「廚師精選甜品」為輕巧潤甜嘅朱古力布朗尼配新鮮嘅芒果及芝麻雪糕。食客可選擇加$48升級要杯軟滑微甜嘅「焦糖奶凍」。或者係頂皮卜卜脆，蛋心甜滑嘅「法式焦糖燉蛋」。銅鑼灣法日料理「GAIJIN」環境舒適，氣氛輕鬆，服務生誠懇親切，遇上問題少男XO仔，身材高高嘅Josh哥哥竟然蹲下來續一回應，體貼之舉確真令人難忘！正如日文店名之漢字「外人」所道，西餐廳融洽外國食材及烹飪方法造出質高美味嘅潮派菜式，網上訂座可享全單八五折優惠，價格絕對合理。契妹壽辰於「外人」尋味有意外收穫，肥肥家族已經計劃好再次幫襯，直接用行動支持有心食肆。

見小肥近日多咗出入跑馬地，發掘咗幾間新店，似有六尺高嘅高姐姐就推介區內屹立咗十幾年嘅「富來粥麵小廚」，大讚小菜經濟得黎有水準，肥肥家族襯週末有空即舉家一試。昇平街斜坡上兩邊都係咪錶位，不過全日都泊滿車車。位於街頂嘅地舖綠色嘅招牌好易認，不難找到。小店外牆貼出該星期嘅抗疫優惠及時日精選。室內空氣流通。牆上掛出嘅靚靚素描均為跑馬地嘅街景，街坊情懷盡在不言中。散座空間感足，除咗有電視睇，投影機會不斷循環時播放出時令推介菜式。電子自助落單簡便衛生。不過場內嘅熟客似乎都係鍾意真人對話多。桌上擺有自用餐具及任用紙巾。濃湯雞煲翅（$498/份）：翅翅同雞湯好有文化地分開上，並由店主菲臘哥哥親自分配。如相所示，每份當真足八兩翅翅，四人分享剛剛好，不過五、六個人分都冇問題。以砂鍋上嘅濃湯雞熱辣辣、香噴噴，飲落香濃甜美，火喉十足，必先預訂絕對有理！每人有成兩大碗湯飲，煲湯嘅半隻雞肉相當軟腍，$498實屬抵吃足料之選。拔絲菠蘿咕嚕肉（$118）：酸甜開胃嘅咕嚕肉嘅拔絲外皮香脆，肉質亦好鬆爽。秘製鹹香雞（$128/半隻）：鎮店菜式之一嘅鹹香雞甘香幼滑，雞皮柔潤入味。富來小炒皇（$128）：招牌小炒皇爽脆惹味，好夠鑊氣，靈魂所在就係撈咗啲脆卜卜嘅芋頭絲炒製，甚有驚喜。蒜蓉炒白菜仔（$78）：細細樖嘅白菜仔清甜嫩脆，簡單以蒜蓉調味已能為正菜提鮮。值得一提嘅就係炒菜可以指明要少鹽少油，靈活變通嘅廚房真係就得食客。豉油王炒麵（$88）：炒麵好香口，麵條夠鬆夠彈牙，最欣賞佢完全唔油兼且唔會黐埋一舊舊。自家製荔枝雪糕：嘻嘻，可能見同細佬好傾，老闆娘好客氣地送咗杯自家製嘅雪糕俾XO仔試。以荔枝蓉打製嘅雪糕混入咗清爽嘅龍眼肉，組合清甜芳香，輕盈可口。跑馬地老店「富來粥麵小廚」環境企理，鑊氣小菜量足味佳，店主親民有幹勁，據悉每日未天光已經開舖，心中團火以熱誠傳達，難怪會有咁多街坊捧場。