天巢法國餐廳 (南灣)

繼早前與一眾靚靚auntie旋風式訪澳，享用過新葡京酒店入內「8」餐廳美觀美味o既中菜後，XO仔不時都會心郁郁，想再赴澳一趟尋美食。嘻嘻，八月份機會終於到臨，家中一位親友幸運地於抽獎項目中贏取咗六張來回澳門船飛，所以就大搞即日美食團，小肥當然係第一個報名啦 ！美食團行程全部由親友策劃，一共四站，首站為新葡京酒店內著名o既三星「天巢法國餐廳」（Robuchon au Dôme）。「天巢」乃世紀星級名廚Joël Robuchon大師核下其中一家高級法國餐廳，名氣甚大，居港o既八位團友們亦曾經各自品嚐過其香港分店o既佳餚，個個都有讚冇彈！據悉，澳門「天巢」出名高質抵食，故午市天天滿座，一般訂座最少都要成個月之前 。於新葡京酒店弧形蓋頂上築巢當真唔講得笑！正當大家以為乘搭大堂升降機往三十九樓已到步時，方才發現此僅為通往「天巢」秘道之入口 。前往巢穴必先行經玻璃酒櫃及秘道。秘道兩旁擺滿壯觀名貴o既珍藏雕塑品，聽說全為賭王家族所擁有，「堅過石堅」 ！走廊盡頭另有一部升降機轉駁往餐廳主樓，望清楚先發現洗手間原來設於別層，果真機關重重！踏足舖上雲石o既「天巢」，感覺猶如被藍天白雲擁抱著，溫暖o既陽光直透玻璃窗，光線打射在大堂中央o既鋼琴、鏡面牆身及水晶吊燈上，足以令全場閃閃生輝，華麗光亮 。高高在上o既「天巢」感覺比香港分店更為高貴霸氣，餐桌圍繞玻璃窗擺放，座位寬敞闊綽，食客可如雀鳥傲翔天空般，舒適地欣賞澳門景色。餐廳不但用上水晶杯品、銀閃餐具及梳化式椅櫈，就連餐牌、餐桌及餐墊都全為皮造，好明顯每一個細節都非常講究 ！週六假期，大家都懷住輕鬆o既心情遊澳門，當然係要飲番杯略作慶祝啦！小肥一向不嗜紅酒，所以就叫咗杯香檳黎飲。午市套餐合共有三款，分別為三道菜o既「Menu $498」、四道菜o既「Menu $598」及五道菜o既「Menu $728」，勻為限定自選配搭。客套有禮o既服務生為各人落單後，隨即推出牛油車，並即場刨捲光滑柔軟o既鹽味及原味牛油。店內其實有架麵包推車喺走廊，整天吹住冷氣，但係意外地，呈上餐桌o既麵包籃內o既包點一啲都唔硬唔涷，全屬暖熱軟熟 。Amuse-bouche之Corn puree with lemon jelly and popcorn：三星餐廳果然有文化，眾人o既食物一同上枱，而且第一味已有驚喜，因為係免費贈送 ！餐前小食以黃色乾冰墊底，營造出騰雲駕霧o既效果，好襯托「天巢」個主題。細杯底部被濃霧遮擋，其實內藏透明o既檸檬啫喱，酸甜涼快；面層鮮黃色o既粟米蓉由粟米新鮮攪製，鮮甜香濃，而且入口仍可食得出粟米微粒；個人最為欣賞大廚灑上紅色o既辣椒粉末，成功刺激食客o既味蕾 。頭盤之Le crabe（Fresh crabmeat in chilled tomato infusion w/ spiced avocado guacamole & perfumed w/ soft boil egg鮮蟹肉配涷蕃茄露及牛油果拌嫩煮蛋）：顏色鮮艷o既蟹肉頭盤看似簡單，食落就知口感有幾複雜豐富。底層晶瑩剔透o既涷蕃茄露加辣椒粉末清新醒胃，湯中o既三隻蟹腳亦盡顯份量如何十足，中間四層疊o既蟹肉、牛油果醬、軟心蛋及胡桃脆更為誘人；蟹肉絲同蟹腳同樣鮮甜幼嫩，配上牛油果醬及軟心蛋又增添一份香滑感，加埋頂面o既卜卜脆一齊食，感覺就好似個口去咗環遊世界咁精彩 。頭盤之Les moules de Bouchots（French mussels <<marinières>> w/ touch of cream & leek fondant perfumed w/ saffron法國青口配清新忌廉及韭蔥藏紅花汁）：經理哥哥極力推介法國青口為節令食品，要有來貨先會加入餐牌內。如相所示，青口隻隻都咁脹卜卜，雖然調味中加插咗忌廉，但食落一啲都唔覺溜，每一隻都咁鮮甜肥美，是高質美味之選 ！湯之Le petit pois（Light green pea velouté flavoured w/ mint, serve w/ a delicate sweet onion foam青豆薄荷忌廉湯伴清新洋蔥泡）：小肥未有品嚐，故不能評核。魚類之Les crevettes Crystal Blue（Cristal blue prawns cooked on a bed of spring vegetable pearls w/ spelt risotto & crustacean emulsion燴水晶藍蝦配時蔬小麥飯及海鮮露）：XO仔試咗兩款主菜，個人覺得此道水晶藍蝦最為出色！啱啱好熟o既藍天使蝦爽脆多汁，少辣惹味，碟中橙色o既汁液乃藍蝦殼所肴製，鮮味香濃，最難得就係意大利飯一啲都唔溜，令人為之深醉 ！魚類之La Noix de Saint-Jacques（Scallops “meunieres” style w/ baby artichoke & tomato salsa flavored w/ basil & Piquillo emulsion香煎法式帶子配蕃茄及朝鮮薊）：Auntie覺得帶子鮮嫩，但就嫌味道過酸 。肉類之La joue de boeuf Wagyu（Braised Wagyu beef cheek w/ red miso & medley of seasonal vegetable燉日本和牛面肉配紅味噌醬及時蔬）：和牛面額好夠軟腍，問題係味道偏咸，而且食完有啲溜滯，故小弟建議大家主菜揀選水晶藍蝦「Les crevettes Crystal Blue」。食完哂主菜，溫文o既姐姐清理好餐桌後，就推出甜品車任由客人點選。甜品之日本水蜜桃：蜜桃超級爽甜，如大肥在場，食完包保會encore ！甜品之Napoleon拿破崙：拿破崙o既三層酥皮鬆脆乾身，中間o既忌廉餡微甜軟滑，真係好耐冇食過咁簡單可口o既拿破崙啦 ！甜品之Floating Island：Auntie見個樣咁得意，姐姐仔又介紹話甜品係用蛋品製成，所以就叫咗黎試。食完佢話好似食緊甜甜o既空氣咁囉 。套餐除咗包有甜品之外，原來「天巢」仲有架朱古力車同芝士車。奈何大家都已食到攬住個肚，所以就由得小肥個相機獨自吃個飽 ，家中有小孫兒o既長輩就攞咗幾枝波板糖返屋企氹小朋友。暑假天氣較熱，小肥就叫咗杯涷檸茶作飯後咖啡或茶之選。不知此舉是否法國文化，因為小弟都係第一次見涷檸茶o既檸檬分開上。於空中之城「天巢」進食午膳，居高臨下地感受開揚無際o既景觀，一邊品嚐細膩o既三星法國佳餚，肚滿腸肥之外，更受到貴賓式o既禮待，難怪不愛賭博o既親朋好友都經常短遊澳門，四尋美食！

8 (南灣)

靚靚媽咪有一班靚太好友，每星期都會約出黎午聚，為求增加新鮮感，每次都會揀選不同餐廳。由於auntie們個個「入得廚房，出得廳堂」，對食自然係好有要求，聚餐時經常都會研究新食譜同食府，當中亦不乏外地o既食肆。靚auntie當中有幾位係澳門o既常客，除咗得閒會玩兩手，最愛就係嚐美食，每次去完定必詳盡報導；踏入馬年，佢地其中一位就提議組團過大海，去佢地一致裁定為全澳最正o既名中菜廳「8」度食好野，實行「八」一「八」  ！小肥聽見都已經流哂口水，當然係唔會玩怕羞啦，第一時間就問准auntie們可否拉埋表妹一同參與，嘻嘻，細佬喺度寫得食評即係話有份去啦  ！我地一行十二人，乘坐早上十一點鐘船，中午十二點前已經泊岸，由於澳門入境處人手足，效率高，港人無需填表，十分鐘內就辦妥好手續，真係話都冇咁易。計劃周全o既領隊auntie一早安排好專車接送，團員唔洗擔心要搵的士，一到步就有車坐，加上馬路上車輛不多，交通毫不擠塞，十二點半左右就到達新葡京酒店。「8」係新葡京酒店o既中餐廳，樓面高，設計裝潢華麗，門面一串串o既「8」字連環扣耀眼閃亮，踏入餐廳門口同步入酒店大堂一樣，都可以感受到嗰種無形o既氣派。食客必需行上幾級，穿過一道以自動門開關o既「金魚走廊」先入到餐廳大堂；正當大家不斷讚賞地上游黎游去o既電子金魚如何生動時，步出走廊嗰一刻，發覺大堂中央擺設著o既落地水晶燈飾、天花掛著o既玉環吊飾，以及牆身o既金魚刺繡，嗰份震撼感足以令靚太們儀態不顧地嘩聲四起 。餐廳用紅色為主色，哈，同個餐廳名「8」真係夾 。Auntie們留意到餐廳雖然地方大，但係啲枱唔會排到密麻麻，位於中間o既散座全為高高o既皮櫈，舒適得黎好有私人空間。餐廳內每一扇門都係自動開關，洗手間內o既所有配備亦同樣地全為電動，客人出入洗手間或餐廳都無須觸碰任何不潔之處，我地十二個人都對「8」奇高o既衛生意識水平印象都好深刻！小肥更因此次經歷為以後o既食評重新定下新o既衛生分標準 。「8」除咗格調高雅貴氣，酒店級服務亦顯專業。太太們一進場，幾位服務生隨即每人送上櫈架，以拱擺放手袋衣物之用。見客人安頓好行裝，高高瘦瘦o既靚女姐姐就續一為我地奉上熱茶、滾水，最驚喜就係喺客人面前表演魔術 ，變出濕巾（請看下圖），既新穎又衛生！澳門通auntie曾多次於「8」用膳，深知除咗必需要預先訂座之外，有幾款菜式如「原隻乳豬焗飯」都一定要預留，今次亦做足功夫，為團友們訂咗兩隻，諗住咁美味，食剩都可以包走 。唔知澳門通auntie會唔會係VIP呢，定亦或係因為我地訂咗乳豬飯o既原固，坐底冇耐，兩位經理非常好客地續一同我地打招呼，派咭片之餘，亦不忘介紹鎮店點心及小菜；叫餸依個重大責任，我地當然係交比團隊中o既澳門常客啦！值得細佬喺度讚o既係經理o既細心體貼，雖然我地叫o既食物大多以點心為主，佢都好樂意地印製多份餐單，比我地攞返屋企作為參考及紀念，好等女士們有一個美好o既回憶 ！ Amuse-Bouche之柚子鮑魚，彩椒豬爽肉（估計係免費贈送 ，不過由於帳單唔輪到小肥睇，所以不能作實）：以鮑魚作為前菜，如果真係免費贈送的話，「8」真係好慷慨 ！魚形匙羮上除咗有兩片鮑魚之外，原來底部有層薄薄o既柚子啫喱，鮑魚爽口鮮甜，啫喱清涼醒胃；鮑魚旁o既彩椒豬爽肉帶丁點兒辣味，入口醒神，配上底層o既雀巢一齊食，口感更覺香口爽脆，食後大家都越來越期待接住落黎o既菜式！ 蟹肉小籠包（$60），藍天使蝦金魚餃（$60）：可愛o既藍天使蝦金魚餃同門口條「金魚走廊」及牆身o既金魚刺繡好相襯 ！金魚餃層外皮煙煙韌韌，冇想像中咁厚，做得好出色；其內涵亦非常豐富，經理哥哥解釋話，每件金魚餃內都有一隻New Zealand o既藍天使蝦，出名爽口彈牙，事實亦的確如此 。蟹肉小籠包外表雖然不及金魚餃吸引，但味道絕不比其遜色；小籠包皮薄又juicy，入面o既餡肉質極為鬆軟，而且咬落一啲都唔肥膩，點上黑醋又能特顯蟹肉o既鮮甜味，正！ 香煎琵琶燕盞（$68），脆香叉燒包（$45/籠）：香煎琵琶燕盞，即燕窩盞，煎香咗o既外皮又薄又香又脆，最重要係唔會食到成口油，而且燕窩餡份量足，味道清香得黎完全唔覺淡，可惜其不大出眾o既外貌只能輪為碟中o既配角。一眾auntie離遠見到一碟碟o既刺蝟叉燒包已經情不自禁地讚嘆其趣緻o既外形，哈，原本無意拍照o既長輩們最終都要用智能手機影返幾幅比自己啲孫仔睇 。師傅不但有心思，而且仲好有心機，因為據經理哥哥所講，叉燒包上o既每一條刺都係由師傅續一拉出 ，少啲功夫同時間都唔得。再者，「8」o既脆香叉燒包同外間o既叉燒包造法有幾點不同：第一，叉燒包不但經過蒸製，同時亦要被煎煮，所以其底部奇脆無比，香口非常；第二，叉燒包餡中加入咗梅菜，味道香濃而不濁；第三，叉燒包層刺蝟外皮經過搓揉及拉製，質感較為軟熟，而且冇咁粗糙。刺蝟叉燒包美觀又美味，精彩得令人眼界大開，拍案叫絕 ！ 竹笙魚圓：Auntie話中國人食飯一定要有湯水先夠滋潤，所以就應經理哥哥o既推介，叫咗依款竹笙魚圓豆腐羮。嘩，師傅將豆腐切成千絲萬縷o既幼絲，不但盡顯其精湛o既刀功，豆腐羮中o既三粒魚圓更加係一絕！由桂魚所打製而成o既魚圓外皮猶如蛋白般幼嫩滑溜 ，魚圓心卻又能質感彈牙，好得意。碗中爽脆o既竹笙同魚圓本身冇味，同火腿及瑤柱味濃o既豆腐羮好夾，以甜甜o既杞子加以點綴更覺清潤，妙呀！ 田園雜菜伴南瓜汁：一向對菜反感o既XO仔尤其討厭菠菜，因為只要食一口，條脷都會嚡哂 ，好唔舒服；好奇怪，「8」所烹調出黎o既菠菜一啲都冇令細佬條脷有所不適，媽咪唔講真係唔知自己食緊菠菜 ！菠菜不但唔嚡脷，味道同底層o既紅蘿蔔絲一樣咁甜，個人覺得配上香滑o既南瓜汁有種中菜西食之感，讚 ！ 至尊京都肉排：京都肉排看似平凡，但原來內有乾坤！炸製o既外層超薄超脆，食落仲以為自己食緊春卷咁，去咗骨o既肉排肉汁豐厚，肉質好似層層疊o既火腿卷般，整體勁鬆化。 鮮腐竹銀杏炒時蔬：講真，小肥喺一餐飯入面毫無怨言地食咗成碟菜已經好難得，所以見到一碟沉悶o既白果腐竹西蘭花，胃口頓時大減，最終亦選擇比菜后表妹搞掂 。表妹食後感想：「腐竹好腍，西蘭花同白果就好脆，廚師用果乾調味有啲西化，不過效果唔錯，因為腐竹喺口內散發出陣陣果香，感覺新奇有趣。」 桂瑤魚翅炒米粉：桂瑤魚翅炒米粉其實係由桂花翅所演變而成，前者主要少咗蟹肉同芽菜，但係就加插咗瑤柱同米粉，價錢亦相對地較便宜 。撈入魚翅o既新竹米粉炒得好夠乾身同好夠鬆，不過最靚就係面層o既瑤柱粒；瑤柱乾炸到好似薯片咁脆，而且香口味濃，夾住米粉一齊食，唔需要多餘o既調味已經好美味！ 原隻乳豬焗飯：請留意，原隻乳豬焗飯必先預訂，Auntie訂咗兩隻，不過我地十二人當日都只係食得落一隻。如相所示，飯係放入乳豬內所焗製，飯粒軟綿綿得黎非常入味，包住焗飯o既乳豬亦都唔輸蝕，皮脆肉嫩，香口野味 ！ 炸龜苓膏之龜兔賽跑：XO仔燥底，所以好多時都會食龜苓膏清熱，夏天涷食、冬天熱食，就連涷食龜苓蛋都試過，就係未聽過龜苓膏可以炸黎食 ！熱辣辣o既炸龜苓膏外脆內流心，伴碟o既兔仔棉花糖香甜軟熟，烏龜蓮蓉酥鬆脆得黎又唔會過甜，三款都各具特色！值得一讚再讚o既係「8」o既廚房班底，一再証實創意果真係無限，喺炸龜苓膏o既同時亦不忘加插一段龜兔賽跑o既小插曲作為伴奏，猶如劃龍點睛般精彩 ！（注：始終炸製食物屬熱氣食品，所以建議熱氣o既朋友都係食返非炸製o既龜苓膏。） 葡撻，奶茶（免費贈送）：「8」o既葡撻可以話係小肥喺港澳食過最正宗o既葡撻，簡直可以同肥肥家族兩年前喺葡萄牙始創葡撻嗰間Pastéis de Belém店舖食過嗰啲比美 ！（http://travel.openrice.com/traveller/reviewdetail.htm?reviewid=9086）千層酥皮葡撻每層都好夠薄，而且毫不油膩，疊起上黎鬆化香脆，輕輕喺蛋餡上灑上焦糖粉、雲尼拿粉及朱古力粉加以調味，認真滋味無窮，再配上杯香滑濃郁o既奶茶就仿如神來之筆，清香怡人，寫意舒暢 ！埋單每位五百大元，中西合璧o既菜式不但高質，造形亦極之創新及吸引，當中更包括有魚翅、燕窩、鮑魚，太太們都大讚抵食！除咗食物水準高，服務生態度誠懇，「8」對其環境、氣氛、裝飾、衛生亦非常講究，我地十二個人都食得好滿意，小肥更準備每次遊澳將「8」列為必經之站添 ！

六棉酒家 (花城區)

是次澳門美食一日遊終站為「六棉酒家」。據年長o既團友們所講，喺澳門屹立多年o既「六棉」係市內著名o既懷舊粵菜廳，以其超抵食o既魚翅聞名 。「六棉」面積廣，但週六晚市，七點未到，全店已滿座，幸虧團長預先訂座，我地一行八人無需久等，即被安排入座大堂中央其中一張散座。「六棉」樓面唔高，聲浪比較嘈雜，枱與枱間o既活動空間又唔多，感覺就好似一般酒樓咁，坐得不太舒適，故亦無暇拍攝室內環境。

落單後不久，服務生隨即自動送上茶水（$10/位）、芥醬（$30）及三款小食（$8/碟）。 小食之雞腎（$8）：好少會見到酒樓會呈上雞腎作餐前小食，因為好多都會以更高o既價錢列入餐牌內。大大隻o既滷水雞腎爽脆惹味，非常醒胃 。埋單得知每碟$8，大家都後悔點解唔叫姐姐仔比多兩碟。 小食之雲耳青瓜（$8）：雲耳同青瓜都好爽，不過味道實在過酸 ，唔係好多人頂得順，真係情願餐廳換上雞腎小食代替。 招牌瓦罉雞煲鮑翅（$1300半份）：可能小肥第一次光顧，眼見自己隻碗入面有成梳翅時已經好開心 。不過，幾位曾經食過此味招牌翅品o既長輩，睇見姐姐仔分完八碗後，第一個反應居然係話份量比以前少咗好多 ；仲話當年同為八個人黎食o既時候，都係叫咗半份翅，嗰陣時分咗八大碗後，其中有幾個係有得添o既！當日瓦罉並未有上枱，服務生只係話「個翅黎咗，不如幫你地喺出面分埋」，跟住就擺咗八碗翅及湯料上轉盤等食客自行提取。不知為何，用瓦罉上o既雞煲翅入口時已不甚滾熱 ，雖然湯底雞味香濃，而且毫不油膩，但由於熱力不足，不得不扣一分。 油麥菜（$58）：XO仔對油麥菜o既印象唔深，亦唔清楚質感應該點先好食，只係有感「六棉」煮出黎嗰啲顏色綠就夠鮮綠，不過就好難咬得爛，味道又偏苦，唔多啱口味囉！ 翅湯津白浸肉丸（$88）：加咗津白o既翅湯濃郁甜美，用煲上又能保存熱力，津白本身又夠甜嫩，雖則肉丸有少少硬實，整體仍算得上為一道正菜。 白汁焗鮮蟹蓋（$140/隻）：蟹蓋必先預訂，淨係睇其脹卜卜而又金黃色o既外表，外觀已值滿分，入埋口更覺此乃全晚之最 ！蟹蓋非常足料，白色o既蟹肉鮮甜幼嫩，白汁濃而不滯，蟹殼仍黐有蟹膏及蟹「衣」，好明顯每隻蟹蓋都係用新鮮蟹所拆煮，團長真係冇介紹錯 ！ 杬角蒸魚雲（$88）：小肥唔多食魚，只係聽到auntie略嫌魚雲唔夠熱，食落有少少腥。 尖椒炒豬肚絲（$76）：豬肚絲又硬又韌，雖然用咗好多尖椒炒製，但係味道欠奉，不吃也吧！ 金蒜爆牛柳粒（$88）：黑墨墨o既牛柳粒，外形已經唔多吸引，質感又硬又嚡又乾，味道更加係咸得厲害，仲要搵咗好耐先見到金蒜o既影踪，失敗之作也 ！當日澳遊一天，原本喺新舊葡京酒店品嚐到法國及澳門美食，為味蕾帶來不少驚喜，可惜「六棉」幾道低水準o既菜式難以為旅程劃上完美o既句號，雖然其蟹蓋能夠挽回不少分數，但亦難抵各人失望之感 ，在下當真希望「六棉」下點功夫，省靚番個金漆招牌。

不夜天 (南灣)

媽咪居澳o既一位好友，一知道我地會去澳門一日遊，就話一定要請我地食餐飯。由於同行o既親友早已計劃行程，午餐及晚餐亦已預先訂座，最終只能抽出下午茶時間與澳門auntie相聚。Auntie真係心思細密，得知我地剛於新葡京酒店進食午膳，所以就特意帶大家去「舊」葡京酒店個咖啡室「不夜天 Noite e Dia Café」飲茶，等大家可以比拼一下兩間酒店。「不夜天」弧形o既正門好夠闊綽，直入大堂即可見到自助餐o既食品，望落都好乾淨企理。廳內左手邊為高咗一級而又半露出大堂o既散座，因為小肥當日行動不便，故我地一行九人被安排入座右手邊近洗手間位置o既長枱，經理哥哥非常細心體貼 。個人覺得，咖啡室內o既光線較為昏暗，四周多面金色o既鏡子襯上紫色o既光管感覺有啲夜總會feel囉 ，同新葡京酒店高雅o既格調截然不同。

澳門auntie真係客氣，除咗任由團友們自選食物及飲品之外，仲額外點咗幾款鎮店美食。特色蜜餞豬扒脆包（$55）：喺酒店食豬扒包都係第一次，果然高級過人！熱烘烘o既麵包皮脆包鬆，中間挾住o既炸豬扒不但香脆肉汁夠，配上甜甜o既秘汁食一啲都唔覺油膩，哥哥仲大讚伴碟o既洋蔥、蕃茄、青瓜等配菜都勁新鮮爽甜，全屬靚料 ，$55都好合理。木槺蛋糕（$28）：如相所示，木槺蛋糕層次分明，入口更覺香滑軟熟，簡單可口。Lisboa Club葡京公司治（$110）：豬扒包同木槺蛋糕雖然好味，但都難以同依客葡京公司治相比！XO仔本身口細，所以好怕食公司三文治，但係「不夜天」個公司治成卷狀，而且外層換上咗蛋糕皮，多方面下變得較易入口。葡京公司治魅力凝聚之處在於蛋糕外皮輕輕煎過，糕心軟腍濕潤得黎外表多咗份香脆 。此外，三文治餡除咗有蕃茄、生菜、火腿、蛋之外，小肥最開心就係見到大大粒o既牛油果，另整體香滑不少，美味非常，更可稱得上為細佬食過最正o既公司治 ！配角o既煙肉沙律亦好有睇頭，蔬菜全為高質鮮嫩之選，顏色翠綠鮮艷、質感爽脆多汁，實物與餐牌所示o既圖片無異，真係難得！請留意，由於餐廳亦有提供別款公司三文治，安全起見，落單時最好手持餐牌，並指出圖片，以免服務生混淆。今次短遊澳門，有幸光臨環境格調不同o既兩間葡京酒店，細嚐新舊酒店各有特色o既佳餚美饌，同享貼身o既服務，團友們都大感興奮。不過，整個旅程令小弟留下最深刻印象o既菜式就係「不夜天 Noite e Dia Café」個「Lisboa Club葡京公司治」，外表獨特新穎，美觀又美味，果真令人一試難忘 ！

禮記雪糕 (荷蘭園)

家中每逢有親友遊澳門，帶返黎o既手信大多為香蕉糕、杏仁餅、花生糖等，今次我地o既即日澳門美食之旅就大玩反傳統，去咗一間懷舊小店「禮記雪糕」度，購買以打計算而又不一樣o既手信。據悉，「禮記雪糕」係澳門老字號，所有雪糕全為每天自家新鮮製造，標明不含人造色素或防腐劑，保證真材實料，健康美味。既然團友極力推薦，我地全體人員就睇佢頭，一齊買雪糕返香港。「禮記雪糕」格局就好似一間茶餐廳咁，分開咗埋牆卡位、中間圓枱摺櫈散座、廚房及正門旁o既收銀部四大區域。見我地一大班遊客闖入店內，老闆娘鄺太就親自上前了解所需，並解釋店舖唯一可外賣o既食品為紅豆雪條，每枝十二蚊，如果要求大量購買，則可代為以盒包裝，以便攜帶上船。為免雪條溶掉，佢仲非常客氣地留底聯絡電話，提議我地飯後離澳前先返轉頭提取雪條，「禮記」果然冇改錯名，懂得以禮待客！禮記紅豆雪條（$12）：當生於澳門o既友人收到紅豆雪條作手信時，其喜悅o既心情全表露於臉上，未食已覺懷舊，因望見雪條勾起咗不少兒時回憶。紅豆雪條除咗紅豆味香濃，內外都可食到大大粒o既紅豆，用料認真十足，感覺就好似食緊冰凍o既固體紅豆沙咁；哈，唔知依啲算唔算分子料理呢？！