睇到新假期的介紹, 專程去觀塘廣場試試。
店在商場內, 難搵, 除非你去慣去熟。
去到, 我不由分說, 就選最辣的「辣到震雲南米線」、「麻辣皮蛋」和「泰北特辣小米椒醃生豬肉」。老實講, 三樣都不算好辣, 尤其是那個生豬肉, 酸味為主, 味道有點似泰式鳳爪。辣到震米線, 餸就夠晒多, 亦有顯著的「麻」, 但由於湯不夠熱, 令到啲餸亦好似不夠熱, 辣度同時亦下降了, 好在浸在底部的米線, 吸了湯, 幾夠味, 不過你要接受到佢油。皮蛋就中規中矩, 不算太突出。
老闆倒是十分健談的人, 坐下來詳談他由愛吃泰菜到轉吃川菜, 在甚麼地方入貨, 以及開業半個月來遇到不少嗜辣高手等, 又大談店內各種雞的做法, 好像好有心得。
這是一間值得一試的小店, 也不算太擠迫, 如果你自問吃得辣, 可以指明要加辣, 老闆話樂意配合唔同客人嘅要求喎。

終於都識得分九龍城兩間路邊雞了。
叫鳳華的在龍崗道, 大間, 大碟, 但冇咁好食。而且, 拼雞什, 要加錢。
叫燦記的在城南道, 近舊機場多啲, 細細間, 細細碟, 但好食好多, 又有燉湯賣。
今次喝的是嚮螺湯, 螺肉多, 味道濃, 個人覺得好抵飲。
例牌路邊雞拼雞什, 就真係細碟得滯, 好在還叫了砵酒焗生蠔, 味道也ok。如果你係想食得好飽, 雞, 宜叫半隻以上吧!
見到菜牌有滑蛋炒豬腦, 咁有趣, 下次應該可以試吓。
臨走前, 竟然見到最近話題人物鄭融進來, 一個不知是朋友還是家人的男士早已叫了食物等她。坦白講, 她走來的時候, 我真的以為是菲律賓人 ........ 不過, 看清楚便知是她了。難得最近那麼多新聞, 也沒有影響她的心情, 也沒有造作地戴甚麼黑超, 只是有意識地背著其他客人坐 ..... 當然, 大家都認得她了。我留意到他們叫了芝士伊麵, 這個大概也是招牌菜吧? 下次試試啦!

試過紐約芝士蛋糕和TIRAMISU, 覺得好普通。

前者, 只有「蛋糕味」, 吃不出芝士味, 底部的像麥維他消化餅亦略嫌硬了點。

TIRAMISU, 竟然有薄荷味? 是下了薄荷酒? 還是我的錯覺 ....... 由於個人不喜歡薄荷, 所以不敢恭維了。

芒果忌廉批沒有供應, 實在太可惜了 ...... 希望下次試到, 可以給它一個笑吧。

跑馬地, 有錢人雖多, 盲人大概不會太多吧! 想混水摸魚, 其實, 一點也不容易。

之前試過泰面膳「夠膽死」整杯「冇青檸嘅的青檸梳打」, 已經嘆為觀止, 今次試海洋小廚, 唉, 心情都真係有啲矛盾-----店員服務不錯, 分分鐘體貼過新同樂, 幾親切, 但係食物真係 .......

作為「招牌菜」, 蔥油雞例牌賣$68還不算過份, 但沒有油只有薑和蔥的感覺, 又未免令人覺得, 去永祥買盒切雞飯可能抵食啲。

魚湯浸大蜆的是否「真正魚湯」無疑是值得商榷, 不過, 蜆唔係好大是鐵一般的事實, 而湯的胡椒味較重, 可能重手了些少, 幸好食完沒有喉嚨乾涸, 這一點比甚麼魚蛋大王優勝。但係標價是$88 .......

銀芽蝦乾炒韭菜花就稍鹹, 蝦乾好多亦好大, 可能導致鹹味超標。而且, 賣$58可能真係太貴。

所以, 結論係, 貴, 而且, 唔係太值呢個價 ......

之前說了想吃這裡的大千雞, 今晚本來想去吃波記, 但有性格的波波果然玩「唔開檔」(生意好, 唔休做), 於是就再步行到荷蘭街光顧南北美食館。

結果 ....... 唉, 爭啲就係爭啲 ...... 冇咗辣椒乾, 即刻失去了神髓 ----- 即使, 有不苦的花椒, 有酒味和醋味, 但沒有了辣椒乾作畫龍點睛之效, 令人覺得形似但失神。可惜, 可惜。當然, 對於好多不能吃辣的人來說, 這道菜, 還是吃得過的。

回鍋肉, 其實只是「鹵鍋肉」的變奏版, 沒有港式上海菜的濃濃醬油味, 又沒有正宗四川干煸回鍋肉的風味, 不過我都食晒 ...... 菜飯偏油, 食完個肚咕咕聲, 不過, 係好吃的。

油豆腐粉絲湯就不敢恭維, 尤其是豆腐卜竟然有些怪味, 粉絲亦都太少。

生意是好的, 希望老闆畀啲心機, 贏番D口碑返嚟。今次「黑面神」又不在, 太好了, 之前因為她而卻步的熟客們, 可以放心嚟開飯喇。

對面, 「開梗」間叫花滿庭的, 不知是甚麼東東, 編輯們, 不妨去打聽一下吧!

合隆, 這個名字, 其實我未聽過, 真係「失覺晒」!
聽聞它是魚蛋大王, 又有特色湯底, 於是專程去試過兩次, 得出的結論是:「魚蛋大王」前, 宜加一個「鹹」字, 魚蛋還好些少, 魚片真夠鹹, 片頭更是鹹到九彩!
最慘仲係, 除咗鹹之外, 並無任何味道先可怕。
本人食過最好食的魚蛋, 乃長洲張記, 起碼, 真係有魚味。合隆, 不但冇, 而且食完喉嚨勁涸, 鹹味大概來自味精, 把我這個味精大王徹底擊倒。
另一次去, 試過越南湯底和魚麵, 還好, 前者有片檸檬, 酸酸地, 還有疑似「鵝帝」的香草, 加上聲稱是用牛骨熬的湯, 至少, 冇再喉嚨涸了。至於魚麵, 也遠比魚蛋魚片好。
牛腩好普通, 鞋鞋地, 牛肚就不錯, 不過都好有「味精感覺」。
本來都想給個「ok」, 但, 名不副實, 所以, 都係給個喊吧!

這間幫襯了十多年的小店, 始終, 令人回味。

吃的還是從前叫「回鍋肉」、近年終於肯更正的「鹵鍋肉」菜飯, 不過, 食咗咁多年, 近年先識得叫佢「走筍」(本人唔食筍), 咁樣d肥豬肉就會多d ...... 而菜飯本身已有菜, 其實已有中和作用, 好過餐餐食剩幾舊筍, 咁浪費。

味道是沒有多大變化的, 反而, 附近, 變化真大 -------- 同一條街, 鴛鴦mix茶餐廳擺了幾多年, 舖位都租唔出; 滄浪庭開過又摺了, 接棒的茶餐廳又摺了, 而家連綠野先踪都摺埋 ........ 反而係南北美食館那邊幾間小店, 一直可以生存得到, 不得不令人佩服。

廚房屢屢傳出像大牌檔炒菜的聲音, 好有氣勢 ...... 下次想再嚐大千雞, 好懷念它的味道。

今次來, 那個被各位食家口誅筆伐的黑面乾瘦阿姐已經不在, 不知是放假, 還是已經另謀高就呢?希望是後者啦!

這間泰面膳, 雖然跟土瓜灣一間泰國菜館相似, 但, 相信並無關係。
能夠在跑馬地這種富貴地方開業, 一心以為它有點「把炮」, 於是就去試試。結果 ..... 真想替它改個好名, 叫「泰難食」 ...... 而光顧過的人, 又真的有點「泰不幸」了 ........
冬陰功湯, 相信是泰國菜最基本的東西, 沒錯, 真的大一隻一開二的大蝦, 但湯完全像醋一般, 勁酸, 濃味到大概可以加多一碗水一開二 .......... 我已經是被味精薰陶慣的人, 不敢想像那些不吃味精的人, 如何能喝下它。
泰式海鮮炒金邊粉, 還算似樣, 起碼那些真是金邊粉, 不過可能是下午茶餐的緣故, 碟頭不大, 係唔會食得飽的size。
青檸梳打先最爆笑 ....... 不但冇青檸, 乜檸都冇 !
埋單找數, 居然唔收大部份信用卡, 只數美國運通, 不明何解, 價錢又唔係平 ......

有機會去新同樂食飯, 並無想像中樂而忘返的感覺。

去時不過六點鐘, 太早了, 空無一人。侍應可能未熱身, 所以對於有客到可能感到訝異。我對筷子有漬, 想表達意見, 類似部長的物體已經皮笑肉不笑地說, 這是象牙筷子, 對對如是 ----- 對於如此虛偽的表情, 我的反應也慢了, 忘了回敬他:「我要北極長毛象的象牙造個播~」

座位窄, 幾乎入唔到, 裝修, 係浮誇一點, 但也無可厚非。

好了, 談回食物。雞燉翅湯味極佳, 但翅極軟, 不知是不是貴的貨色, 平常人會覺得無咬口, 雞肉亦理所當然地鞋晒。燒乳鴿倒是十分出色, 不過同上的西蘭花鴿肉就沒有肉味了。肘子麒麟豆腐, 所用的火腿只得一個鹹字, 幸好不靭, 但白白浪費了軟滑的豆腐。

賣單是八百多元, 值不值得, 真是見仁見智。

值得一提的是食食吓, 一行四人兩大兩細的大陸客來了, 打扮極街坊, 小孩們只顧玩電話game, 連翅(一人一盅)擺在眼前都唔食住。有疑似熟客的中年男女來了, 見此情況, 不足十分鐘又走了, 可能被大陸客嚇跑了。我看到, 心情變得極愉快: 扮高檔又如何? 象牙筷子又如何? 還不是睇錢份上, 人哋著短褲拖鞋入嚟, 畀得起錢, 你咪一樣涎著臉招呼人?

風味園的前身, 是曾經在旺角享負盛名的極之好車仔麵。

由於不是經常去那一頭, 風味園開了很久, 我都沒有去過, 只是路過時留意到佢有足球直播。從門面看來, 不過是一間極普通的茶餐廳。

但有一次, 偶然的機會之下去了光顧, 卻被它的喇沙湯底嚇了一跳: 咦, 做得咁似樣嘅???

佢嘅麵食係有自由搭配, 有麻辣、酸辣、雞湯、喇沙等湯底, 再加車仔餸。我不過是無心插柳, 點知, 佢個喇沙湯竟然椰汁味十足, 雖然要了大辣, 但當然是不辣的, 但味道夠濃厚, 雖然跟灣仔加東有距離, 但肯定好過同區的馬拉盞 ------- 當然, 美中不足的是沒有獅蚶, 咁人哋不過係「湯底」, 又唔係正宗喇沙, 但煮到近似的味道來, 已經值得嘉許。

朋友食炒公仔麵, 我嫌太濕。其他食品, 也好像不太吸引, 都係繼續食喇沙啦!