過去, 我主要是幫襯軒尼詩道近馬師道那間車記, 而且次次都係食車仔飯, 必選之餸為麻辣腩肉, 真係辣得幾嗆, 價錢亦算平。

最近, 發現謝斐道都有間, 仲有點心供應, 於是就試試。例牌的蝦餃、燒賣、叉燒包等, 普普通通, 不過一籠三粒點心又好似唔多夠 ...... 但最大的發現, 係佢嘅辣椒油-----裡面竟然有辣椒乾! 一試之下, 辣得有勁, 點點心都ok, 相信用來撈粉麵會更佳!

值得一提, 係落單阿姐幾搞笑, 叫點心時要求人客順number落order, 由小至大, 令人費解, 有咩關係呢? 唔通係有密碼嘅?

傷心酸辣粉係一間我一直好想試的小店, 尤其係佢門口寫住「辣到流眼淚‧酸到流口水」, 講到咁勁, 應該試下。但係好少去嗰頭, 間舖又咁細, 買外賣又唔知可以去邊度食, 所以 ...

最近, 佢終於喺同一條街開咗「第一分店」, 雖然都唔算好大間, 但點都冇正店咁「屈質」。由於已經吃過了正餐, 於是只係叫了三個小食, 打算下次再試各式粉類。

1)口水雞(下例)真係只有小食咁嘅份量, 但味道不錯, 唔係荃灣雲桂香嗰種酸味雞。
2)夫妻肺片, 色水同口水雞一模一樣, 但麻味重d ...... 冇錯, 睇唔到有花椒, 但食到有麻味。
3)招牌腸頭, 最令人失望, 皆因上述兩樣都叫中辣, 而呢樣特登叫大辣, 結果, 佢根本唔係一樣辣餸, 附上的疑似生胡椒粉, 也不是辣的, 可能係夥記做到頭昏腦脹, 乜都問要咩辣吧!

賣單係$105, 唔算平, 水準亦不過不失, 不過至少不是掛羊頭賣狗肉那種「黑店」, 下次一定要試下酸辣粉。至於嫌佢迫夾的朋友, 可以考慮行多幾步去分店, 起碼, 有冷氣嘛!

成日出街食飯, 想清一清腸胃, 必定好旺角吃白粥, 外加一碟皮蛋子薑。

白粥的味道, 十年如一日 ....... 我不敢說它沒有味精, 但我從來沒有在那裡叫過飲品, 大概味精不算太勁吧, 更重要的是, 有些粥店, 加了味精, 還是不好吃 .......

皮蛋當然不是貴價貨, 還要下些糖伴碟, 薑倒是嫩的, 一吃無妨。

埋單找數, 廿二大元, 如果從心靈滿足角度去衡量, 是超值的。如果你是大胃王, 還是去叫麥記的double足三兩吧!

試過麻辣媽媽這種「超人氣、低水準」的川菜後, 心有不甘, 改天又試了另一間有川菜吃的地方,就是遠在荃灣的雲桂香。

這家店, 日頭賣米線, 夜晚做川菜, 穩打穩紮,雖然叫「雲」、「桂」好像跟四川無關, 即管試一試吧。所試的包括夫妻肺片、口水雞、五味蟶子皇、四川酸辣粉。

首先登場的是夫妻肺片, 賣相好正宗, 味道亦頗辣, 還有一點牛的羶味, 對版喎!

然而 ....... 接著出場的口水雞, 好古怪, 一點也不辣, (落order時叫中辣), 微酸, 好像用了罐頭菠蘿汁或茄汁做芡 ...... 雞還算滑, 不過, 不辣的口水雞, 不是太能令人流口水了 ....... 懷念以前在長沙灣的辣妹子, 可惜, 可惜。

五味蟶子皇, 味道一般, 也是有點酸, 蟶子都幾夠多, 而且洗得幾乾淨, 但沒有驚艷。至於酸辣粉, 撲鼻而來有酸味, 吃下去卻甚麼味也沒有 ....... 叫阿姐拿辣椒油來啦, 祈禱不要出現潮州的那種 ..... 結果, 不幸言中 ....... 吃川菜點潮州辣椒油, 還有甚麼意義呢?

飯後甜品的西瓜, 倒是出類拔萃, 起晒沙 .......... 因此, 給它一個ok, 如果你試過魔芋雞、孜然牛肉、回鍋肉或蒜泥白肉等, 記得告訴大家到底水準如何 , 然後就可以界定它到底是不是一間川菜館。

可能是這裡好評太多，可能是因為那裡人氣太盛，昨晚去光顧麻辣媽媽，結果是極度失望。
多人，預咗，要等，預咗，坐得唔太舒服，都預咗。
但，所叫三道菜，形似而沒靈魂，實在太令我失望。
本來想叫麻辣魚春煲，一來好多人讚，二來賣相又係幾奇特，可惜八點幾就已經賣晒。
所叫的菜，包括水煮魚、辣子雞和麻辣雞什煲，全部都要中辣。
結果，全部都唔辣 ........ 我們連飲品也不用叫,我連茶也沒有喝一口, 可想而知有幾唔辣。
麻辣雞什, 冇花椒, 又何來「麻」呢? 雞什件頭大, 但雞腎較靭, 還有薯仔作伴菜 ......... 問題係, 冇辣味。滿江紅小甜甜的麻辣燙, 似樣得多。
辣子雞, 不錯, 外形完全似樣, 有辣椒乾、辣椒、腰果和雞粒, 但係, 亦都係冇花椒, 一粒都冇, 而且, 辣椒乾的色澤, 令人懷疑係冇炒過, 就咁切碎就放再去一齊兜, 辣味自然出唔到嚟! 我食過最好的, 始終係譚魚頭的辣子雞。
最後, 水煮魚, 係用鯇魚, 窩中難得有十粒左右的花椒, 可惜, 都係唔辣, 仲有劣質花椒的苦味, 辣椒乾依然似冇炒過, 成件事變得好搞笑。咁雲陽閣、滿江紅的水煮菜, 肯定高佢十九班。
人氣不過肥皂泡 ............

有晚, 想吃菜飯, 結果去了西環以前常去的南北美食館,吃了一個鹵鍋肉菜飯, 而且, 十幾年來第一次叫侍應「走筍」 ........ 味道已經無法像十幾年前那麼出色了, 完全是感情分搭夠。

第二晚,心有不甘, 記起天后的順豐 ------ 其實一直沒有記它的名, 只記它的位置 ------- 因為它開到凌晨, 夜點去也有菜飯吃吧?

排骨菜飯還是老樣子, 白菜特多, 排骨夾雜了薑味和醋味, 幾醒胃, 微暖的豆漿則有「無添加」的感覺。我揀了店外的枱, 頗有餐風飲露之感, 還替它招徠顧客 ......... 埋單不過三十元, 這種時勢, 還是食得過的。

第一次食螄蚶，沒記錯的話是數年前在牛皇打邊爐，感覺沒甚特別，即使侍應一再強調「男人食咗身體好」，但也沒有再吃的衝動。

後來，蔡瀾寫旺角的「馬拉盞」，順道提了螄蚶對喇沙的重要性，我記起同心好似有白灼螄蚶，於是就去試了。嘩，一上枱，血淋淋的一碟，要自行剝殼　．．．．．．　一吃之下，好正，好有「谷血上腦」的感覺，如蘸一點附送的泰式辣汁，則少了點「衝勁」，多了點香辣味道。

如果喇沙加了牠（起碼要十隻！），可以想像到，味道會提升十倍，可惜，香港食唔到。

之後，再去同心，又試一試螄蚶沙律。這個是比較平易近人的選擇，去了殼，無血水，賣相佳，味道也不太搶。另外還試了炸蝦餅，也是物有所值的選擇。

因為睇了上一篇食評, 特地來嘉華試一試黃金磚。

甫坐下, 即快速從餐牌中搜尋「黃金磚」三個字, 居然遍尋不獲, 難道已經剩下「頹垣敗瓦」?

原來, 餐單上是沒有的, 反而在店內靠牆的介紹中, 有「嘉華黃金磚」, 還有照片。侍應話二十元, 不能跟餐, 沒所謂吧。

明知這種西多士製作需時, 於是瀏覽餐單上其他食物。一看之下, 發現這裡結合了潮式粉麵、港式炒粉麵飯及越式粉麵, 通常茶餐廳都不賣越南菜, 可能, 嘉華的老闆或大廚特別好此道吧。有一個豬膶金邊粉, 幾特別的配搭, 或者可以下次一試。

黃金磚來了 ............ 它的外表, 好像旺角極之好的炸豆腐。說它是西多士其實不太適合, 因為部分火腿是外露的, 不完全是「釀」進去, 在功夫方面當然層次低一點。但一咬之下, 發現它遠比西多士脆, 而且, 鹹牛肉沒有想像中的多, 反而沒有跟火腿「撞」出過鹹的效果, 味道適中。附上一小碟沙律醬, 是可有可無, 因為已經夠味了, 而且不是蝦多士呢。

個人一向喜歡芝士火腿西多, 如果嘉華肯試下推出多種「黃金磚」餡料的選擇, 相信會更加多人想吃 .............

如果蔡瀾沒有介紹這間食肆, 真的開了張營業了也不知道。畢竟, 那個位, 好少經過, 而店舖的門面也不太起眼。

店不大, 要等位, 慣了, 沒關係。類似老闆娘的物體, 是講到嘴唇邊但講不出其名的前無線藝員, 後來才聽人講起 , 佢叫何嘉麗, 不過同做DJ和運動員的都不是同一個人。難怪, 店內貼滿了不少藝人的相呀、簽名呀。

好了, 蔡瀾推介此店的海鮮喇沙, 一定要試啦。無疑, 係有四粒螄蚶, 可能真係一粒都不能少, 但起不了太大作用, 因為湯底不夠濃, 好淡。只要你去過灣仔的莎巴、巴東、蝦麵店, 你就知喇沙的湯應該有幾濃。或者, 有人喜歡清淡, 但, 吃粥似乎更能清腸胃呢。

參峇蝦係幾普通, 除咗大隻之外, 味道同賣相都唔見得好突出。而福建炒麵, 黑豉油好似失咗踪, 幸好, 真係敢用豬油, 油到反晒光, 雖然豬油渣不多, 肉亦少, 但起碼好味。不過期待有黑豉油的甜味的話, 都係去莎巴啦。,

再加兩杯飲品(奶茶恐怕是shake出來而不是拉出來的拉茶), 結帳已經過二百蚊, 其實唔平。見到佢有好多同馬拉菜無關的食品名字, 像雞中翼腸仔, 肉醬豆腐之類, 唉, 在咁嘅時勢, 在旺角, 開食店真不易, 本來想畀「喊」, 都有d同情分加一加, ok啦!

只要有誠意, 實事求是, 係可以生存到嘅。尤其係, 見到香港仔的扒王之王終於如願地關門大吉, 更加証明到這一點!

久違了的雲南風味, 猶幸, 味道始終如一, 真好。
當然, 擠迫也是「始終如一」, 要嫌, 不妨專揀「拍晒烏蠅」的店舖去光顧。
吃的仍然是過橋米線, 湯依然是一層油泛面, 完全不理會潮流趨勢。
價錢好像加了一蚊, 也不為過啦。
同枱的情侶, 一度想叫我吃的過橋米線, 後來女方說「個樣咁怪」而打消了這個念頭。男方後來還說「以前來食都沒有過橋的」 ........
沒關係, 我食了十年, 也是情有獨鍾。