呢排, 我好畀心機來openrice寫食評, 不是有得分, 而是, 太橋, 幾乎餐餐都有新奇刺激的遭遇。

像九龍城的回味館, 好耐之前食過一次, 記憶中係蒸食肉餅等港式小炒, 都幾ok, 又留意到它有不少川菜, 反正前日先在佐敦新過一間新開的川菜(相聚小廚), 今晚不妨又試下這間的水準如何。

結果如下:

1 夫妻肺片 ---------- 明明是屬於前菜的冷盆, 偏偏是最遲來的。味道方面, 只有蒜茸味, 沒有辣味, 連死辣都沒有先至出奇!

2 辣子雞丁 ---------- 也是不辣的, 但炸得幾好, 冇焦味, 反而好似有d蒜茸牛油味, 但至少係合格的, 你食得辣就不妨叫佢加辣吧!

3 水煮牛肉 ---------- 終於都講到主角了! 此道菜一捧上來, 外觀很像樣, 但係, 一挾塊牛肉一咬, 咦, 浸味咁似 ........... 午餐肉??? 佢d牛肉係搵咩醃? 可以醃出午餐肉味來? 其他配菜除一般的大豆芽和苕粉, 還有離奇地出現的白菜仔(?), 而它們都係可以吸辣的, 只係, 浸午餐肉味影響了所有食物的味道。

算吧啦, 下次都係食番港式小菜, 好地地做咩要去求証佢個廚係咪識整川菜? 最搞笑仲係, 三道菜個樣, 其實同正宗川菜幾乎一樣, 但味道卻不是那回事了!

「相聚小廚」原址, 是一間睇波的茶餐廳, 好記得仲大字標題, 標榜唔知邀請了咩順德名廚坐鎮, 可惜, 未趕及光顧便摺埋了。新開的, 卻是以川菜掛帥, 對於嗜辣的我, 自然要試試試吧!

所點的菜包括:

1熗炒土豆絲 ----- 即係「大陸薯條」, 不過唔係炸, 而係炒,, 見到佢有用花椒同辣椒乾, 都幾正宗, 只係略嫌炒得濕咗少少

2霸皇辣子雞------ 一大盤炸雞塊, 看來係用高溫油炸, 好夠熱, 不過不夠辣, 譚魚頭在呢方面做得好d, 不過加入了腰果, 算係冇咁單調

3郫縣醬干煸肥牛 ------- 連我這個長期受味精侵襲的人, 都覺得此菜過鹹, 大概係郫縣的豆瓣醬, 本來就係辣中帶鹹, 加上似乎加了孜然粉, 於是over左, 幸好肯用京蔥去炒, 連埋肥牛一切食會好d。

4風花雪月 --------- 係啤酒來的, 最初我在觀塘的雲南風味第一次飲到, 覺得幾清, 可是好少會特登買來飲, 這裡$16一支, 唔算平。

第一次, 感覺係不過不失, 始終香港正宗川菜館不多, 像這間也不得不賣些港式碟頭飯和小菜來拉闊客源 ............ 會再去光顧, 試試它的水煮系列做得如何吧!

終於有耐性, 去呢間十勝, 站在門外狹小的行人路上等位, 全因為想試下呢間經常有好多人排隊的小店, 質素如何。

結果呢? 小食方面係不錯的, 所叫的煙豬肝和芝士免治肉餅都好得, 前者的煙燻味令豬膶本身的腥味大減, 醬汁亦起到點睛作用; 肉餅就勝在大塊得黎又好鮮味, 雖然芝士不算多(點都冇去東榮火鍋打邊爐食的芝士牛丸那種震撼效果!), 但一分錢一分貨啦!

反而, 厚燒豬豚肉, 真係冇乜味, d汁又流晒落d飯度, 變左d肉唔夠味啦! 滑蛋吉列豬扒, 炸得唔夠脆, 好在味道方面好過厚燒者, 而在滑蛋中加些小蝦米, 也是聰明的做法。

不過, 要等咁耐, 對我黎講, 就覺得唔係太值得 ..............

有人笑陳冠希、阿嬌在西片中做「茄哩啡」, 然而, 笑人者, 連到片場做場務、幫人挽鞋的機會都冇。

輿論可以吹到天上有地下無, 也可以一沉百踩。食評當然也是一樣, 這便是大家親身去試食的意義了。

我終於試到勝香園最出名的茄牛麵 ---------- 在烈日當空之下, 午飯時間都就完, 勝香園仍然係爆晒棚, 反而gough 40就拍晒烏蠅。夥記好心安排我調到冇咁曬的位, 好了, 可以目睹廚房點整嘢!

「茄通冇得加茄架! 茄腿通先有!」一大鍋茄通, 用個「殼」「筆」落不同大小的碗中, 而兩個火爐好到好猛, 佩服掌廚人士的忍耐能力!

端上來的茄牛麵, 講真, 其貌不揚, 但一飲啖湯, 茄味極濃, 將番茄連牛肉一齊食, 或湯加麵一齊送入口, 先領略到佢有幾美味。當然, 你如果對任何茄都沒興趣, 這個麵(或通)就對你毫無吸引力了。

奶茶方面, 太澀了, 同附近的蘭香園有距離, 不過我見佢係剛沖好, 唔知有冇關係呢? 點都好, 自己試過就知係咩一回事, 不過都多謝咁多朋友落力介紹此店, 而且如實報道呢!

兩樣夾埋$33, 唔算平, 但飽晒, 連脆脆系列都冇力再試, 唯有等下次。

有一晚, 「與敵同行」做梗尾二嗰集, 行了老遠來到這間重慶燒烤店試下, 真係有d不愉快。

隔桌同我哋幾乎同一時間落單, 人地出去煲完煙就有嘢食, 我地等了又等, 睇埋郭晉安掟阿呂珊落地下, 都未有一樣串燒來(統共叫了五樣, 包括雞脆骨、雞翼、虎蝦、牛脷和羊肉), 前後起碼有15分鐘以上, 催也催了兩回。

千呼萬喚始出來, 結果, 蝦我冇食, 唔知點, 但係幾大隻。雞脆骨其實即係雞軟骨, 幾惹味, 但似炸雞軟骨。雞翼普通啦, 牛脷同羊肉一上枱卻竟然係唔熱的 --------- 即叫即燒都唔熱, 唔通係要過冷河? 定係師傅都掛住睇鄭嘉穎同郭晉安打架、蒙嘉慧碌落山?

人客係好多嘅, 我見到, 兩邊舖都幾乎爆晒棚, 但係咪真係咁值得等呢? 又或者, 「等」少d人幫襯的時段去, 質素會好d掛!(至少即叫即燒的唔會唔熱吧!)

甚少光顧朗豪坊的食肆, 主要係去那裡睇波衫或行muji多。有朋友食過佳餚店, 說太爺雞好好味, 於是就去試下。點知, 經理話賣晒 ---------- 可能係星期日, 多人預訂的緣故吧!

唯有食古法鹽焗雞啦! 再加酥炸生蠔和魚香茄子煲。老實講, 三樣都係「街坊小菜」, 尤其係魚香茄子煲呢d, 大牌檔必有, 價錢介乎$28至$48之間, 這裡卻是$98 --------- 在朗豪坊的靚景襯托下, 會好食d?

答案係, 同個景冇關, 但又真係幾好食! 其中, 酥炸生蠔真係做到外脆內軟, 蠔肉仍然很嫩。魚香茄子煲, 都算大煲, 而且好香, 茄子亦煮到好淋。鹽焗雞就有鹹味不均勻的情況, 雞胸位亦都一如大牌檔的貨色般「鞋」, 畢竟, $120的雞和$70的雞, 都係雞啫。

賣單計數, 係$385, 已經係冇飲嘢冇食甜品, 只係加多碗白飯。算係食得過, 希望下次食到太爺雞時, 就會改口話「大家一定要去試」啦!

除非你是不吃牛肉. 兼且從來沒有到過九龍城, 否則, 清真牛肉館, 未去過都聽過吧！

幾年前, 據說該店不知經理還是甚麼人走了出來, 在同一條街開了間「北京清真牛肉館」(好似改了名做咖喱羊肉館了, 大家留意有冇?), 這種魚目混珠的手段, 不是因為對舊僱主強烈不滿, 就是想博人地「摸錯門」 ------------ 大可以睇下過去的食評啦, 有好多人真係以為係分店, 或以為係一樣(好在冇人以為係正店), 如果我有錢, 我一定租佢隔離兩個舖位, 分別開一間「南京清真牛肉館」, 和一間「東京清真牛肉館」, 以彼之道, 還施彼身。

那間老翻店, 我早年幫襯過兩三次, 牛肉餅不夠熱係致命傷, 不用等位係「引你落搭」的技倆(有冇人願意在街邊買老翻碟時都要等畀錢?), 由於正店經常爆棚, 門口擠滿人的嚇人場面, 真的嚇走了不少人, 助長了老翻店能夠一直偷雞生存, 大概是這個緣故, 正店老闆一於在附近的打鼓嶺道開了間真正的「分店」, 我今晚就去了試試。

別以為, 新開兼且咁隔涉, 一定冇乜人, 一入到去又係咁墟陷, 不過唔駛等位。今晚食的包括:

1 ________ (三個字的, 最出名的, 好易估, 唔識就自己去睇下)
2 孜然羊片
3 咖喱羊腩

牛肉餅比正店還要滾燙多汁, 不過我未咬已經穿了漏汁, 好在d肉質真係鮮嫰軟熟, 原諒佢「穿崩」啦! 孜然羊片好似在舊店沒有, 孜然係西藏菜常見的香料, 串燒羊肉一定要落佢先好食, 而這道羊片亦幾有水準, 羊肉不算太羶, 孜然味夠濃。至於咖喱羊腩, 就比正店失色了, 雖然咖喱辣咗, 但羊腩不夠肥, 有點「鞋」。

還想試的, 仲有山東燒雞、羊肉獅子頭等, 不過冇可能食得落啦, 唯有等下次啦!

不嫌貴的人, 會捨得去Amaroni's Little Italy 食所謂美式意大利菜。嫌貴的人, 叫他們去吃必勝客, 也老不情願吧!

你見到有咁多人畀「笑」, 就知呢間嘢唔會係「掠水」, 真係幾物有所值。日前去, 兩個人, 三道菜, 差不多四百蚊 ----------- 所點菜式, 包括海鮮意大利飯, 芝士薯仔同巴馬火腿配蒜茸包, 其中意大利飯係最出色, 堅持不讓客人「食軟飯」(意大利飯係應該硬硬地), 也沒有過量的汁, 海鮮材料都幾豐富(雖然來來去去咪有係蝦呀、魚呀、青口嗰d)。

芝士薯仔有d膩, 但可以接受, 巴馬火腿當然正, 但蒜茸包就不像話了。

最令人費解的, 是一入門口, 接待處排住四五個女侍應, 好似night club咁 -------- 駛唔駛咁多人帶位呢? 而我去那晚, 她們的帶位策略係 ----------- 將沒有訂位的客人, 安排在餐廳最入或最出的位, 而預留卡位給遲來或訂了枱的人。訂了枱, 固然有權坐好d, 但點解要預留卡位益遲來的人呢?係咪早來的客人, 因為「落在搭」,可以求其塞佢地坐d差的位, 而用靚卡位吸引未「落搭」的人呢?

我想經營食肆也應該有點「人情味」, 也應該當每個客人都係人, 公平對待, 先到自然先得。

同心, 未必係九龍城最出名的泰國菜館, 但我由佢未紅食到佢擴充營業, 都幾替老闆娘高興。雖然, 佢話金融海嘯令食客減少, 但觸目所見仍有半滿, 點都好過人地拍烏蠅!

早前, 覺得佢水準好似跌左, 尤其係叫胡椒雞居然冇胡椒, 真係太離譜喇! 老闆娘就話有時師傅放了假, 唔同人煮, 水準有分別都係無可奈何的事。好在今次去時大師傅在陣, 水準應該有保証吧!

鴨肉生菜包跟之前食差唔多, 但唔見晒D辣椒乾, 唔知係咪夥記聽錯咗, 我叫佢辣D, 佢以為係唔好咁辣呢! 值得一提的, 是生菜係可以揀D大塊D畀客人吧, 否則, 就包唔到D鴨肉碎了。

脆肉炒椰菜苗就係咁多年來最出色的一次, 那些椰菜曲鮮嫩到不得了, 成碟自然一掃而空。而豬什湯河D湯依然咁濃, 材料亦冇少到 --------- 上半年乜都話加時, 去邊度食飯D野都好似縮左水, 希望而家D野可以平番, SIZE都可以回復舊觀啦!

賣單找數, 百二蚊左右(因為今次冇叫啤酒), 抵食, 希望大師傅放少D假啦!

在九龍城打得邊爐多, 點都要周圍見識觀摩, 比較一下。

新明記據說好出名豬骨鍋, 我唔係特別此道, 但只知道今次去食, 個湯OK, 但D豬骨好似冇骨髓啜喎, 有D搵笨, 而且叫六樣野三樣話冇, 有一樣仲要係追問先話冇, 服務認真麻麻喇!

不過, 肥牛係幾夠牛味, 而且算係大碟啦, 蝦滑拼墨魚滑, 夥記幫手落, 二者混為一體, 味道又幾特別, 其他地方食唔到。後補的雞腸亦肥大多油, 好此道者一定食過返尋味。