季季紅執左後，好耐先有番間酒樓，實在太好了，試問屋企附近冇一間酒樓又成何體統呢？ 早兩日試過買外賣叉燒切雞飯，非常好食，啲叉燒係冇得彈，比附近某沽名釣譽嘅 x 燒大王好九條街 (基本上果間嘅叉燒係垃圾)。 今日嚟試下飲茶，啲野等好耐下，好似食法國大餐咁，食完一味消化哂喇，再上第二道菜，不過開張唔夠一星期係咁㗎喇。 叫左點心如圖啦，蝦餃好食，蘿蔔糕賣相核突但都好味喎，百花魚肚個魚肚好耐未食過咁有魚肚味，而家好多酒樓嘅魚肚都係把鬼。不過啲蝦膠仲有冇再少啲。 魷魚鬚味道幾好，但唔夠熱。鯪魚球好味又唔多粉。 服務嚟講呢，普遍員工除咗好似發緊夢咁呢，都冇咩問題嘅。但有一個男經理，好似幾高級，件西裝領有條紅邊嘅。佢自己執緊枱，見到你舉手叫人落單，就好似睇你唔到咁。跟住執完行咗過嚟附近，我再望住佢叫佢，佢都視而不見。 *** 以下同食評無關，大家可以 skip 咗佢。 有時工作上嘅野，唔係話你自己做緊野就關人，你忙緊叫同事跟下都得啫，去好多食肆啲員工都會咁做，何況做到咁高級？仲要後來忙完再叫都係扮盲。 有時真係唔好怪啲青年人叫佢哋 “廢中”。響一間公司做野即係坐埋同一條船，如果個水手因為煮緊飯見到隻船入水都唔理嘅，係咪應該即刻踢佢落海呢？

本身呢度都有間金滿X，都係越南野，但非常港式。呢間新野係集團式(雖然金滿X都係集團)，好似特色點，但貴過金滿X一些。今晚路過見到，嘩，仲可以坐街邊食，真係有風味喇，等我得閒試下先。

本來一心想黎食魚旦粉，但見到餐牌貪平（38 蚊）叫左窩蛋牛肉飯食。 大家見到圖片好似麻麻地咁，唔好比佢誤導，佢唔係麻麻地咁簡單，而係難食到嘔。有幾難食？且聽我慢慢道來。 首先，窩蛋牛肉飯有咩特點？係有隻生蛋打落牛肉餅度嘛。咁隻蛋生o既點食呢？靠 D 飯 o既熱力，再搞云隻蛋撈飯，去整到半生熟咁食囉。 難題黎喇，如果個蒸飯本身係凍 o既，咁點食呢？我冇誇張到，個蒸飯唔係唔夠熱咁簡單，而係直情凍o既。我一路搞 D 蛋，一路食，我都冇見到 D 蛋黃或蛋白有凝結過，好恐怖。 最難頂 o既係，個牛肉餅又係生生地咁 o既  feel，本來如果飯夠熱咁係冇問題，半生熟仲正添。但正如頭先所講，飯係凍架嘛，我覺得自己好似食緊生肉咁，真係一路食一路好想嘔。正宗窩蛋嘔飯。 跟住我峽左啖紫菜湯，oh my god，係熱架。尤記得之前有套叫 My 盛 Lady o既劇集，蝦頭整 D 生 o既肉餅比黃子華食，黃子華襯蝦頭行開左就拎 D 熱湯想整番熟 D 落左肚 o既肉餅，我一路睇仲心諗邊有人咁低能架，有用 o既咩？ 但我果刻真係頓時萌生呢個念頭，證明左人響絕望時真係咩都會想嘗試去減輕自己 o既痛苦。 食哂盅飯，埋左單，我好內疚，覺得自己係鼓佬定黑仔，冰天雪地，要食自己個 friend, 食又難頂，唔食又死路一條。一路食一路喊，唔知落番雪山之後可以點同阿 Yan 交代？

於 2017 月 12 月 23 日，晚上約 8 點 20 分，我食左呢碟炸兩： 我見到佢嘅第一個印象係，嘩，落咁多豉油，搞到啲炸兩淋哂，一定好難食。 點知一食落去，原來唔係我諗咁簡單。佢嘅淋，唔係因為豉油，因為一咬落去係水汪汪嘅，唔咸，但好多熱水，好似你用毛巾索左好多熱水，跟住你咬落條毛巾度，係咁嘅口感。 我果刻第一反應唔係嬲，係唔相信自己嘅味覺，我竟然又再食多兩舊，結果當然係一樣。 我自問個人想像力都好豐富，但係我都諗唔到佢係點整到咁嘅。做左咁多年人，我唔係未食過難食嘅炸兩，應該話經驗所得，多數炸兩都係難食嘅多，食得都預左。但呢碟野唔係難食咁簡單，如果虎豹別墅有機會重開，我希望佢哋除左原有嘅落油鑊、勾脷筋等場景外，可以加入“食一粥麵濕水炸兩”，以警惕世人切勿浪費食物。 由於食左幾舊，我都費事拎去換啦，就食剩如圖中咁多。但走嗰陣我好有衝動想同啲職員講，問係邊個整呢碟炸兩嘅。我唔係想大興問罪之師，事實上果陣我度火已過。我係真心想問，你做得廚師，你係有你嘅專業知識，你知道浸滿熱水嘅油條係有幾難食，既然係咁，點解你仲要整啲咁嘅野比人食？或者直接啲問，你係咪今日 last day? 但隨著我冇問到而悻悻然咁離開，我知道呢個謎將會伴隨住我一世。

簡介：呢間係素食版嘅放題，即係任點任食，限時兩個鐘。以下係佢哋嘅點心紙，可以見到款式並不太多。呢期佢哋做緊黑松露主題。 由於本人鐘意飲湯，所以試個老火湯先，係青紅蘿蔔煲猴頭菇，都幾好味又夠熱。 涼拌苦瓜 - 幾香麻油味，都幾好食，但我同老婆兩個人食唔使比咁多啩？唔好學埋哂寶x 素食啲衰嘢好喎。 唐揚炸雞 - 通常素食扮肉嘅菜式都係把鬼，但呢個估你唔到又幾好食喎，食到停唔到口。 黑松露蒸扇貝 - 完美咁演繹左咩叫金玉其外，敗絮其中，感覺係食緊一塊蒸到好熱嘅擦膠。 蘿蔔香菇羹 - 呢個擺明係伏，相信係人都比佢 fake 左，呢個點睇都唔係世人所理解嘅羹啩？雖然唔跟封面，但其實味道唔錯嘅。 跟住我就口痕想食雪葩，通常甜品都係食飽先食，但正所謂 rules are made to be 仆勤，我食任食就鐘意亂咁叫嘅。 點知一食，不得了，好鬼好食。 本人食任食同大多數香港人一樣，都係當達文西名畫 - 最後晚餐咁食。呢個並無貶義，就好似香港人睇煙花要嘩嘩聲咁睇，唔知就裡嘅人當我哋係港燦。又或者鋤 dee 要隻手助跑向外，大喝一聲咁掟出去先有快感。食浦飛就係要向最短時間內食最多嘅野，咁先好玩。 不過一食到呢個芒果雪葩，我就好似楚漢相爭時嘅楚軍聽到家鄉嘅歌曲咁，完全軍心渙散。本身覺得自己狀態好好，要食盡佢哋嘅菜式應該冇難道，但一食呢個芒果雪葩，我心裡面就響起 George Clooney 嘅名句 - what else? 已經唔想再試其他野了。 當然講係咁講，我嘅理智話比我聽唔可以沉淪落去，好似 TVB 劇入面向雪地就訓著嘅人，我要提住自己你唔可以訓㗎。 春卷 - 雖然犯左炸野嘅大忌 - 唔熱，但味道係非常唔錯。 擔擔麵 - 受過涼拌苦瓜嘅教訓，呢個麵叫佢比少啲，呢度係我分左一半比老婆先影嘅。味道普普通通啦。 麻辣粉絲 - 唔好睇佢賣相核核突突咁，味道係好正嘅，非常惹味。雖然份量都係比好多，但呢次冇投訴，反正佢比得少我都會再點。 紫菜湯水餃 - 好普通，不吃也罷。 食到咁上下我又沉淪喇，今次試下青檸雪葩先，以為做得芒果雪葩個friend 都唔會太差啦，但嘩頂唔順，太酸，天同地嘅分別。 跟住好自然地我又嗌番芒果雪葩喇，我發現青檸雪葩係要等好耐，但芒果雪葩就即叫即有，可能太受歡迎喇。整定好多向度。 不過呼籲大家食還食，唔好太任性。我總共就食左食四杯芒果雪葩，搞到個肚唔係好舒服，可能太寒涼。

係咪估唔到向 open rice 睇食評都有心理測驗做呢？試下啦，好好玩㗎。 嗱而家呢度有幅圖，望真佢先，再憑直覺去揀個答案。 睇到呢幅圖，令你聯想到咩？ 。 。 。 。 A. 剩墨丸魚蛋，唔覺意筆左少少河粉。 B. 墨丸魚蛋河 C. 有個乞兒路過，饑寒交迫，老細見到唔忍心，係咁意筆左呢碗野佢充饑。 D. 有個和尚經過，拎住個齋砵想化緣，同老細講 “唔該施主可唔可以比少少河粉我？” 個老細見佢咁瘦弱，面青青咁，除咗河粉之外仲醒左幾粒魚蛋墨丸佢嘆，筆左先醒起，咦？！和尚係唔食肉㗎... 揀 A 嘅朋友，你係屬於樂觀型，見到半杯水會好開心咁諗 “我仲有半杯水呀，yeah！" 揀 B 嘅朋友，好明顯同我一樣，幫襯過無數劣食，經常遇人不淑。 揀 C 同 D 嘅同揀 A 差唔多，不過幻想力更豐富，係活向充滿童話嘅世界。 而現實中，呢碗其實真係魚蛋墨丸河黎，連埋杯凍檬茶，盛惠三十六蚊。咁唔使問，食完一定唔飽啦。 其實本人都唔係第一次中伏，話說呢間野個老細同老闆娘係極度孤寒，試過有人問可唔可以比多少少飯，個老闆娘話好呀，加十蚊比多一碗你吖，個客覺得好侮辱，於是兩個單位嘈到面紅耳熱。 向度食潮式粉麵如果你向唔加底嘅情況下係食得飽嘅，我諗你都唔使旨意去食浦飛同放題，因為你個食量應該係細到異於常人，吸啖空氣都能夠充饑果隻。 同埋唔知你有冇見識過呢間野個老細切魚片或牛腩呢，真係嘆為觀止㗎，唔講仲以為佢學過日本料理。佢啲刀功精湛到可以將任何食材切到好薄好薄，透明咁滯，果啲咩鼎爺見到我諗都會自慚形穢。

呢間台軒前身係手信店，即係賣下電話卡呀，“名錶” 果隻啦，手信店執左後都空置左好耐，終於開間食肆造福下街坊。 始終店舖面積大細，坐得比較迫，都冇計啦，唔同附近嘅月光光坐得咁舒服。 講大家最關心嘅嘢食啦，其實幾好食，份量又好大份，我同老婆一人一個麵 (牛肉麵同肉燥旦麵，仲有前菜送)，驚唔夠再加個小食(花枝餅)，但食碗麵都飽得不得了，差啲食唔落個小食。掉轉你試下去附近差唔多時間開張嘅台灣菜食？價錢貴一截，又難食，仲分分鐘要去麥記再食先夠飽。但反而果間門庭若市喎。 不過我想講呢，咁大間酒店竟然一坐低同人講唔供應水，要加十五蚊買台式飲品，真係非常小家，呢間酒店咁多間食肆係得呢一間係咁。可能真係坐位太少佢想人消費多啲，但咁做比人嘅觀感實在太差了。

話說今天天氣勁熱，商場所有食肆都爆滿，連呢間平時人跡罕至嘅台灣野都好多人食，包括我呢個咁唔好彩中哂伏嘅顧客。 叫左個餐，係嫩滑三色蛋，嘩真係見到個名都流哂口水啦，係咪先。 點知一等就等左我五個字。 最奇怪嘅係，一路有侍應拎野食入黎，但都係西餐黎嘅。睇到呢度你會覺得好奇怪，點解台灣食店有西餐食呢？ 因為呢間野同隔離一間扒房係同一個老細嘅，所以食客亦可以叫扒房嘅食物。而題外話係，呢間台灣野前身係日本放題，叫橫濱，我冇食過但相信佢應該係劣食得好緊要，因為我未見過放題長期係一個客都冇嘅，相信霍金咁聰明都解釋唔到呢個咁奇怪嘅現象。 咁嘅情況，我咪催囉，唔黎我即走，經理本來仲想解釋話蛋係即蒸㗎，但一見到我等左五個字都將未講完嘅說話吞番落肚。 隔左一陣，黎喇。望一望，嫩？邊度嫩呀，睇過？硬過鐘乳石喎大佬。我怪錯左個廚房添，我諗佢真係响我落單時已經開始蒸，蒸左半個鍾先得黎咁嘅效果。 一食，嘩，唔止係老，仲要勁咸，所謂三色蛋著左一半都係咸蛋，但冇咸蛋部份嘅蛋都係咸到嘔，你睇連佢同鄉蛋黃哥都頂唔浦就知有幾伏啦。 仲有個麵，味道冇問題，但食食下覺得差咁啲野咁，原來冇左肉燥，又話肉燥麵？違反商品說明條例喎，海關唔該做野丫。 算啦，今次當跌左錢，絕無下次。

本人於 2017 年 3 月 24 日晚約 8點半度，响季季紅門口經過，本身想買飯盒食，又見到佢有外賣燒味飯賣，咪買嚟試下囉。

叫左燒鴨飯，到燒味哥哥就嚟包盒飯時，我問佢拎薑蓉，咁佢即刻好惡咁話：“包左喇，下次早啲講吖。”

我心諗，我以為你係比現成 pack 好嘅薑蓉嘛，同埋你都係揭番開個飯盒啫，唔會難得過你斬燒鴨啩，我都諗住唔比咪算囉。

點知佢鬧完我之後，望一望我，仲嬲啲咁再重覆一次：“下次早啲講吖”, 跟住就一大 pat 薑蓉咁筆落啲飯度。我完全明白呢位哥哥嘅心路歷程，好明顯佢望到我個樣傻下傻下知道恰得, 就放心再兇你一次，再諗咁鍾意薑蓉丫喇，比你囉。

番到去食，食過呢啲飯都知道都係食頭頭尾尾㗎啦，再加埋啲飯比薑蓉浸過哂，真係咸到驚有腎病，咁就冇左廿二蚊。

食唔飽唯有再落去買其他野食，經過季季紅門口見到佢地咁慘淡嘅情況。其實呢間野雖然唔係好食，但都不致於生意咁差，鬼咩，請左啲咁嘅伙記。

其實之後我都有响地廳堂食過一次，以前有個做左好耐嘅女經理冇做，成班職員而家好似烏合之眾咁，玩下玩下响度 “扮工”, 啲野又貴又難食。唉，真係祝呢間野好運。

本人係 Red Mango 既忠實 fan 屎，相信亦係少數既 fan 屎，唔信？你得閒經過望下佢有幾多客就知道，可惜呢個聖誕夜佢令我傷透了心。

話說早前本人見到 Red Mango 聖誕自助餐既廣告，又話有芝士火鍋，又勁多聖誕特色美食，好吸引呀，咁作為 fan 屎既我梗係 ja ja 林訂位啦。價錢雖然係平時既 double, 但有咁多聖誕菜色都係抵比既。

去到食喇，咦？芝士火鍋呢，冇喎。又話有好多款湯既？點解又係平時既中西湯。對於我呢個成日黎食既 fan 屎黎講，根本所有野同閒日係冇分別! 我重複一次，係冇分別 arrrrrrrrrrrr

唯有睇到最有聖誕 feel 既係火雞卷，但唔講都唔覺喎，食埋都唔覺，我諗你叫佢龍肉卷我都吹你唔脹既。另外佢將 o的印哂聖誕公仔既紙插落o的奶凍度，嘩，真係好有聖誕氣氛呀，原來我比多一倍既錢使左向呢 o的 detail 位度，諗到果個簡直係天才啦。

一路食一路望下附近既客，講都唔信，聖誕正日流流，o的客既數量係仲少過o的伙記。陰公豬。

啱㗎喇，素食達人同 DJ 先生，keep 住呢 d 做生意既走精面態度，好快 Red Mango 就會前途似咁，祝你地好運啦。