之前看了一下這裡的食評,加上是吃信用卡的生日優惠,不抱什麼大期望
但吃來算相當不錯
最驚喜係飲品
咖啡用虹吸管式上,好香,不用落太多奶都能提出咖啡的香味,不澀(如之前不少食評所說)
奶茶都有驚喜,唔似好多西餐廳咁用茶包沖,係一大堆茶葉放入一個金屬壺到泡,茶有回甘,很不錯

野食都係一般啦,熱辣辣又叫大份,意粉無過淋....想想銅鑼灣區環境好少少既夜晚飯,除埋一個人都係六十蚊唔使有湯有主菜有飲品仲想點

另外值得一提係serve我地既眼鏡姐姐好好笑容,好熱情,全程不停添水又落力推介抵食既餐比我地

見到呢間好評升幅得咁快,見係附近就去試食左一次

夜晚一個人,將近九點,唔食得太多
叫左個藥膳清湯粉(hkd18),因為酸辣粉已經太濫,藥膳雞湯比較特別
湯ok,有少少藥味,食到d淮山粒,味精不算重
但配料同粉無我想像中咁好
薯粉太煙靱了,直情到黏牙的地步,同今年年頭係荃灣一帶食既爽滑口感差太遠,是否偶然失準?
配料方面,有花生、榨菜、芫茜芹菜葱粒肉碎
我食唔到有芹菜
花生雖未至於霉,但唔香,好似放係碗麵到一齊煮左一輪咁,無晒香味但麵又無吸收到花生既香甜
如果佢d花生只有呢種水準的話,我覺得都係無必要放入去
榨菜一樣,唔咸唔酸又唔香,其實有必要放佢入去碗粉到咩

配料應該係有吊起成碗粉鮮味既作用既,但佢既配料係無.
另外其實藥膳湯底唔應該配酸辣粉既配料

可能串燒會好食d
酸辣粉其實hkd18一碗都幾貴.....

試了燒仙草(hkd15)同高麗甘茶(hkd12)

燒仙草(走甜)(珍珠/綠豆)
估唔到d台灣人係鐘意將d涼粉煮到半熔黎食,涼粉煙煙靱靱,口感新奇
走甜後涼粉味更出,不錯
不過似乎店員忘記了幫我加花生?

高麗甘茶
唔記得叫走甜係大錯,果然太甜,甜到好搶
好在未至於"拿"喉
杯野有淡淡既蔘味同紅棗味....仲有d中藥味,的確有一點暖身同補身既感覺,喉嚨幾舒服
下次要少甜應該會正好多

呢排行過旺角都有經過呢間餅店

似乎係新開張,所以搵openrice都搵唔到佢既資料
試兩次都係買曲奇,HKD9.5/四安士
鬆化,唔會太甜,牛油味唔會太搶,係手制既味道
推荐綠茶味,好濃香既抹茶味道

同場仲有酒店式西餅如紐約芝士蛋糕(HKD13/件),抹茶紅豆芝士蛋糕之類,攸緊特價,賣相亦好睇,不過一件蛋糕其實太飽啦.......

好耐無黎,.一黎就試新出熱食甜品

自磨芝麻糊(不知價錢??):見到新出甜品有芝麻糊,想試但怕太飽,店員哥哥好親切咁話請我飲半碗,佢話唔會太飽因為芝麻係用白米同磨,而非坊間用米粉整
試左,果然唔會太飽肚,仲有陣特別既....米香?好味

紫霞蕃薯糖水(HKD18):據說糖水係由日本紫心蕃薯煮熔而成,試落去果然有陣蕃薯香味,蕃薯林軟,有淡淡薑味,微涼既今天正好令全身暖和起來

呢兩日假期屋企都係到飲茶
因為有5個人,所以試多左好多點心

非特價時段好唔抵(茶錢要$7,小點$12,中點$17,大點食唔起)

試左既新點心有:
粉果(小點): 皮唔太厚,煙靱度適中,餡料唔太咸更無太多粉,有落味精但仍然食得出食材既味道,白蘿蔔粒好juicy
手拉白腸粉(早市特價$7.8): 值得一提既係呢間茶樓既腸粉雖然比較林,但好有米香,食落唔會太漏,亦唔會搞到成碟油
家鄉煎薄餅(早市特價$7.8): 唔油,餅皮薄,餅邊少少脆,少少榨菜吊起整塊餅既鮮味,料亦算足夠(有d火鴨絲果類)幾好
杞子桂花糕(小點): 足料,桂花味好重,比較企身,唔會一拮就爛,甜左d
田園炒米粉(早市特價$7.8,正價$20):正價同特價既分別就係十幾粒西芹
但粉炒得幾好,乾爽唔油,仲有少少焦,亦唔會太咸

午市有食過鮮蝦荷茱飯(套餐$68,送一碟油菜)
唔抵,因為睇佢咁大包原來係一整塊荷葉摺疊係飯中間先有咁大包
但就好香荷葉味,阿媽話可能係用豬油炒先有咁香....即刻唔敢食> <
其實只係料唔算好足,我以為有雲腿同蓮子
鮮蝦也有蝦味,但同d飯唔算好夾,又老,無晒爽既口感

午市埋單係$2**,早市埋單係$113.....
整體黎說呢間茶樓既好處係真係低油低鹽及真材實料(相對同類食肆及同類點心),但味道仍然唔差

夜晚行過,發現屋企附近d台式飲品店就得呢間未試過...點知,賴野

見佢同隔離土豆町一樣有賣薑母茶,佢賣大杯12蚊,細杯10蚊,平人地兩蚊仲有細杯揀
決心試下,要走甜+熱飲,加兩蚊要寒天條,心唸呢種台式飲料本來也就junk food而已,唔會差到去邊

結果...
佢拎出黎時,支飲管係無包裝既→好似有包裝既飲管已經係台式飲品店既基本要求啦嘛,心裏頭已經打左個突
隻杯揸到後來,居然...仲有d黏手,好似係d甜野未洗淨番黏係食具上果種

然後飲落去,d茶真係好茶餐廳,係沖得唔好既果種茶餐廳奶茶,雖然已經係成杯都係奶,都掩蓋唔到果種茶既酸澀味,更不要說有茶香了
個胃仲有d唔舒服,天呀

而佢其他飲料既價錢,係偏貴既
睇黎個老細係見台式飲品流行,見呢區無咩台式飲品店,將成本算到最最最低之下先有呢間野
搞不好,呢個老細係唔識沖台式奶茶既
但...點解連衛生都唔搞得正常d?個老細真係無品

至少,比較合我口味?

呢排突然對呢種台式珍珠奶茶上左癮
試過好多間,見到就想試通常都係奶味估9成5,茶味最多吊吊味咁
不過呢間唔知係咪茶餐廳兼做呢?茶味唔差,只憑印象來說,比COMEBUY仲出BOR?
如果COMEBUY既奶/茶味係6.5 : 3.5的話,呢檔就六比四到啦....

珍珠一般,比較林,表層有少少爛(大部大粒珍珠既問題),都可以叫煙韌
黑糖寒天條反而幾好食,爽滑中保持一點咬口,因為係黑糖煮過(?),係甜既,我杯奶茶走甜就正好吊到D味...兩蚊,都幾抵

下午茶時段無咩人(隔離稻香兩點鐘已經好多人排隊),見到佢點心係呢個商場黎講算平(小點/中點/大點:$8.8/$11.8/$13.8,茶錢$6/位),以為唔多掂
叫左一個白切雞飯($18),一籠馬拉糕($8.8),一籠南瓜奶黃酥($11.8)

白切雞飯:飯係認真一人份量,算幾細份,一般啦
部長哥哥好留心咁真係幫我要到瘦雞(雞胸同雞脾,d皮真係幫我切到差唔多無黎)
媽咪話d薑蓉唔會太咸,亦不會淡到無味,味精不重,o岩o岩好吊到雞既鮮味出黎

馬拉糕:媽咪至愛,好大籠(一個正常點心蒸籠滿晒)
好味,鬆軟,香
有少少椰子味(應該係食用香油之類),但唔會好霸道
難得係一上菜,我挾左一小片發現唔夠熱,同d樓面阿姐佢地都真係幫我去蒸番熱佢
end up我同媽咪只係食得完半籠
佢係小點黎咋

南瓜奶黃酥:呢個好驚喜,南瓜既香味同甜味同奶黃好完美咁配合起來,幼滑,唔會好似而家果d所謂奶黃流沙餡咁得個漏字
酥皮就一般,蘿蔔絲酥餅果種皮(呢種點心似乎係香港未食過真係整得好既),但唔油

埋單56蚊,大量打包.....因為食唔晒
一定會再黎,希望keep到水準啦

呢晶舖食左咁耐,其實佢賣既算係最傳統既中式糕點

用既主要係粘米粉,唔同而家常見到既用馬蹄粉煮既冰涼爽口
加上size頗大,所以一件都好飽肚(我一個女仔頂多食到半件到)
甜度不高,靠既都係食材本身既味道

有時都怕佢做唔住(呢條街d租都好貴),只係好\唔想香港又少一間呢d做傳統野既小店
因為佢d野粉質重,所以推介紅豆糕,眉豆糕,綠豆糕,豆係粒粒分明而起沙,鐘意食豆既人應該會維意