係朋友介紹下,第一次黎呢度食,叫左個三文魚親子丼定食,快到呢…上完前菜立即黎個飯,好似一早整定咁,不過好在三文魚生都唔錯,唔會腥,幾新鮮,雖然薄切,但係都有近十片,鋪滿飯面,唔錯,三文魚子亦都大大粒,整體黎講幾好味!

之但係,我覺得最好食竟然係個甜品,一睇似豆腐花,上面舖左紅豆,但係一食落去,好大奶香,我估係奶凍,奶到呢…而且奶味好濃,真係好好味!

唯一不之處,係趕住交枱,要一點前離座,所以有點倉促呢!

午市好多人呀!
以為呢類工廠區餐廳會粗製濫造,點知又唔係喎!都算OK喎!
午餐有個牛腩飯,姑且一試,牛腩唔靭,雖然唔算十分美味,但係份量足,少筋,汁入味又唔油,真係算係咁喎!上菜速度快,唔會阻時間,唔錯!
唯一係服務,個阿姐有少少惡,同埋有催人快的落ORDER的感覺,不過真係客多,所以咁係可以接受既…

去飲茶,點心好普通,但係叫左碟煎蠔餅,真係好得呀!好脆好新鮮,但係唔太油,好多脆邊,蛋同蠔都好味,唔會腥,七十蚊一碟份量好足,夠五六個人食,絕對值得叫!
另外推介蠔仔肉碎粥,一窩七十蚊,夠六個人分,又係好足料,食左一碗都飽左一半,不過唔及煎蠔餅咁吸引。
點心係普通,不過都可以試下千層馬拉卷,一籠四係,好似迷你瑞士卷,唔太甜,唔太漏,一件細細岩岩好,OK啦!
服務方面麻麻地,可能午市多客啦,有時唔係好搵到人理你咁囉…

見到件件CAKE都好靚,唔知點揀,最後食左一件MANGO既,圓柱形,白色,有黃點點綴,唔花巧,但都好靚…

味道方面,好LIGHT,一切開已流左好多芒果餡出黎,好香芒果味,但係唔會好甜,外層係好LIGHT既MOUSSE,我覺得有少少芝士味,但唔重,食完成個都唔覺得好飽好HEAVY,得推介!

食左個Set Menu內的選擇,唔記得個名,係三百幾蚊果款,可在三個範疇內每個範疇選一樣食物,我揀左三文魚,野菜,同埋芥茉牛肉,其中最好味又最特喇係芥茉牛肉,值得推介,雖然話係芥茉,但係唔會攻鼻,唔太食得辣都可以食到,三文魚一般,而套餐內既日式蒸蛋反而有點令人失望,因為唔算十分美味,亦唔係好多,係好普通果隻…

由於人多,叫左好多甜品share,其中最喜歡綠茶tiramisu,上面有cream又有紅豆,好靚,但係唔漏,好creamy,雖然同正式tiramisu唔同,但係食落好似食雪糕咁,好得意;焦糖燉蛋拼盤有三種味,分別係expresso,綠茶,同薑,都算唔錯,唔會太甜;至於心太軟就好重朱古力味,實實地,唔算好流心,配呍呢拿糕,個雪糕都係一般貨色。我見menu有wasabi雪糕,其實都想試下,因為唔係度度有得食,或者下次試啦!

整體上,個set都值得推介,尤其芥茉牛肉,甜品可試綠茶tiramisu。

真係超唔掂囉!
第一,食物無特色可言,又唔係特別好食,最慘係果段時間已經唔係多客,但係竟然等左差唔多成個鐘都未上菜,要三催四請,雖然侍應好有禮,但係都唔可以等咁耐呀!
上菜次序又奇怪,竟然最後上魚!連甜品都上埋先上魚,真係佢至得!
我諗應該唔會再幫襯咯!

同屋企人食呢度既任食放題,有張點菜紙,但寫明每次限叫三樣野,雖然有分小食、主菜、沙律、湯、飲品、甜品等,但係小食同主菜的size係無分別,一樣係的的骰骰,份量好才,反而飲品好大杯...
食物質素方面,真係唔好有太大期望,雖然自稱法越餐廳,但係食物亳無特色可言,係一般西餐廳甚至快餐或茶餐廳都食到咁既質素!尤其係魚柳,根本係一細件吉列魚柳加少少汁,我係快餐店都食到!仲有咖喱角,好似美心大家樂都係咁既質素...
比較好既係南乳雞,雖然細份,但係個汁唔錯,好夠味!另外都可以試下煙鴨胸,唔肥,幾好味!越式粉包都可以,但係唔知點解我食到同潮州粉果一樣味,個餡好似係潮州粉果的餡,如果鍾意食潮州粉果的人,一定會鍾意越式粉包囉,呵呵!反而燒豬頸肉同坊間果d唔係好同,主要係好瘦,又唔係好似豬頸肉咁...蒜茸炒野菜呢,就勁油呀!
甜品方面,真係旳骰到不得了,榴槤班㦸細到我地以為係畲碟的花!哈哈!椰汁什麼糕又切到一岩一蠶,好醜樣!
飲品只係可以啦,紫米冰可一試,即係將紅豆冰的紅豆變左紫米,味道都唔錯!不過,所謂芒果沙冰,根本唔係沙冰,只係芒果味的普通飲品!
其實總括黎講,唔可以話好好食,但係勝在任點任食囉!同埋服務都唔錯既...

我覺得完全唔掂呀!以呢個價錢,唔應該係咁既質素!
第一,上菜太太太慢,話說我地十二點十叫野,只係叫set lunch,但係等到一點半都未有頭盤,只係得包同牛油,要我地三催四請,又話幫我地追,先係一點七八有個頭盤!主菜仲耐,食完頭盤都仲要等,成一點九一點十先黎!仲要好慢!即係由叫野到食主菜要成個鐘呀!太唔掂啦!
佢話自己係法國菜,但係亳無法國特色可言,食物份量大大件,頭盤燒雞沙律已經有成件雞扒,另一頭盤吞拿魚三文治竟然有三件,好多呢!
主菜方面,我揀左煎龍利魚,都算幾香,又唔油,好在無之前其他食家講話腥既情況,都唔錯,三大塊,啖啖肉,算係OK!朋友的長通粉都份量唔少,不過好似幾多汁,睇落有少少漏,佢話味道都幾好喎!但係我見佢d粉好似好粗身咁既....
意大利咖啡好香,好滑,唔錯!
食物只係一般,同普通西餐廳無分別,但係服務唔得,最差係太慢,所以我覺得唔值呢個價錢!

真係好唔明,點解只係一個方魚肉碎潮州粥,叫左一個鐘先至黎?問佢係咪漏單,佢又話整緊,實在好過份!雖然以味道論,個粥係好食,但係以服務計,點都唔會格!
公平點說,呢度有一味點心唔錯,係素菜餃,比紫肉蘭的更好!又多菜又香又清又唔油,食多幾件都得!
反而蝦餃燒賣都係麻麻地,有一味排骨陳村粉,以為好特別,但係食完覺得"咪又係咁"囉!
另一味值得推介係章魚什麼石頭飯,好夠味,粒粒飯都入晒味,又夠熱,黎左大半個鐘都仲熱架!

COVA新出既檸檬雪芳蛋糕,第一次食!
店員話呢個蛋糕係light之選,好岩女仔食...
食落的確好有檸檬味,好香,不過都係覺得甜左少少,同埋cream太多,蛋糕本身好軟熟,好好味,可惜忌廉令佢比較漏...
餅底有點怪,係一個唔脆既餅,好難切又難咬開,而且比較甜,我覺得脆餅底可能好些!