尋晚一個人食左一個冰糖燕窩冰皮月餅,綠豆蓉好多好豐富,一食已經好大綠豆蓉味,不過要食到中間先食到燕窩,話就話係冰糖燕窩,但係完全無冰糖味, 燕窩當然亦係無味,所以只覺得自己食緊一d透明滑溜溜既野,好似啫喱咁,其實無乜口感,唔知係咪豆蓉比較甜,蓋左冰糖味呢?個皮好快溶呀,沾到隻手一pat pat,同埋都叫做厚厚地,食到最後,個咀覺得好糊同好粉,但都算係不過不失啦!

本來魚湯王幾好架!試過幾次都唔錯,所以先會再黎之嘛!點知,而家差晒喇!
話說只係要個車仔麵,四送一麵$25,夠晒抵!不過,食得幾唔開心下…
佢收左我錢,然後同我講,無米粉,叫我改米線,我唔肯,你呢間無我咪食第二間,使乜一定食你呢間呢?佢唔應該收左人錢出聲嘛!我話唔要喇咁,點知佢唔肯退錢,然後話幫我搵米粉,等呀等,要人等左成個字,又唔覆人,我再三追問,就話而家有米粉喇!
咁好啦,又等,到整左粉出黎,又話落錯湯底,mark左清湯,但係佢唔覺意俾左豬骨湯,我叫佢轉番,點知整左成十幾分鐘都未轉到,只係轉個湯底都要咁耐?
好啦,如果改番無事都算啦,點知唔係,所謂改番清湯,原來都係唔對路,係面頭一浸又一浸油既”清湯”!反而初時話無既米粉份量就好多呀!食到你滯!
好顃呀!又要等好耐喎!d野又錯錯錯!下次唔會再黎囉!

同同事分享左一件馬豆糕同埋一件芝麻糕…
馬豆糕:唔係白色而係透明,可能係因為無椰汁卦,豆既份量唔少,軟硬適中,味較清,唔太甜,有個同事竟然話似粟米=.=;
芝麻糕:聞落好香,但係食落又唔係咁重芝麻味,黑媽媽唔係好靚,但係勝在唔會太甜,又唔太濃,我反而覺得唔錯!

呢度有間專食咖喱既店子,試左個焗咖喱豬扒飯,結論係…唔得!
首先,賣相已經係極差,豬扒同一隻半熟煎蛋天一半地一半,隻蛋係盤邊,漏晒出去食唔,到,更加好難撈,豬扒又瘦又乾,無肉食,飯根本無焗過,而且係普通白飯,份量又少,無啦啦用張紙隔住個盤同d飯,食時會麻煩左,因為蛋黃黏晒落張紙度,唯一好少少竟然係個沙律,唉!仲有一碟豆角,個醬橙色但係又唔辣,話酸又唔係,個味好怪,食左一啖已經食唔落口!都幾唔掂下!

見報章連日有土司工坊的介紹,於是試一試…
點左個肉鬆土司套餐,有一份肉鬆土司、兩隻半熟烚蛋或煎蛋,再有一個飲品。
由於呢期唔食得生野,問佢可唔可以改烚蛋為全熟,竟然唔可以,令我覺得都幾rigid,夠flexible,無法,唯有要煎蛋,不過,原來煎蛋係麥記式煎蛋.又係圓碌碌兩個,蛋白圍住蛋黃,食落似蛋漿而唔似鮮雞蛋…
肉鬆土司既土司果真脆口,幾好味,土司上落左一d漿,味道似煉奶,因為唔計肉鬆的話,隻味幾似奶油多,但係我唔係好肯定係咩醬,總之甜甜地幾好味,而面頭既肉鬆都係唔錯,幾香口,唔咸,配奶醬同土司原來都唔錯,不過件土司size唔係好大,即使加埋兩隻蛋,都唔係好夠飽…
叫做值得一試啦!

夏日炎炎,黎到粥店都唔想食粥,所以叫左粉麵…
XO醬蝦球撈麵個名好吸引,而且係$30,以為係好野,但係原來會令食客失望,只因細細碟之餘,所謂蝦球只係一隻隻細蝦,有五細件,麵乾爭爭,上面放幾蝦細蝦,點兩點XO醬,咁就完成,隻碟仲要細到根本唔可以完成”撈”呢個動作,唯有另外搵多隻碗去撈!味道一般,同樣令人失望…
反而鮮滑牛米粉好少少, 滑牛真係一片片牛肉,鮮味雖無乜,但腍,易入口,唔多肥膏,而且份量夠晒,有唔少牛肉片,都幾好。
不過,連凍檸茶同凍奶茶都無得供應,都幾趕客…

其實從未試過呢度既客飯套餐,但係見到$25咁平(附近一般食肆都要$35以上),姑且一試,點知又幾好喎!
點左個瑤柱粉絲蒸水蛋,只係等左五分鐘左右就到,有效率!碟蛋唔細,用一個中型不锈鋼碟裝既,最令人意外係真係食郅唔少瑤柱,好多啖都有瑤柱味,咁既情況係一般食肆比較少見,蛋蒸得好滑,唔老,加左豉油更有味道;白飯好大碗,軟熟,ok;仲有一碟炒白菜仔,份量ok架,唔算少;最後仲有中湯或飲品(凍飲加$2),食完夠飽肚,而且好味又唔貴,真係唔錯!

唔覺唔覺,原來而家食魚蛋粉都幾貴…
豬軟骨撈麵($25): 個汁幾特別,雖然橙紅色其實不然,但係食落撈落又幾惹味,酸酸地咁,但係有點油,同埋乾,豬軟骨算係ok,但係好硬朤部分,而且多左少少肥膏,可以話係麻麻地;
炸魚皮($12):一般質素,好多只有炸皮而無魚皮,好在唔腥;
魚湯紫菜($13):原來好大碗,怪不得收咁貴,有兩大餅紫菜,再加一些生菜,個魚湯同人地食魚蛋粉果d一樣,雖然見到湯底白色,但係飲落又無乜魚味喎,睇落幾好,但係飲落會覺得唔值呢個價;
油菜($7):怪不得咁平,原來份量好少;
凍檸茶($7):n人comment,不過黎得好快,即叫即手,水吧師傅果然有效率!
題外話,食食下從天而降一隻用過既筷子,發生咩事?原來後面張枱同我背對背坐個師奶,竟然食食下野將自己對筷子飛左過黎,其中一隻飛到我件衫再跌落我張櫈!仲整污糟左我件同條裙!我真係唔明點解有人可以咁騎呢,跌筷子唔奇囉,但係往後飛真係好神奇!激死我!真係糟糕!

休息一天,行街街食個下午茶,$22有個叉燒米加飲品,幾抵食,所以一見即點!
原來粉好細碗,不過預左,同埋以下午茶黎計算咁,難得唔會好似好多燒味咁油膩,仲加左兩條菜添,叉燒份量係普通,唔可以話少架喇,不過係多左少少肥膏(其實我諗對一般人黎講係ok既,只不過我自己比較喜歡瘦叉燒啫),另加錢飲紅豆冰,反而麻麻地,因為紅豆唔係好多,十零啖已經無晒,奶就好淡,相信係多冰之故。

初試魚湯王的車仔麵,原來唔算十分好,只係不過不失…
雖然揀清湯底,但係因為材料關係,其實個底一點都唔清,所以揀乜底都係無所謂。要左四送一粉,$25,價錢合理,豬紅係估唔到會辣,有少少腥;卥水蛋唔得,細隻又無卥水味,幾硬實實,曾經試過裕一品既卥水蛋,比呢度好好多;蟹籽丸有兩件,呢d現成既,無乜好講,普通啦;紫菜都算幾好,因為夠多。
食魚湯王,似乎都係要番魚湯米線或者泡飯好一點…