估唔到會有咁既飯--雞脾餐肉煎蛋飯!
只係$26,仲要包飲品,心諗以為可能只係雞搥,點知黎到,真係一隻雞脾,仲要加埋煎香的餐肉同煎蛋,飲又一大碟,份量好大呀!味道仲要唔錯添!真係兩個女仔share都夠呀!好抵呢!
當然環境唔可以計較,但係老闆娘超級友善,抵讚呀!

本來唔多黎呢度食,但係久唔久一次又有新發現,今次發現原來呢度既粟米班塊飯好好食!
精緒係件魚!班塊好大好大塊,有成個飯盒咁大,唔止啖啖肉,仲煎得好香,個皮都好好味!而且粟米汁又真係有粟米粒,撈飯同連魚食都岩!總之成個飯好香!雖然話係一塊魚,但係大件程度抵得住人地幾舊魚,同埋個廚師煎魚的手勢可以話係一流(皮薄又唔會太多油)!

點左個$26茶餐,真係抵喎!包野飲又有好多野食,而且味道唔差!
先有一個麵,可揀一款送,揀左牛扒,唔多筋,煎香左,好味!個麵軟硬適中,又係幾好,仲附加幾條菜添!除左個麵,仲有牛油多士,同埋煎蛋,咁當然呢D唔可以話特別好味,但係OK啦,可以食得好滋味囉!
服務方面其實幾好,因為個阿姐(可能係老闆娘)幾nice!
嘻嘻,呢度仲有電視睇添!

因為貪平,所以同小牛黎呢度...
一人一個麵,$16x2,只係三十二蚊,真係抵,而且係兩送麵喎!
不過,個麵好似浸左好耐咁,淋晒,變得無咁好味lu!漢堡得一細塊,切左一半,味道一般啦!反而隻煎蛋最好味,打期個蔶撈麵食最佳!
黎呢度唔好要求味道,但係以呢個價錢黎講,好合理!

由於呢餐已經係二月既事,仔細情況唔係好記得,但係一道大良炒鮮奶令人印象深刻,只因我從未食過咁既大良炒鮮奶,不禁問一句:係咪變左種?
呢度既大良炒鮮奶,竟然係好似炒蛋白咁,唔止無奶味,而且仲令人以為自己食緊賽磅蟹...唔係,賽磅蟹都還好,起碼可能有蛋或者西蘭花食下,但係呢個炒鮮奶,就好似炒蛋白一樣,奇怪!
不過咁,當日的例湯又唔錯既,蒸魚都好好,唔會腥。
之不過,個葡汁扒四蔬唔掂,好油!其中二蔬係菇類,鍾意食菌既就岩胃口!

幾個人叫左幾樣野share...
先講兩款炒飯,第一款係鮭魚什麼炒飯,要成$138,比一般貴,但係個樣睇落同$88既蝦仁什麼炒飯一樣,差D分唔清!鮭魚果個真係有好多魚肉粒,不過無乜味,我分唔清係咩魚,但係應該貴在呢度;反而蝦仁果個有驚喜,竟然有牛果,好特別,又好味...不過,呢兩個飯都幾油,食完見到個碗係油淋淋既...
同樣問題出係個搵室豆苗度,只不過係清炒啫,食完發現比起炒飯剩得仲油!都唔健康既!
反而最愛蒸素餃,一客四件,算係多菜,清清地好好味,餃皮唔算薄,但係唔會好硬,值得一試!
講到最香口要數煎鍋貼,呢個真係無得頂,個底煎得好脆好香,估唔到唔算太油,我諗下次有機會都會再試!一客都有五件架!

自從小朗出世之後,雪儀諗住封筆,但係過左三個月,都係出番山...
對上一次去Cafe TOO食lunch buffet,已經係八月既事,大半年後再黎,食物選擇竟然同上次幾乎一樣,唯一唔同只係多左意大利飯,連蛋糕甜品雪糕都係無變化!似乎差左D囉...
新出既意大利飯係廚師即場整,但係見住佢勁落牛油,雖然味道唔錯,但係好肥,而且淋左少少...
甜品仍然最愛雪糕,不過又係果六款口味,士多啤梨呍呢拿朱古力芒果芝麻紅豆,係後兩者比較特別...tiramisu蛋糕好重朱古力味,但無酒味,好heavy...其他蛋糕都係差唔多,唔算好好食...梳乎里又係無味,得個甜字...
愈來愈唔鍾意Cafe TOO的buffet,不過令次係同事楂主意,無辦法...

今日去食lunch,好好好好味,仲食到好飽!真係好豐富呀!十分十分推介呢!
我揀左三文魚做主菜,三大件都唔腥又唔漏,個汁酸酸地,十分醒胃,已經令人滿意!
但係最最正係沙律吧同埋甜品!
沙律吧實在係有太多野食喇!可惜我唔食得蠔,但係食得既同事都話好!煙三文魚呀,蛋沙律醬薯仔呀,芝麻醬豆腐呀,各類菇菌呀,粟米呀,三文魚蓉他他汁,甚至冷麵,應有盡有,仲要樣樣都咁好味喎!浄係食頭盤都夠啦!仲有菠菜湯添呀!
包籃裡面既脆餅又係令人食唔停口,個好似吞拿魚既醬就最好味,查完一件又一件,食呢個都食到半飽!
甜品超正!我從來未試過一次過食六款甜品,係拼盤黎架!有tiramisu, panna cotta, 軟心朱古力蛋糕(好香朱古力味呀,個心真係軟架,蛋糕又唔會太硬), 開心果味法式白餅(同事個個話呢個甜同漏,但我又唔覺喎,外脆內軟,比君悅甜品buffet食果次好味幾倍有多), 意大利雪糕蛋糕(我最鍾意呢個,係三角形,有三式雪糕,食多幾件我都得呀!), 仲有一個有少少酒既橙, 全部超級好味!同事們無一個食晒,係我呢個超級甜品迷全部清晒,但係真係飽死,而且肥死呢!但係超滿足囉!
咖啡附送既Petite four又係唔可以唔食,千期咪錯過!
服務好好呀,成日有人問我地岩啱食,唔岩又會換,又會同客人傾計,好有禮貌,好好呀!

同阿媽去買送,途經呢度,俾佢既香味吸引左...大批人係門外輪住等,好犀利!
見到菠蘿包新鮮出爐,要左一個,只係$3.5,但係超好味,皮夠香脆但唔易甩,包夠軟,一路食緊都一路聞到香味,完全唔滯,話咁快食完!
見到$2一個撻,$5.5有三個,好抵呀!不過一出已經售完,勁!

終於試左呢度既湯飯,比想像中正呀!
個湯底好好好好味呀!食完飯都想飲埋d湯!
而且每個湯飯包埋時菜同豆腐,豆腐份量又夠食,我覺得幾抵喎!點多一樣送都只係加$3,我試左雞肉同牛肉,當脄唔會係新鮮,但係肉質唔錯,食得過!
但係,有一點一定要提出,小牛成日想食河粉,但係次次黎親都話無!!!如果係長期無,唔該唔好係餐紙度列出!如果係有,唔該唔好唔添貨,會得失好多客架!(雖然我見你日日都好好生意,但係都唔好咁呀!)