星期日黎呢度飲早茶,原來有半價優惠,不過食物唔多好食...
北京水餃怪怪咁,竟然係乾身無湯,或者係我唔識野卦...味道竟然同之前點左既小蘢包無分別,舊肉同個皮都一樣味,只係一個蒸,一個就咁放係碟上...
最好味係椒鹽排骨,雖然唔夠香,但係起碼夠脆,同埋唔油,仲夠大碟,夠份量!
素菜蒸餃都唔錯,清清地又多菜,一籠四隻,幾好味!
不過,鮮蝦水晶餃唔及一般蝦餃好味;燒賣都好普通。
反而三鮮鍋貼徝得推介,底煎得脆,唔會太燶,又唔油,好香,好好食!一碟有四隻,唔算細隻架!但記住趁熱食喎!
狗不理包普通到唔普通,只係肉包一個。
炒腸粉有驚喜,好香,好入味,但略嫌油,埋有少少辣,不過的確係惹味!
魚蓉鮮竹卷比例細條,料唔多,唔太值得食...
至於春卷,夠脆,但皮太厚,料又怪,比一般酒樓無咁吸引...
花雕醉雞轉彎同埋江希肉我都無食,但係屋企人話唔錯喎...
豆沙鍋餅令人失望,唔夠香唔夠脆,一定唔可以話係高質囉!係入得口咁啦!
不過因為早,所以無乜人,夠靜囉,但係好似一到下午,就會好多人架喇!
服務方面,有時略欠效率,可改善!

同小牛黎呢度食飯,係因為唔知去邊度食好,一心諗住求求其其又一餐,又估唔到食到好味既海南雞飯!
一個海南雞飯餐$43,加凍飲就變左$45,碗飯好大碗呀!一個人都食唔晒!不過唔似油飯。但係呢,個餐最好味唔係碗飯,而係碟雞,估唔到雞肉咁滑咁好味,又夠多肉,可惜係雞皮好肥呀!所以一定唔好連皮食,不過雞肉唔多唔少黏左好多肥膏,要自行剔走,總之係肉質幾好啦!
另外要個菜遠牛肉湯麵,原來都好大碗架!而且料足,多菜多牛肉,唯一唔好係個湯底,成浸油淨晒係面,食完又飽又膩,牛肉唔多筋但係略肥...

點左個$26公仔麵餐,要牛扒麵,連飲品。
麵既質素講真真係麻麻地,反而牛扒勁好味!煎得好香,但係唔會太乾又唔會太油,好香肉味,厚薄又適中,唔係一大件,而係有一件中型,再配兩件細細既,肉質唔靭易咬,唯一係旁邊多左少少筋,不過整體上都好好味!牛扒值得一試!

要左個雙拼麵餐,好唔掂呀!
個公仔麵係無味架,湯底都係清湯,乜都唔落架!雙拼點左煎蛋同漢堡扒,但係兩者都好細件,食完成個餐都唔夠飽既...下次唔會再食呢樣野,同埋會減少黎呢度...

好耐無黎呢度食野,尋晚試左個以前未食過既三絲湯檬,我一心以為三絲之中其中一絲會係雞絲,點知大失所望,原來只係火腿絲,紥肉絲,同埋蟹柳絲,全部都係加工品,而且無乜味道,唔可以話係好好食,只係覺得好唔抵!早知要雞絲或者牛肉仲好!不過$24包埋熱飲或紅豆冰,都算好平下喇!紅豆冰又唔錯喎!話晒唔使加錢,都有咁多紅豆,而且唔會太甜,飲完都唔覺太漏,真係抵飲!
另外,偷食左小牛既咖喱魚柳,越式椰汁咖喱果然夠惹味,連我地要唔辣都咁好食,不過薯仔少左d,有三小件,我一個人已經食鬼晒!魚柳都略嫌細左少少啦!

一家五口黎食大閘蟹宴為老人家賀壽,點左半席(即六人)A餐,五個人分享,預左食唔晒。
黎蟹之前先上蟹粉小籠包同埋五式拼盤,蟹粉小籠包雖然多湯,而且全部都係橙黃色,好似好多蟹粉咁,但係個皮好唔掂,趁熱食都略嫌硬,真係麻麻地!五式拼盤方面,豬手,叉燒等等都好求其,反而豆腐同雞肉最好味!
呢兩味之後已經係六隻大閘蟹,細細地都ok,不過無乜肉食。
經過長時間同蟹搏鬥,侍應先會上其他菜,先係金湯海鮮翅,又幾得意,係橙色,而且味道似西湯,唔似一般食開既翅,我都係第一次食,食落仲有好多料,似魚肉,又有一些膠膠地唔知係咩海鮮,都幾有趣,唯一唔好係成日食到蟹殼碎!
之後果d真係普通,只係平日酒席的象拔蚌,炸子雞,蒸魚,生炒糯米飯等等,一般貨色。值得一提係脆炸華盛頓卷,人地果d乜卷物卷通常個餡係海鮮或者沙律,佢竟然係芝士腸同煙肉,實在騎呢兼慳皮,唔怪得個個餐都有呢一味!
最後係甜品,包括薑茶湯丸(12粒)同埋脆麻花(6件),前者個薑茶辣到我試左一啖已經無法再入口,好在湯丸係麻蓉,而且完全無薑味,唔係真係唔使食!脆麻花唔掂,唔夠脆,但係加左好多糖漿,勁甜勁膩,不太好!
仲有一點,個餐包六罐汽水,佢俾左可樂,雪碧,橙汁汽水各二,我地話想改健怡可樂,竟然話唔得,話個餐唔包呢款汽水,有無搞錯!
服務方面,有個女侍應掛住睇"珠光寶氣",連有野做都唔知,哈哈!

同阿媽食糖水做下午茶,一人一碗熱芝麻糊,其實都唔錯既,但我始終覺得唔夠香,睇落好杰好夠芝麻,但係食落都係差少少香味,反而阿媽話好好味喎!我覺得要再濃一點!
睇落唔係好大碗,但係原來食完會好飽,哈哈!
$14一碗,我略嫌貴...

尋日下晝行經甜麥麥,俾佢又平又看似新鮮既紙包蛋糕吸引左,見$3一個,$5兩個,就買左兩個番屋企。
我等到即日夜晚食,都唔算放左好耐呀,估唔到香氣哨失晒,食落已經唔算香軟,蛋味只係聞到而食唔到,顏色又比一般蛋糕既黃色深色,真係怪怪地...最重要係紙包蛋糕所需既軟熟,佢真係欠奉!
同埋,面頭啡色皮好易甩...
呢度的紙包蛋糕唔係得...

尋日快餐五號係醬膠蛋飯,除左一碟飯仲有一碗中湯同一個飲品,個飯勁多野食,白飯已經夠多,仲要有兩隻圓形煎蛋,兩條煎香腸,同埋兩片煎午餐肉,個汁仲係黑椒汁,好香,好多汁添喎!估唔到個湯又ok喎,唔會面頭一浸油,竟然清清地,不過食完真係飽死呀!好富呢!
另外,$24特餐都抵食,有個叉燒湯意,火腿奄列,牛油多士,仲有飲品...衰在叉燒有點肥,同埋意粉個湯底好多油,不過奄列唔錯,乾身唔油,蛋同火腿份量剛剛好,多士都好味,牛油份子適中,唔會只係俾少少就算,夠晒香!
服務方面,阿姐講野係有少少"掘",不過幫襯呢類茶餐廳,係可以接受的!

尋日買左個雞批做下午茶,阿姐係個烘爐攞出黎,熱辣辣,好吸引,點知一攞上手食...散晒!
個面既皮甩既...竟然一下子就同個批底分開左...激死...佢散晒,我都無法,搞到分開批面同批底(連餡)食,本來好好味架,但係咁食法真係差左...
呢度既雞批勝在唔會太油,夠熱,如果再香d同再多d雞會更好!