包場part,試左呢幾樣野: 香草雞胸凯撒沙律、瑞士雞翼、吉列魚柳配他他汁、燒豬柳配種籽芥末汁、芝士腸仔肉醬意粉、意式海鮮焗飯、焦糖燉蛋、紐約芝士餅、凍青蘋果茶。
香草雞胸凯撒沙律: 好多生菜同紫色菜,但係好少雞胸肉,可能十片以內,香草、麵包糠、沙律醬等分開擺,要自行添加,沙律醬只有一種選擇,無千島醬,味道一般;
瑞士雞翼:呢個最搶手,但係瑞士汁又唔算太入味,不過都整得幾香口,屬中上之作啦;
吉列魚柳配他他汁:呢個又係搶手貨,難得魚炸得唔油,又有好多件,夠脆口,幾好;
燒豬柳配種籽芥末汁:呢個無乜人食,食剩晒,又唔難食既,但係都幾多肥膏,算係咁多樣野中最唔受歡迎既一款;
芝士腸仔肉醬意粉:料唔係好咋,腸仔同牛肉做既肉醬之外,加左少少茄子同瓜,個意粉只係烚熟,唔會有驚喜;
意式海鮮焗飯:呢個有點令人失望,所謂海鮮,連魚肉都無,最多係魷魚,同埋芝士醬,個飯只係白飯,無炒底,實在麻麻地;
焦糖燉蛋:一細碗一細碗咁裝,幾方便,味道就一定無得同大酒店比,但係過得去啦;
紐約芝士餅:又係唔可以同大酒店比,細細件,有芝士味但唔重,餅底略厚但唔脆,叫做OK咁囉;
凍青蘋果茶:幾清,無乜味,淡淡地,都幾好呀!

服務方面,都算唔錯,老闆同店員都好nice,個女侍應又經常保持笑容。

環境方面,頗舒適,夠大又有梳化,都幾舒服,不過要預左唔會太光猛。

整體而言,呢度係一個食晚,飲野,同開party唔錯選擇!

有人嫁女請食嫁女餅,由於唔鍾意果d有蛋黃既酥,就揀左大大個圓碌碌好似光酥餅既欖仁合桃酥喇!
個欖仁合桃酥都幾大架,有120g,好實淨好硬,都幾難搣開,而且一搣就有好多碎,不過味道又幾好,絕對唔油,清清淡淡,合桃味唔重,欖仁味都唔強,如果鍾意呢兩隻味可能會失望,因為個酥似餅餅多d!唔好以為會有好多合桃粒,係無乜架!雖然係咁,我真係覺得幾好味喎!夠脆嘛!

食晚餐,要一個芝麻雞中翼湯伊麵($28)同一個時菜班球米粉($33),加多個汽水($7)...
芝麻雞中翼湯伊麵先上,雞翼同伊麵分開,雞翼只有三只,好在都有唔少芝麻,味道唔差,唔會過咸又唔會過燶,味道都算係咁,係伊麵淋左一點;時菜班球米粉竟然等左好耐先到,唔知點解要整咁耐,黎到仲要錯左,俾左米線,要換過,又要等,奇奇怪怪地係碗粉上加左好多獻汁,格格不入又唔好味,時菜係蘭花,但係只有兩小棵,班球就唔錯,五六件大大件,多肉好味!
其實食物方面又唔係咁差,都算合格,但係六點後收加一服務費就唔係好得,本來個價錢都合理,但係加左一就得唔合理...我諗下次唔會再黎食晚餐咯!

話說尋晚去食個車仔麵,本來就唔會有咩好評,但係同時叫左個凍華田,平日做水吧既老細行開左,於是由個廚操刀,見佢面有難色都驚驚地,但係諗住咁簡單既野,應該無野卦!點知...杯凍華田一放上桌,我睇住佢d冰係短短十五秒之肉全部滆晒,再摸下杯野,熱既,飲一啖,熱既!唉!我見佢咁,好似淨係識整野食,唔識其他咁,我都費事話佢...飲到最後,到我食晒野,杯華田仲係暖既...其實非凍飲係平$2,我係咪應該claim番佢?當然我無咁做啦...算啦!
個煘樣係俾杯咁騎呢既華田既...

打風通常都行唔得遠,只可以係太興食飯...
望住個餐牌,晚市套餐都幾貴,最平,$48但唔好食,其他都要五六十蚊甚至更多,比附近食肆貴幾成!
於是點左個$38客飯,但係並唔係套餐,即係只有一個送配一碟白飯。點左蕃茄炒蛋牛肉飯,飯同送分開上,個送好多汁,全部係蕃茄汁,飯都好多,應該多過一碗,所以用汁撈飯係唔錯!蕃茄份量都唔算小,但係蛋炒得太細碎,而牛肉都係十片以內,不過炒得燶燶地,同埋唔係好有牛味,可能係蕃茄/茄汁味重卦。
不過,味道尚算ok,所以我一個人都食晒成個客飯,可以接受啦!

人人都話呢度既茄蛋牛麵出名,所以專登黎試下!
問個阿姐手攪麵同削搖麵既分別,佢第一句竟然篗,兩者都係麵,好搞笑,我心諗,鬼唔知咩!跟住佢有話,呢隻(指住削搖麵)闊d,呢隻(指住手攪麵)粗d,下?我唔明,咁我問,即係一粗一幼?咁佢就再講到一舊舊,無人明佢講乜。小牛打圓場,話試過咪知囉!於是試左削搖麵…
我點左茄蛋牛同埋竹笙做送,唔知點解,我見到其他食家既相好大堆頭,好似好多茄好多蛋好多牛,好似食唔晒咁,但係我今次又唔係喎,除左蕃茄可以話係多少少之外,同牛都係細細碎碎咁,但係味道都好既,牛肉又夠腍,蕃茄好味呀!竹生就份量好多,但係好索油;削搖麵好闊好得意,係其他地方未見過,有少少似麻布茶房既屏屏麵,但係好似仲闊d添。
另外,我明明要原味湯底唔辣,佢竟然加左辣油俾我,食到我呀…係咪一時唔小心呢?仲有,明明叫左凍華田少甜,但係無少甜到,仍然好甜…
不過,呢度真係抵食,我咁食法,都只係$27,又一頓晚餐了!

食左個澳洲龍利魚柳湯通粉,好味呀, 澳洲龍利魚係一舊舊無炸粉,但係煎香左,雖然燶左少少,但係好夠鑊氣,幾好味,而且仲有五大件,又唔腥,實在唔錯!食得過!雖然個湯底因魚柳煎過而有少少油,但係可接受,唔過份,$20好抵食!
見到人地食菜莆肉粒煎蛋都好吸引,叉燒個樣又唔錯,好想試!可惜呢排庶左黃薑飯…下次一定會黎逐樣試呀!

好少去千欣會食到一肚氣,今次真係一次好差既經驗!
叫左一個什錦炒飯餐,再叫一個牛肉蛋意粉餐。
1. 點飲品時講到明係凍奶茶,點知黎左凍檸茶;
2. 只係兩樣野都可以漏左落單,遲黎既人d野黎晒,都可以唔發覺我仲無野食,要我問佢先知;
3. 已經因漏落單而遲左,仲要再等成十幾分鐘先有得食;
3. 點野食時講到明唔好落沙嗲醬,點知黎到落左一大pat沙嗲醬;
4. 明明上次黎食係用鮮牛肉,今次變左牛扒切件,仲要自行加入黑椒;
5. 什錦炒飯原來係無料炒飯,只係得什菜、蛋絲、火腿粒同埋腸仔粒,早知叫咸魚雞粒炒飯(同價)都有咸魚同雞粒食下。
自此一役,小牛話以後唔想再黎…

上次試左一個冰糖燕窩冰皮月餅,今次試埋杏汁官燕冰皮月餅...
原來兩個月餅真係差唔多,味道幾乎一樣,只係中間個餡有好少唔同,但係杏汁果隻都只係有好少杏仁味,味道唔濃,如果唔係見到包裝紙寫左佢係咩味,就咁食未必食得出杏汁味,咁都好,有時杏味太濃好難入口,個皮依然略厚同埋易溶,食完真係溶晒係手...綠豆蓉味道好寡...我覺得美心冰皮好似好味d...

兩個人點左兩個餐,分別係常餐($28)同埋自選米線餐。
常餐揀左沙嗲牛肉麵,另配火腿奄列同埋牛油方包,加左$1轉多士,奄列同多士都OK,係一般茶餐廳質素,但係個麵就好差,牛肉又老又多筋,難以入口,麵好難食,好在有少少沙嗲味先令人食得落去...
自選米線餐揀左鮮牛肉同埋卥水蛋做送,鮮牛肉竟然同沙嗲牛肉一模一樣,連色水都一樣!!咁當然又係又老又多筋啦!卥水蛋完全無卥水味,蛋黃好大,蛋白好少,隻蛋好細,真係麻麻地...