今日想同大家介紹吓呢間家嫂 因為之前呢間人哋話好出名 好難book枱 所以一於試吓佢 其實佢主要都係得一個餐揀 就係食小食同魚生拼盤先 魚生種類唔太多 不過過吓口癮係OK嘅 都尚算新鮮 小食嚟講就唔太啱口味 啲炸物味道有啲奇怪 除咗蝦多士係好味少少 其他都係好一般麻麻 雞煲完全失望 全部都係雞骨雞殼雞腳 想搵一舊正常肉食下都好難 完全唔知啲肉去晒邊 蒸扇貝算係正常 味道唔錯 之後到打邊爐時段 都係有啲失望 基本上選擇唔太多 同埋冇得揀 就算你唔要 佢都要夾硬上 基本上係會浪費咗 打邊爐海鮮尚算OK 不過啲肉真係好麻麻 好下難 基本上我哋叫咗三轉牛肉 轉轉啲肥牛 啲肥膏都係多過肉 同侍應反映 即刻卸膊話唔關佢事 話係廚房出菜 冇得揀 真係好恐怖 估唔到啲牛肉真係咁差 仲有最想講 侍應服務真心差 我哋今日晏晝食 全場得兩三台客 個侍應完全唔想做咁 叫佢拎乜都話冇 一係叫你自己出去拎 同埋成日趕住收碟 未食晒 已經好似趕住收咁 搞到你食得好唔舒服🤢 好大壓力 好似好趕咁 好似想逼你地早啲走咁 總括嚟講下次唔會再嚟幫襯

今日路經觀塘食早餐 見到呢間都幾多人幫襯 一於入去試吓 入到去人山人海 可能忙嘅關係 侍應阿姐已經呼呼喝喝 叫我坐埋一邊 其實佢個早餐都幾好味 坐底加$3轉做出前一丁物有所值 沙嗲牛肉大大塊 個麵又煮得夠彈牙 湯又夠熱 而且又有牛角包夠特別 不過個牛角包就唔夠脆 濕濕地有水氣 而且杯凍奶茶好多冰 飲幾啖就冇晒 最恐怖係佢哋嘅服務態度 首先係佢放低杯凍奶茶 係放喺個枱邊度 差唔多有一半凌空左 差啲俾佢淋濕條褲 之後佢擺低碟牛角包 完全係用力飛埋嚟 直頭係有離心力 個牛角包同腸蛋係側埋左一邊 見到個侍應阿姐都有啲驚咗佢

今朝早路經工廠區 可能係紅子嘅關係 好多茶餐廳都冇開 就連平時食開嗰間都冇 跟住越行越入 求其搵間茶記就算 附近冇咩餐廳有開 咁見到呢間餐廳就入咗去 叫咗個普通嘅茶餐 首先同想同大家講講嗰個包 話就話係焗厚多士 完全好似發水麵包咁 最離譜係個沙嗲牛肉出前一丁 沙嗲牛肉有好多渣 同埋湯麵個湯唔熱㗎 個出前一丁完全煮唔熟 硬掘掘咁！ 真係好後悔加咗$6 轉佢個出前一丁麵 同埋茶記最緊要係杯茶 杯凍奶茶完全冇茶味 好似飲糖水咁 最後個麵又係食唔晒 杯野又飲剩就走人 唔會再幫襯真係伏味濃

今日想同大家介紹吓 呢間泰式大排檔 其實我食過咁多次 次次都係叫外賣 從來冇堂食過！ 首先想同大家介紹吓佢個泰式蠔餅 基本上每次外賣呢個都係膽嚟！ 必食！蠔仔夠多足料！ 而且佢係似煎蛋 入面仲有少少蛋汁 唔會好似潮式咁炸到好乾 黑椒牛柳粒炒西蘭花 雖然呢個唔係好似泰式菜 不過佢都好惹味！ 味濃嘅黑椒牛柳粒 配呢個清爽嘅西蘭花底 好爽！！ 椒鹽鮮魷 呢個就中規中矩！ 炸皮味道比較濃 不過唔係好付到上個鮮魷度 一夾個皮就好似甩出嚟咁 不過有時叫外賣就唔可以要求咁多 一定冇堂食咁新鮮 不過整體嚟講都會繼續幫襯！ 性價比都算高

今日約咗朋友嚟將軍澳 又係每逢一個月 狂食一次牛肉嘅時候 每次我哋嚟都係叫M9和牛個餐！ 不過放題個價錢又加咗價！ 我哋食下午茶時段 嗰段時間唔太多人 基本上都係得三四張枱 我哋叫咗藥膳麻辣燙 湯底味道非常濃郁 基本上係唔需要點豉油都夠晒味 M9和牛的確出色 每一碟質素都好好 唔會話之後越來越差 油花分布得好平均 呢個係送嘅海鮮拼盤 質素麻麻唔係太新鮮 其實佢啲牛肉質素真係好好 不過喺服務方面真係有待改進 因為佢哋得90分鐘放題 你都係預咗客人狂order狂點！ 但係佢哋上菜速度超級慢 每一轉點完之後 就算點四五碟 都係嚟得一兩碟 有次真係忍唔住問部長 究竟我哋仲駛唔駛用電話繼續落單 因為我都唔清楚佢究竟嚟齊未？ 之後個部長最搞笑係話 牛肉刨唔切！！ 但係我哋去嗰個時間係下午茶時間 基本上都冇乜人 得個三四枱客 如果你話得嗰三四台客都刨唔切牛肉 咁你午市晚市爆場嘅時候咪唔使做生意？ 食放題最差就係呢種感覺 比完個咁貴嘅價錢 都好似又要左求右求先乞到碟肉！ 你話食物質素幾好都好 都大打折扣

今日係想同大家介紹吓 沙田區好食嘅茶記 呢間茶記個門面唔係幾好 行過有時都唔會發現到佢 但係呢一間平民茶記 就係做街坊生意做咗好多年 來親呢度個個都係熟客 同老闆娘有傾有笑 呢間茶記無論午市同下午茶 都有好多選擇 有炒粉麵飯、車仔麵、炸豬扒 韭菜豬紅同撈丁都有 不過我每次去親呢間茶記 第一時間都會諗起佢個芙蓉蛋飯！ 因為實在太過出色 佢個芙蓉蛋飯 我諗係我食過咁多間茶記之中 都有頭三甲 首先佢啲料好足 有好多叉燒火腿洋蔥同蔥花 足料之餘好夠獲氣 最正係佢煎到有少少燶邊 加埋佢個甜豉油 認真一流 另外凍奶茶最重要係個茶膽 佢濃得來有啲甘味 喺我心目中又係數一數二

東港城真係美食荒漠 冇乜好嘢食可以揀 今日突然想食吓湯河 於是膽粗粗試吓錦麗 我見人哋話佢嘅越南牛河都算穩陣 咁一於試吓佢先 呢個熱飲麻麻地 我哋叫咗個二人餐 呢個越南滴滴咖啡要另外加多$12 但係完全唔值呢個價 我食呢個係安格斯越南牛河 散叫係最貴嘅 一個要$99 但係同對面嗰個越南牛河冇乜分別 只係多咗幾塊安格斯牛肉 但就要加多$30 同埋多咗塊擺盤同筷子 同碟青檸芽葉 睇真啲 小食拼盤就幾好食嘅 算係正常水準 個蔥油炸雞同豬扒都好味 其他都係一般水準 不過佢最唔掂係服務水平 落單個女侍應冇乜禮貌 餐廳坐嗰張枱非常之逼 基本上擺晒所有食物同飲品 會逼到驚打瀉嘢 食得好唔暢快 最重要係佢個牛肉湯係唔夠熱 啲湯直頭唔夠熱到 淥熟唔到啲牛肉 你話就算個湯幾好味都冇用

呢間小食店係近排新開 我見都多人排隊幫襯！ 咁梗係要試吓佢啦 韓米係無堂食 主攻外賣！ 鋪面好開揚 睇到晒入面煮食狀況 所有野都算乾淨整齊！ 客人都食得安心 今次我哋叫咗炸雞、炒年糕、紫菜包飯 炸雞非常出色 抵食！ 拎到返屋企 隔咗段時間 炸雞皮依然鬆脆 肉質仲keep到有暖笠笠肉汁 而且份量充足！抵讚！ 員工仲要好細心分汁上 等啲雞皮唔會擺到淋晒霉晒 非常細心！ 不過如果夾硬要彈嘅話 就係因為佢order後即炸 所以要現場等差唔多20分鐘先有得拎 紫菜包飯款式好多！ 可以自己揀配料 加唔加芝士？ 而且味道好好 有香濃麻油味 好接近韓國食嗰啲 至於炒年糕就比較平庸 個汁係好味嘅！ 但係個價錢同外賣個份量 就唔太抵喇 不過係會回頭再幫襯 下次一於再試試其他小食先

今日放假 其實想打邊爐好耐 人年紀大咗 越來越珍惜獨處時間 以前會唔敢一個人去打邊爐 但係而家真係冇乜所謂 尤其越來越多一人一鍋嘅邊爐 今朝早大約11:30就去到馬祖 佢哋都係啱啱開門 入面冇乜客人亦都冇乜員工 入到去咁我就揀咗牛小排個餐 呢個餐係排第二最貴 第一次試呢間餐廳 試個中上嘅餐我諗都OK 湯底我揀咗麻辣鴨血凍豆腐湯 要另外加多$10 湯底味道非常之濃郁 基本上唔需要點豉油都夠晒味 肉方面我揀咗牛小排 油脂分布都非常平均 但係可能太早去嘅關係 啲肉好似未完全解凍 黐住喺碟底夾唔起身 不過牛小排嘅質素都算中上 係間唔中幾碟嘅質素比較參差 有啲一夾就散完全好似肉碎一樣 不過如果以$350+呢個價錢 任食牛小排放題嚟講 以我個人而言 我足足食咗24碟 的確非常抵食 而且服務都算唔錯 會主動問你加唔加牛肉 幫你收碟加湯 抵讚

話說尋晚接肥妹仔收工 喺荃灣搵吓邊度有宵夜好食 見到近小巴站呢間新舖頭 舖頭招牌好光鮮 一於入去試吓 點知中伏就係咁開始⋯ 其實佢小菜價錢都偏貴 不過講真真係冇乜所謂 最緊要俾返相對嘅質素 呢個金銀蛋浸時菜 初頭諗住食清少少健康啲 菜嘅份量好少 入邊得幾條白菜仔 上面金銀蛋都算足料 但係整體來講非常之鹹 如果以差唔多$100嘅一個小菜來講 真係非常之唔抵 劣食 之後想講吓呢個蒜香骨 賣相已經非常核突 好似人哋食剩咁 基本上全部都係骨冇乜肉 全部炸到過晒火 好似食柴皮咁 最恐怖係啲骨邊好鋒利 一個不留神條脷隨時都俾佢𠝹損 見到呢個餸之後 我真係深感後悔入咗嚟 整體來講都非常劣食 以荃灣百幾蚊一個小炒來講 佢嘅質素都算水平線之下 真係唔會回頭再幫襯！！