有年生日朋友同我去左野玩山店慶祝,當時覺得佢份量唔大,幾適合我呢d細食人
所以知道九龍區都有呢個系列嘅店都想黎試下
事前唔知會唔會好多人,所以都book定枱先;喺K11入面位置唔易搵,要形容的話係角落嘅角落位置
呢度冇set,散叫就選擇困難,好多野都想試沙律黎到同圖片一樣,非常好~ 不過我就覺得汁唔夠,d羽衣甘藍喺冇乜汁嘅情況之下顯得有d苦...意粉就一般,只要唔係白汁我都okpizza每件上面都齊料嘅,好欣賞d芝士,但係pizza邊冇料嘅部分就多得滯,變左好dry,有少少扣分 可能上一次經驗太好令我好期待喺度食,但今次之後我諗就未必再黎喇

朋友曾經黎過呢度同屋企人慶祝生日,都幾激讚,趁大人生日就黎試一試幸運地被安排坐房,就喺門口收銀位旁邊,後面夜滿清酒樽 房入面仲奇怪地有一部大陸街機.... 都係因為唔想諗咁多野,散叫menu唔算多選擇,所以兩條友各一個雪の味,係一人餐黎
沙律其實只要d菜唔係特別核突都唔會難食 醃蘿白上面又係櫻花蝦 我唔係好識欣賞呢個螢光魷魚漬,唔可以話佢難食,係d質感唔討好 刺身5點,2隻蠔係本身個餐附送,其實原先我落order時係話只係送2隻就夠,另一個餐唔洗送,因為我唔食;但點知打單打漏左一個餐,叫佢補返之後連蠔都補埋 我硬著頭皮想嘗試食1隻,但擺左入口半秒就頂唔順,都係質感問題
千祈唔好誤會,重覆一次只係純粹唔鐘意蠔嘅質感!!!雖然我吞唔到落去,但放入口冇腥味,仲要咁大隻,鐘意食嘅人應該仲會想佢送多幾隻吧~除左餐我地仲散叫左個櫻花蝦鰻魚卷,因為事前唔知道沙律同前菜都有櫻花蝦.... 份量比想像中少,得4件跟住壽司5點,店員有介紹過每件野係咩黎,因為都唔係市面上常見嘅野,總之唔腥同埋有好多薑我就已經好開心 炸魚造型特別,杯入面仲有細細粒popcorn;條魚係細d,不過成個餐咁多野食,俾條大魚黎都食唔落喇 芝士焗半隻龍蝦,d肉好易就夾到,我唔肯定係咪自己食得唔夠乾淨,因為眼見有肉嘅地方我都夾走哂,但店員就係唔收走我隻碟.... 跟餐個麵豉湯入面有蜆最後甜品要左一個綠茶雪糕(店員話係外購),同埋3.6奶凍(自家製) 整體黎講係好抵食,個餐$498,有9折,咁多款野食
美中不足就係佢對面間紅酒舖好嘈,店員話對面每個週末都會成班人上黎飲酒唱k,壽司閂埋門都係好嘈好嘈

話說今日要去麗港城附近,正經野做完見仲有成個下晝可以嘆下,獎勵自己去喵cafe 依家真係幾乎每區都有貓cafe,搵到最近嘅就係呢間位於工廈最高層嘅梅子
正值落貨時間,喺樓下等lift有d危險同有d耐,不過為左喵,我等~~
店門口放左消毒液,我有乖乖地消毒雙手先入去架
下午茶時段只有兩個女仔同一個疑似熟客,環境唔算好闊落,可能因為裝修都係為左一班主公而設計,佢地可以沿住天花行黎行去~未食晏,所以叫左個all day breakfast 多士有兩塊咁多,炒蛋都唔弱,ok滑~食物比想像中好,可能因為以往去過d樓上cafe普遍都質素好麻麻,冇期望之下感覺有驚喜
當然最驚喜就係食食下有一隻喵跳上黎我隔離個A4箱呀!!呀!!!呀!!!!!我驚隨便摸會令佢唔高興,所以小女子一直都係遠觀....已經好感恩廚房外面有小書架,放嘅書都同喵有關,數量不少.另外仲有一大塊board介紹店內喵家族,冇記錯總共有1個喵爸2個喵媽,各有4個小朋友 以下送上幾張主公玉照俾大家~

龍版幾年前我帶大人黎呢度食生日飯,今次我生日佢同我黎返呢度食
事前已經透過whatsapp揀好main course,店家亦要求落訂先,其實呢種做法對雙方都好,人地又唔洗浪費食材,客人又可以確保有留位我同大人分別揀左蟹湯同番茄清湯,不過其實我係為左兩粒雲吞個湯清得黎淡淡番茄味,幾開胃餐前小食賣相精美,口大嘅朋友可以一啖食哂,唔多唔少剛剛好香草麵包要俾個讚,暖暖地又唔會太多,bread stick我本身就麻麻地呢個appetizer都唔弱,好睇又好食,龍蝦唔係一大舊,少食多滋味.而且食完一道先會再上菜,俾夠時間慢慢消化用墨汁製成嘅意粉唔會食到一口中毒咁款,當然亦都唔會好似出面其他餐廳咁煮到"林"哂,帶子都ok大隻份量少少地,所有意少都沾到汁,而且自家製意粉都已經贏左 唔記得左兩款main course係乜野....不過都係牛,要對餐廳講句唔好意思,我覺得伴碟菜好食過d牛(掩面) 可能因為我鐘意食菜多過肉,所以每次都係俾伴碟嘅野吸引左兩個甜品放埋同一碟,蘋果捲好正~

話說今日有d好~~~重要嘅野黎大坑處理,做正經野之前當然要搵食
一向對於大坑嘅食店都有d卻步,主因當然係價錢,今次其實都唔例外
因為放工過黎有d眼懞懞冇睇清楚,以為呢度比一般食店平,加上又係素食,二話不說衝入黎,點知一睇menu點解貴過外面個黑板咁多嘅?原來外賣自取會平d......

但點都好,已經坐低左都費事再周圍搵跟餐飲品可以揀特式mixed juice,雖然係細杯d,不過話哂都喺你面前鮮榨,還不錯 前面橙色嘅係金星(蘋果+甘荀+薑),但主要都係飲到甘荀味,我期待嘅薑味係零 後面係火龍果蘋果,味道普通 老實講我覺得個意粉同飯其實好似,只係一個有茄,一個有豆腐 味道黎講大家都好清淡,我都幾鐘意雜菌意粉如果可以再多d菇就好,味道仍然係清淡路線 整體份量ok,大食嘅朋友可能會唔夠飽

其實鄭師姐一路都喺個wishlist入面,但一直都冇機會黎,所以今次自己生日就預早兩星期book定,同屋企人黎試下泰式素菜會係乜野一回事 大廈門口都幾隱蔽,喺藥房中間,電梯仍然係舊式人手拉閘款
一層樓雖然好幾個單位,但完全唔難搵
被安排坐大廳,最大嗰枱大約8個人,其實呢度地方都好大,同時可以開到咁多枱
完全唔知今日有d乜野食,正所謂冇希望就唔會失望,都係食素唔會差得去邊嘅 先黎一大碗湯,分好之後其實一人只有一小碗,不過可以添飲嘅..飲到個底覺得太辣,所以大家都冇添到齋叉燒都算意料之外,我以為係中式齋菜先會有?對比之後出現嘅其他菜式算份量多,而且淨食都幾dry開胃雜果沙律,有火龍果,蘋果,梨,楊桃,芭樂,哈蜜瓜,菠蘿,大部分都係平時雜果沙律少見嘅生果,微酸,轉頭就清哂串燒當然都係麵筋偽裝出黎,個汁真係好味,夾埋d花生碎勁香椰子炒飯,雖然成個都白色,賣相黎講唔吸引,不過椰汁香,仲有一片片椰肉,我唔係咁鐘意椰味都接受到炒雜菜就係一般炒雜菜...春卷我都唔記得入面有咩料,唔係勁脆,但又唔會好油膩;食到呢一刻都飽飽地咯..點知仲有個米粉!真係不得了,個米粉好好食,咖哩湯唔辣,有薯仔呀素腸呀咁,如果唔係咁飽真係想食多幾碗終於到甜品時間,以為得糖水?又點少得芒果糯米飯,飽到

8點幾黎到,完全唔需要等位,所以自己行左入去
當時店內得幾枱客,吧入面企左3個人,樓面都企左2個人;我猶豫左一陣自己搵左個位坐低,彷彿冇人見到我咁
見到d店員係完全唔忙,但仍然冇人發覺多左兩條友坐左喺度,幾分鐘之後先有個男仔見到我枱面水都冇杯就俾我 但menu仍然要開口叫先肯攞黎,第一印象係零分
望住個menu有d難攪,好特別又不至於,但d組合唔係人人啱
落單時店員冇寫低,雖然我只係叫三樣野,但唔寫係會出事架...
叫左個烏冬但佢俾左個黑松露意粉出黎,係咪衰呢說好的三色芝士呢?肉醬呢? 有d粟米片就俾一pat芝士覆蓋住所以林哂唔好食,寧願分開三兜仔俾我點好過啦
肉醬就好似冇出現過咁就係一個齋嘅risotto,唔知具體入面有咩料 只可以話d洋蔥真係好夠細碎,食左都唔覺因為之前出錯左所以最後先出現嘅烏冬 卡邦尼係一如所料咁膩,同埋冇諗過咁多汁,成個湯咁
隻溫泉蛋係由頭到尾都冇見過佢,睇返張相應該係喺d芝士粉下面
個人黎講就麻麻地烏冬搭卡邦尼

店內環境尚可,但我估如果多人的話就會同隔離枱好親密
仲有就係冷氣好大,凍到冇心機食野

夜媽媽唔知食乜好,唔知幾時開左間越南三文治,我自己就麻麻地法包,不過見佢有粉食,可以一試
舖頭細細,十個八個位,全部都係吧枱
選擇唔算多,不過基本款有齊要左個札肉雞絲金邊粉,原來d雞係海南雞,有d唔慣 湯底唔太濃,剛剛好;不過因為d雞係連埋雞皮,所以浸一陣就開始有油出
大人要左燒牛肉河,所以俾左一塊我,正野喎~雖然我唔鐘意食牛肉,但呢個真係制得過
側邊嗰碟係蒜蓉法包,細塊得黎唔係勁多牛油,好味道
埋單行出去見到有個mon喺度播緊個節目,原來廚師上過大台比賽(我唔睇電視所以唔知咩黎)
如果堂食冇位買返屋企應該都ok,價錢又唔貴,就算一條友落黎都唔怕,支持小店

九號水產開左一排,饒之味係首批開業餐廳之一,行過幾次,但落街食飯未必會諗起佢
今日終於入黎試下新野
21:30 last order,所以我地8點左右就落黎食,完全唔需要等位

整體餐牌選擇唔多,應該係居酒屋嘅關係,酒類同下酒嘅串燒就好多款式
餐牌每一頁都會寫住日本茶每位$8,如果你唔叫其他野飲,而話要茶,記得佢會收茶錢,唔係免費俾你架!
最面嗰堆係蒟蒻,但望落勁似美乃滋,食落就當然冇味 忘記左影埋兜沙律汁,係有d似油醋汁嘅汁
因為見到好多油所以唔想倒哂落去撈,最終我食左一兜零dressing嘅沙律
(諗住反正佢都設定左呢款沙律係配呢個汁,我就費事問佢有冇芝麻醬喇)

上菜速度其實幾快
剛剛開始食沙律,個烏冬就已經黎左牛肉都ok嘅,唔係肥牛,個湯都好清 雞翼乾左d,同埋好似好細隻,食完一陣風咁 冷烏冬就冇乜得話好定唔好,係個汁咸左d
結論係新邨巷仔入面間德__好食d,附近太多日本野食,好難突圍.但如果想飲返兩杯,又要坐得舒服,黎呢度係一個唔錯嘅選擇.

放長假我地都係鐘意喺返區內,路過德美見到似乎唔洗等位
佢有兩個舖位,行入左邊嗰間,侍應以一種唔憂做態度叫我地攞位去隔離
入到去有d望落高級嘅叫我地企喺度等等執埋枱就ok
我嗰幾分鐘就係企左喺度望住嗰張可以俾我坐但一路都冇人想去執嘅枱
其實要我等唔係問題,但係唔好俾我知道你將會俾邊張枱+有人得閒都唔清理,我地企喺通道又怕阻住,呢d安排完全唔ok,寧願佢叫我出返去執好再叫我入黎

總算坐得低,個menu其實都好多野揀,有二人餐,不過覺得太多,雖然價錢黎講都幾抵食
小小地叫3樣壽司試下本身入面已經有wasabi,我食壽司唔鐘意點任何野,雖然唔抗拒wasabi,但加左入去有時覺得會食唔到魚味碟烏冬剛剛放低我就望到隻蛋悄悄地喺個殼入面sir左出黎,仲滑左落去盤底.....
天婦羅有4件,蝦+茄子+南瓜+蕃薯
唔油,但如果可以再多一兩件就好喇
烏冬彈牙,份量還可以 鐵板牛舌食到得返一兩塊先知底下原來有好多蒜蓉,唔怪得愈食愈辣
同其他野相比之下覺得普通腐皮餃子賣相吸引,食落有D似腐皮卷,但佢只有一層皮,餡料就係一大舊肉,得4條仲嫌有D唔夠喉 咁樣埋單都係$320,係可接受嘅;不過都係唔洗等嗰時先會再考慮黎食喇.