夜晚同娘親喺荷里活,唔想食黎食去都嗰d,於是試下misocool

menu選擇其實算多,我認呢個位我貪心左,因為見到有前菜,諗住都有兜沙律食下,點知得一啖海帶絲...外觀算係咁,呃到人

咖哩汁微辣,但係薯仔甘荀係半粒都冇,感覺就似自己喺屋企用咖哩磚整咁

豬扒,仲衰過茶餐廳炸粉厚到痴線兼一夾就散(應該多謝佢散開所以我唔洗自行處理),仲要好多肥膏

圖中切成5條嘅豬有2條係肥膏,我到底食緊乜野

最後杯飲品係本身包左,menu寫係柚子茶,落order時多口問侍應如果唔飲呢個仲可以揀咩,佢答奶茶咖啡檸茶檸水柑桔,咁我咪話要柑桔,點知原來menu個柚子=柑桔....我錯囉,錯在行左入黎呢度食...

喺北角返工,每一日都留意緊附近有咩新野未試過

有同事話聰嫂開左,仲要慢幾步都分分鐘冇位

今日一試都真係幾誇張,12:30飛落黎行慢少少就連最後一張二人枱都冇埋同行另外兩位同事都係食肉獸,所以對於素扒好驚奇

圖中左上焗豬,中間係三絲烏冬,右邊係咖哩牛腩

以上所有嘅肉其實都係同一種素扒,配落唔同嘅汁入面

焗豬份量夠,茄飯底值得一讚炒烏冬就普通左,唔wow咖哩汁微辣,多薯仔,飯量可以少d

價錢一般,相對其他茶餐廳貴d

我都唔係對素食好有研究,不過扮肉呢下我就麻麻地

或者係要迎合市場需求?

服務態度好好,但睇得出唔係熟手樓面,而且店內都幾迫,一唔小心好易撞到人,似乎有d潛在危險呢.

我食左三輪生日飯之後,今日就到我為大人慶祝佢大壽喇

都係習慣上網book枱,一黎有得儲分,二黎白紙黑字有哂紀錄

到booking當日餐廳打黎確認,都係好貼心嘅服務(因為有d真係唔會打黎,但其實都幾冇安全感)餐廳係L型,不過整體黎講都唔多枱;樓底勁高,感覺都幾高級都係決定叫二人餐,貪佢多個甜品最後要黎寫happy birthday~入座前已經有牛油擺喺枱面,所以麵包係基本盤唔係一入座就有得食,因為會熱返先拎出黎;香草味濃,或者唔係人人喜歡,但如果俾多一塊我都會食埋佢其實落完單已經唔記得個餐入面有d乜野所以沙律出現時見到pat白色諗左好耐,事後再睇返menu先知係蟹肉,不過老實講食唔出,可能因為我撈勻哂先食所以撈到唔知去哂邊黃色細細粒嗰d就係芒果,如果可以大粒多少少就好喇再黎係忌廉湯,本身菇味已經好濃厚,再加埋黑松露覺得似乎太強烈,不過都係好味嘅肉眼要左五成熟,厚薄適中,亦好嫩唔難切,就咁咬都係好易咬得開血水唔多,所以望落似七成薯蓉唔馬虎,蔬菜每樣一款食蝦最怕就係有腸,呢個意粉入面隻蝦已經去殼切開左,兩邊煎香意粉係忌廉汁,不過唔會好膩,兩個人share份量剛好先上飲品,我冇特別影相,又唔係飲d咩特別野不過杯檸茶唔加糖都飲到,我覺得係最好嘅熱檸茶最後梗係重點嘅甜品加錢可以轉其他甜品,不過就覺得唔係太抵,而且brownie都唔錯落booking時已經註明係生日飯,所以餐廳打黎時都有問到時需唔需要寫埋名上去,但我一時又諗唔到應該點寫,所以happy birthday就算唔知朵花係standard pattern定點,一個佬碟甜品有朵花都幾得意

朋友們選擇左呢間喺英皇1/F嘅餐廳,店內分兩部分,外面係有D行山戶外用品,入面先係餐廳

餐廳入面裝潢都好切合主題,用黎飲水嗰隻杯都係露營常用嘅金屬水杯

餐廳有麵包盤提供,有bread stick同幾個好硬嘅包,因為唔熱嘅關係,搽左牛油都溶唔到因為仲有一位朋友未到,所以叫住幾樣食住等

第一道出現嘅係蟹肉煙三文魚卷,冇諗過會係咁細...

煙三文魚冇平時食嗰d咁咸,蟹肉如果可以多少少就好喇之後係海鮮薈,茄醬好味,但法包烘得有d過火

入面有蝦,青口,魷魚,我地咁多人share可能叫個大嘅會適合d諗住都叫個飽肚嘅頂住先,所以叫左carbonara,點知都係咁細碟,一人一啖就清哂

真係耍趁熱食,放涼左會變成一pat呢個炸磨菇真係要試下,原粒包住炸,點唔點醬都好好食,炸完一d都唔乾,想encore添叫左青瓜綠茶,非常清新,青瓜味比較淡,只有凍飲朋友要左香蕉朱古力,佢地話飲到好飽,但係好香蕉味,呢款凍熱都有其中一位朋友要求叫呢個點點醬薄餅,其實係茄醬黎,不過面層有芝士,撈完一輪就可以點點喇.

個薄餅比想像中冧,朋友就話會唔會只係我地以為佢一定係脆就覺得佢冧左係唔啱呢

個醬的確係有少少辣,唔點太多都係可以接受,值得一試朋友話有個著火雞要試下,上菜時店員會喺你面前點著杯酒淋上去,於是就出現以上畫面,都燒左好一陣子(唔好意思影得唔好)火熄左之後店員會幫你切開隻雞,真係坐喺度等食就得喇,但唔好諗住隻雞個味道好特別,我覺得就係一般燒雞味

雞下面有d薯角喺度,我最後唔小心食左舊索哂酒嘅薯角,苦到...呢個意粉都講明係有vodka,但係食落完全冇vodka味,雖然係咁,不過我都覺得係要試下嘅,比起之前個carbonara好食

由於意粉嘅餸係腸蓉,你會以為佢冇餸,有d無奈蕃薯條,如果唔係特別鐘意甜食嘅人,千祈唔好點中間兜野,因為係蜜糖黎

本身d蕃薯已經有d甜味,所以我地寧願點嗰個微辣嘅茄醬最後呢個其實係黎錯左唔知邊枱叫嘅芝士焗菇

6位或以上送汽酒1枝,好唔好飲就見仁見智

因為今次係生日飯,我地切蛋糕影相時店員拎左一堆牌仔俾我地揸住黎影相,都幾得意

正日生日飯,大人揀左呢度,我自己就好少揀呢d bar+restaurant嘅舖頭,因為通常都嘈,同埋窄

呢間餐廳喺正尖東站出口旁邊,不過我建議出返尖沙咀站過馬路一定快過喺兩個站中間行

喺門口等店員check返booking就可以入座,搭枱基本上係無可避免,因為大部分都係一張長枱坐好多組人

menu非常豐富多選擇,紅字嘅must try item亦都超多,樣樣都叫人must try咁滯

千揀萬揀之後....

其實我地有叫飲品,不過冇影低

我地唔飲酒,所以兩杯都係mocktail,一杯係橙色嘅PPQ(桃/西柚),一杯係紅色嘅parrot(荔枝)唔係好肯定份量大細,同埋一張長枱咁多人坐,位置唔多都唔敢叫太多野食

我幻想個脆卷係入面充滿雞茸,或者至少入面係有野嘅,但原來只係春卷皮頭尾填左d雞茸同黑松露,中間係空心

咁多黑松露擺入口原來都幾咸,我呢平民食唔慣大蝦意粉係最好食嗰樣,一黎隻蝦堅大,二黎意粉汁都好有蝦味,最後係意粉軟硬適中

不過真係趁熱食,凍左就唔係嗰回事最後先上黎嘅拼盤,諗住可以一次試幾樣野,但係...我唔識欣賞,我錯了

相入面中間係一舊芝心肉丸,旁邊3條骨係豬仔骨(同我認知嘅豬仔骨唔一樣,而且味道普通),順時針去見到兩條牛油果唔知咩卷(口感好攪笑,軟軟地有d似甜品腸粉,同埋係凍嘅),再落又係黑松露脆卷,最後有d菜嗰堆係辣八爪魚(食到最後兩粒先覺得辣,同埋不停覺得自己食緊擦膠)

有d野都係試過一次就算,我都係覺得食晚飯要坐得舒服,最好唔洗搭枱,仲要唔好坐bar枱...

唔知幾時開始每次一家人食生日飯都會選擇食齋, 好在依家素食店都開到成行成市,唔怕冇得揀幾年前食過灣仔樂農,印象係份量大,所以覺得抵食,但今次呢...

由於老頭子好堅持叫7樣野唔老黎,所以點都叫左8樣野先黎一個學斗,薑蓉唔算多,可能因為我鐘意食薑,多多益善,所以呢碟感覺上唔夠辣味睇相好似好油,不過食落去還好緊接住有蒸飯,淮山夠細粒蒸得透,真係阿婆都啱食呀雖然見到蟲草花,但食落就唔係好覺栗子煲係店長推介,啱哂呢d凍凍地嘅日子入面都有好多菇類,撈埋頭先個蒸飯一齊食就好豐富想食d香口野,腐竹粒唔油,擺左一陣仲好熱,不過就唔多覺椒鹽左喺邊度但就咁炸腐竹粒都係非常唔錯,唔點野都ok追加五柳卷,叫之前冇留意原來又係腐竹.....酸酸地又唔係太大件,只係食到呢度先意識到自己已經食左太多腐竹都係追加嘅蒸餃,一啖一粒咁滯,好細嘅有雲耳同菜做餡,但係餃皮厚左d,而且唔夠熱就唔好食最後黎到甜品~印象中佢地嘅合桃露係香d濃d但呢次....好稀,而且冇合桃香,加上好細碗,真係有D失望最最最最後係老頭子話要食壽包壽包反而幾大隻,而且唔會話要等好耐,味道就冇乜特別

試業嘅時候就已經想黎試下,但係一開總係太多人
於是今晚見差唔多9點就黎碰下運氣
黎到門口就遇到第一個難題,收銀隔離有部tab,但係冇任何指示話俾人知呢部機係做乜
咁我就係唔係都篤左先,大不了俾人叫我唔好亂篤
原來客人要自己埋黎篤飛仔,部機上面只係好簡單顯示住1到11號嘅按鈕,同foodgulu個logo,完全冇文字話你知佢係咩一回事.事實上有好幾個客都係呆等左一陣先發現原來係要自己篤飛
同埋客人唔會知道黎攞飛嘅時候係叫到幾多號,店內冇顯示牌

好快有位,大人揀左呢個千層豬扒嚴格黎講都唔扒,我諗係將d豬肉疊埋一齊?我都冇仔細研究
但口感一d都唔豬扒,形容唔到
沙律上枱嘅時候冇汁,唔小心乾哽左我就要個飽肚d嘅壽喜燒
要讚下擺盤其實幾靚
牛肉一d都唔肥,只有好少好少脂肪
到我食沙律嘅時候再望下周圍,一d枱有枝醬料一d又冇
所以我忍唔住要問侍應,佢先拎左枝柚子汁過黎.到底係唔夠主動定係訓練不足?店方想俾客人自主選擇加唔加汁,但上沙律嗰陣又冇人講原來有汁呢樣野
講返個飯,我覺得太乾太硬,冇d汁撈下就比較難入口最後醒起自己有張coupon,消費滿$100送柚子芝士蛋糕或者白桃茶
呢個蛋糕可以話係成餐入面最令人滿意嘅,濃郁柚子味餅底唔硬,連側邊d cream都彷彿好食過人,我諗係用鮮奶打嘅

再講多少少食物以外,食食下發現有條人龍出現左
原來係十幾個人等住俾錢,之後聽到收銀有人講hang機,有人講成部機壞左,最後條人龍花左差唔多廿分鐘先清理到

做完gym,又唔想去澳牛,是但求其見到呢度環境都唔錯就入左
有印象係小儀開嘅,不過都冇影響,其實唔會覺得特別好食左

有個lunch set,選擇唔多,得3款,另外加左個小食,就出事喇...話說呢個木耳嘅汁係酒黎,都可以話係自己攞黎衰
冇諗過陣酒味濃到咁,因為我平日係完全唔飲酒,所以面對呢碟醉酒木耳真係毫無招架之力
而且愈食愈覺得苦,食苦瓜沙律可能都冇咁難入口
可能酒鬼會鐘意食,但我一路食一路feel到自己心跳加速,同埋頭痛,所以剩左半碟處理唔到餐飲可以揀豆漿或者紫貝天葵
凍飲唔覺但飲到底就覺得太酸
不過點都健康過凍奶茶之類嘅飲品嘅午餐入面最吸引我嘅另外一樣野係前菜
雖然只係一小片百福豆腐,其實可以索性將個豆腐變做一個獨立小食啦
蒜蓉包都相當值得欣賞,唔係勁重蒜味,食完都唔怕口臭主菜湯檬就平平,湯係好清,豬扒亦都好嫩
但檬粉太多,而且一夾就碎到阿媽都唔認得
多菜都係抵讚嘅
可能我唔好彩,揀親d野食都同我作對,下次再黎佐敦或者都係去返澳牛喇..

我真係太鐘意用table map訂枱,幾時有幾時冇一眼睇哂
去完gym過黎食飯時間剛剛好
一黎就有位,唔洗等
呢度裝修同屋企附近間泰國野好似,就係冇乜裝修,每張枱都好似舊時屋企食飯摺枱咁隨便
見到隔離十個八個人叫左勁多野食,我地都唔小心眼闊肚窄...香口野少不了,雙併入面春卷稍為遜色,普通到好似酒樓程度
酸辣醬有點兒太辣,用黎點蝦餅入口就冇咁油膩食泰國野冇可能唔叫串燒,原本我地應該係叫豬+雞+腎
但黎到好似變左雞+雞+腎,不過都食左落肚,就由佢
沙嗲汁雖然平平無奇,但食串燒係會忍唔住點個不停睇menu張相見到好似都幾多蟹肉,不過始終圖片只供參考..
本身個炒飯底係普通三色炒飯;芒果都幾甜,但最後我地因為下一味餸滯左而要打包返屋企以為炒鮮魷有幾特別,原來都係炸過淋返汁上去就算
呢味餸我覺得係幾失望,因為一望就知好多油,二黎就係炸粉厚,所以食完魷魚就滯到唔想食飯,太油一杯飲品都唔平,$28@
我諗佢有提供水嘅,但唔係你坐低就會俾
杯沙冰其實一早就黎左,不過飲到食完哂野都仲未溶哂,而且飲到入面真係有用芒果

食完出黎都好似就黎十點咁上下,都仲有人等緊位

上次黎食過豬仔骨之後,其實一路都覺得要encore一下,於是又上table map book定枱
黎到門口有堆人喺度等位,即刻驚會唔會我book左都要等餐死
最後等左一陣,剛剛有人走左未執得切
望到個menu,點解好似同上次黎係一樣,彷彿冇轉過(上次應該係大半年前)
今日就揀左個平啲嘅二人餐,試下特色野,點知就出事喇我都幾鐘意頭盤個沙律,火腿雖然咸左少少,不過有成兩大塊咁多
至於個湯,我唔係好知係咩黎,好稀如果食西餐嘅地方可以唔好下下都一味碟大,咁個枱面就可以更加有效利用
因為放低左呢個意粉之後,前菜都未食完下一味又黎,擺唔哂而且好易撞跌
講返個意粉,order時已經問左侍應會唔會好辣,嗰個有少少呆嘅四眼仔就話唔會好辣
點知呢,我食少少已經辣到唔想再食,唯有成兜等大人攪掂
意粉入面有4隻大蝦,已經去左殼;會好辣嘅原因我估係用左乾辣椒,而且成碟都係辣椒籽,最辣嘅部分滿佈一整碟意粉,唔食得辣嘅朋友千祈唔好揀第二味主菜,見仁見智,兩隻蛋係幾有趣嘅,但切開左,d蛋汁浸淋左個pizza,咁一個唔係好脆又濕左嘅pizza到底仲好唔好食呢?
每個人食蛋都有唔同喜好,太陽蛋又未必個個鐘意
pizza嘅其他配料就一般,菠菜同煙肉,所以最特別嘅地方就係嗰兩隻蛋
食落其實淨係feel到蛋同芝士嘅存在,其他野唔係好食得出
我自己就覺得一般,最主要係因為d蛋汁攪到唔知想點甜品應該係椰子奶凍,又係一樣見仁見智嘅野
我自己唔係好喜歡椰子味,另一樣扣分位係個奶凍完全唔smooth
今餐真係強差人意