次次行過都覺得唔算好抵,但又唔貴,今晚就因為原本想去o既地方太多人先黎試下
八點落到黎,得幾枱客,半滿都冇
叫二人餐抵過一人一個,都係諗住可以試多少少野食
個餐包左湯/沙律+頭盤3款+飯/pizza/意粉+扒+台式奶茶/紅茶/綠茶今日係南瓜湯,原來入面有素翅,都幾飽肚
後面o個杯就係台式奶茶,好香,唔洗落糖,冇港式奶茶咁濃
另一杯要左綠茶,好香茉莉味擺盤算唔錯,可惜個底冇野索油,所以有少少倒胃口
個帶子係原隻(即係有裙邊同埋帶子便便...)好細粒,味道就唔係好食得出
中間係煙肉包雞脾菇,都係冇乜特別
最後就係炸豆腐,細細粒其實好易入口,不過炸物d油一定多,最離奇係冇調味,又或者係有我食唔出如menu上圖片所示,隻鮑魚真係咁細隻,冇呃人架
裡面仲有蛋,薑粒,鮑魚粒,洋蔥,蘆筍,至於雞粒應該都係有o既,不過可能又係太細我食左都唔知
本來都覺得個飯唔錯,但愈食愈覺得油,加上食到一粒疑似鮑魚但咬極咬唔開,擦膠咁o既物體之後,我就有d保留個肉眼一上枱就件扒咁薄,要3/5/7成熟都差不多吧
隔離茶餐廳件扒可能仲好過呢度,只能話個汁唔錯囉
最失望就係o個度有一大部分都係全脂肪,正常人唔會食啦吧?
件碟o既薯菜都算少...

成餐飯我最欣賞就係杯奶茶,其他野就

陪大人買完野唔知食乜好,是但求其過左黎呢度食
好耐之前朋友生日飯黎過,當時印象係食完好似冇食過野咁..睇緊menu時先serve幾件麵包,hmm...冇dip sauce架?
大人覺得個menu同jamie oliver好似,都係一堆不明所以o既名之後揀左個海鮮扁意粉,料都幾多,有好大隻青口,好多魷魚
但呢碟野如果一個人食都應該覺得唔夠另外叫左個black angus,7成熟
最外層有d燶燶地,略咸,又唔會勁多血水
不過大人就覺得冇淋汁,就咁食好dry
底下墊左薯仔,茄子,青瓜;茄子好索油,薯仔就唔算好夠味
冇再叫其他野,因為覺得唔算好抵食

倫記摺左,取而代之係呢間小小麵店
望落價錢唔算貴,門口阿姨落力推銷,就試下係咪藥湯我地兩個都鐘意食豆腐,所以要個小蔥豆腐試下舊豆腐大到...半盒定一盒百福出左黎
後尾自己加左少少辣油,蔥味更香;但另一個角度睇,自己買盒百福雪凍,淋豉油之後就咁食係一樣架
大人要個牛腩麵埋到黎仲O係度滾緊,阿姨都千叮萬囑小心唔好掂到個煲
比想像中大碗,但係牛腩稍為老左,香就真係好香我要左個齋o既,未食之前撩佢幾下,有一陣藥味衝出黎
算幾多料,又有幾條菜,如果唔係今日下晝早食飯,都未必食得哂呢碗麵
飲左幾啖湯,藥味冇聞到o既咁濃,同想像中有出入,有少少失望
另外叫左豆漿,只有凍o既提供,同埋好細杯
個人覺得係可以再黎o既食店,希望佢捱得住~

好耐之前嘗試過黎walk in,但因為等位時間太痴線最後冇食到
今次買左團購,預早一個星期book枱,可惜都係book唔到我想要o既時間

黎到即刻就有得入座,不過門口接待o個位大姐聽錯左我講野所以帶我遊哂成間餐廳先坐得低
團購係另一個menu因為係素食,所以基本上揀邊樣都覺得差唔多今日餐湯係雜菜湯,我o個碗有5大舊薯仔~正
揀左牛蒡沙律,都幾大兜;不過醬汁太多,食到尾覺得酸左d再黎係串燒,其實當然就係麵筋,唔知有冇炸過先,好香口.個沙嗲汁都好正,點少少唔夠喉香芒蝦xxx入面仲有"雞"
d芒果真係甜到你唔信!!仲一夾就爛
蝦有4大隻,雞就同之前串燒差唔多,質感好似真雞肉
唯一覺得麻麻係個汁,好漏,而且放涼左之後有少少琼埋一舊pizza係勁多芝士,但配料唔多,每塊有一片腸同菠蘿
因為係薄批,所以個邊都幾脆
最後食唔哂要打包...
飲品要左一杯蘋果醋一杯菠蘿醋,諗住平時都有o係屋企自己沖黎飲,應該冇咩問題
不過呢度沖得濃d,所以酸味相對勁d,杯蘋果醋甚至令人覺得乸喉嚨,係咁溝水都唔得最後是日甜品係豆腐花,幾滑,唔大碗;不過到最後食甜品時已經飽到痴左線..

未叫埋單就已經有人主動隊張單埋黎(其實仲食緊個豆腐花),團購二人餐只需要俾返服務費$38
但又計錯數,唔知點解變左七十幾蚊...
之前提到我地食唔哂個pizza要打包走,侍應話用個膠袋仔好唔好,我地冇所謂
然後佢埋黎幫我地處理,以反轉膠袋就咁拎起d pizza o既方式去包,咁就令到成個膠袋都係油,睇個樣我有少少唔知拎唔拎走好,真係後悔冇截住話等我自己黎攪.
整體覺得味道唔錯,但份量太多(隔離枱要打包o既野仲多!),service就有待改善.

唔係經常會行到咁遠食飯,原來呢度新開左間點心舖~
黃埔呢頭真係好少呢類食店,二話不說就衝左入去
店內座位係僅僅擺得落,走廊較窄

選擇唔算多,不過都算係應有的都有~鳳爪唔算辣,最底有好多芋頭墊住,雖然都索左少少油,不過都入到口~
蝦餃味道一般,不過算係大粒試下特色野,我對柚子呢兩個字又係冇乜抵抗力
始終係油炸,避免唔到多油,但如果張油紙放o係食物下面會更好,起碼真係會幫到手索油丫
柚子汁可以再傑d,依家太稀,好似點極都點唔到咁,但整體覺得唔錯,微酸其實d包都幾得意,例如叉燒包,上面會印住"我是叉燒包",好盞鬼
不過覺得餓,所以叫左個牛肉飯share
煎蛋同牛肉一樣咁厚同咁圓
蛋邊有少少脆,好味~牛肉冇乜筋,切細d撈飯就爽哂.點心紙上面仲好貼心咁可以俾你tick要多/少/走豉油最後呢個燒賣就有d失望,咬左一啖以為佢黎錯,因為唔見左粒帶子
問下侍應姐姐,佢話因為做唔到成件帶子擺o係面,所以轉個方式攪碎撈左入去
但食唔食得出,真係因人而異,我就唔係好覺喇,同埋成粒白色,賣相都麻麻地

食飯時間高峰,入黎巷仔最有可能搵到唔洗等位o既食店
蛋包飯係行過幾次但覺得稍貴而且好飽所以唔係首選
見佢今晚有位,抱住一試心態...
一睇menu,其實set dinner黎講一舊水,都係比較貴
一人一個蛋包飯,都係餐黎o既先黎沙律,幾條菜同埋1/4粒車厘茄(連半粒都冇...),芝麻醬兩個餐o既小食合體做一碟,即炸薯角雞樁翼就大細有少少唔平均我o既係咖哩吉列豬蛋包飯
第一眼望落已經覺得豬扒炸得太老,黑得滯..
冇特登拎把刀去切個蛋,隨便用羹切開...咦唔會自己趴落黎o既?個蛋入面就係未熟但又唔夠流質...
咖哩汁唔辣,不過都唔甜,豬扒算瘦,但都係炸得太老
輪到d飯...其實我好少評論關於白飯呢個部分,但呢度d飯加左料---三色雜菜,煙肉,洋蔥
留意佢唔係炒飯,只係撈左呢d野入去
對於唔食三色雜菜或者洋蔥o既人黎講,呢個白飯係惡夢店內亦冇任何提示話俾你聽d飯係咁
如果我知道我一定唔會食,連入都唔會入黎,因為我唔食洋蔥!!如果熟o既我會考慮下,但半生不熟o既就最難頂大人要左牛肉漢堡,圍住個漢堡見到有一圈油...
蛋同上,都係冇溶岩feel
飯一樣,加左料
最後大人食唔哂,因為pat肉好滯好膩
跟餐仲有一杯飲品,呢度就唔share喇,都係d奶茶咖啡咁

偶然o係openrice碌碌下,見到呢間韓式甜品好似幾有趣,同朋友食完飯就黎睇下
黎到門口見到一堆人o係度等,其實唔係好樂觀,本來想算數,不過朋友又衝左入去攞飛,原來等兩張就到
唔係等左好耐就入座,店內其實位置都幾多,大家都坐得好迫...
完全就係用盡哂d地方咁

我最鐘意食軟雪糕,所以二話不說就揀左呢個抹茶味o係d粉食哂/吹走哂之後就得返牛奶味雪糕,但要講o既係冇牛奶味
旁邊o個pat紅豆我就覺得唔錯,唔係太甜
最後就係o個兩粒丸子,白色係零味道,就係一粒放大左o既冇餡小丸子;綠色就有好淡好淡o既抹茶味
朋友要左呢個朱古力五重xxxxxxx雪奶一開始見到兜煉奶有少少R頭,因為冇人講過要點食
於是就試下就咁唔加落去係咩味道,d朱古力粉加埋底下o個d白色o既雪(冇味o既碎碎碎碎冰?),我覺得自己係將朱古力粉就咁放入口,好苦...
食食下個頂舊cream冧左,連帶佢上面d粉都跌哂落枱面
食到大家都覺得好似好冇味,就將d煉奶倒埋落去翻滾幾下,更加唔知自己食緊乜

平時行過呢度都係一堆人等位,今日都係抱住一試心態,食唔到其實真係冇損失
八點鬆d落到黎又好好彩咁有位
有個小插曲o係前面.......
我地黎到時有pair人o係前面等緊,當時店內都有兩三枱係吉左.忽然有一班鬼妹入左去就即刻坐低哂
前面兩位質問女侍應,對方回應因為佢地有打黎book
於是佢地好唔順氣咁走左.以我所見,o個一大班人入去之前佢兩位已經等緊,係一直冇人安排佢地入座,難怪佢地寧願唔食算數

因為前面兩個走左,所以我地即刻有位
夜晚冇set,所有野都散叫,彷彿好flexible?但其實係貴左.
叫餐形式係出去收銀order,之後佢地會送埋枱等左20分鐘,兩個burger先出現
左邊係德國腸磨菇,望落好似好多料,其實得3塊腸,菇同菜都唔多,唯獨是入面個茄汁我幾欣賞,因為有加香草之類,味道比平時o個d酸少少
右邊係經典牛肉,芝士一路食一路溶唔知係咪即叫即炸,所以幾粒丸都等咁耐,上到黎係好熱,但同o係佳寶買黎打邊爐o個d丸唔覺得有分別最後差唔多乜都食哂先出現o既炸蝦,有4條o既
一睇個色就覺得炸太耐,咬開仲見到條蝦腸同我say hi
入面係唔乾,但呢個炸皮就咸得滯,再回想返有條蝦腸....
我地冇買飲品,因為出面都有好多奶茶舖.食完出黎覺得自己連七分飽都唔到,但已經唔想再order完又要等勁耐,去第度再買野食好過

最唔鐘意就係成間野都係bar枱,雖然枱底個勾俾人掛袋,但其實掛左袋又會頂腳,同埋間野其實都幾迫,好肉地o既朋友黎食就要小心撞到喇

從來都冇留意原來工廈入面可以咁多舖頭,一出lift真係wow左一聲
不過提提各位,當日到左地下大堂,有一部lift壞左,得返一部,又唔係裝得多人,所以要去低層的話可以出返門口轉右上樓梯,快過等lift呀!!!

餐廳環境算幾舒服,兩旁有d二人/四人枱,中間係一張長枱;所以坐長枱就必定要搭枱喇,因為係分唔開架
晚餐可以只叫主菜,不過水都冇杯...所以我地3個人就將2個upgrade做餐.另外提一提o既係豬牛羊雞各有一款,食肉獸就最適合.得一款係齋,我就冇得揀喇個湯好似係甘荀...唔記得,偏咸,不過唔大碗,所以算接受到.旁邊仲有沙律(油醋汁)同埋麵包,如果個包可以稍為烘下會好少少.但整體觀感覺得唔錯.朋友要左雞扒意大利飯,好似係香草汁(同個意粉一樣樣)
要講下個雞扒,一咬落去係索索聲好清脆!真係邪惡的雞皮~我當然要左個冇肉o既,好似頹左d,不過我食得哂,但我估香草汁唔係人人喜歡吧最後係呢個唔記得左乜野牛扒配大蝦,老實講隻蝦就唔係好大,不過切開左就容易d食
牛方面就普通,只可以話唔算難食;飯o既份量正常,因為扒唔大,所以有d汁撈下都好易食得哂初時以為窩夫係上面有大舊生果o個種,點知黎到真係有少少失望,個芒果仲要細到咁 咁不如就咁叫做窩夫伴朱古力醬,藍莓得兩粒,d生果只係伴碟作用
黎到即刻食會好d,如果佢索左cream就林哂冇咁好食喇飲品方面淨係叫左杯梳打黎試下...
好睇係好睇,入面都真係有蜜桃,但唔俾長羹,又整枝咁長o既飲筒..會唔會令人有d難做.味道一般,冇乜特別望住杯底d生果好無奈

大人話要食燒肉都講左好耐,牛角同牛涮鍋個reception好近,但一堆人竟然全部都係等緊牛涮鍋,所以牛角係近乎唔洗等就入左去
原來依家都好high tech,唔洗叫人埋黎落單,好似白木屋咁o係部tab篤篤篤就完成
上菜都好快叫左個盛合,豬牛雞有齊,乜都試到小小~
燒雞肉o個時個火真係好勁,另外要讚下個牛舌,薄薄地剛好
另外仲叫左個雜菌盛合冇d非肉類入口會好難受~一邊食燒肉一邊食冷麵....覺得佢好似唔係好夠冷添
不過柚子醋真係非常唔錯,微酸,但係都幾大碗,兩三個人share都ok牛肚都係新野,本身已經有d汁,燒一燒更惹味~
而且都唔貴($4x),9點後仲係其中一樣特價品!!
燒完哂肉梗係要黎d甜品猶豫左好耐到底應該要吉士定紅豆餡,不過又怕紅豆太甜,都係叫左吉士
一份有兩條魚,手掌心咁大,燒之前店員會換過個網先俾你燒~
店員會開中火,不過本身個爐D火唔係好平均,自己要留意下喇