呢個位置o既餐廳轉完又轉,冇一間做得長~
開左幾日,16-19/7係試業,不過都未見爆滿,宣傳唔係好夠咁呢
見到個二人餐好似都幾抵,$163先黎一人一個沙律仔,就係好普通o既雜果沙律,冇乜特別小食有4樣野可以揀,揀左個年糕
咬開有芝士流出,但年糕我又唔係好覺...order時侍應話部機有問題,單上面打左芝士軟心煎餅,所以其實眼前呢兩件到底係芝士乜乜,我唔肯定,只可以話唔難食麵都有幾款可以揀,最後揀左醬油味,d芽菜多到搵唔到d麵o係邊,堆到座山咁高
有幾隻蝦o係入面,都唔算太寡,不過感覺配料多過麵火鍋牛肉得4塊,食肉獸就唔適合喇
料唔算多,份量偏細.湯底可以揀原味或者味噌,其實我有問佢原味即係乜野,不過聽完都唔係好明,講到一舊舊咁,就要味噌算.留返舊粟米最後先食,但d味怪怪,食左幾粒就冇食落去.
火鍋有拉麵跟,一細碗,食埋就飽飽如果唔想要飲品可以揀甜品o既,不過得一個雪糕球,好似飲野抵d
幾鐘意杯紅豆抹茶,係多冰左d但唔會超甜,不過要+$9
另一朱古力都係特飲,所以都要+$9
整體黎講算唔錯啦~平平地,但服務需要改善
我地坐卡位,櫃筒入面得紙巾同筷子,我地叫二人餐碗仔都冇隻,個沙律上到黎又冇叉又冇羹,唔夠主動~

見到呢間cafe都開左一段日子,不過位置唔算方便,所以一路都冇打算特登黎試
今日放工唔知食咩好,行下行下黎到呢度,又冇乜人就入黎試下得唔得
完全冇set,全部散叫,唔同時段有d套餐揀下會好d吧
是但求其叫左兩個all day breakfast
價錢一般,雖然我唔係好明點解食d咁普通o既野要八十幾蚊咁多
上菜都等左頗耐,唔係漏單之類,係真係好耐,差唔多二十分鐘吧呢碟入面有煙三文魚(中間卷埋一舊),煙肉,火腿,菇,炒蛋,薯餅同牛角包
望落都ok o既,係個薯餅似乎炸到over左我就要左個更普通o既,因為我好鐘意食茹汁豆
個多士雖然係已經唔熱但都ok的,只係冇牛油...
兩隻蛋o既其中一隻黃已經模糊不清,個presentation唔得
我最愛o既茄汁豆唔知係咩牌子,但係唔好食
最後係重點...說好的蕃茄呢???
中間o個pat我都講唔出係咩黎,連1/4個蕃茄o既份量都冇,芝士定唔知咩野完全蓋過左底下o個件茄皮
見到呢舊野真係好失望,連一粒車厘茄都不如

都講下店內環境丫,其實都算幾relax o既,但我地坐o個d圓枱會好易撞到隔離,肥d都未必出入到o個種
仲有就係我唔明點解音樂就播英文歌,但電視播住mute左o既安室奈美惠演唱會loop?是但播一樣啦好嘛,咁樣攪到成件事都不倫不類
入黎坐低時店員俾左張coupon我地,但張coupon上面只係寫住$5或是$8,冇任何細則除左到期日.唔知點用同有咩用,而且因為張coupon隔離有一款食物,我地唔知係咪要指定食物先用得.點知埋單時店員減左$8,之後就撕走左一張$8 coupon...errr多謝哂囉.減左o個$8但都係有加一,其實冇平到幾多...

話說同壽星仔o係油麻地食完飯,佢話食糖水,行下行下就黎左佐敦
本來想試下對面o個間綠茶甜品,但係好似好多都係waffle或者蛋糕,飽左d...
行左入黎甜在心先發現原來呢度有飯食架,都幾好可以同一間野食完咸o既就食埋甜見到佢圖片有得黑白涼粉撈埋一兜,但menu上面又冇呢個選項,問左一位唔係好清楚o既侍應,佢再問另一個人先知道係可以咁樣撈o既
雪糕就是但揀左個芒果味
白色o個隻其實唔知係咩黎,又同黑色有少少唔一樣質感,不過都係幾爽口o既壽星仔要左個綿綿冰,仲要雙拼口味
朱古力o個邊好味過芒果~因為芒果明顯淡好多~~
要左煉奶,冇其他醬咁明顯;其他配料要左可可脆,椰果同乳酸爆珠
唯一要講o既係,爆珠真係唔係人人都鐘意o既野...下次都係唔好揀呢隻配料,同埋乳酸味係頗酸的..

朋友生日,又唔想食d好貴o既野,見到呢度好似都制得過~
其實有個二人餐o既,不過我唔想食咁多肉.二人餐得兩款可以揀,一係牛一係豬...
最後一人一個餐,先黎個湯,係冇得揀紅定白,不過我都冇所謂好似話係薯仔忌廉湯,都幾濃,唔錯~
我要左個齋o既意大利飯都幾菇,份量尚算適中,或者再少d都可以,因為意大利飯都係d幾滯o既野黎
飯粒o既軟硬度係我鐘意o個種...即係熟哂o既飯~或者有d人覺得呢d飯唔應該係熟哂,要有d硬硬地先得,但係口味o既野個個人唔同,唔係做得正確就會好食
加上佢又係冇肉o既飯,所以我都幾鐘意壽星仔要左個龍蝦天使麵,佢話意粉比較一般,低個龍蝦就幾好食
望落都幾多肉,又幾大隻,而且唔會食到好狼狽最後飲品我就揀左個檸檬薑茶,只係茶包,同我想像有d出入...我以為真係會有薑o係度
要篤下個茶包先再有多d味,就咁浸住d味就勁淡
朋友o個杯朱古力就正正常常,不過好似係要加唔知$3定$5

我地食完先差唔多八點,唔full,但環境其實幾唔錯,下午茶時段應該都幾relax
不過因為圓枱o既關係,如果再叫多d野食就一定擺唔落,呢樣就有少少美中不足喇

一路都唔知原來淘大有間麻布...星期五o既晚上周圍都要等位,我又對於軟雪糕好冇抵抗力,所以就o係度痴痴的等...
真係企到腰酸,終於有位,大家都好有恒心咁等
menu同以前認識o既麻布好唔同,少左好多野是但揀左個咖哩飯,幾乎完全唔辣,所以食得好輕鬆,同埋因為等位咁耐好餓o既關係,轉頭就食完~大人要左個牛柳定食
其實牛肉係咪真係好難煮得好,點解又係咁難咬o既
最欣賞就係d前菜,酸酸地好開胃
揀左配梅子飯,係好淡o既梅味,食耐左係唔覺o既添

就o係差唔多食完兩個飯,諗緊叫咩軟雪糕甜品o既時候...
聽到侍應同隔離枱講個雪糕機壞左!!!
呀!!!!我到底係為左乜野等位等咁耐,錯哂呀....
如果淨係為左食飯,我真係唔會入黎呢度呀咁貴,冇得食軟雪糕,所以極速埋單走人喇

我地7條女其實都嗌左好多野食架...不過食完先發現自己唔記得全部影相
事前朋友打過黎話冇得book枱,所以早到o既人就先上黎登記,差唔多有枱就會電話通知
一坐低就留意到枱面會有兩杯糖果又幾攪笑喎,大家都餓喇食住糖頂肚
我地叫左檸檬雞翼同水牛雞翼,不過我就係唔記得左要影...小小地都叫個沙律黎食下,感覺份量唔算多,不過可能根本係我地今次人多o者呢個拼盤好似係叫做海鮮拼盤之類
有fish finger,炸蝦同魷魚圈.太耐冇食過fish finger所以好鐘意呢個拼盤~拿破崙d茄汁唔會太勁,剛剛好,入面d腸相對少左d唔知朋友o係menu邊度見到有呢個明太子天使麵
好多菇,但明太子就...唔知去左邊~
仲叫左個菠菜雲吞,只有4大塊,轉眼間就食哂~因為想試多幾樣野食,所以只係叫左半份rib,大家都係少少地試過就ok~
旁邊o既薯條都係非常脆口~幾條rib都係好易切好易食,個汁又唔會太勁最後就叫左個甜品,慳返冇買蛋糕
店員都有一齊唱生日歌~

食完甜品好快就要埋單,限時90分鐘都真係唔覺唔覺..

本來好少行入黎呢條街搵野食,以為purplemind仲健在,去到明明個門口都一樣
原來已經轉左手,唔怪得硬係有d唔妥...
不過都是但,飯都係要食
見到門口有個黑板寫住呢個星期試菜所以只係得一個set,有3款唔同o既肉類主菜可以揀

企o係開房式廚房入面打點o既當然就係老闆,好健談
原來今日只係試業第三定第四日,所以兩個侍應姐姐都有d手忙腳亂坐低第一件事老闆就自過黎介紹呢個銀色o既東東,佢話有客唔識用呢個牙簽筒攪到好樣衰
拎起睇下都好重手...雖然入面唔係裝到好多枝牙簽要左個白湯,入面有素翅....唔記得入面係有咩材料,我淨係記得個湯每一啖都飲到入面係有d咩o係度,總之好味啦,唔好深究咁多喇有湯又點可以冇蒜蓉包.
不過直到我食到個主菜為止,"手忙腳亂"呢4個字o係我腦海中揮之不去...前菜~密瓜稍為唔夠甜,所以覺得個火腿彷彿咸過平時咁
不過整體黎講係十分之唔錯o既沙律~除左前菜仲有個小食頂一頂,因為主菜都唔係話有就有,好在o者~
呢個炸物就平平,唔係勁好食,但又唔會難食..大人揀左個牛,已經忘記左落單時有冇問我地要幾多成熟,anyways...埋到黎覺得佢熟得滯
我唔係太食紅肉,淨係食左一小啖,有d唔係咁易咬得開我要左個雞,hmmm份量都幾大,我地兩個都細食,所以望住呢兩個主菜有少少茫然
好在有d薯菜墊左底,否則就會感覺太油膩(其實依家都有少少)
畢竟食雞係好難避開雞油呢件事,唯有食到幾多得幾多
btw兩個主菜係等得比較耐左,有漏單之嫌甜品係自家製香蕉雪糕...
呢個就真係唔係太欣賞,冇香蕉味,d朱古力醬轉個頭就硬哂,根本一d都唔想食
質感係有d似sorbet又有d似刨冰又有d似劣質gelato...
sorry但我寧願要件迷你蛋糕或者雀巢迷你雪糕都似乎比呢個吸引啊

朋友即將出發去working holiday而且有可能一去冇回頭,於是今日鄭重地食呢餐飯
佢又好好人咁主動提出話去食齋~擺明係就哂我呢d無肉人士
o係table map book枱,前幾個鐘想改人數,原來上網改佢地會唔知道,但至少我個booking健在
餐廳唔難搵,近牛頭角,o係渣打行去後面就見到大大個招牌
上到去都估唔到幾大間野,裝潢真係好西式
3個人選擇困難,最後決定一人一個餐就算一個人o既晚餐都相當豐富,有新鮮生果做前菜,另外五穀包/衛星包/冷麵任揀一款
再一人一個湯,中或者西式
然後就到主菜我揀左個雜菌素丸手打烏冬
見到咁多餸就知佢幾有份量,雖然個人唔係太喜歡假齋,但呢d丸都真係做得相當似,連口感都好似
舊西蘭花就爭少少,如果可以切細d就更好其中一位食南瓜意大利飯
望落碟大飯少,但係食到個人飽飽滯滯,因為意大利始終有芝士呢d飽野o係入面
朋友就話南瓜味好似太淡,但整體唔錯今晚o既主角叫左千層麵,入面o既"肉醬"由多款唔同o既蔬果組成,有翠玉瓜,薯仔等等
茄味都係偏淡,芝士可以減量會冇咁滯甜品其實都有7,8個選擇,本來我想要水蜜桃布丁,可惜冇哂.於是要左是日中式甜品
係咪睇落好水好稀呢,其實佢係腐竹蛋花湯,微甜,少少地唔係一大碗,剛剛好
另外仲有千層蛋糕,芝麻糕呢d可以揀
個餐仲包埋一杯飲品,都係奶茶咖啡o個d,我就要左個熱檸賓,唔洗加錢架~
整體黎講呢度係可以食過翻尋味,一定會再同其他人再黎食!因為好抵又好好食~

原本都唔打算要寫呢間野o既食評,但係唔講出黎,我擔心大家會有一樣o既經歷
朝早出完街返黎食下午茶,見佢都開左一段日子,於是黎試下
入座時得3枱客,相比附近其他食肆,呢度真係好少人

通常去呢類點心舖,佢都會俾一壺茶你自己慢慢飲,但呢度就唔係,你飲哂o個杯佢就加俾你,位位$3.所以唔知自己飲緊咩茶,亦覺得咁o既方式唔係太好.
叫左以下幾樣:
泰式肉鬆炸兩
牛肉球
燒賣(大粒o個隻)
雞包仔

個炸兩第一個到,皮稍厚,入面條油炸鬼"林"得好緊要,不過肉鬆都算唔少;問題就係佢d肉鬆係鋪面,如果包埋o係腸粉入面就會食得冇咁狼狽.點豉油係點極都唔覺得有味,只係黑色o既汁...
燒賣話有蝦o係入面,但咁大粒燒賣入面隻蝦都係好細,感覺就係平時o既燒賣放大版.味道冇乜特別,而且因為佢大粒左所以覺得自己食左好多豬肉.
雞包仔冇乜餡,味道一般,皮比較厚.
最後牛肉球,我諗係最好食o個樣,都幾大粒,同埋個喼汁真係有喼汁味o既.
呢個moment就出事喇...正當我諗住可以食完抖一抖飲多兩杯茶o既時候,大人示意佢腳邊有隻掙扎緊o既大小強
我即刻催佢快d走,雖然小強反左肚但唔代表佢唔會反返個身o係度四圍走 勁驚
出去埋單時同個疑似店長講o個度有小強,佢只係好大聲咁叫入面o既店員去睇下,彷彿唔信定唔覺得有問題亦冇唔好意思
雖然食肆有小強都唔係新鮮事,眼不見為淨,不過佢地處理手法有問題,所以我就絕對唔會再黎幫襯

原本打算去稻香打邊爐,點知原來呢排做緊一蚊雞,超多人食小菜,等打邊爐可能一兩粒鐘之後先有枱
醒起呢度有間西餐,細細地,就決定黎試一試
晚飯高峰時間,竟然仲有兩張4人枱吉出黎
只有一位外籍女店員,疑似老闆娘?
唔想諗咁多,就叫set dinner算個香草麵包有少少乾身,不過唔算難食蘑菇湯好濃好香o既菇味,但個湯又出奇地好水,唔會好似平時飲o個d咁傑因為我唔飲酒,所以要左個蘋果汁
大人就懶有情調要左杯紅酒,不過佢就話都只係好普通o既紅酒,冇乜特別主菜方面大人要西冷扒
外觀就唔錯喇,食落去呢...有筋,每一啖都有趙返一陣先吞得落去
落order時冇問過要幾多成熟,我地都冇為意
大人o既評語係唔好食見到佢個扒咁細,以為我倨risotto都會係細份量,點知...
多到好似個山仔咁,d飯煮得好o岩口味,因為粒粒都熟哂,或者正宗risotto唔係咁,但口味呢d野好主觀,同正唔正宗完全冇關係
雞肉就一般,不過都去哂皮,所以食得好輕鬆,菇都有好多
食得哂不過勁飽~~是日甜品係chocolate mousse,賣相唔係太好睇
但食落去d朱古力濃到癲左,係超濃郁o既朱古力味!!
呢個都可算係成晚最鐘意o既一樣野