I-thai (沙田)

係沙田搵食，除非你知窿路，如果唔係都係mall food。

沙田新城市廣場間間餐廳唔係貴到死就要要排餐先有得食，見到呢間野竟然冇人等位就食。兩人叫左兩個lunch set，一個泰式肉碎炒烏冬、一個豆腐炒雜菜，套餐連青檸梳打同例湯賣大概$50份，係新城市算係平。可惜食物既質素只符合茶餐廳level，如果要俾咁貴去食d咁少肉既烏冬，冇咩味既豆腐炒菜(一D泰國味道都冇!)，我寧願俾三十零蚊食個茶記ABC餐!

意粉 360 (沙田)

為左慶祝本人第360個食評，所以就搵左呢間餐廳。原來此店乃意粉屋集團成員....呀

唔好以為佢間野細細地，d野都幾貴! 冇午餐俾你揀，全部a la carte! 兩個人叫左一個有蘑菇既意粉(個名都唔記得)、煙三文魚pizza，咁就每人食左$70! 貴! 仲要唔好食! 個蘑菇意粉賣相唔差，但係味道就冇特別，仲有拌碟既蒜蓉飽係韌既! 另外個pizza，完全唔覺得有味道...係咁易有少少煙三文魚既鹹味....而且賣相好港式，pizza hut好食過佢喇!

意屋粉集團既出品真係令我好失望，以後都唔好再叫我去意粉屋!

民園麵家 (中環)

睇食評話佢d牛腩同豬手好食，所以見到士丹頓街咁多chic既餐廳都堅持試下。又話特首都鐘意食佢既牛腩，但係本人當天所食既牛腩非常韌咬左好耐先食到...仲好黏牙 好彩佢既豬手都算幾好食，不過OL小姐食既話就失儀左D...民園對面都有一大排檔，佢既麵仲平一蚊($17)，下次有機會試試。

大利清湯腩 (灣仔)

阿so又推介埋d唔好食既野。
我地叫左一碗清湯腩，一碗咖哩腩麵。清湯腩個湯好普通，唔係話好清，冇乜味,只係一般味精湯，d牛又唔腍,又有渣，又唔入味，又冇蘿蔔。d麵有鹼水味,咖哩唔香，轉伊麵加２蚊，又貴，份量好少。總之就失望！

Brasserie Le Fauchon (中環)

一生起碼豪一次，豪梗係要食法國野。

今次價錢唔係問題，最緊要夠法。四道菜$298/位，可以係餐牌上選頭盤、湯、主菜及甜品，菜式選擇唔算多，最終選左︰

頭盤
香煎鵝肝(要加$80)、法國田螺、哈密瓜Parma Ham
鵝肝再不是咸牛肉的味道，但係好似食緊一舊肥膏咁; 田螺雖然沒有法國超市那種好吃，但總比一般餐的焗田螺好吃一點; 個哈密瓜parma ham既ham好少，呃錢!!!

湯
法式洋葱湯(唔夠濃喎)
龍蝦湯(ok喇)

主菜
紐西蘭肉眼扒(我覺得完全唔法)
法式鴨脾(普通西餐廳都做到喇)
無花果釀豬扒(沒有啥特別)

甜品
Cr鋗e Brulee (唔脆既?)
Crepe (做得太厚，係pancake，唔係crepes)
梳扶厘(好似食緊空氣，甜味同口感都冇)

侍應姐姐介紹︰紅酒Bel Arbor (Cabernet Sauvignon) $298 (初次試酒，扮高級、有品味!!)

舖仔細細，環境唔算太靜，細房入面d人講野仲好鬼大聲，令人覺得唔夠高級。餐廳大多都是本地人光顧，而且餐牌只有中文及英文，法國餐廳竟然冇法文，唔似樣喎! 侍應又全部都係本地人，似乎經驗又唔係好夠，冇左個種好高級既感覺。可能食正宗法國菜真係要成$500/位先至夠法，港式法國菜都唔係我想要既!