某次去完中環睇戲，當然要搵d新野試下。

係中環soho區，梗係要賣d老外都會食既野，咁非burger莫屬。呢間野好近蘭桂坊，老外去蒲前都要醫肚打底。佢舖仔細細，全部都係高腳椅，OL著高跟鞋好似唔係咁方便坐!

兩個人叫左一個魚飽同手打牛肉漢堡+薯條同汽水，牛肉堡係招牌菜，所以肉汁都幾夠，唔失禮。個魚飽就冇咩特別，但係以咁既價錢同size，我覺得佢抵過麥記囉。

其實我已經好耐之前去食，到左今天佢仲生存到，係中環黎講，已經係成功!

係中環上完堂， 近近地係食個平平地既晚飯!

佢呢間野其實係主打食米線，但係個日唔知點解覺得好鬼飽，所以求其叫一個勁麻甩既豬骨湯泡飯+蒜蓉雲吞，兩人Share。一心以為個豬骨泡飯可以食到豬骨髓(有飲筒啜個隻)，點知佢骨髓冇之餘，肉都唔多，結果好似食豬骨「湯」飯! 不過個雲呑d蒜味幾濃，辣辣地幾惹味攞返少少分咁喇。

不過佢收得早，10pm已經要打烊，中環OT族就唔好去喇!

我地係除夕專登揀人地去搵位倒數既時候去食糖水，所以都係等左一陣就有位!

之前睇肥仔食神介紹佢用雞蛋殼裝雞蛋布甸有創意，所以就點左一盒六隻($58)試下。肥仔果然冇介紹錯，d雞蛋布甸真係好有雞蛋味，口感綿滑，好耐冇食過咁好味既甜品!! 不過$58得六隻真係貴左d! 另外叫左一個話要等10-15分鐘既藍苺梳乎厘，點知等左一陣就有得食。梳乎厘一如概往，而且又勁細杯，一陣風就食完，成$40一杯實在太貴!!!!!!

去年大除夕為左要食每年一度既火煱宴，所以就聽朋友介紹呢間日式shabu shabu專門店。

之前睇食評都知佢價錢唔平，因為佢主打係日本入口新鮮材料，所以都預左多d錢找數。三個人總共叫左兩個鍋︰

鹿兒島A4和牛SET(HK$350)︰一碟雪花和牛大約有6片(好少...)，老實講其實冇咩特別，冇我期望入口即溶既感覺，有少少失望。
黑豚鍋SET(HK$280) : 黑豚肉都算幾腍滑，但係都係個句 - 唔夠喉嚨

為左開多一個免費既湯底，叫左一份(HK$80)廣島蠔(一份兩隻)。隻蠔真係幾大，但係烚完之後就細隻左好多，不過都算幾鮮味。

每個SET都配上一份蔬菜拼盤，有高麗菜、金菇、冬菇(2隻)同類似唐蒿既菜，仲可以揀要飯定稻烏冬。個烏冬雖只係得一小撮，但係真係好彈牙，正!

湯底方面，我地試哂佢幾種湯底︰壽喜燒 - 味濃，好重日本醬油味道，最合配牛肉; 立魚湯低 - 魚味濃，啱烚菜; 木魚清湯 - 清得得甜，百搭之選。

此店乃有線前娛樂台男主持(好勁日文o個個)所開，佢自己親serve客，仲得閒問下d客好唔好食同夠唔夠(又叫人試下佢d串燒、餃子)，而家佢店舖設計似足日本小居酒屋圍埋一齊食野，真係幾日本feel既。不過埋單$792/3人，但係都唔算好飽，食正宗日本菜係有代價既!

p.s. 仲有每人係要收購20枝豆費，太貴喇!

呢日朋友係澳洲返來，就來呢間野度幫佢洗下塵。
我地叫左一個沙爹螺肉，一個雲吞雞，一個啫啫雜菌煲同一個南瓜炒飯。
個沙爹螺肉似係ｄ蒟蒻造的，唔係太似螺肉，沙爹味唔係太濃。個雲吞雞就幾好食，個湯清得來唔算冇味，仲有好多隻菜肉雲吞添。個啫啫煲都唔錯的，熱辣辣，食得多ｄ假肉都要食下ｄ真齋既。至於個南瓜沙飯都幾大幾足料，食到飽晒。
呢度ｄ阿姐服務態度唔錯，都算坐得舒服，但ｄ冷氣都幾勁下。

由於近排洗得太多錢，所以唯有cheap cheap地食碗麵就算。我地叫左一碗牛柏葉麵同一碗菜肉雲吞米。
碗牛柏葉麵真係有好多牛柏葉，但佢要成25蚊又合理ge，佢ｄ麵又冇乜鹼水味，都唔錯。碗米由於係最後一碗，所以特別多，ｄ菜肉雲吞好大粒，皮又薄，好味！
呢間野原來8點半就收，都幾早，但係夠鐘都仲有好多客入來，佢地又來者不拒喎。有人仲用電話落單，話搭緊車要五分鐘之後入去食，認真巴閉。

本來係來呢度食焗飯的，但點知冇開，就試下呢間印度野。
我地一坐得就有脆薄餅食，點ｄ薄荷汁幾好味。朋友話呢ｄ野好難整架喎，但我地唔駛一分鐘就食晒。
我地叫左一個咖哩魚同一個masala羊肉。由於我唔係好食得辣所以幾佢少辣，但點知係走辣，對食得辣的朋友真係唔好意思。佢呢個set就包一碗蘿蔔湯，都幾好味的，有咖哩，有飯，有naan，食完都飽到上喉嚨，仲加左錢飲賣飛佛mango lassi。本來要加我25蚊的，但老細見我地飲兩杯就減到２０蚊，食飯都有價講，唔錯。
呢度入夜有好多印度鄉里來食，又可以睇bollywood mv，環境都幾好。

又到同人慶生的時間，由於有人唔得閒食晚飯，咁就同佢tea一tea啦。
朋友想食呢間野好耐啦，我地叫左一個tea set同一個puff。個tea set都幾豐富，有４鹹４甜點。甜點首先有朱古力mousse，好香又唔甜，有少少似雪糕；跟住有個cake係baileys味既，超好味，但如果ｄbaileys再勁ｄ會更好味；一個朱古力mousse蛋糕都ok，另外有個vanilla puff都好食。鹹點方面有兩個係ham pastry，一個三文魚，一個係好似鵪鶉蛋，都唔錯的。
至於另叫的puff裡面有自製的vanilla雪糕，好好味呀！絕對唔係買個ｄ咁味。
茶方面叫左一個vanilla味既紅茶，但唔夠vanilla味，仲有一個marco polo茶同一杯latte，個杯都幾靚。
呢度既裝修好似法國咁，但法國一定冇呢度咁多人同咁嘈，除左paris間amelie cafe之外。佢連個廁所都係寫法文既，不過好彩有公仔解釋！總之呢一餐大家都食得好滿意！

好耐冇來西環，真係變左好多，以前係好local的地方，而家竟然變左好似soho咁，有好多鬼出沒。
呢日我地來左呢間野度慶生，佢對住個有青馬大橋景的海，呢ｄ先叫心曠神怡。我地叫左一個凱撒雞沙律，一個橄欖鯷魚+吞拿魚細pizza，一個火腿白pizza，同一個蕃茄意粉。個凱撒雞沙律配自製沙律汁，都幾清新。兩個pizza都好薄好脆，但ｄ橄欖鯷魚太鹹，好彩叫左一半。個白pizza其實係白汁底，整得好香好好味，個意粉又俾你落好多芝士，正。
呢度環境同個view一流，但ｄ枱櫈好鬼高，兼且係只包一杯水飲，逼你叫野飲。ｄwaiters好nice好有心機咁介紹野食，個老細又成日撩人講野，叫我地深入虎穴搵男人喎，又話自己唔結婚，勁搞笑！最後仲屈到佢請主角食tiramisu，睇其他食評先知佢係法國人，但佢ｄ口音一ｄ都唔法喎！

食完pizza之後，個口乾到痺，即走過隔離小甜谷度食野。本來係想試下北海道牛奶乜乜ｇｅ，但驚佢口渴就唯有食ｄ有水既甜品。我地叫左一個楊枝甘露同一個榴槤楊枝甘露，仲有一個乳酪。其實呢三個甜品都普通啦，特別係個楊枝甘露真係同出面冇乜分別，我唔食榴槤都試左一啖榴槤都ｏｋ既，唔算太大陣味，至於個乳酪就一般啦，普通乳酪味。都唔係好知呢間野點解咁出名，可能係因為谷祖琳啦。