呢間野係我地中環搵食第一炮。原本係去鐵行里間越南野的，但條街又黑又污糟，都係唔去住，呢間米線就光猛得多。
佢比一般雲南米多好多配料揀。原本係諗住食牛肝菌的，但咁夜賣晒，咁就揀黑木耳，海龍（即係好長的海草），腩肉同肉筋條（條形貢丸）。ｄ黑木耳好爽脆，海龍又好特別，腩肉都幾香，可惜數量較少，肉筋條就麻麻地啦。我地揀的湯米線都配豆漿，係中環咁的價錢算好抵食。

我地有次行經呢度見到呢間野竟然係米芝蓮星級，但佢又唔算貴喎，趁我地一大班人一齊慶生，就來呢度試下啦。
呢間野ｄ菜式都唔係一般京川滬餐廳見到的，所以凡係特別的都叫。我地叫的頭盤有糯米蓮耦，呢味菜好花功夫，唔係好多地方有得食。初頭我地見到佢以為係叉燒，乜我地有叫叉燒咩？咁見到一碟好似叉燒的物體，就自然以為佢係鹹的，點知係甜架喎，仲幾sticky，係一味算清的菜。
第二碟頭盤係萬年青。佢整到好似一座山咁，個樣唔錯，但味道就普通啦，都幾清的，但冇碟蓮藕咁特別。
第三碟頭盤係炸響鈴，我估係腐皮個ｄ，但佢炸到又脆又薄，好味呀！但有人話肥囉。
咁主菜我地叫左一鍋雲吞雞。個湯都幾清甜，ｄ雲吞都好食，ｄ雞煲過湯就鞋ｄ架啦。
第二味主菜係蒸雙臭，真係好鬼臭呀！搞到我地個個將碟野推來推去，務求唔好係我個位前面，佢直情臭到隔離枱都冇呢碟係咩來架，咁臭既？咁食落呢，就一ｄ都唔臭喎，好似食台灣個ｄ蒸臭豆腐咁，仲有少少辣味添。至於個ｄ菜呢，我就冇食到，因為友人食到面容扭曲，都應該幾難食下。
第三味主菜係東坡肉，蔡瀾就一定ｌｉｋｅ，因為差不多全係肥豬肉，仲滴埋豬油，如果唔係有個餅夾下都幾油膩！
最後到甜品啦，就係最正常的豆沙鍋餅，個皮都幾香下，但係就唔係好似其他餐廳個ｄ咁熱到辣口。
呢間野都幾多人幫趁下，ｄ服務態度都算ｏｋ的，但大部分人都係講普通話，應該都係北方人，但最令我印象深刻都係個ｄ蒸雙臭！

呢次係我第一次來東門，真係乜鬼都有得賣，仲好鬼死平，但ｄ質素係點就冇人知了。
我地由日頭行到夜晚，都唔知食乜好，最後見到呢間野幾層高，幾富麗堂皇就試下啦。
我地叫左一碟佢推介的填鴨二食（一半片皮，一半跟西芹炒，味道都唔錯，仲送蝦片），仲有一碟炸鱔（老外叫的，好鬼好味，食落唔算油，有蜜糖味，又好鬆化，但一舊成１５蚊，都唔平），浸娃娃菜（清清地，但唔夠腍）同炒水魚（又係老外要試，都幾辣下，都係我第一次食呢隻肉，有ｄ膠質）。
呢間野唔算太就腳，而且價錢比較貴，所以唔算太多人，但環境真係幾好，好乾淨，連廁所得好乾淨。

本來係諗住去北角食sham，點知間野無啦啦閂門，唯有搭車落銅鑼灣搵食。
呢間野個老細係個fd既舊同學，個人都幾cool。咁人地係老細，又咁鬼忙就係咁，佢係銅鑼灣ｄ咁貴租的地方做得住，都有番咁上下。
我地叫左兩個二人餐。有咖哩角（都辣架，要趁熱食，唔係會腍），有薄餅（ｏｋ啦，冇加味），有香飯（之前係佐敦食過，非常特別），有tandoori grill（雞同香腸，重慶食過），有咖哩齋（最辣呢味），有咖哩羊（中辣），有咖哩雞（最唔辣呢樣，重椰汁味），仲叫左賣飛佛mango lassi！
食左咁多野都係７０零蚊，係銅鑼灣食咁多野，呢度真算平！

其實一直都想食呢間野架啦，佢裝修咁得意，蔡瀾又介紹過，趁呢日又返母校，就一齊試下啦。
一開來waiter就俾左菊花茶我地飲。我地叫左一個蟠龍豆，一個羊肉餃子，同一個駱駝肉炒飯。個蟠龍豆係好長好長的豆角，加埋ｄ辣椒洋蔥一齊炒，辣辣地咁，可惜太多油，唔係都幾好味。個羊肉餃子就好大陣羊味，但食羊冇羊味就唔係食羊啦。個駱駝肉炒飯聽落好特別，駱駝肉我都係第一次食，有少少似牛展，但係又係鬼咁多油，好似返左大陸食野咁,咁鬼得咁多大陸人。最後我地追加左個杏仁羊奶凍，佢又香又滑，好味到極呀！又係一種令人感動的味道。

呢日考完公開試，大家都勁down，因為有好多唔識，咁唯有去食番餐好野補數啦。我地為左應節就食法國野。咁法國野通常都好貴既，平個ｄ又似茶餐廳，睇到呢度都幾好評就試下啦。
我地叫左set lunch，一個鹹crepe，一個甜crepe同cidre。個鹹crepe一個叫marco polo，好似咖哩雞咁，但仲有ｄ芝士同青紅椒同沙律，唔好睇佢好似好細個，其實都不知幾飽滯。另一個我都唔記得叫乜名，佢的內容有磨菇洋蔥同煙肉，都幾好味，可惜呢兩個crepe都唔知點解有陣燶燶地既味，可能係佢的特色掛。
個甜crepe一個係caramel and apple，另一個係朱古力，個caramel整得好好味呀！至於cidre方面就一個dry兩個sweet，sweet真係似汽水，而dry就似一般酒。最特別係佢用碗來裝既。
呢度既staff都係外國人，個姐姐一入來就同我地講法文，可惜自己太down反應唔切，不過佢ｄ英文都幾勁，冇口音，ｄ廚師個樣都好法，另一waiter就似北非人。呢度既客大部分係外國人，有好多法國人，又有日本人，當然都有附近返工的人。呢度最唔舒服就係張凳，因為真係好高呀！

之前朋友請食mille feuilles同macaron，今次來到間舖度試下其他野。原來間舖係咁細既，仲冇乜位坐，有ｄ失望，但ｄ店員個個都好親切。
我地叫左一個creme brulee同一個朱古力蛋糕，個creme brulee簡直係我一生中食過最好的creme brulee呀！好香蛋味又好滑，好感動呀！個朱古力蛋糕就好香朱古力味，好濃，但其實我本人對朱古力都係麻麻，chocolate lover就應該鍾意既。
呢度唯一唔好就係冇得坐，要坐係出面，環境要扣少少分。但佢的出品真係搞到我次次行經呢度都想食。

呢度無啦啦有間茶餐廳，咁巴士站附近都有好多司機食既。
原來呢度以前係有西餐的，如果而家仲有就好了。我地叫左ｄ普通野：煙肉煎蛋飯，本來以為係加ｄ煙肉落ｄ蛋度煎，原來係各有各上，冇乜驚喜。另外仲叫左個菜心斑塊，都幾多送下，落足料。呢個餐係跟湯既，但ｄ湯比較稀，冇七姊妹道ｄ茶記好味，但都有ｄ明星食，例如許冠英。

同法國朋友去玩，為左應景，就食下法國菜，但大部分法國菜都好貴，呢間bistro都算平，原來來自馬賽的朋友都知道呢間野，仲話佢個名係法國南部一種酒，係玩沙地滾球個陣飲既，又學到野了。
我地叫左一個鴨胸沙律同一個魚。個魚都幾滑，有香草味，唔錯，個鴨胸沙律都幾清新。除左野食之外，我地仲叫左杯pastis。佢其實係茴香酒，有成４０度，不過梗係溝好多水啦，唔係飲到暈低。佢的味道太勁了，有ｄ飲唔慣，都係飲番紅白酒啤酒cocktail好d。
呢間野舖仔細細，都幾多客，大部分都係法國人，連waiter都係講法文，真係好似去左法國咁。

呢日係最後一堂，亦係謝師宴，梗係要食得好ｄ啦。初頭係諗住去東寶既，但係個邊環境麻麻，又驚miss坐得迫，所以都係去酒樓。我地的律師同學係呢間酒樓的熟客，所以ｄ伙記都招呼周到，俾ｄ好野益我地。
我地叫左個龍蝦餐，先來前菜，有雞絲粉皮（我的最愛，我最鍾意佢ｄ涼拌汁加左wasabi），有牛展（都ｏｋ），有雞腳(miss唔食），有燒豬（都ｏｋ）。跟住到主菜，有龍蝦伊麵（個個都食到舔舔脷，尤其是miss)，有片皮鴨（下面墊左baguette，啱晒miss)，有海鮮卷（但冇海鮮），有瑤柱甫，有蒸魚，有燒雞，有炒螺片，有魚翅（想環保ｄ都唔得，個餐包既），有炒飯，仲有生果盤。其實應該仲有幾味菜架，但係菜式太多，恕難盡錄啦，大家食完一味都話oh no，仲有呀？
雖然呢間野比較吊腳，又係大酒店附近，去廁所又行得遠，但ｄ野的確好味，呢餐又有人包底，又食又拎，所以大家都好盡興。