8-2-2011

記得 Elements 夏麵館喺 Openrice 勁多喊面, 但手拉麵又好好食 (http://www.openrice.com/restaurant/commentdetail.htm?commentid=2111149), 是日到銅記食 dinner 但無乜頭緒, 不如試試皇室堡分店吧. 2 人約 8:00pm 嚟到係要等位, 不過等的時間都唔算長, 玩了幾 round Fruit Ninja 就有位了.

涼拌海蜇 ($48)*: 底部墊了大量青瓜絲, 刨得幼如 capellini , 食落清爽; 海蜇就極爽脆, 不過我覺得味道太淡了, 麻油嚴重唔夠喎. 不過平日唔太食海蜇的朋友又似乎幾喜歡, 話幾 refreshing 云云...

夏味燻蛋 ($18 each, 兩隻起)*: 蛋白夠滑亦夠「煙燻」, 蛋黃就勁溏心, 質地黏糯, 食落「煙燻」及蛋味都好香, 正 比 Elements 店做得更好, 值得一試.

蔥油開洋拌麵 ($28)*: 記得 Elements 店的係「蔥油開洋」+ 湯麵, 完全唔知點撈, 可幸呢度係一碗走湯的麵 + 蔥油蝦米分開上, 咁樣「正常」得多! 麵條無 Elements 店的咁滑, 不過仍然爽中帶煙韌, 拌勻香濃的蔥油及香口的蝦米, 整體仍然好好食, 好此道的絕對值得試試. (不過旁邊的一碗湯 (木耳蛋花湯?) 就好鹹, 相我都費事影了...)

鮮肉小籠包 ($24)*: 湯汁算鮮甜, 份量就略嫌太少; 肉餡鮮味 ok, 質地就較粗糙; 皮唔算薄, 不過食落煙煙韌韌, 熱辣辣的唔衰得去邊的. 整體當然同「鼎」字派的同類出品 (http://www.openrice.com/restaurant/commentdetail.htm?commentid=1920942) 無得比, 不過我覺得比樓上的所謂「金牌」貨色 (http://www.openrice.com/restaurant/commentdetail.htm?commentid=2115175) 好, 都可以一試的.

蒸銀絲卷 ($18)*: 朋友去到邊都會叫一籠銀絲卷「驗證」「絲」唔「絲」, 不過呢度的賣相「千絲萬縷」, 佢應該都收貨吧? 質地鬆軟, 食落微甜帶麵粉香, 蘸埋煉奶又熱辣辣, 其實都幾難唔好食?

高力豆沙 ($22)*: 熱辣辣, 蛋白鬆泡, 不過豆沙餡味道怪怪的, 好似澀澀哋? 質地則又乾又 "clay", 第一次食高力豆沙要自行走豆沙

連加一埋單每人 $100 有找, 銅記嚟講唔貴了, 食物又不錯, 值得試試的.

仍然唔明點解連皇室堡呢間都喊多過笑, 更唔明點解金牌小龍比佢更多笑面...

*更多資料: http://www.xiamianguan.com/menu.html

8-2-2011

前一晚的 shabu-shabu 仲未落格 , lunch 粥粉麵飯乜都唔想食, 嚟到呢間 cafe 試試. 對幾款 set lunch 無興趣, 結果只散叫了咖啡及三文治.

先嚟熱 caffe latte ($20), 賣相勁似「已落了 espresso 的 latte macchiato」, 齋飲唔澀, 不過實在太苦了, 落糖飲易入口得多! 咖啡味則幾香, 奶味唔突出不過好滑, 飲完好舒服, 都不錯.

主食叫了 club sandwich (好似 $45): 原來只係加了火腿及芝士的 BLT... 火腿及芝士都極薄, 食唔出咩味 , bacon 就似係「烚熟」又無「煎」過的痕跡, 不過麵包輕輕烘過, 蕃茄及生菜都算新鮮, 沙律醬份量剛好, 加上即叫即整, 都叫 ok 的; 中間仲有一堆薯片, 食落辣辣哋, 似係「熱浪」喎!

呢度最吸引絕對係環境, 雖然裝修似酒吧多 d, 不過都幾好坐, 仲有上網電腦供應, 下午無聊的話喺度 kill time 應該都不錯.

埋單 $65, 可以一試.

7-2-2011

放了幾日農曆年假都無食過茶餐廳, 是日奶茶 / 公仔麵癮終於爆發 , lunch 立即搵間茶記搞掂. 叫了有炸雞全翼雞肉腸出前一丁 ("default" 係拉麵, 轉出前一丁要加 $3) 的其中一款常餐 ($30), 跟一杯飲品.

飲品叫了凍奶茶 (凍飲加 $2): 色水好「奶」, 飲落唔算滑, 可幸唔會太甜或太多奶, 茶味夠, 亦夠晒多碎濕夠晒凍, 收貨了.

炸雞全翼 + 雞肉腸出前一丁: 雞全翼炸得透, 雞肉幾嚡 / 乾 / 老, 雞皮就十分薄脆, 但可惜兩隻都浸了落 MSG 湯裡, 食得一隻又顧唔掂另一隻, 結果還是逃不過「軟皮」的命運 出前一丁淥得過腍 (不過可幸未到「發水」/「入口即溶」的地步...), 唔覺麻油味 (...! ), 亦索得太多 MSG 湯底, 食落較鹹, 幾掃興的; 雞肉腸就係「廚師」, 不過食落成陣酸澀味, lur 都 lur 唔切.

放低 $35, 食飽但唔滿意, 兔年第一個工作天都要喊了 -- 都怪自己忽然發晒神經咁想食公仔麵吧.

6-2-2011

晚飯後勁想食朱古力蛋糕, 見時間尚早, 近近哋捉了朋友到樓下 b 仔坐吓.

睇勻成個餅櫃都唔見喺 IFC 店食過的 Opera (http://www.openrice.com/restaurant/commentdetail.htm?commentid=2079719) 及以前又一城店的 tartelette au chocolat (http://www.openrice.com/restaurant/commentdetail.htm?commentid=1926918), 結果近乎無得揀的情況下, 揀了 Chloé (好似 $32): 由 hazelnut, chocolate, feuilletine 及 sponge cake 組成, 拮落質地乾乾鬆鬆的, 食落亦又乾又有點似 "rubber", hazelnut 味淡, 朱古力味就更淡, 乜咁似隔了兩晚夜? 餅底本應脆卜卜, 事實上就明顯唔係啦, 食落只覺「硬」, 整體係算得上難食, 真箇嗚呼哀哉!

朋友買了 Marion (好似都係 $32): 由 nougatine, caramel custard 及 puff pastry 組成, 酥皮帶脆, 唔鬆化, 食落亦近乎無味; 中間的 caramel custard 就更「經典」, 質地似 clay, 食落就係完全無味, 合埋眼食的話, 你話係「真」clay 我都信. 絕對係金玉其外的一件餅, 極力反推介.

亦試了少少朋友的 hot chocolate (好似 $36), 少甜, 朱古力味 ok, 比前一晚喺 Classified 飲到的所謂 "Vero" 朱古力 (http://www.openrice.com/restaurant/commentdetail.htm?commentid=2147495) 好少少, 不過質地都係稀了 d. 比起 Starbucks 的同類出品 (無錯, 我討厭 Starbucks 的咖啡, 不過 Starbucks 的熱朱古力我間中都會買的), 呢個更遜一籌, 真係

唔滿意, 每人 $50 埋單儼如倒錢落海, 都怪自己太信「牌子」嘢了 後會無期!

6-2-2011

咁多年都未食過北京道 1 號的火間土, 是日 early lunch 卻見到佢開了分店喺利舞臺, 就試試吧. 2 人如常各自叫了澱粉質主食, 再 share 幾款食物, 整體印象唔差, 不過好好食就一定唔係了:-

日式蒜汁凍豆腐 ($38): 賣相勁中式, 味道亦然, 醬汁幾鹹, 帶點蒜味, 少少酸, 味道勁似走辣版「蒜泥白肉」的醬油 豆腐凍凍的, 食落滑, 不過都幾似「百福」, 哈哈; 面頭的炸蒜片脆卜卜, 不過帶點苦味, 唔太喜歡.

牛舌串燒 (每串 $15): 幾濕, 不過燒得幾香, 食落亦爽身豐潤, 幾好食, 好在叫了兩串.

生蠔味噌風味燒 ($58): 醬油及焗至金黃色的「味噌」落得幾重手, 食落幾香, 不過又有點過鹹; 一隻殼竟有兩隻蠔肉 , size 不大, 不過幾鮮甜 juicy, 咁嘅價錢嚟講算不錯了; 配上濃味味噌, 都幾好食.

銀鱈魚西京燒 ($69): 賣相樣衰, 不過食落甜甜哋, 魚肉預期中的滑溜及油香四溢, 就咁食已幾好食, 不過都幾膩的, 蘸點酸多過甜的蛋黃醬同吃吧.

主食就係辣魚子忌廉醬冷烏冬 ($88): 明太子睇得見卻食唔到辣及鹹味, 而「忌廉醬」就係菇味強勁的 cream sauce, 配 pasta 效果絕對會比烏冬好得多 配料就有仲有磨菇 (!) 及勁多飛魚籽, 拌勻醬汁及質地煙韌的烏冬同吃, 味道唔差, 但實在怪怪哋, 唔識欣賞.

朋友就(又)食蔥吞拿魚腩飯 (「中」size $58), 吞拿魚腩茸無喱味道, 而且一舊舊, 機攪的? 蔥就太碎濕濕又落得太少了吧, 拌勻成碗飯都無蔥味 不過呢碗丼 $60 有找, 睇嚟要求又唔應該太高?

食物一般, 環境就幾乾淨好坐, 招呼亦有求必應及有禮貌 (帶位嗰個悔氣 waiter 除外), 配套都 ok 吧.

連加一再 85 折 (星期日及假期每人食滿 $150 的優惠) 埋單每人約 $160, a la carte 嚟講唔係特別貴, 不過應該試過就算了.

5-2-2011

晚飯 (http://www.openrice.com/restaurant/commentdetail.htm?commentid=2147495) 專程走到去大坑, 其實係為了之後可以試試呢間新開不久, 又「鐵定初三啟市」的咖啡店, 事關食友 HK Epicurus 實在寫得太吸引了.

先來朋友的 caffe latte (好似 $25): 旁邊有一塊 chocolate almond cookie, 少甜, 朱古力味香濃, almond 片味道唔突出, 不過夠晒脆口, 不錯; 而咖啡面頭奶泡畫了好 "sharp" 的樹葉圖案 latte art , 質地綿密輕柔, 下面的咖啡好熱, 聞落好香, 飲 (唔使落糖的) 落好濃, 好醇, 唔澀, 亦無「酸」aftertaste, 正! 雖然自己較喜歡銅記 18 Grams 的同類出品 (http://www.openrice.com/restaurant/commentdetail.htm?commentid=2103271), 但 so far 呢杯絕對係大坑最好的 caffe latte, 值得試試.

自己就叫了 flat white (好似都係 $25): 呢杯面頭無 latte art, 奶泡就比 caffe latte 的更幼更綿滑, 飲落奶味亦較重, 不過咖啡味仍然十分香濃, 唔苦又唔澀又唔酸, 正 比起 18 Grams 的同類出品, 我更喜歡呢個, 絕對值得試試; 旁邊的 cookie 就係 chocolate chip, 朱古力味一樣香濃, chocolate chips 又唔會太甜, 正

咖啡勁對口味, 配套亦好, 店員們勁友善好客, 環境「mou 街」卻十分舒服, 幾有歐洲小鎮的 "roadside cafe" feel, 感覺良好.

每人放低 $25, 會再來飲咖啡的.

5-2-2011

一直對呢度的上環總 (?) 店幾有興趣, 後來見佢的分店又中環又灣仔又西貢, 愈開愈多 , 是日終於嚟到大坑店試試. 2 人叫了一人一飲品, 另 share 食 salad 及 pizza 各一, 不過整體印象一般而已:-

先飲杯 Watermelon agua fresca* ($38): 由 watermelon juice, 少量 lime juice 及 soda 溝成, 飲落係有汽的, 幾多渣 (新鮮西瓜肉), 跟住有少少酸味, 係幾醒胃, 不過其實味道都有少少怪...

朋友飲 Hot chocolate by Vero* (regular $35), 賣相如茶記「熱華田」, 聞落幾香, 飲落算滑, 朱古力味 ok, 不過太稀了吧 唔算太差的一杯朱古力, 不過佢又放了人哋 Vero (http://www.openrice.com/restaurant/commentdetail.htm?commentid=1972359) 個名上檯, 以 "Vero" 嚟講就唔收貨了.

沙律叫了 grilled organic chicken salad* ($82): dressing 係 mustard seed vinaigrette? 份量剛好, 味道酸香, 配上夠新鮮的 mesclun (?), 幾清新的; 丁方狀 chicken breast 就唔似 grill 過, 不過食落腍身又唔乾嚡, 作為 chicken breast 都不錯了; 而最好食就係 bacon bits 及 avocado, 前者脆卜卜鹹鹹香香, 後者就爽身得來滑溜, 味道香濃, 好此道的絕對會喜歡.

Pizza 叫了 "Italian" (好似 $135): 餅底薄身, 脆口中少少煙韌, 帶麵粉香, 幾喜歡咁樣的 pizza crust 配料就以 tomato, mozzarella 及 pesto 為主, 不過食落係好酸嗆的罐頭 tomato puree 味, pesto 無乜味但又超級油淋淋, 餡料還是前一晚喺 Grappa's 食的 Margarita 較對口味.

食至 7-8 成飽, 不過既然有咖啡下場, 呢度地方又唔太好坐, 還是每人放低約 $160 走人好了.

*更多資料: http://www.classifiedfoodshops.com.hk/index.php?page=eat-drink

3-2-2011

其實我對 Cova 一般, 但印象中佢 d gelato (http://www.openrice.com/restaurant/commentdetail.htm?commentid=1920950) 及咖啡 (http://www.openrice.com/restaurant/commentdetail.htm?commentid=1981724) 不錯, 所以一直 keep 住俾機會佢, 是日要搵個地方邊飲咖啡邊等夠鐘食開年飯, 嚟到世貿分店坐吓.

叫了杯 caffe latte ($50) 堂飲... 面頭奶泡幾多亦幾密, 但其實好鬆散, 齋飲係超熱, 唔澀, 少少苦, 但咖啡味及奶味亦好淡, 飲完又嚡口嚡脷, 真係 咖啡師都真係幾無心機, 不過明嘅, 有邊個會想大年初一開工?

唔滿意, 呢杯咁嘅嘢收 $50 仲要收加一, 新年流流都要喊, 真箇嗚呼哀哉.

1-2-2011

以前返過一段時間金鐘, 呢間開業多年的泰國餐廳卻一次都未幫襯過; 而是日捉了朋友來食「團年飯」, 純粹因為自己忽然想食炸軟殼蟹, 睇了食友 FL 的食評又好似幾吸引.

先飲杯 Lychee Ginger (non-alcoholic 版 $45): 由 lychee honey, lychee soda 及 ginger juice etc 溝成, 飲落係有汽的, 荔枝味唔「人工」, 少少酸, 薑汁的辛辣就係 "burp" 的時候最突出, 哈哈.

朋友飲 Thai Sugar Cane (non-alcoholic 版 $45), 由 sugar cane, mint, lemongrass etc 溝成, 飲落的確好勁 lemongrass 味, 幾甜, aftertaste 亦如朋友所講「似 bubble gum」, 感覺得意, 但味道其實怪怪哋, 唔喜歡.

炸軟殼蟹 ($98): 為佢而來, 懶理佢是否「天下間極肥之物」了 粉漿薄, 炸得脆口, 食落亦好好「肉」/ 膏, 就咁食都幾香, 不過炸得太油膩了; 旁邊的魚露汁就又酸又鹹又 "fishy", 味道豐富, 蘸軟殼蟹亦可減低油膩感, 幾喜歡.

沙爹串燒 (雞, 牛, 豬) ($72): 三款肉都醃得入味 (香茅味好勁), 不過就以雞肉最好食, 嫩腍又多汁 牛肉都不錯, 質地軟腍, 牛味亦比預期濃; 豬肉就較粗嚡; 沙爹汁花生味幾香, 亦幾濃椰汁味, 唔辣, 幾甜, 都幾啱口味. 做得不錯的串燒, 值得試試的.

Roti ($22 一份): 本來只叫了一客嚟送咖喱 (詳見下文), 不過呢度做得十分鬆化, 酥油味香, 就咁食都好好食, 最後係要追加一客.

大虎蝦黃咖喱 ($168): 大家作為受辣「幼稚園生」/「小學生」, 咖喱當然選最小辣的「黃」, 不過呢個咖喱汁比預期稀, 食落唔算香濃, 反而幾辣 虎蝦好好肉, 賣相靚, 不過「炭」/「燶」味實在太勁, 質地亦唔算爽實, 配咖喱汁同吃會較好, 不過既然咖喱汁都麻麻, 可想而知有幾「唔太好食」; 亦不得不提呢隻蝦幾多膏, 不過 d 膏都幾苦的...

食到 8 成飽, 但見甜品款式唔少, 仲好似幾吸引, 又叫了香蕉布甸伴雪糕 ($48) 試試: 布甸熱熱的, 質地及味道都似「勁 moist 版」香蕉蛋糕多 d, 蕉味香濃, 仲有黏稠又好甜的 toffee sauce, 粒粒焦糖 crunch 及碟上如「水塘」的 vanilla sauce, 食落甜得嚟香, 而且係我喜歡的 "caramel" 味, 正 配上雪糕一冰一熱, 最後仍然清碟.

食物有好有唔好, 環境就好好, 裝修得有點似酒店的 coffee shop / buffet 餐廳 店員們有禮貌亦有求必應, 招呼亦好.

連加一埋單每人 $286, 比預期仲要貴 d, 喺 PP 嚟講叫 "standard', 但我覺得唔太抵食, 試過就算了.

30-1-2011

睇了壹仔的飲食專欄介紹呢間新店, 幾有興趣, 是日有時間又過嚟試試. 星期日夜晚大部分紅磡食肆都人頭湧湧, 7:xx pm 入到嚟呢度卻空無一人.

叫了鴨胸牛肝野菌汁撈哈哈通心粉 ($25): 鴨胸係來貨, 食落幾嚡亦有點韌, 可幸唔會太鹹;「牛肝野菌汁」色水有點似「過稀」日式咖喱汁 / poutine 醬汁, 賣相麻麻, 不過味道出奇地香濃, 質地幼滑, 配上煙韌彈口的坑紋通粉, 又幾好食喎 其他配料仲有紅蘿蔔絲, 椰菜絲及紫菜, 前兩者無味, 不過質地爽脆新鮮, 印象還好. 味道絕對比賣相好的一碗撈通粉, 只售 $25 一碗 (要係撈通粉 + 單餸), 仲包一杯熱飲 (是日叫了熱利賓納, 唔使評吧? ), 認真平, 值得一試的.

另亦叫了一碟香辣牛柏葉 ($18)做小食: 係凍食的, 牛柏葉淥得十分爽脆, 唔會有梳打粉味, 配上酸酸哋, 夠晒香又幾辣的辣椒醬汁, 食唔停口!

埋單 $43, 小試牛刀食物幾有驚喜, 有機會再來的. 下次叫凍食的撈麵!

P.S. 原來呢度屬「私房窩」(http://www.openrice.com/restaurant/commentdetail.htm?commentid=2028773) 集團旗下, 唔通碟牛柏葉係打邊爐料?