蝗蟲同學 等級4 | 關注 留言給此食家 |
排序方法:
日期 笑臉 喊臉
編輯推介 餐廳總分
文章形式 | 地圖形式
2010-11-24
20-11-2010 由東涌折返市區懶得轉車, dinner 到九龍站碰碰運氣. Elements 食肆收費偏高, 不過喺丼店食個「非刺身」類的飯應該唔使破產吧, 就拎飛等位試試. 2 人叫了一人一 set, 再 share 一份小食及甜品, 食得幾滿意:- 燒玉子卷: 同魚一丁的煎蛋卷 (http://www.openrice.com/restaurant/commentdetail.htm?commentid=2126062) 一樣 style i.e. 唔係「玉子燒」, 而係捲埋一舊的「蛋皮」, 不過既然食落香甜軟熟, 中間仲有蛋汁,「玉子燒」又好「蛋卷」又好, 是但啦, 好食就得啦. 不過食食吓竟然食到柚子味 , 感覺上有點畫蛇添足 -- 還是我有幻覺? 廣島蠔釜飯: 天氣開始凍以來已好想食釜飯, 呢度有供應就當然要叫來試試. 蠔有 4 隻, 體積一般, 不過極為鮮甜多汁, 正! 飯底係日本米, 粒粒飽滿黏韌, 濕潤度剛好, 味道就滲滿蠔汁的鮮甜味, 比蠔本身仲正! 初初見個煲咁深, 仲擔心會嚴重食唔晒, 但唔覺唔覺啄吓啄吓, 最後成煲俾我食剩一啖咁多, 10 個滿足之餘亦飽到褲頭帶都爆. 旁邊仲有漬物及味噌湯, 不過既然前者我一向唔食, 後者又無乜特別, 唔講太多了. 朋友食吉列黑豚扒定食, 跟前菜, 白飯及味噌湯... 前菜係漬牛蒡, 食落十分爽脆, 酸到爆 (「醋底」味道仲有點魚露 feel...?), 但實在幾好食, 而且夠清新夠開胃, 最後好唔客氣地食晒成碗 亦試了吉列豬, 雖然無 Tonkichi (http://www.openrice.com/restaurant/commentdetail.htm?commentid=2113100) 炸得咁酥脆, 仲有少少油膩, 不過起碼無「甩皮甩骨」吧, 肉質則鬆化軟熟, 磨完芝麻再配上多酸少甜 tonkatsu 汁, 不錯喎 椰菜絲刨我夠幼細, 不過「出水」得太嚴重了吧, 搞到碟底濕溼溼, 好在有個架將吉列豬 "long" 起了 而旁邊供應的 "salad dressing" 就係 wasabi 汁, 食落又真係幾攻鼻, 配椰菜絲效果都不錯. 甜品揀了「日式千層蛋糕」: 我好鍾意食 mille crepe, 奈何香港好似好少地方有供應, 呢度有就當然要試試吧... 不過又好明顯係超市都有得買嗰隻急凍「北海道ミルクレープ」, 食落 crepe 皮幾乾又有點厚, cream 就竟然係嚡的 , 果然係急凍嘢. 忽然諗起ルエル・ドゥ・ドゥリエール西麻布店的原味ミルクレープ, 唔知幾時有機會再去回味一下? Mille crepe 以外食物不錯; 坐了 bar 檯, 不過 d 位幾闊落, 店員們亦有求必應又有禮貌, 配套亦好. 連加一埋單每人 $200 有找, 平就一定唔係, 但整體印象不錯, 我覺得唔算太貴, 值得一試的. 推介美食: 廣島蠔釜飯
評分: 味道 4 環境 3 服務 3 衛生 4 抵食 3
2010-11-17
14-11-2010 從 Openrice 的「最新餐廳」一欄見到九龍城開了呢間新店, 睇落仲好似糖水 / 小菜 / 粉麵乜都有供應, 是日捉了兩老晚飯嚟試試. 叫了 3 餸 1 飯 share 食, 另一人一碗糖水各自食, 好客的老闆 (?) 最後又不斷「畢」了多款糖水請我哋試食 結果當然食到超飽, 不過整體質素其實十分麻麻, 詳情如下:- 薑蔥花雕炒蝦: 中蝦係「原隻」煮, 連「鬚都」無「剃」 食落淡而無味, 不過肉質尚算爽身, 起碼都新鮮的; 碟底汁液呈水汪汪的橙紅色, 食落就係蝦膏/油 + 水的味道, 算不上惹味; d 蔥就幾老, 不過起碼食到「炒過」的味道, 叫幾香口吧. 蝦醬蒸頸肉: serve 時聞到輕輕的蝦醬味, 食落口就反而無, 奇怪? 豬頸肉賣相似肉片多 d , 以「肉片」來計質地就幾爽口, 不過作為「豬頸肉」就唔多掂了; 碟底有大量粉絲, 索滿油及少少蝦醬味的肉汁, 唔係唔好食, 但實在比較油膩, 淺嘗好了. 節瓜蝦米粉絲煲: 叫餸食飯點都要有菜吧, 諗住呢味會清淡及穩陣一點就叫嚟試試, 點知嚟了一鍋 "sizzling" 的 , 睇真 d 亦果然好多油, 食落就更加啦 蝦米較硬不過食落幾鹹香, 節瓜就軟軟的, 粉絲亦太腍身, 加埋索油豆卜, 算吧啦. 瑤柱蛋白炒飯: 上檯時已「立立令」, 飯粒食落夠熱但欠鑊氣, 而且實在炒得太油又較濕, 唔係好掂; 蛋白正正常常, 瑤柱就夠味的, 但咬落奇硬 呢碟炒飯絕對係浪費 quota 之作, 早知叫碗雲吞麵就算. 糖水揀了蓮子杏仁露: 杏仁露的確幾香天然杏仁味, 質地幾滑溜, 甜度亦剛好, 不過蓮子 (初時嚟錯了普通杏仁露, 蓮子係後來老闆補返俾我的) 有無硬 d 呀, 食落仲有苦味, 想點 試了少少阿媽 order 的山水豆腐花, 豆味叫有, 但質地嚡到呢, 咁樣拎出來見人? 阿爸就叫了蕃薯糖水, 不過佢喺我諗住試之前已經成碗「隊」晒, 應該都唔差吧. 而「試食」的就有芝麻糊及合桃露... 老闆好 proud 咁話前者係「新鮮磨」, 質地較「稀」係因為「無落豆粉水」etc, 但我食就只覺得芝麻味好淡, 而且唔夠甜 (太甜梗係唔得啦, 但芝麻糊唔甜點會好食?); 後者就同杏仁露異曲同工, ie 質地幾滑溜, 甜度剛好, 合桃味亦清香, 算比較好的一款. 呢度明明新開張不久, 環境卻有點殘舊, 而且唔知點解覺得好大陸 feel 老闆就十分熱情好客, 見你食完嘢仲會問你對食物的意見, 不過你答佢「炒飯比較油」, 佢又會話返你「炒飯要油先炒到0架」 又講埋 d 咩「其實小菜其次」, 因為佢哋「主打」的係糖水 (吓? 咁你開糖水鋪算啦!), 而家做埋小菜都係「徇眾要求」云云的「偉論」, 聽到哭笑不得之餘, 亦沒好氣再理佢了. 埋單每人約 $90, 雖然老闆 (?) 話齋,「小菜其次」, 但成餐飯基本上無一樣嘢係真正滿意的 (連佢引以為傲的「主打」糖水, 都輸福佬村道「地茂」糖水鋪幾條街!), 再來的興趣絕對係「零」. 後會無期! 推介美食: 你教我點推喇!?
評分: 味道 2 環境 2 服務 3 衛生 3 抵食 2
2010-11-14
11-11-2010 又係即興食的 dinner, 又係去到銅記 / 天后唔知食乜好, 今次就行近炮台山呢邊碰運氣. 而點解呢條街兩間 quasi-港式日本餐廳當中入了呢間, 純粹因為地方好似乾淨光猛一點. 2 人叫了店員推介的秋刀魚刺身 ($130 一條) 及 5 款熟食 share, 食到超飽, 整體印象亦唔差:- 鹽燒牛舌: 一串兩件, 幾厚身, 不過點解兩件大小不一得咁嚴重 食了細嗰件, 燒得熱辣乾身, 簡單以少少鹽及黑胡椒調味, 食落夠爽口, 而且又香又 juicy, 幾好食. 秋刀魚刺身: 擺成「怕羞草」狀, presentation 不錯. 諗住呢段時間秋刀魚應該會幾肥美 (還是 11 月已太遲?), 我哋呢條就偏瘦, 不過夠新鮮就係真的, 質地爽身, 魚味香濃, 蘸點有生薑茸及花穗 (?) 的酸汁同吃就更鮮甜又開胃, 都幾好食. 蟹肉燒飯糰: 外燒得金黃乾身, 食落幾脆, 不過又無預期中的「飯焦」香? 中間 d 飯就夠軟熟, 唔太濕又唔「糊」, 米香撲鼻, 還不錯; 蟹肉實實在在, 份量亦不少, 不過混得太多 herbs 了吧, 食落只有「芫茜」得很的味道, 可惜. 海膽蝦雜菜餅: 賣相「岩岩覃覃」, 可用「怪石嶙峋」來形容 「雜菜」以紅蘿蔔, 芋頭及南瓜為主, 天婦羅炸漿薄薄的, 炸得透徹, 食落脆而不油又清甜, 好食喎 蝦有點太乾又太老, 海膽就可有可無, 不過既然主角係「雜菜餅」, 是但啦 另奉上鹽及黑漆漆又呈一 pat pat jam 狀的海苔醬, 樣衰得很, 但其實好香紫菜味又帶點「海洋」feel, 配炸物同吃, 感覺無咁熱氣之餘, 味道亦清鮮不少, 正 每人分到兩大件, 初時都擔心食唔晒, 但最後當然又清了碟. 比起「震音」烏冬店每況愈下的雜菜餅塔 (http://www.openrice.com/restaurant/commentdetail.htm?commentid=2030718), 呢個好食得多, 值得試試. 雪泥黑豚鍋:「雪泥」應該係指面頭的蘿白茸? 不過磨成茸仍然食到渣 豚肉切得厚了一點, 肥 vs 瘦差不多 8:2, 但肥部分食落只覺一口油, 完全唔香, 瘦肉就硬柴無味, 拎去整 bacon 算啦 湯汁 (木魚-based?) 味道清淡, 而底部的蔬菜就因為湯汁唔得, 應腍的又唔腍 (特別係小棠菜及紹菜, 前者幾老, 後者食落則超爽口 ), 加加埋埋認真麻麻, 可以不試. 食到好飽, 正想埋單之際, 店方又送上兩 scoop 牛奶雪糕 雪糕質地黏滑濃稠, 奶味好重, 內仲有脆卜卜又香甜的 caramel crisps (米通來的?), 好食喎 連裝飾用的朱古力 sauce 亦夠香朱古力味, 幾驚喜的. 食物不錯, 地方亦乾淨光猛又闊落好坐; 店員有點 hard-sell, 不過會 e.g. 耐心「教」我哋食秋刀魚刺身配酸汁「可以更加帶出鮮味喎」(雖然「阿媽係女人」的道理又係人都知... ), 或提醒「黑豚鍋面頭有蘿白茸, 會比較特別 d」(雖然有幾特別, 我又諗唔通 ), 態度認真又「多謝」前「多謝」後, 服務值得一讚的. 連加一每人約 $210 埋單, 價錢比預期高少少, 不過其實都唔算太貴, 嚟開呢頭可以一試. 推介美食: 海膽蝦雜菜餅 (記得配海苔醬同吃!)
評分: 味道 4 環境 4 服務 4 衛生 4 抵食 4
2010-11-13
7-11-2010 星期日 dinner 又要自己搞掂, 朋友捱義氣陪我食, 仲帶路嚟到佢公司附近呢間佢話「幾好食」的泰 / 越 / 星馬 / 印尼食店 2 人叫了一人一飲品, 及 share 一碟菜, 一款肉, 半打 (揀了兩款) 沙爹串燒及一份咖喱, 再加一份蒜蓉包送咖喱, 整體幾滿意, 仲食到超飽:- 火龍果沙冰: 泰啤賣晒, 唯有飲 smoothie 吧, 而揀火龍果就純粹覺得應該會無咁甜 飲落比預期中甜了少少, 不過其實甜度可以接受的, 質地細滑, 火龍果味清香突出, 幾好飲 平日覺得火龍果較淡口, 火龍果打成的飲品都係第一次飲, 原來又不錯喎. 朋友飲龍眼冰, 試了少少亦覺得甜度剛好又夠凍, 滿意的. 串燒沙爹牛/ 雞: serve 時已聞到好香燒烤味 兩款肉都醃得好入味, lemongrass 味香, 食落少少甜又軟腍, 雞肉就直程係嫩滑的 牛肉的牛味亦唔輕, 配上少少辣, 幾甜又帶椰味的沙爹醬, 正! 比最近喺尖東沙爹名店 (http://www.openrice.com/restaurant/commentdetail.htm?commentid=2114577) 的, 呢度個沙爹汁無咁香濃, 但呢度 d 肉比嗰邊仲好食, 值得試試. 炭燒豬頸肉: 薄切得很, 食落乾身香口, 質地亦爽身, 不過我覺得有點乾得滯; 中間的醬汁就無試了, 唔知咩嚟? 蒜蓉炒貴妃苗: 本身勁鍾意食炒貴妃苗, 所以某程度上係為了呢碟菜而來 呢度的炒得熱辣辣, 獨有的「草青味」點到即止, 食落清爽嫩綠, 食唔停口! 小時候去「蕉葉」(現已全線執笠) 次次都會 order 馬拉盞炒貴妃苗又次次都食得好開心, 而家卻好似好多地方都唔供應呢隻菜苗, 係咪成本太高? 還是香港人唔鍾意食? 越式麵包咖喱雞: 本來以為係挖空麵包再「釀」入咖喱, 嚟到原來只係面頭蓋上酥皮, 乜咁似 Pizza Hut d「酥皮湯」 酥皮熱辣辣的又「千層」, 食落鬆脆酥化, 正 朋友比我更唔食得辣, 揀「越式」都係因為辣極有個譜 , 咖喱汁亦的確一 d 都唔辣, 不過仍然香濃又帶甜, 好食 雞件係配角, 但件件入味又嫩腍, 又不錯喎. 咖喱幾有驚喜, 結果追加一客蒜蓉包食咖喱汁 包身烘得外邊極脆, 中間就仍然軟熟, 本身的蒜蓉味較淡, 但 salted 牛油塗得夠晒多, 就咁食都已幾香, 蘸埋咖喱就當然無可能唔好食吧. 食物不錯, 配套亦好, 2 人有 4 人梳化卡位坐, 店員又友善有禮及有求必應, 印象很不錯. 連加一埋單每人約 $170, 唔平, 不過有時食泰菜唔係「辣」或「九龍城」就一定係好的, 呢度各方面都令人滿意, 值得試試. 推介美食: 串燒沙爹牛/ 雞,蒜蓉炒貴妃苗
評分: 味道 4 環境 4 服務 4 衛生 4 抵食 3
2010-11-11
6-11-2010 入得西貢行吓, 無理由唔食埋晚飯先走吧 尋找 Anthony's Catch 途中路經呢間 Anthony Kitchen, 見佢入面好多位, 門口的餐牌又中又西, 但又青口又羊架又生蠔, 價錢偏平, Openrice mobile 上的食評仲要不錯, 又無理由唔試吧. 由於想食完飯又坐 cafe / 食甜品, 2 人只 share 了三個 starter 及一個 main, 整體係幾滿意的:- 蒜片白酒煮法國藍青口 ($85; 屬是日 special, 餐牌無的): 藍青口煮得火喉剛好, 食落細緻嫩滑無沙又鮮甜, 酒香蒜香都剛好, 好食喎 不過唯一唔好就係勁細隻, 連老闆娘 (?) 見到都忍唔住講句「嘩, 今日 d 青口咁的骰呀?」 蒜蓉包 (好似 $10) 可加咖喱汁, 但我哋叫嚟純為送青口, 唔加了. 蒜蓉包的蒜味好少, 不過係烘得幾脆口的, 蘸上藍青口的白酒汁, 清碟當然唔難. 煎鵝肝 ($100): 望落油溼溼, 面頭仲有 1 開 2 的提子 , 坦白講賣相幾麻麻, 不過食落原來鵝肝煎得幾香脆, 入面則軟滑無筋, 味道就夠晒甘香, 配上清甜的提子, 又幾好食喎 不過始終「一舊油」的口感及味道, 食多兩啖其實好膩, 配旁邊的法包同吃好好多, 可惜旁邊呢塊唔脆啦. Grilled Australian lamb rack ($130): 落單時阿姐無問幾成熟 , 大家立即勁擔心兼 fingers crossed 起來, 切開兩件燒羊架卻發現一件差不多 rare, 一件就 medium-rare, 吸引到呢 食了 medium-rare 嗰件, 羊味 ok, 肉質就十分軟腍鮮嫩, 正 旁邊一兜醬汁不論味道及賣相都似 instant 咖喱汁 , 可以不理; 另外亦奉上 mint jelly 可減低飽膩-ness, 不過既然就咁食已好好食, 還是唔落太多了. 旁邊的 veggies (string beans, cherry tomatoes 及蕃薯) 亦燒過, 當中最喜歡蕃薯, 軟腍又清甜, 好食 環境新淨企理但帶點港式 / "cafe" feel, 而招呼就麻麻哋, 阿姐由頭到尾都擺出一副唔想理我哋的態度, serve 嘢食又「落檯有聲」, 幾篤眼篤鼻的, 不過食物不錯, 算啦. 每人放低約 $180, 咁嘅格局又估唔到食物不錯, 都值得試試的. 唔知中式煮法的味道又如果? 推介美食: grilled Australian lamb rack
評分: 味道 4 環境 3 服務 2 衛生 3 抵食 4
|