13-3-2011

大坑及天后以外, 原來西環串燒店選擇都不少, 上星期試了西寶城附近嗰間 (http://www.openrice.com/restaurant/commentdetail.htm?commentid=2154240) 覺得幾好食, 今次試試第二街呢間. 2 人劃了 10 幾款最常叫的燒物 share 食, 另一人一飲品; 整體我覺得唔難食, 不過真係太鹹, 食完亦口渴:-

先試試每檯一碟的醬料: 酸辣汁的確好酸又好辣, 沙爹醬就幾香, 不過稍鹹, 亦比酸辣仲辣, 嗒了半滴已辣到我飛街

牛脷: 一客分成兩串, 但牛舌竟然切到同「骰仔」一樣 size 食落都帶點鹹及羶香, 不過略嫌腍了少少, 亦偏乾身, 還是油潤一點的牛舌更啱口味.

豬頸肉: 肉本身已醃得超級鹹, 面頭仲要再捽咁多味粉 (係咪「七味粉」?), 食落則又乾又硬, 呢個超級難食!

芝士腸: 又無芝士, 不過夠脆皮, 食落亦微甜, 應該掃了蜜糖同燒吧; 不過將佢反轉, 又發覺燒得太燶, 幾掃興的.

汁燒牛柳串: 牛柳肉味一般, 醬汁就太鹹; 而 4 粒肉就有兩粒係超韌, 咬到牙骹軟.

蟶子皇: 賣相不錯, 食落爽脆, 有少少沙, 但調味重手到咁, 蟶子幾新鮮都無用啦, 食落好鹹喎

燒粟米: 一開二, 但大細超 燒得幾靚, 食落先有牛油的微鹹及香味, 跟住有粟米的爽脆及甜味, 正 比起上述幾款超鹹食物, 呢個就好得多!

蜜糖菠蘿: 新鮮菠蘿掃了蜜糖同燒, 酸酸甜甜又多汁, 雖然唔係 d 乜嘢特色食物, 不過都幾好食.

鮑魚: 已去腸, 件頭唔細, 食落幾彈牙, 鮮味亦 ok, 可以一試的, 雖然是日「時價」近 $30 一隻係幾貴, 同「果皮蒸」的廣 / 港式做法又無可能比較...

牛油焗雜菇: 面頭芝士當然唔會係靚貨, 不過都幾香口; 下面的雜菇以金菇及新鮮冬菇為主, 一樣焗得香, 不過都幾多水 , 而且稍鹹了少少, 可以更好.

蒜蓉包: 食過唔少「脆而不蒜」的燒蒜蓉包, 但呢度的就做到外鬆脆 + 內軟熟 + 蒜蓉牛油味好香, 正

雞中翼: 皮脆無油, 肉就嫩滑多汁, 不過又係「味粉太重手」的問題, 真係

飲品叫了雪梨無花果: order 紙上話係自家製的, 飲落帶少少酸澀 (來自雪梨?), 不過夠解渴, 唔太甜, 味道亦「住家」feel, 可惜咁細杯啦.

店內 ventilation 麻麻, 食到成頭 BBQ 味, 店員們就俾人好 snobbish 的感覺, 配套唔多掂...

埋單每人約 $140, 各方面都唔多滿意, 朋友就直程拍晒檯 , 應該唔會再來了.

12-3-2011

收工到中環食 lunch, 2 人喺 Soho 行了一轉無乜心水, 嚟到玉葉 (http://www.openrice.com/restaurant/commentdetail.htm?commentid=2120512) 附近卻見到呢間新店供應 set lunch, 仲好似有 crepes 食, 又上嚟試試. 本來想叫 3-course 及 2-course 各一份, 再散叫一份 crepe 做甜品, 不過店員又話是日無 crepes 供應, 唯有叫一人一份 3-course ($138)吧.

麵包係小型 baguette, 唔熱, 邊位脆口但有少少硬, 中間則幾軟熟, 食落就麵粉香強勁 牛油唔似係 salted, 但好香奶味, 不過實在凍了 d, 可惜.

Starter 揀了 marinated sardines with potato salad: 中間一 scoop 薯仔沙律, 再用漬 sardine fillets 圍邊, presentation 十分精緻 Sardine fillets 比預期中無咁鹹, 少少酸, 味道濃鮮 (其實亦可形容為「少少腥」, 視乎你鍾唔鍾意沙甸魚吧), olive oil 味亦香, 配上質地較粗糙, 但薯味香又帶點洋蔥香味的 potato salad 同吃, 開胃又惹味, 正

朋友的 starter 係 goat cheese salad with honey: 疑似 Antonio (http://www.openrice.com/restaurant/commentdetail.htm?commentid=2127834) 名物? Goat cheese 賣相不及 Antonio 的金黃, 食落則無咁鹹, 但羊味強勁, 質地極軟滑, 配上甜甜的蜜糖汁及墊底的脆卜卜多士, 我覺得比 Antonio's 的更好食 沙律菜就夠新鮮, 拌以酸香的 vinaigrette, 都不錯.

主食揀了 duck leg confit: 以前食過的 duck confit 都係無汁的「鹹」及「乾身」一類, 呢度的就有酸而不嗆的 tomato-based 醬汁, 不過淋了醬汁後層皮仍然薄脆, 鴨肉鬆化軟腍又 juicy, 好好食喎 旁邊的 mashed potatoes 質感細滑 (似 puree 多一點?), 薯味香又帶點牛油及奶味, 但食落又唔覺得飽膩, 正 仲有西蘭花, 紅蘿蔔 etc 的 veggies, 味道普通, 用嚟清清味蕾不錯的.

朋友食 Angus striploin: 叫了 medium rare, 切開的確 medium rare, 仲有唔少血水滲出 試了少少覺得唔算好腍, 但質地鬆化, 肉味香, 亦好香炭烤味, 好食喎

Dessert 揀了 floating island: 蛋白 "faak" 得輕巧, 面頭則灑了杏仁片增添 nut 氣及脆卜卜, 食落「一陣風」, 唔太甜, 配上充滿 vanilla seeds 又甜而不膩的 vanilla caramel sauce, 最後當然輕易清碟.

亦試了少少朋友的 dark chocolate mousse, 朱古力味夠香濃又夠 "dark", 唔太甜, 質地軟滑, 正

食物好, 配套亦好, 是日環境清靜舒服, 店員亦 nice 得很, 絕對係由頭滿意到尾的一餐 lunch.

連加一埋單每人約 $152, 絕對值得試試.

>> 本文另記載於 http://locusttunghok.blogspot.com/2011/03/entourage.html

10-3-2011

近來差不多逢星期四晚都會到港島東食 dinner, 睇了呢度食評好似不錯, 今次嚟到炮台山試試呢度的越式三文治. 2 人叫了兩份法包套餐 ($35; 跟一杯飲品) 及一份鵝肝醬法包 ($20) share 食, 整體雖然不及佐敦 (http://www.openrice.com/restaurant/commentdetail.htm?commentid=2056040) 同中環 (http://www.openrice.com/restaurant/commentdetail.htm?commentid=2048849) 嗰兩間, 不過都食得幾滿意的:-

原味法包配豬肉: 法包烘得熱辣鬆脆, 一咬即「剝落」, 結果食到成檯都係碎屑 豬肉係薄切腩肉, 肥比瘦多少少, 質地有點「啫喱糖」feel , 不過都幾滑溜; 其他配料有 standard 的漬紅蘿蔔絲, 青瓜絲, 洋蔥, 扎肉 etc, 最喜歡的亦繼續係漬紅蘿蔔絲, 清爽又酸酸甜甜, 實在開胃

黑麥芽法包配牛肉:「黑麥芽」法包一樣熱辣鬆脆及「剝落」, 牛肉掃上了燒汁, 質地有點似吉野家的又「一抽二 lung」, 不過食落肉味香, 醬汁亦惹味, 同酸爽蔬菜類配料一齊食, 比豬肉法包更好食.

鵝肝醬法包: 呢個就不及兩份 baguette sandwich 鬆脆; 鵝肝醬唔會係好靚的貨色可以理解, 不過份量又真係少咗 d, 結果只聞其香, 但未嚐其味, 可惜.

飲品跟了凍越式咖啡 (加 $10): 朋友試完「囧」咗 , 我就覺得呢杯接近「疑似芽莊」同類出品的味道 (即係點: http://www.openrice.com/restaurant/commentdetail.htm?commentid=2057195), 雖然仍然幾苦, 不過越式咖啡嚟講已唔算啃了.

龍眼冰 (好似加 $4) 朋友就話「ok 啦」, 不過輪到我試完「囧」咗, 因為實在好甜.

環境就比較「屈質」, 食完快閃好了.

每人 50 幾蚊埋單, 食物雖然未到「值得專程來試」的地步, 不過嚟講呢頭的話都值得一試的.

>> 更多相關分享 @ http://locusttunghok.blogspot.com/2011/03/banh-mi.html

10-3-2011

約朋友 J 食 lunch 由我拍板, 當然要搵個好坐一點的地方, 打電話問過得悉呢間人氣 buffet 店的 lunch 除了 semi-buffet 之外, 亦有「非 buffet」的 3-course set 供應, 就訂呢度試試吧. 大家都叫了 executive set, 有 starter, main, dessert 及 coffee / tea.

Waiter 先捧出一籃麵包俾我哋揀: 揀了蕃茄 foccacia 及 baguette, 不過後者好韌, 前者則超乾, 兩款都唔多掂喎...

Starter 揀了shrimp bisque: 飲落幾濃「蝦殼」的味道, 仲有大量爽口的蝦肉增添咬口, 不過有點太鹹, 質地亦略嫌稀了少少, 可以更好的.

無試朋友的 Caesar salad with seared scallops, 賣相不錯, 朋友亦話「幾好食」,「芝士味好香」etc, 應該都不錯吧.

Main 揀了 pan-fried tiger prawns with light XO sauce ($128): "light XO sauce" 似淡味版 lobster cream sauce 多一點? 蝦頭無嘢食, 不過蝦身肉質結實, 煎得香亦算鮮甜, 幾好食; 配角有薯仔, zucchini, 紅蘿蔔及我唔食的燈籠椒, 最喜歡薯仔, 又腍又香; 最唔掂就係 zucchini, 軟撻撻又濕溼溼

試了一件朋友的「7 成熟」roasted lamb loin with herb crust ($128):「7 成熟」應該係指 medium well done? 自己食唔慣咁熟的羊肉, 羊味亦似乎淡了 d, 不過的確 medium well done 的, 肉質軟熟, 帶點 mustard 的酸香, 都 ok 的.

Dessert of the day 係 coffee cheesecake? 食落幾有咖啡味及 cream cheese 味, 質地我就覺得「魚膠」咗少少; 而餅底就濕濕的又有點「泥」, 似足索了水的 cookie crumbs, 唔喜歡; 面頭塊朱古力味道就幾假, 而且太甜.

最後的熱咖啡聞落一般香, 質地有點稀, 供應的奶亦幾稀, 落埋糖飲仍覺苦澀, 麻麻哋.

食物 ok, 老牌酒店服務就當然好; 而環境就比預期中嘈得多, 不過既然呢度係 buffet 餐廳, lunch 又會供應 semi-buffet, d 人「黐出」咁轉又大大聲講嘢, 都唔係 d 咩出奇的事, 只怪自己估計錯誤吧.

埋單每人約 $140, 可以一試的.

多謝晒朋友專程趕到灣仔同我食呢餐飯, 下次不如我過中環?

>> 本文另記載於 http://locusttunghok.blogspot.com/2011/03/le-menu.html

9-3-2011

一直對呢度的流沙餃好有興趣, 但是日上到嚟先知原來 lunch hour 只供應 3 餸飯餐 ($40), 不過既來之則安之吧, 難得近 1:20pm 嚟到仲有大把位.

飯餐的 3 out of 6 款餸揀了南乳炆齋, 鹵水豆腐及咕嚕竹:-

南乳炆齋: 有雲耳, 豆卜, 紅蘿蔔, 銀杏 etc, 煮得腍身入味, 雖然南乳汁質地有點 gooey, 南乳味亦比預期淡, 不過係好「住家」的味道又幾好送飯, 清碟無難度的.

鹵水豆腐: 幾硬身, 食落稍嚡, 不過鹵得入味之餘又滿有豆香, 幾好食的.

咕嚕竹: 即咕嚕汁配炸過的千層腐皮, 食落唔脆, 不過亦唔會硬, 咕嚕汁的酸甜味平衡得宜, 效果不錯的; 其他配料仲有菠蘿, (罐頭)蜜桃及黃椒 ( ), 前兩者配咕嚕汁同吃好酸吓 , 後者就無食了.

亞麻籽糙米飯: 就咁食一啖其實幾有米香, 亦唔會太乾 / 濕; 份量就真係大了 d, 明明 3 樣餸都咁好送飯, 我都食唔晒 d 飯, 早知叫「少飯」啦.

例湯就係眉豆 + 佛手果 (?), 火喉十足, 味道清潤,「屋企」feel 得很, 正.

食物清淡住家得來味道又不錯, 環境衛生亦好; 而由於全程都近乎自助形式, 服務無得評了, 不過據聞呢度係聘用 auditorially challenged 人士做店員, 絕對值得支持的.

埋單 $40, 有機會夜晚再嚟試試吧 -- 好想食流沙餃 / 煎藕餅!

8-3-2011

繼續食灣仔茶記的常餐特餐乜餐物餐, 睇了大家的早餐食評, 今次搵到嚟譚臣道呢間. 叫了「全日供應」的特餐 ($27), 有麵一碗, 火腿奄列 + 牛油方包及飲品一杯.

熱奶茶色水不錯, 飲落茶味香, 唔澀, 質地滑, 不錯喎

多士 (轉多士加 $1) 係薄多士, 鹹牛油塗得夠亦烘得脆, 幾好食.

火腿奄列幾有蛋香, 但太熟了, 內外一樣嚡, 乜咁似走剩火腿的「全走」芙蓉蛋?

麵揀了鹵水雞翼 + 煎蛋 (雙併加 $2) 福麵: 鹵水雞翼雖然皮軟撻撻肉又腍得幾乎「入口即溶」, 但起碼浸得入味吧; 煎蛋係荷包蛋, 邊位微脆, 蛋黃就仍然流質, 用嚟蘸多士不錯; 福麵就淥得稍腍.

地方細, 座位其實幾迫夾, 不過又咁好彩俾我「攝」到角落的「面壁」位, 1 人坐 2 人位, 都算舒服了.

放低 $30, 早上喺度買奶茶應該不錯, 可惜呢度離公司稍遠啦.

7-3-2011

10 年唔掃一次街, 咖喱魚蛋更加從來唔會食, 是日卻忽然好想食咖喱魷魚 路過呢檔好多次, 亦一直聽聞呢度的咖喱魷魚幾出名, 是日收工就過嚟買了咖喱魷魚 ($7) 及咖喱東風螺 ($8) 各一串立食.

咖喱魷魚: 唔熱的? 一向對港式咖喱汁的印象係「得個辣字」, 所以無乜好感, 呢度的就調得唔係咁辣, 不過又香又濃厚, 不錯喎 魷魚係土魷, 無鹼水味, 質地極爽脆, 而且咖喱汁夠入味, 又幾好食喎.

咖喱東風螺: 乜咁大粒 食落亦爽口, 無常見的「擦膠」質地, 配上咖喱汁, 都幾好食.

呢度環境衛生當然唔會好咗去, 不過食兩串嘢啫, 食完個肚又無事, 是但啦.

相信會再來食咖喱魷魚的.

6-3-2011

下午喺澳門好似無停過咁食嘢 , 返到嚟還是食 light 一點吧. 睇了食友 elmotoro 關於呢度的食評及相片, 好似都不錯, 2 人就叮叮過來試試.

先叫支竹蔗茅根邊飲邊等食: 夠冰凍, 甜度低, 味道「住家」, 無投訴了.

蜜糖芝士腸: 又係無芝士, 但食落皮夠脆, 落了蜜糖又甜甜的, 其實幾難唔好食?

蒜鹽雞中翼: 燒得皮脆肉嫩,「蒜鹽」就似乎只係醃的過程落了少少, 不過醃得味道都不錯的.

蜜汁雞肝: 質地就比預期中無咁「粉」又爽得多, 食落則「膶」味甘香, 加埋蜜糖甜甜的, 幾好食.

鹽燒牛舌: 燒得少少韌, 不過食落豐潤鹹香, 有居酒屋水準喎.

燒生蠔: 唔算好肥美, 但實在鮮嫩多汁, 濃味蒜蓉及蔥亦無蓋過蠔的鮮甜味, 正

燒蟶子皇: 蟶子肉食落爽脆鮮甜唔乾身, 加埋蒜蓉及蔥就更香口, 比燒蠔仲正

燒雞泡魚乾: 稍嫌唔夠乾身, 食落甜多過鹹, 不過夠香的; 蘸點蛋黃醬就更開胃及惹味.

汁燒牛仔骨: 肉夠腍, 又黐住點油脂, 不過醬汁太鹹太濃了, 唔喜歡呢個.

燒粟米: 燒得香, 食落好爽, 亦好甜, 唔知係咪又落了蜜糖?

燒玉子: 食落蛋味係有, 不過太甜了, 質地就似 sponge cake 多 d, 整體印象怪怪哋.

蜜汁豬頸肉: 呢個 d 蜜糖就重手咗少少, 甜味蓋過了肉味 , 不過質地幾爽口, 都可以的.

蒜蓉焗雜菜: 有冬菇, 金菇及娃娃菜, 其中以娃娃菜最好食, 軟腍度剛好, 清甜到呢 金菇都不錯, 食落夠爽脆, 配蒜蓉就當然更惹味; 新鮮冬菇則普通.

蒜蓉 pita bread 加芝士: 少食 pita bread, BBQ 版更加未試過, 呢度的就做到脆卜卜, 食落似足 Carr's 牌餅乾 蒜蓉不少亦夠香, 而芝士就係仍然凍凍的 "Kraft", 早知唔加啦.

亦想講講每檯有一小碟的沙爹醬, 聞落好香, 食落少少辣, 味道濃郁惹味, 好喜歡 不過是日叫的肉類唔算多, 加上大部分食物已預先醃過 / 有醬汁 / 蜜糖, 結果呢碟沙爹醬係無乜用武之地, 可惜.

食物好, 小店 ventilation 亦做得不錯, 不過環境就好迫, 食完快閃好了.

埋單每人約 $130, 比上次喺大坑已食得幾滿意嗰間 (http://www.openrice.com/restaurant/commentdetail.htm?commentid=2143522) 更滿意, 價錢亦平一截, 絕對值得試試的.

6-3-2011

食完冷糕 (http://www.openrice.com/restaurant/commentdetail.htm?commentid=2154101) 需要飲杯嘢, 嚟到對面街市內新開不久的熟食中心搞掂. 行了一圈, 好似得呢檔有奶茶咖啡供應, 朋友就喺度買了兩杯奶茶 ($7.50) 大家飲.

熱奶茶: 原來係一 pot 茶 + 1/4 杯淡奶分開上, 仲奉上茶隔 而大家都斟了茶後, 發現我嗰杯的淡奶份量較多, 唯有交換嚟飲. 而無咁多奶呢杯飲落亦滑, 茶味香濃, 無澀味, 落半羹糖已好夠, 不錯喎.

亦試了少少朋友的油砂豬 ($6.50): 包身烘得透徹, 牛油及砂糖份量剛好, 食落又鬆脆又甜甜的, 仲有砂糖的「咯咯」聲, 正

可能新開不久的關係, 熟食中心環境可謂「超級勁爆乾淨」, 衛生比唔少香港的商場 food court 更好

埋單每人約 $11, 可以一試.

6-3-2011

唔屬於「冷糕」的年代, 認識呢款小食純粹因為睇了飲食雜誌的介紹, otherwise 真係聽都未聽過, 食亦更加未食過了... 但同朋友不約而同地對呢款糕餅好有興趣, 是次專程過嚟買了一件 ($5) 試試.

睇住店員將粉漿倒入蒸鑊, 幾分鐘後開蓋, 粉漿發大成糕, 店員就拎出嚟落砂糖, 花生及芝麻, 再切成一楷楷賣出街... 新鮮整起的冷糕當然熱辣辣, 食落如大蝗蟲所言, 外皮脆身, 中間則軟熟又有點濕潤, 有少少似馬拉糕, 不過餅身有少少鹹又有點「乸」喉, 係發粉落得太多? 配料則好甜, 作為「唔太甜魔」我覺得甜得有點過火, 加加埋埋唔算好喜歡, 不過係幾得意的.

$5 一件, 一試無妨.