之前知道牧羊喺屯門開已經勁開心，因為之前喺其他分店食通常都要勁等，所以比較難食到。今晚7點半左右拎飛，等左唔使一粒鐘就有位，入到去發覺環境裝修好文青feel，一排窗望出青山公路，好開揚，坐喺窗邊好舒服放鬆☺️ 好適合情侶約會嘅地方。 我哋total叫左四樣食物兩杯飲品： 1. 紅菜頭香芒葡萄藜麥沙律：每樣食材都好新鮮，醬汁應該係honey mustard，好fresh 食完好開胃。 2. 鮮忌廉野菌帆立貝意大利粉：個汁好香好滑，唔會太油膩，不過得3粒帆立貝好似少咗啲。 3. 灸燒荷蘭汁豬肉排：肉質彈牙好嫩滑，唔會乾柴，配埋個汁好完美！小食嚟講份量好足夠，$78 CP值好高👍 4. 法式蘋果撻配雲呢拿雪糕：甜品都出色，酥皮撻底唔會太油膩，配合雪糕一齊食好正！ 5. 飲品叫左梳打濃縮咖啡同埋蜜桃奶酪，前者幾特別，後者就一般般，之後未必會再叫，因價錢都略貴（$56一杯） 總括而言，牧羊少年呢間分店好值得推介👍👍 舒適嘅環境同埋食物嘅高質素已經值回票價！

今日約好朋友食lunch，佢話想試呢間韓式炸雞，咁我冇所謂就去呢間啦。 12:20入到去只有一枱客，唔使訂位十分方便，一入到餐廳個無敵海景view真正，v point餐廳個view係無得輸👍👍 講返食物，呢度有lunch set~78，不過朋友想食雞我地就散叫，想食辣又唔想有汁唯有揀「辣味烤雞」，份量都頗多（一隻全雞，切成十幾件）我地都夠食，所以只叫左呢樣同兩罐汽水。本人覺得呢個烤雞比較乾，一點肉汁都冇，又唔辣，waiter提議我點附送嘅醬，點知都唔覺辣，細問之下，佢地就比左個辣醬我地，點左好食好多。 比較果銅鑼灣4間嘅韓式炸雞之後，我覺得喺銅鑼灣最好味嘅炸雞係「總統戲院」附近果間，下次一定要帶朋友去😝😝

一家人為阿哥慶生，佢話想食日本菜，就上openrice搵下上水有咩好嘅日本菜啦，見到呢間好多好評，就黎呢度食啦😊星期六下午訂即晚8點嘅枱都訂到，不過waitress 話我地可能要等一陣先有枱，都明白嘅，我地一行十一人，冇可能要佢地hold咁多張枱比我地，點知7:30時餐廳打黎話有枱，早d食好過要等啦😝 打開餐牌，發覺都好多選擇，sashimi壽司炸物燒物甜品一應俱全，岩哂我地一家大小。今餐我同老公發版： - 兩個sashimi拼盤，魚生好新鮮，海膽勁鮮甜，劍魚油甘肥美，帶子鮮甜。 -兩個壽司拼盤，一個有中拖羅，牡丹蝦好新鮮彈牙，帶子壽司好厚肉。 -蟹子沙律，好一般，份量太少，冇同區築x果個咁抵食，唔值比$48食呢個沙律👎🏻 熟食： 金菇牛肉卷，好大條，切開一半會好d。 牛油焗帶子，都算幾香，帶子又夠大粒。 燒鯖魚，燒得幾好，唔會太乾，juicy😋 牛肉壽喜燒，牛肉一開始冇放哂入個鍋度，等你自己淥，自己調校生熟度👍👍 鰻魚炒飯，鰻魚都幾多下，好好味份量夠。 食食下又叫左一打蠔，半打清酒蒸半打燒，原來佢蒸同燒都係比個爐你自己玩，個人覺得有點麻煩，因d姐姐（waitress)放低就閃左去，完全冇教你點煮⋯問佢點樣先叫食得，佢答我話熟左就食得⋯係人都知熟左就食得啦，咁要燒幾耐蒸幾耐都講下掛⋯😬😬呢part覺得佢地服務有點亂黎🙄🙄 最後叫左甜品：雪糕紅豆哈密瓜，我地咁多人食都好夠，個哈密瓜好甜好好味。 整體呢間餐廳食物係好好，服務就過得去，你唔問佢地太多野，佢地都可以應付嘅😬😂😂

又出差工作啦，今次下午機飛去上海，慣性動作上機前都會去pizzaexpress食個lunch, 今次叫左一份焗雞翼同白汁大蝦意粉，加飲品青瓜lemonade 。 焗雞翼係第一次叫，外皮唔脆，一d都唔似焗出來嘅，好重香草味，味道一般，不推薦。 意粉係第二次食，同上次唔一樣，今次大廚加左好多dill, 個人唔太鍾意dill嘅味道，所以都覺得麻麻地，好彩落左芝士粉可以蓋過dill嘅味道。 飲品係今次最好嘅選擇，青瓜好refreshing！

每次想食泰國菜就會諗起小曼谷，因為我覺得香港最抵食嘅泰菜係佢，星期日夜晚9點去到都好多人排隊下（大約有20幾人）而我地都等左大約半個鐘，夏天黎講都幾難頂，不過今次算快架啦😬😬 今次我同老公叫左： -必點嘅生蝦，依然係咁好味，蝦夠凍夠彈牙，辣醬夠辣 -必點嘅冬蔭功，份量小左，不過都係咁足料咁好味 -柚子蝦沙律，唔夠辣 -飛天通菜，味道都係一般嘅好味 -試新野 炆牛尾，有好多菜同4件牛尾（兩大兩小）炆得夠淋，味道比較淡。 -飲品叫左西瓜冰，西瓜味一般，不過夠冰夠解渴 想食泰國菜嘅話一定要試下，真係大推👍👍👍

放工同老公想試新野，睇食評呢間拉麵店好似幾好咁，就黎試下啦😊大約8點半都幾多人等位，排左10分鐘左右就有位，不過要搭枱，肚餓冇計啦！ 我地叫左芝士辛辣濃湯拉麵，同埋辛辣塩湯拉麵同埋芝士明太子餃子。每款拉麵都可選擇配料（蔥&筍）同麵條嘅軟硬度，流心蛋就未必款款有，不過可以自己追加。 我嘅芝士辛辣拉麵湯底好好味又不會太油，流心蛋有點失望，係流心不過冇味道，唔會有滷水嘅味道，而老公就好滿意佢嘅塩湯拉麵，因為佢好怕油膩同埋滯嘅湯底，呢個清清地就岩哂佢口味，大讚👍👍呢度嘅湯底選擇夠多，適合唔同人嘅口味😝😊 芝士明太子餃子唔係太掂，芝士係可以拉絲，不過餃子本身嘅肉同皮都唔得，餃子又好細隻又油，唔推介👎🏻

上星期六同老公奶奶行完街，本來想去食火車壽司，點知勁多人，就去左附近嘅茶木，返工有時候都會去銅鑼灣果間食lunch，今次就試晚餐。 我叫左墨魚汁什菌花枝手工意大利麵，汁濃鮮味，麵嘅口感都好好，推介！ 奶奶叫嘅肉躁蠔仔泡飯都好好食，足料夠味夠大碗，奶奶都食得好開心😋😋 老公叫左簡單嘅肉躁沙朗牛排飯，肉躁唔太油，牛排就一般。 飲品叫左焦糖芋圓奶茶，芋圓好彈牙好好食。老公叫洛神花茶，小小甜，味道唔會太酸，可接受。甜品叫左招牌草莓吐司，吐司鬆化，草莓新鮮，keep到好好食😋😋 餐牌豐富左，多左好多選擇，不過好似加左價，主食多數都要$70以上，飲品$30幾，算中上價錢。

上星期五同班姊妹食完飯搵甜品食，喺銅鑼灣只諗到呢間，平時都有同同事去食午餐嘅，午餐食品幾好味又抵食，咁諗住甜品（主打）應該唔會太差。 我地叫左芝麻糊豆腐花，杏仁蛋白茶，楊枝甘露，同waffle, 我食嘅楊枝甘露一d都唔凍，有點暖暖地，十分奇怪，其他我冇食冇得comment...個waffle好似～$120，太貴了，不值得😬😬 題外話：30幾度嘅天氣，入到一間冇冷氣嘅舖頭係好難受，希望佢地快點維修好冷氣機。

星期五晚想同老公拍拖食飯，喺openrice 見到呢間餐廳評語不錯就試下啦，點知打電話去訂位，full哂要waiting，咁又係嘅，星期五都唔full即係未必好食啦，咁我地照等⋯好好彩上去即有位，帶位嘅waitress 好有禮貌，不錯😊 餐牌食物選擇都算多，有parma ham有意大利飯，亦有龍蝦鵝肝，當然都有牛扒同羊架嘅大路野，我同老公叫左個fusion意大利飯（煎帶子泡菜意大利飯），味道幾好，意大利飯煮得岩岩好，不太硬，略嫌泡菜太大塊，如果可以切細啲就會更好。我哋見到隔離枱嘅燒春雞幾靚仔，就叫左黎試下，點知食完意大利飯，等左好耐（大約20分鐘，order左半個鐘）燒春雞先上枱，燒春雞唔似平時嘅春雞，好大隻，仲要有成隻雞，好抵食，味道十分好，醃得好入味又唔會過咸，推介👍👍 甜品係呢間餐廳嘅主打，當然要試啦，我地叫左peach，不過冇想像咁似桃，味道又一般，冇主菜咁好味。 小插曲：服務可以再改善下，因食飯途中有一位waiter行過跌左d餐具，咁岩有把叉拮到我隻腳，點知佢好似冇野咁就咁行開，好冇禮貌🙄🙄 整體來說，推薦呢間餐廳，食物質素好，環境好

星期日同老公黎懷舊一番, 照舊叫生炸雞脾薯條加杯紅豆冰, 滿心期待, 點知雞脾一到, 見到唔係生炸就覺有點問題, 諗住算啦, 試下好唔好食再講... 食落一口油, 層炸粉又太厚, 完全唔同哂.
一問之下, 冰室阿姐話轉左廚房, 我真唔明白, 生炸雞脾係本店招牌, 換廚都應該要保持應有水準, 點解可以唔同哂?!?!