是日大哥放假，呀媽問佢夜晚想食咩，佢話食大家樂既焗豬扒飯，所以自然夜晚就唔煮飯啦...
呀哥就食大家樂，而我就食大家樂對面既五十嵐啦...
今次我要左血池地獄拉麵，要轉手打烏冬，飲凍柑桔檸蜜，呢個係跟餐送唔洗加錢...湯同烏冬+餸係分開裝...
蛋同青口我無食，不過隻青口都幾大隻...
蟹柳係一條切開兩小半，普普通通...
個4大塊肉，一開始睇以為係腩肉哈哈...點知原來係叉燒黎，甜甜地都幾好味
呢個湯真係笑左，都唔可以講話唔辣，但對於我黎講只係小辣，如果講到血池地獄就真係誇左d...
可能我要求太高啦 不過呢個湯除左小小辣之外，仲幾咸 下次都係唔好貪得意試新野@@

是日去開北江整野，就順便食埋野先返屋企，經過麗江，出奇地無人排隊，仲即刻有位，就入去坐低啦...
第一次食係食麻辣，但而家除左食譚仔之外，食其他鋪頭既米線就會食酸辣...
所以今次都想試下食酸辣，就叫左腩肉酸辣大辣同凍檸茶...腩肉幾大塊，不過食落去竟然係甜既，甜既真係第一次食到，不過都唔錯...
米線都幾大碗，份量幾多，米線硬度適中，唔太硬唔太淋，算ok...
湯底，一個字...酸，酸到蓋過晒辣味，只食得出小小辣...
一碗咁既米線只係普普通通，真係唔明點解可以成日咁多人係出面排隊等食佢...
唔洗等位可能都有下次，但如果要等咁耐，我寧願食唔差得過佢既川味...

是日大哥病左叫我陪佢去睇醫生跟住之後去食野，加埋大哥個朋友同我男朋友就變左4人行...
睇完醫生呀哥問食咩，因為佢頭先話想食粥，所以我就話去銀龍...
行到去頌富個間點知好多人，所以就轉左去天恩個間，岩岩相反，天恩個間無咩人，真係奇怪...睇黎睇去到最後我都係食米線，叫左個豬扒雲南米線，由頭到尾佢都無問過我要咩辣，
所以我以為得一種辣度，點知張單黎到寫住小辣，之後睇真d到餐牌先發覺原來有大辣同小辣選...
真係難聽d講句，問一句野洗死咩，不過好彩碗米線都唔錯...
豬扒好淋，好容易咬，幾好...
米線都好淋，份量都夠...
個湯底一開始睇落好清，但係將放係豬扒上面個堆野撈埋落去就好有味，
雖然唔夠辣，不過酸酸地清清地都唔錯

最後埋單$17x，某程度上都幾貴，一碗米線都要$4x，又唔算好特別...

是日同個好耐無見既朋友一齊去新北江，佢話覺得呢間ok，所以我又再次再戰呢間野啦...
由於上次雲吞既中伏，所以我今次決定試第二樣，試腩肉 酸辣小鍋米線大辣+腩肉:諗住試腩肉無死啦，點知都係中伏...腩肉有2大塊，無錯，的確係好大塊...
不過...一塊就好薄而且全瘦，而另一塊就好厚但係勁肥，肥到真係入唔到口...
不過個腩肉本身個味唔差，食左薄個塊覺得唔錯，而且d肉好淋好容易咬...
不過...如果可以切得細塊d同埋厚度既拿捏可以好d就好啦...
之但係...個米線仍然好味，夠大碗，湯底夠酸，開胃，所以都會有下次

是日同媽咪出街，又黎呢道食辣啦...叫左碗米線同媽咪share，再叫左小食同野飲...木耳絲酸辣大辣($27):次次黎都食雲吞，所以今次轉下，健康d食木耳絲，一黎到我同媽咪都嘩左一聲...
因為d木耳絲真係好多，加$5黎講咁多真係抵食，辣度同平時差唔多，都係咁過癮 炸春卷($20):同樣係抵食之選，入面好似係芋頭黎，而且個皮係越式春卷個隻，炸完熱辣辣即刻食，正 豆漿($7):普普通通，不過勝在唔會好甜

是日同男朋友去銀座打機，打機前當然要食返個下午茶先啦，所以又黎左呢道...
我叫左杯野飲同埋凍餅，而男朋友就叫左個生果盤...粒粒芒果爽($25):唔錯，今次既芒果幾甜，而且凍冰冰，簡直係我既解渴之選 芒果凍餅($16):一黎到已經失望，好細件，根本就係小朋友既份量，食落去更失望，除左d芒果肉...
個餅我都唔知食緊咩，得個凍字，唔知咩味

男朋友個生果盤都係細細盤，不過味道ok...

等左幾個月終於可以寫呢間鋪既食評啦
話說有一日同男朋友去新北江，次次都食川味所以今次想試下第二間...
見到呢間鋪好似幾ok，又係食雲南米線，簡直岩晒我...
個日無咩人所以唔洗等位...睇完個餐牌我決定叫酸辣小鍋米線大辣+雲吞同凍檸茶...
可能呢個時間無咩人所以野食都好快到...酸辣小鍋米線大辣+雲吞:一黎到熱辣辣，當然要試下個湯底先啦，味道唔可以話唔好，酸味就好出位啦...
不過...就唔係好覺有辣既存在對於鐘意辣既我當然有d不滿，不過好彩個米線夠淋連埋湯一齊食都唔錯...
但係個雲吞就離譜左d...細隻都唔緊要，最重要係個餡，食落口成pat野咁，好似d材料撈到溶溶爛爛咁再包
雖然個餸好唔掂，不過個主角係米線，間唔中清小小唔好食咁辣都ok既，而且米線份量都好足...
所以仍然俾笑臉

今日咁岩去新北江整d野，點知呀媽打黎叫我順便買埋打邊爐既野，所以我就打電話叫埋男朋友出黎...
諗住食完野先去買，所以又諗起呢間野啦，本身係想食早餐，點知遲左小小，所以唯有食好似早餐既常餐啦
同樣地叫左雞扒、腸仔煎蛋，不過今次係湯米線 雞扒大大塊，而且幫你切開左一舊舊，方便入口...
腸仔煎蛋都係普通，個米線份量都算多，而且幾淋，唔錯唔錯
男朋友就叫左吉列魚柳、煙肉煎蛋、湯意粉，魚柳出奇地好細塊，不過味道唔差...
但係男朋友就話d意粉太硬，所以食剩一半
不過相比起琴日食既意粉，我會更加鐘意湯米線

是日同大哥大嫂，表妹同埋男朋友同大哥個女去完冒險樂園玩之後，去左美心買野食
由於男朋友唔舒服唔食得，所以我自然就食埋佢個份，哈哈
最鐘意芒果既我就要左芒果撻同芒果六重奏啦，而表妹同大哥個女就要左hello kitty啫喱杯...芒果撻:撻底，中間有舊蛋糕仔，蛋糕仔上面有堆cream，跟住就係芒果，整到好似座山咁...
芒果好驚喜，又大舊，又甜，整體黎講好好，一定有下次芒果六重奏:由上面開始係芒果果肉，芒果味啫喱，牛奶奶凍，楊枝甘露布甸，芒果乾味布甸...
最後係芒果味cream...
芒果肉上面有一粒藍莓，我唔鐘意食所以無食，六層真係層層有驚喜，好似食緊出奇蛋咁
不過呢個杯既芒果肉有小小係酸既，而且第5層既芒果乾味都幾怪，而且比較硬身...
不過撈埋最底個層既cream就容易入口d，整體都算唔錯既

是日又同男朋友黎呢間抵食既店鋪解決我地既午餐...
今次黎多人左，坐落覺得迫迫地，不過本身個地方都唔大，就算啦
今次我叫左個百搭扒餐$33包埋杯野飲，凍飲+$2...
我要左雞扒，腸仔加煎蛋，要意粉，鮮茄汁，本身都有d驚驚地，驚叫完係普通既點薯條個d茄汁@@
一黎到見到咁鮮紅色，即刻唔洗諗就試左個汁睇下係米同我諗既一樣...食落去...咦，又唔係喎...
個味真係蕃茄個隻味黎，唔係茄汁，不過略嫌唔夠濃蕃茄味
雞扒、腸仔、煎蛋都係普普通通，不過意粉既份量就出奇地多，一個男仔都夠食
不過相反男朋友叫既意粉就差d，佢叫左個唔知咩芝士意粉，黎到係用個碗裝住，份量唔錯...
不過d意粉係散晒，可能要撈芝士所以咁掛，男朋友話味道唔錯，不過太濟，食左一半就食唔落...

下次一定會再黎試其他野食