五十嵐日本料理 (天水圍)

今日同大嫂同埋2個豆丁落街食野，本身想食大家樂，點知好爆好多人，所以就食五十嵐...
五十嵐一向俾我既印象都唔錯，點知今日真係中伏 平時黎都唔會叫壽司，除左同小朋友黎食，點知今日大嫂都想食壽司，就叫左好多...
我自已就要左2客三文魚壽司，因為本身食開三文魚刺身都覺得幾好...
黎到睇個樣都幾好，一夾起見到舊三文魚幾厚已經好興奮，因為好小可食壽司會切到咁厚俾你，
但係一食落口已經覺得中伏，三文魚無問題，問題在於舊飯，
完全唔知食緊咩，勁黏，唔講以為食緊醋味既漿糊筆
但係大嫂話佢食既火灸三文魚壽司無問題，不過佢一試個三文魚壽司都即刻變左臉 ...
食完真係會諗，做得日本料理，點解連舊最基本既壽司飯都整得唔好 雞扒手打烏冬($36+$6):
由於今次要同小朋友share，所以無叫辣，個雞扒ok，不過食得出好重豉油味...
手打烏冬仍然好好，夠煙靭 炸雞($18):絕對抵食，雖然有d好大舊有d好細舊，而且食落有小小粉地，不過都算係熱辣辣同脆 花枝丸($18):平時食開大大粒既，黎到呢道得細細粒，不過熱辣辣整起，而且細細粒易入口，都唔錯

雖然今次對壽司好失望，不過對其他都好滿意，所以都係俾笑面啦

甜心良品 (元朗)

是晚同3個朋友相約在此，雖然經常有經過呢道，但從未試過，今次係有2個朋友都推介呢道，所以試下...
店鋪一眼睇晒，覺得好細，或者會坐得比較迫，所以我地要求坐出面，不過夜晚好大風，不停咁食西北風...坐低望住張餐牌，真係唔知食咩好，太多花款，朋友推薦心太軟，但係我無興趣...
最後就選左個無可能會難食既班戟...水果同雪糕我都選左芒果 我個個係最快到，賣相真係幾靚，但食落認真麻麻...
班戟皮:初初以為係平時b仔涼粉、蛋糕店賣個d既班戟咁，點知完全唔同，佢既口感好似乾左既蛋皮咁
芒果粒:仍然係酸的，果然唔係當造
芒果味雪糕:最好味都係個雪糕，正正常常...

雖然今次試完覺得麻麻，但係佢其實仲有好多其他款式，有機會都會再試

芝脆雞 (天水圍)

今日聖誕節，兩個哥哥都帶晒佢地d女出街，所以我就係屋企同媽咪同男朋友同埋兩個舅父慶祝...
原本想叫pizza hut，上網點餐禁完先發覺速遞要等成3個鐘，真係呆左，如果自取就等1個鐘倒...
但係又唔想行咁遠，所以就諗住食近近地係樓下商場既芝脆雞，打電話問左，如果自取就等4-5個字，
送外賣就要1個半鐘，最後我同男朋友就落去買，因為唔想等咁耐
我地叫左個四至五人套餐($228)+蒜蓉包($28)
佢即刻整完拎出黎，我地即刻拎返屋企，估唔到已經得返微暖 啖啖肉pizza:麻麻地，味道係唔差，而且個pizza好厚，但係d料太少...炸雞(5件):1人1件岩岩好，味道拍得住kfc個d，皮脆肉嫩，讚 墨西哥辣肉醬焗飯:個醬唔錯，有牛肉粒，蘑菇，栗米粒，辣椒等...好似肉醬意粉個醬咁，
不過呢個食落去有小小辣，幾過癮，不過似乎同飯唔係好夾，如果有得轉意粉就好啦，一定好夾 菠菜龍脷柳焗飯:個汁好多同好重芝士味，龍脷柳都好大塊，抵食...蒜蓉包:一開始以為好似pizza hut個d咁成條過，點知唔係，一開始有d失望，不過食完即刻改觀...
脆，真係好脆，仲好有蒜蓉味 忌廉栗米湯:唔錯，連我呢個唔鐘意飲忌廉湯既人都覺得幾好味，不過男朋友就嫌太寡，得栗米...

譚仔雲南米線 (天水圍)

今日同朋友相約係新北江食野順便俾朱古力佢，冬天梗係想食米線，而且好耐無食譚仔...
雖然都覺得三哥既係好食d，不過咁凍又唔想出到咁遠，所以就俾多次呢間譚仔啦...今次係我第二次黎食呢間譚仔，仍然係叫左腩肉特辣，不過今次加埋炸醬...
碗野黎到，仍然係果個樣，所以都無咩期望...
米線:唔會太淋同太硬，岩岩好...
腩肉:算合格，味道ok，厚度都唔算太薄...
湯底:完全失敗...只有麻，麻到我無晒感覺，搞到都唔知食緊咩，辣只係feel到小小... 炸醬:最正常都係炸醬，同三哥既一樣味道，讚

總括黎講，應該無下次，除非新北江賣米線既都汁晒...

吉野家 (天水圍)

是日男朋友同朋友出左街，淨返自已一個，咁岩又要出元朗買野，所以落街醫飽個肚先...
原本想食麥當勞叔叔，不過諗起今日係星期日，所以應該好多人，就放棄左呢個念頭...
見到吉野家唔算滿座，所以就決定係呢道落腳 餃子雞肉羅宋湯烏冬($25.5):呢個價錢包埋野飲，我要左可樂，湯底唔錯，食到有洋蔥粒，紅蘿蔔粒，
薯仔粒同蕃茄粒，雖然唔算好濃味，不過都ok！餃子普通，係街都食到個d黎...雞肉煎得ok，
不過味道麻麻，真係得雞味...