今日係我嘅生日, 雖然LUNCH去牛摩食得超飽, DINNER點都要邊一邊.  打邊邊係我嘅最愛嘛! 上網見到小肥牛訂位有9折, 即時就BOOK位. 
但去到竟然無我RECORD喎. 職員就問係咪上網BOOK, 佢哋未睇喎. 總之就會做返9折比我, 佢哋好老實咁話.

我哋一家三口叫咗唔算多嘢 (LUNCH食得太飽, 都仲未落格)

蕃茄薯仔牛腩鍋--牛腩又韌,  無蕃茄味,  淡味到呢...(平時我打邊邊啲食材唔會點豉油, 但今次唔點唔得囉. ) 呢個湯底唔得,  早知叫清湯好過, 仲平啲添.
響鈴半份--淥3秒拎上嚟, 仲脆口架.
手打蝦丸半份--半份有6粒, 爽口彈牙夠鮮味, 正!
手打四寶丸--有鯪魚丸, 牛丸, 豬肉丸, 墨魚丸各3粒, 全部都夠彈牙, 好味!
鮮蝦雲吞--一份有8粒, 蝦與肉比例剛好, 好味道, 百厭仔食咗大半碟
冰鎮鮮牛肉--初初以為係滑牛, 原來只係一碟冰上面舖上牛肉薄片, (LUNCH食嘅牛摩好食過佢)
花生酸菜 $12.00
茶/醬油 $16.00 X 3
連加一
扣去食材9折優惠
埋單 $333.00

之前有朋友推介呢間位於新墟新開嘅魚湯店, 今日就嚟試下. 
我哋一家三口 11:30左右去到, 等了一陣, 店員便安排好座位給我們. 叫了兩碗招財四寶魚湯米線 $42.00 配--有紫菜﹑魚蛋2粒﹑墨汁墨魚丸2粒﹑魚腐2件﹑魚肉春卷2條, 好豐富啊! 首先當然要試下個銀鱈魚骨湯先啦, 入口清甜, 偏淡味, 唔似荃灣果啲咁重味, 配上滑滑嘅米線好夾啊! 紫菜有好多, 魚蛋OK啦, 唔係彈牙嘅. 魚腐同埋魚肉春卷一咬落去 好脆呀! 係外脆內軟, 正! 最掂竟然係墨汁墨魚丸, 唔好以為佢黑麻麻樣衰衰(百厭仔係咁形容, 唔肯食) 一咬落去非常有驚喜, 入口彈牙, 味道香濃, 超正! 另外一碗 鮮蝦雲吞拼牛肉片魚湯河粉 $36.00--鮮蝦雲吞有三粒,  味道唔錯, 牛肉片都OK, 只係有一塊頗韌. 我哋食咗一半, 店員才端上辣菜莆(可能啱啱整好呱) 原來加埋辣菜莆仲正, 連百厭仔都讚不絕口, 一路喊辣一路話正.埋單$120.00 見到隔離枱叫蝦多士, 個樣幾掂, 下次再嚟試

今日一行4大1細去新開嘅酒樓食小菜晚餐, 順道預祝中秋節.  可能新開啦, 都有好多優惠小菜套餐. 就算散叫都唔係太貴. 叫咗個孖寶餐-揀咗鮑魚雞煲+冬瓜盅 $168.00
鮑魚雞煲--有四隻鮑魚仔, 肉質爽口,  雞件夠入味. 冬瓜盅--湯頭清甜, 湯料亦豐足 半隻乳豬仔(4-6人)   $18.00  乳豬仔一啲都唔欺場, 附上廚剪一把, 要自己剪開, 如果可以斬件上就更好. 乳豬揸上手(剪開) 好熱, 辣手架.  入口皮脆肉嫩, 又唔太肥, 正! 另外散叫咗XO醬海鮮豆腐煲,  魚腐雜菜煲
XO醬海鮮豆腐煲--海鮮配料有蝦, 花枝片, 珊瑚蚌, 帶子, 香辣惹味 魚腐雜菜煲--魚湯鮮甜, 用嚟浸雜菜, 令到蔬菜都帶有鮮甜味, 魚腐味道唔錯. 茶位@$10.00 X 5  芥/酸菜 $20.00  另收加一服務費

埋單$420.00  

今日兩公婆落街食TEA. 見到TEA SET餐牌有我想食嘅炸髀薯條, 又有老公想食嘅西多士, 價錢又合理 (會員卡有88折) 咁就入去試喇 炸雞髀薯條--薯條炸得透又夠脆,  炸雞髀都夠入味, 熟透得嚟又唔會炸得太乾, (好怕食炸雞髀食到中間位唔熟) 西多士--中間搽嘅花生醬都唔少, 入口有少許脆, 加埋牛油糖漿一流, 好邪惡!
飲品叫了
一杯檸水--呢個正常 (如果呢個咁簡單都唔OK真是無言了)
一杯奶茶(多奶) --第一啖入口好濃嘅奶香, 但第二啖就覺得頗苦 (應該係茶膽問題)   平時我飲開奶茶(多奶)係唔會落糖嘅, 今次要落晒一包糖, 但都係有少少苦澀味. 埋單 $59.00 (會員卡88折) = $51.90

今日突然間好想食米線, 碼頭區唔係譚仔就係雲貴軒, 上星期食咗譚仔, 今次就嚟雲貴軒.
見到門口要等位攞飛, 但唔知點解我哋一入去話3位, 就即時有枱, 唔通門口果啲全部都等外賣?
牛展米線(豬骨湯)--牛展夠林唔韌, 米線林滑
鎮江排骨米線(豬骨湯)--鎮江排骨酸酸甜甜夠開胃, 食得出落了很多款香料醃製, 而且炆得夠林, 一咬骨肉分離. 豬頸肉撈紅薯粉--豬頸肉爽口又入味,  紅薯粉煙韌彈牙, 配上香濃麻醬, 掂! 飲品唔差, 奶茶夠滑, 入口無苦澀味. 但講最正都係熱朱古力, 入口濃濃嘅朱古力味, 百厭仔非常LIKE. 埋單$122.00

今日返晏, 一家三口又近近地去海趣坊搵食, 今次去稻香飲茶當brunch. 十一點左右去到, 等咗一陣就有位了!
見到呢個午市套餐幾抵 $128.00 有一碟炒粉麵飯+兩款小食+三款點心初頭都驚兩大一細會食唔晒架, 點知老公話佢包抵喎 (因為佢一開工就停唔到手, 要今晚先有得再食, 而家要食飽啲)
鴻圖窩伊麵--份量一啲都唔少, 我哋每人至少都食到兩個碗仔份量. 湯底味道鮮甜, 蟹肉份量都唔算少. 胡椒支竹豬肚湯--支竹豬肚嘅份量都唔少, 夠入味. 另有咸菜, 雲耳, 銀杏配料. 沙薑豬手--夠林又入味 魚皮餃拼西生菜--呢度嘅魚皮餃係韮菜餡的, 幾特別 燒賣皇--面頭有蝦一隻, 下面係豬肉, 味道ok啦! 金錢肚--辣辣地夠惹味 套餐價128.00+3位茶芥+加一服務費 埋單$163.50 散叫一定唔只呢個數, 抵!

今朝陪百厭仔食埋早餐先開工, 又係近近地喺海趣坊搵食. 見新開嘅桃園制作唔使等位, 仲有大把位任揀 (上星期仲要等位架) 就入去試下. 沙爹牛肉公仔麵+腸仔一條--沙爹牛肉夠林唔韌,  但沙爹味唔夠. 條腸仔好難食, 唔知點解質感好林又無味, 唔通烚熟而且烚得太耐? 煎雞扒米線+半焗流心蛋--煎雞扒好咸, 米線ok, 半焗流心蛋原來即係太陽蛋 最掂係飲品--奶茶濃滑 無苦澀味, 朱古力夠濃 埋單$60.00呢間嘅早餐唔算平, 味道亦一般, 唔會再嚟食早餐, 睇下有無機會試午/晚餐啦!

喺唔想煮又諗唔到食咩嘅情況下, 是旦近近地又嚟大快活

吉列豬扒拚炸蟹捧湯烏冬--湯烏冬湯底唔錯,  今次附帶嘅白蘿蔔大大舊但都夠林又入味. 但主角嘅吉列豬扒同埋炸蟹捧都係略嫌炸得太乾. 沙薑雞餐--有碟沙薑雞, 一碗白飯, 一盅例湯.  沙薑雞夠入味, 但可能佢長期keep warm焗住, (落單無耐就送上) 令到雞肉偏林, 口感唔得. 例湯偏淡無味 (無落味精??) 鐵板豬扒+珍寶腸餐 附加西炒飯--西炒飯夠乾身, 珍寶腸好大條, 切開流出芝士, 幾邪惡. 豬扒夠大件, 都夠林夠入味. 但食到較厚近骨位置唔熟, (豬肉要熟透嘛) 咪叫職員幫我整返熟囉.  諗緊佢係咪會叮返熟呢? 原來拎咗去走油, 拎返嚟嘅時候油立立, 即時唔開胃. (佢附送咗盅例湯當賠罪), 最後老公唔浪費清埋.

今日廿四孝爸媽陪百厭仔去睇多啦A夢大電影, 睇完百厭仔就話想去薩莉亞食PIZZA . 除了羊鞍外, 基本上全部都係百厭仔發板 意大利菜湯--試咗一羹, 酸酸甜甜幾開胃, 其餘百厭仔一個清晒. 辣味雞翼--少少辣 夠惹味 每次嚟必叫 香辣腸配薯角--唔辣嘅 普通芝士脆皮腸 反而欣賞佢嘅薯角 夠脆口 邦哥尼意粉--少少辣嘅蕃茄汁意粉 蜆肉都夠鮮 意粉軟硬適中. 香辣腸PIZZA--餅底鬆脆 燒羊鞍--呢個係老公食嘅, 我試咗少少覺得羶  佢話羊唔羶就唔好食. 埋單$157.00

今日老公叫我唔好買餸, 想去海皇試佢嘅粥底火鍋. 我本來想say no架. 間海皇啲冷氣又唔夠, 天時暑熱仲要打邊爐, 熱上加熱. 但老公盛意拳拳, 咁是旦啦, 去試下囉. 去到又係得小貓三四隻, 當然要搵個冷氣風口位啦! (但其實個個位都差不多, 都係唔夠冷氣囉) 叫咗一個肥牛海鮮鍋配白粥粥底 $70.00 一個雙份肥牛配南瓜粟米粥粥底 $68.00. 送即食麵一個/半客油條. 我哋每樣要一份. 惠顧兩份火鍋減$10.00 另加 凍豆漿一杯 $5.00 及 可樂一罐 $5.00 總數$138.00 肥牛海鮮鍋--有肥牛一碟, 蝦一隻, 青口兩隻, 斑片兩件. 另有三粒肉丸 (豬,牛,魚)  餃子一隻, 五色雜菜一碗 肥牛--超級肥囉 (合乎商品說明條例) 蝦--爽口 青口--ok 斑片--係斑片嚟嘅, 有咬口, 但頗腥 雙份肥牛鍋--肥牛兩碟,  三粒肉丸,  餃子一隻, 五色雜菜一碗 (生菜/娃娃菜/金菇/雲耳/南瓜/豆腐) 肥牛--當然又係超級肥囉 三粒肉丸--豬肉丸, 魚丸 正常, 都彈牙嘅, 但牛肉丸唔好食, 有啲類似咸酸菜嘅怪味  餃子有泡菜味 雜菜一碗--粟米/南瓜都幾甜, 其他無咩特別 由於實在太熱, 我哋採取一品鍋政策, 務求快啲食完, 快啲熄咗個熱上加熱嘅爐. 啲冷氣咁弱雞, 真係唔好再攪我了!