天悅海鮮酒家 (屯門)

今晚撇甩百厭仔, 兩公婆撐枱腳. 天氣涼咗就近近地行過天悅邊一邊.
去到6:45, 可能尚早, 得2-3枱客, 坐位任揀.
今日$118.00 任飲任食2小時15分鐘
熟架部嘅我哋, 先ORDER湯底, 快速畫紙落生料, 跟手就去自助區拎調味品, 當然唔少得雲吞同飲品
傻佬老公竟然一攞就攞5碟雲吞返嚟, 佢話佢好LIKE喎. 飲品就攞咗菊花蜜.
拎完返嚟, 湯底已到了.

菊花蜜--只得甜味, 無菊花味, 預咗架啦. 幸好唔太甜.

胡椒咸菜豬肚鍋--豬肚份量都唔少, 仲有啲炸支竹, 咸菜就唔多覺眼 (可能知我哋唔食呱) 但唔知點解胡椒豬肚鍋嘅湯本身唔係辣, 係要自行加胡椒粉嘅? 怪怪地咁. 


雲吞--大大粒, 入面全部係蝦, 有少許馬蹄, 爽口又好味, 正!

生蝦--好新鮮, 仲識郁架 有啲係中蝦SIZE添.

大魚頭, 九肚魚, 生蠔, 鯇魚片都好新鮮, 個人鐘意脆肉鯇多啲
雞中翼唔知佢係咪事先醃過 (但望落又唔似) 淥完超級入味, 好正!
墨魚滑--粉多欠彈牙,  第一輪 味道正常, 但第二輪墨魚滑就唔掂, 苦嘅!
鯪魚滑, 鮮牛肉都OK
最後食埋菜, 捧住個肚行返屋企.

喺快餐店有海鮮嘅一人一鍋連飲品都要接近80蚊, 呢度$118任飲任食, 性價比算係高.

巴打廳 (屯門)

之前睇飲食男女介紹新墟開咗間新食店, 標榜湯底無落味精, 見到好似幾啱食, 今日就去試下.


叫咗
兩個胡椒豬肚雞湯 配白飯 連熱飲 $46.00 x 2
胡椒湯香味濃郁, 入口只是微辣,  連百厭仔都食到. 豬肚爽口, 雞件只係某幾件比較鞋口, 其他都算滑, 可能雞件位置不同, 口感會有差別. "畢"起啲湯落飯碗後, 發現豬肚同雞件份量都唔少, 全部食晒+飲品一定夠飽.


一個蟲草花雞湯 配白飯 連熱飲 $46.00
蟲草花雞湯入口清甜, 蟲草花份量都好多, 食極都有咁. 但唔知點解蟲草花雞湯嘅湯底比胡椒湯肥膩, 面層嘅油都幾嚇人, 但老公一於少理, 照樣KO.


三杯飲品都正常, 熱朱古力雖未至於濃郁, 但亦不至水汪汪, 唔使落糖都夠味.
埋單$138.00

小肥牛火鍋活魚專門店 (屯門)

今日係我嘅生日, 雖然LUNCH去牛摩食得超飽, DINNER點都要邊一邊.  打邊邊係我嘅最愛嘛!
上網見到小肥牛訂位有9折, 即時就BOOK位. 

但去到竟然無我RECORD喎. 職員就問係咪上網BOOK, 佢哋未睇喎. 總之就會做返9折比我, 佢哋好老實咁話.

我哋一家三口叫咗唔算多嘢 (LUNCH食得太飽, 都仲未落格)

蕃茄薯仔牛腩鍋--牛腩又韌,  無蕃茄味,  淡味到呢...(平時我打邊邊啲食材唔會點豉油, 但今次唔點唔得囉. )
呢個湯底唔得,  早知叫清湯好過, 仲平啲添.


響鈴半份--淥3秒拎上嚟, 仲脆口架.

手打蝦丸半份--半份有6粒, 爽口彈牙夠鮮味, 正!


手打四寶丸--有鯪魚丸, 牛丸, 豬肉丸, 墨魚丸各3粒, 全部都夠彈牙, 好味!


鮮蝦雲吞--一份有8粒, 蝦與肉比例剛好, 好味道, 百厭仔食咗大半碟


冰鎮鮮牛肉--初初以為係滑牛, 原來只係一碟冰上面舖上牛肉薄片, (LUNCH食嘅牛摩好食過佢)


花生酸菜 $12.00
茶/醬油 $16.00 X 3
連加一
扣去食材9折優惠
埋單 $333.00

鮮魚湯 (屯門)

之前有朋友推介呢間位於新墟新開嘅魚湯店, 今日就嚟試下. 


我哋一家三口 11:30左右去到, 等了一陣, 店員便安排好座位給我們.
叫了兩碗招財四寶魚湯米線 $42.00 配--有紫菜﹑魚蛋2粒﹑墨汁墨魚丸2粒﹑魚腐2件﹑魚肉春卷2條, 好豐富啊!
首先當然要試下個銀鱈魚骨湯先啦, 入口清甜, 偏淡味, 唔似荃灣果啲咁重味, 配上滑滑嘅米線好夾啊! 紫菜有好多, 魚蛋OK啦, 唔係彈牙嘅. 魚腐同埋魚肉春卷一咬落去 好脆呀! 係外脆內軟, 正! 最掂竟然係墨汁墨魚丸, 唔好以為佢黑麻麻樣衰衰(百厭仔係咁形容, 唔肯食) 一咬落去非常有驚喜, 入口彈牙, 味道香濃, 超正!

另外一碗 鮮蝦雲吞拼牛肉片魚湯河粉 $36.00--鮮蝦雲吞有三粒,  味道唔錯, 牛肉片都OK, 只係有一塊頗韌.

我哋食咗一半, 店員才端上辣菜莆(可能啱啱整好呱) 原來加埋辣菜莆仲正, 連百厭仔都讚不絕口, 一路喊辣一路話正.埋單$120.00
見到隔離枱叫蝦多士, 個樣幾掂, 下次再嚟試

彩翠軒酒家 (屯門)

今日一行4大1細去新開嘅酒樓食小菜晚餐, 順道預祝中秋節. 

可能新開啦, 都有好多優惠小菜套餐. 就算散叫都唔係太貴.

叫咗個孖寶餐-揀咗鮑魚雞煲+冬瓜盅 $168.00


鮑魚雞煲--有四隻鮑魚仔, 肉質爽口,  雞件夠入味.

冬瓜盅--湯頭清甜, 湯料亦豐足

半隻乳豬仔(4-6人)   $18.00

 乳豬仔一啲都唔欺場, 附上廚剪一把, 要自己剪開, 如果可以斬件上就更好. 乳豬揸上手(剪開) 好熱, 辣手架.  入口皮脆肉嫩, 又唔太肥, 正!

另外散叫咗XO醬海鮮豆腐煲,  魚腐雜菜煲

XO醬海鮮豆腐煲--海鮮配料有蝦, 花枝片, 珊瑚蚌, 帶子, 香辣惹味
魚腐雜菜煲--魚湯鮮甜, 用嚟浸雜菜, 令到蔬菜都帶有鮮甜味, 魚腐味道唔錯.

茶位@$10.00 X 5 
芥/酸菜 $20.00 
另收加一服務費

埋單$420.00