360°旋轉餐廳 (西灣)

今日係年初四, 我地一家三口過黎澳門一天遊, 諗住可以燒煙花嘛

我地買左中旅套票, 每人$534, 包來回TURBO JET船票+旅遊塔觀光層入場券(包58樓觀光主層及61樓室外觀光廊)+360 CAFE DINNER BUFFET, 百厭仔食BUFFET唔使錢, 只係買船票便可

我地因為搵唔到車(搶唔到taxi)去旅遊塔, 所以上埋塔參觀, 去到360 CAFE都已經19:30喇, 估唔到都有窗口位比我地, 嘩! 個景真係好靚呀, 對開仲有人燒煙花, 超靚!

講番D野食都唔錯, 款式都夠多, 要求唔高o既話, 真係可以食得好飽

即灼大頭蝦好鮮甜

凍海鮮有翡翠螺, 青口, 蝦同埋扇貝, D翡翠螺真係好大隻, 其他都唔錯

刺身得三款比較少--八爪魚, 三文魚同吞拿魚, 但都幾新鮮

熱盤都好多選擇-葡國雞, 柳魚, 即淥粉麵, 印式炒飯, 馬介休薯球, 豬脾肉, 白汁焗薯片, 白汁會海鮮, 仲有個新年菜-發財好市大利......都幾好食

甜品有蛋糕, 焦糖布甸, 木糠布甸, 葡撻仔, 窩夫, JELLY, 雪糕, 生果....仲有朱古力噴泉添

D侍應都好NICE, 一埋位就主動攞張BB椅比百厭仔, 又會主動收碟, 又會撩百厭仔玩

其實初時睇過OPENRICE其他人對360 CAFE o既食評真係唔敢有期望, 甚至有d後悔買左票黎食BUFFET, 但去金沙, 葡京果D食BUFFET, 百厭仔又唔入得.

第一次黎個感覺都幾好, 個餐廳會旋轉, 真係幾特別. 雖然浪漫欠奉 (有百厭仔又何來會浪漫吖), 但以$534.00呢個價錢, 減番來回船票134+176, 仲要減埋$100.00上塔費, 個BUFFET 只係$124.00咋, 仲要係年初四, 仲想點吖, 所以我覺得係物有所值o既!

富仕葡式美食 (荷蘭園)

今個聖誕節, 我哋一行五大一細會過馬交玩樂. 聖誕節一定多人啦, 所以事前做定功課, 買定本"天書"計劃一下. 呢本"天書" 有一part介紹澳門十大隱世食店, 富仕係其中一間. 今次老公醒呀, 打定長途電話過去book位, book咗18:30, 仲order埋炒蜆, 薯蓉, 豬頸肉同埋雞釀飯呢四款推介美食添.

當晚18:35, 終於嚟到呢間隱蔽住家食店喇. 我哋被安排坐樓上, 坐低無耐, 之前order嘅四款推介美食已陸續送上, 果然有效率.

葡式炒蜆--辣辣地, 好鮮味. 正! 忌廉馬介休焗薯蓉-- 馬介休嘅咸香混入薯蓉中,質感軟綿, 真係好正! 燒雞釀飯--隻春雞係除咗翼位同肶位外, 成隻起骨, 內釀西炒飯. 雞皮脆, 雞肉嫩, 連胸位一啲都唔"鞋", 西炒飯夠爽身, 一流! 燒豬頸肉--陣陣燒烤香氣, 味道啱啱好, 正! 葡汁焗四蔬--葡汁香濃, 有蘭花三棵, 紅蘿蔔數件, 仲有椰菜, 西芹同埋青椒, 但青椒頗多, 攪到啲味怪怪地. 蒜蓉焗青口--有好多蒜蓉, 少少辣. 掂! 蒜蓉包--見仲有好多葡汁諗住唔好浪費, 就叫多個蒜蓉包點汁食. 一上枱蒜蓉包好香, 又夠熱, 可惜唔太脆, 仲有啲"韌"添, 比較失望!再加多兩杯凍檸蜜, 三杯凍檸茶, 埋單$498.00

當日我哋喺松山公園玩到差不多17:45, 諗住落去打的啦, 一路行一路搵, 點知無的士喎, 行到去皇都酒店門口, 我哋就扮剛check out嘅旅客, 搭酒店嘅Shuttle Bus落葡京, 再喺葡京附近打的. 同司機大佬講去羅憲新街, 但佢竟然問返我哋近邊度, 心諗如果我哋識就唔使打的啦, 好在本"天書"有提到雀仔園呢個地方, 咁司機大佬就車咗我哋去雀仔園嘅其中一條街, 話到喇! 望出去條街咁冷清, 又唔係寫住羅憲新街, 咁我哋問司機邊度係羅憲新街呀 佢叫我哋落車問人, 話架的士駛唔到入去喎, 咁都得! 但唔知點解條路好多車都駛得入, 係呢架的士駛唔入呢 我哋惟有落車搵人問囉, 天又開始黑, 啲店舖又多數關門, 條街都幾陰森架, 我哋一路睇地圖, 一路搵人問, 問咗三個人, 先至搵到呢間超隱蔽嘅住家食店咋!