之前睇某討論區有人介紹意樂嘅滑蛋蓋飯好正, 今日打算早午餐一齊食, 就過嚟試下。
因為係啱啱早餐轉午餐, 所以唔使等位。
豬扒滑蛋蓋飯 配蒜蓉汁 $54.00  另加鮮榨檸檬茶 (因為呢個蓋飯唔係set lunch, 以半價+$10.00 加飲品) 一上枱, 啲汁會唔會太多呢, 攪到啲飯勁濕, 試一啖 啲蒜蓉汁好咸囉.  啲蛋夠滑嘅, 豬扒都唔鞋口, 但為咗滑蛋蓋飯而嚟嘛! 整體唔好食, 失望囉!

鮮榨檸檬茶反而有驚喜, 唔使自己篤餐死, 檸檬味又夠, 幾好飲
龍蝦湯海鮮湯飯 $56.00  (呢個係set lunch, 所以另加鮮榨檸檬茶只係+$3.00) 湯頭味道唔似龍蝦湯, 似茄湯多啲, 但味道唔錯, 海鮮配料亦算豐足, 有蝦, 青口, 帶子, 蜆......
埋單$123.00

今日去圓玄學院掃墓, 順便落荃灣搵食, 喺鱟地坊食街食咗炸髀, 熱狗後, 再過嚟望下呢間甜品店有無開門,  (幾次行過都摸門釘) 今次真好彩啱啱開門, 今日有緣試到了! 香蕉朱古力窩夫伴朱古力雪糕 $55.00 一上枱當然相機食先啦! 好在佢球雪糕雪得夠實, 影完相都仲很完整 (可能係刻意嘅) 窩夫餅外脆內軟, 連埋雪糕食, 又凍又暖很特別。
厚pancake伴海鹽芝士醬+雲尼拿雪糕 $80.00 疏乎厘 厚pancake很鬆軟綿滑,  海鹽芝士醬咸咸地, 好滋味, 點pancake食一流 埋單 $135.00  有緣嘅話可以再encore

呢間餐廳都開咗一段時間,  午市時段路過都會見到有人排隊. 
今日早餐時段見無人排,  睇門口餐牌, 早餐比起附近餐廳略貴, 未試過嘛 就入去試下
叫咗:
叉燒意粉+奶油多+炒蛋+熱奶茶 $37.00
沙爹牛肉麵+奶油多+炒蛋+熱檸水 $36.00
叉燒意粉--湯底唔係好得, 意粉略嫌林了點
沙爹牛肉麵--沙爹湯比一般的辣, 牛肉夠林唔韌, 公仔麵都係略嫌過了火
奶油多--似係生命麵包嘅SIZE, 相對較薄較細塊
炒蛋--正常一般
熱奶茶--係全個餐最好嘅

埋單 $73.00

呢間小店都開咗一段時間, 今日返工前 兩公婆的起心肝去試一試
叫咗兩個特餐

豬骨湯米粉+吉列豬扒+腸仔+炒蛋+厚油多   配熱奶茶 $40.00

湯米粉味道OK
吉列豬扒都夠脆, 略嫌薄了少許
腸仔 炒蛋都可以
厚油多  最正, 入口非常鬆脆, 滿口牛油香
豬骨湯公仔麵+吉列豬扒+餐肉+炒蛋+牛角包 (厚油多 轉牛角包另+$8.00) 配熱檸水 $48.00

湯公仔麵麵質剛好, 唔會過林, 但唔知點解個湯底比起湯米粉嘅湯咸 (唔係同一個湯底嘅咩)
牛角包並唔係酥皮款, 包皮比較厚身, 都OK嘅, 但對於鍾情 酥皮牛角包嘅老公就話有點失望, 相對起要加錢嘅牛角包, 厚油多正好多
埋單$88.00

今日又係嚟兆禧食坊, 今之係買外賣俾百厭仔 Whatsapp咗餐單俾百厭仔, 佢揀咗吉列豬扒咖哩烏冬,  咪照order囉.  原來menu意思係咖哩吉列豬扒飯+湯烏冬/拉麵 (真係眼大睇過龍) 雖然係迷你咋, 大胃王百厭仔都夠食 咖哩汁/飯/烏冬 分開3個兜載, 就真係唔太環保囉 味道方面 咖哩汁好香, 辣味剛好 吉列豬扒雖然焗住拎返屋企食, 但都夠脆 湯烏冬林咗少少, 但ok嘅 另外兜飯有啲紅色酸味嘅嘢,  百厭仔揀晒出嚟, 佢話下次走晒呢啲就perfect喎 總括嚟講百厭仔滿意呢餐 , 俾個讚喎  

今日兩公婆又去試新嘢 就係兆禧食坊入面嘅潮州粉麵店  目測價錢比蝴蝶街市的平(平日早餐+飲品) , 但星期六/日就蝴蝶街市較化算了
叫了平時喺蝴蝶街市叫開嘅作比較:
魚蛋米$28.00--米粉較蝴蝶街市的粗身, 魚蛋就唔係我杯茶, 一啲都唔彈牙, 好林 牛丸米$28.00---牛丸都唔錯, 略嫌有啲筋, 但可接受 炸魚皮$10.00---夠鬆脆, 略嫌調味不均勻, 某啲很咸
豆漿一支 +$7---唔太甜 OK啦
埋單$73.00
(總括蝴蝶街市粉麵舗啱口味啲,  下次有機會試埋呢間嘅牛雜, 再作評價)

今日兩公婆去蝴蝶廣場搵食,  路經薩莉亞,  可能受疫情影響, 竟然無人排隊, 咁我哋就去試下啦!
門口職員熱情招待,  座位任揀, 按鐘即到,  之後都陸續有客光顧, 一樣都係熱情招待. 
嘩! 服務同新墟果間爭好遠喎!

水牛芝士薄餅$30.00--芝士咸香味足,  批底鬆脆

明太子魷魚蝦仁意粉$34.00--味道唔錯, 意粉口感適中有彈性, 唔會過林.

原味雞翼8隻$32.00--原來呢間店只售原味雞翼,  雖則說小朋友也啱食啫, 但大人都係鐘情辣味果款雞翼多啲後加了一件榛子脆餅冰雪蛋糕$18.00--個面係好食嘅, 夠酥脆, 敗筆係個焦糖底太甜,  甜得過分,  變相難食囉! 真係寧願去美心買件凍餅食好過埋單 $114.00

今日要到荃灣辦事, 就約埋老公食午飯, 老公話去試下校長燒肉.   原來喺沙咀道渣打銀行樓上, 舊時扒王之王個位 午市燒烤 $88.00 另加一  (燒肉區/甜品沙律區/飲品區/熱食區) 任飲任食2小時   如果加埋打邊爐就$108.00 另加一 我哋決定齋燒, 打邊爐幫襯火鍋店好啲 唔! 大過元朗店好多喎, 職員帶我哋去一張2人枱, 望到街景又自成一角, 靜靜地又唔錯 出去巡視一下+拎嘢食先, 基本肉類 (豬/牛/雞/雞翼)都有 仲有丸類/腸類......去相...... 飲品都有幾個大雪櫃任揀, 仲有甜品(啫喱/布甸/桂花糕...), 熱食區(蒸燒賣/意粉/雞翼尖/炆鴨腳...) 基本上一定食得飽 味道方面, 某一啲肉太重味, 要飲多啲茶解渴 ,  另外有啲肉嘅醃味有啲怪  (叉燒/ 黑椒牛扒/香茅雞翼/牛柳粒/腎片/魷魚鬚都值得推介) 路過火鍋區八卦一下, 睇下如果加多$20, 會多啲咩食, 只見有炸魚皮/響鈴卷/麵/烏冬,  嘩! 如果加多廿蚊, 只係多咗呢啲嘢食, 唔加明智一點. 食+飲足2個鐘, 真的飽飽了!
每位$97.00

慶祝阿爸生日, 佢話之前嚟過飲茶都OK, 想嚟呢度試下晚飯。 BOOK咗7:00--6位 文昌雞半隻--隻碟大定係隻雞細呢?  真係幾細隻, 但事實又真係半隻雞, 吹佢唔脹。 味道都唔差嘅, OK啦!
燒乳鴿3隻--皮脆肉嫩, 但略嫌未隔好油, 頗油膩
蒜香一字排--斬開細件容易食, 炸得幾乾身, 脆口得嚟又夠味
燒汁一口牛--薯仔多牛肉少, 食唔出燒汁味, 牛肉夠林唔韌
通菜炒牛肉--麻麻啦! 無腐乳味,  碟頭又小。 $98.00碟, 仲未加一, 俾多啲菜都得呱
瑤柱福建炒飯--只係白飯底並非炒飯底, 個獻汁太鹹, 唔掂! 另加一支藍妹啤, 兩罐汽水, 茶芥, 酸菜花生, 加一
埋單$820.00

星期一, 又係兩公婆撑枱腳食早餐時間, 日前收到美心MX寄嚟嘅9折卡, 惠顧任何正價食品, 都可以有9折優惠. 咁今日就去試下啦!
龍蝦湯螺絲粉+魚柳+粗麥多士+熱檸水 $35.00  龍蝦湯螺絲粉--龍蝦湯味濃而且比較杰身, 可以掛喺螺絲粉上, 入口每啖都有龍蝦湯味 魚柳--炸得外面香脆, 內裡嫩滑, 一啲都咁老, 略嫌味道淡了少許. 龍蝦湯螺絲粉+雞扒+粗麥多士+熱奶茶 $35.00--
雞扒--嫩滑夠入味

粗麥多士--新鮮烘起, 香脆有咬口

熱奶茶--係用黑白淡奶, 入口濃滑
總數 $70.00    (9折後 $63.00)