今日放工去左尖東做facial, 跟著老公係附近等我搞店去食個晚飯。 太耐無去過泰國，但見新聞講到果邊旅行都唔太安全，淆底既我真係唔敢去，但我地對泰國菜真係心心念念，所以決定要一嚐解思鄉既滋味😝 係附近見到間Siam28, 個燈牌好搶眼，一望就見到，即刻上左去先算。 上到去原來係食泰北菜，掂啦！因為平時食開曼谷菜，今次即管試下泰北菜有咩分別❤️ 間鋪頭環境好舒服，播住聖誕歌，燈光又柔和。 今日天氣太凍，想食左熱野先，叫左個泰式蟹肉冬菇冬筍羹。 熱辣辣好正，仲要用個火鍋興住個底保持熱度，食落似我地碗仔翅但佢更足料同埋開胃🤤 入面仲有鵪鶉蛋好驚喜！ 跟住叫左炸鮮木瓜沙律配自家醬汁，因為平時食開青木瓜沙律做膽，呢度話炸青木瓜沙律，覺得咁得意就trytry! 上到黎，個青木瓜絲炸到山咁高，個醬汁同蝦擺係一邊伴住個沙律。味道好特別，除左有食開青木瓜沙律既味，仲有啲好似食薯條既口感，雖然係炸但一啲都唔油膩！廚師處理得唔錯。配以自家醬汁酸酸辣辣，好過癮。 愛辣既我地再叫左個香辣燒鴨鬆沙律，呢個要講下真係幾正，平時食開豬肉碎沙律，但呢度用鴨鬆，必食！佢個鴨鬆炒到好香，用生菜包住食好爽，呢味越食越辣但又停唔到口果隻😝 主食叫左個泰式濕炒海鮮停頓麵，佢係一個造型好特別既菜式，個麵係半空用筷子hold住既狀態。底下有好多海鮮同醬汁。將佢地撈埋一齊就變返一個濕炒麵既狀態，味道好食，而且又大量配料包括蔬菜海鮮，賣相又好睇，必點！ 我地最後仲叫左兩杯飲品，解解辣🤪 Lychee Garden 入面有荔枝，薄荷葉，ginger ale • 好清新飲落好醒神 蝶豆花芋頭沙冰 第一次飲蝶豆花咋，原來佢加埋芋頭嘅味道係咁夾㗎。賣相好靚，而且好好飲。 甜品食咗造型好得意嘅蘑菇，上面係泰式奶茶糕下面係椰汁糕，加埋Oreo 碎，好味😋 今餐好滿足同埋食得好飽啊！

今日約左朋友去觀塘區食飯，朋友介左呢間隱世台灣美食店，地點非常就腳，一入到餐廳個空間感都幾大，而且座位都好闊落，播住d好出名既台灣音樂，直頭好似置身係台灣咁。餐牌可選擇既食物款式極多，我地揀左好耐終於到揀到！！ 紅燒半筋半肉麵 牛肉好大舊，而且食落好淋，咬落唔覺得un，牛筋好彈牙，入口即溶，好重既膠原啊！而且個湯都非常入味，牛味超濃又唔會過咸。 手工滷肉飯 朋友超級中意滷肉飯，每次食台灣野都會必點，今次呢間餐廳既滷肉好入味，而且大大粒好有口感，配上白菜健康又惹味。 蚵仔煎 外面煎得非常脆口，蚵仔份量十足，而且每隻都大大粒，配上佢既秘製醬汁，簡直不得了！ 起司肉鬆蛋捲餅 蛋皮好香少少脆，咬落重要有少少芝士拉絲既效果，非常邪惡，入面有爆多既肉鬆，勁香又甜，岩晒我口味。 仙草芋圓 超級多芋圓，好Q彈既感覺，而且仙草既份量都好多，不過略嫌少少甜。 香芋奶茶 甜度可以自行選擇，每一啖都有好香既香芋味，唔會過份甜。

今日放工之後同朋友喺海旁散步，本身諗住買杯嘢飲喺海旁坐吓，點知行經海旁見到呢間日本餐廳，見佢裝修得咁有feel，就忍唔住入去試吓！ 鱈魚白子刺身 $58 日本人視為美顏真品嘅白子，我都係第一次食，入口好滑溜，加上酸酸地嘅柚子汁，完全食唔到腥味呀！ 清酒煮蜆 $78 本人愛酒，新鮮的蜆與清酒更是絕配，呢到嘅蜆處理得幾好，唔會食到成口都係沙，值得讚啊！ 茄子串 $32 好多餐廳燒茄子都會落大量蒜蓉，但係我成日覺得會食唔到茄子嘅鮮味，但係呢一間嘅蒜蓉份量就啱啱好啦，啖啖茄子肉，非常好食呀！ 角切魚生雜菜沙律 $98 呢個沙律作為開胃前菜真係起咗個好頭，魚生份量非常足料，醬汁調配酸度啱啱好，無懈可擊呀！ 燒三文魚飯團 $38 原來燒飯團係咁好食嘅，燒咗脆卜卜，而且外脆內軟，同朋友一人食一個都唔夠呀！ 陸前高田真蠔 $58 呢個蠔雖然體型唔算大，但係勝在入口好鮮甜，好有海水味！ 燒物方面就叫左雞翼2串（$48)、京蔥雞肉串（$28)、雞心2串（$38)、雞肝（$28)、大啡菇串（$28）、牛肋條2串（$48)、菠蘿串（$18），我同朋友一致認為最難忘就係個雞翼同京蔥雞肉串，因為佢哋啲都燒得好有風味，保留到個肉汁，一啲都唔會鞋，黎到真心要叫呢度嘅燒物試下！

中菜黎講連鎖式嘅樂天王朝都算係我嘅不二之選，嘢食選擇多又好食，地點又多數開設喺大型商場入邊，非常就腳。 菠蘿咕嚕肉 最愛之選！因為大多數餐廳嘅咕嚕肉唔係粉太重，就係炸得太乾，但呢到嘅咕嚕肉色澤紅潤、酸酸甜甜，肉質鮮美多汁，超級好食呀！ 四川辣子雞丁 呢個辣子雞丁啱啱炸起上碟，咬落極度香脆，酥香惹味，辣椒香辣娓娓道來，係非常正宗嘅四川口味！ 皇朝擔擔拉麵 最怕食擔擔麵會有一浸鹼水味，但係呢一個擔擔麵完全食唔到有鹼水味，係屬於質感較腍嘅麵，但就係我最鍾意嘅味道，因為腍身嘅麵底可以更加掛湯，令芝麻醬和麻辣醬混合得更完美，加埋花生碎、芝麻等配料，添加口感，胃口大增！ 宮廷驢打滾 甜品都係第一次食，佢係以糯米作皮，再捲入豆沙，表面放上黃豆粉而成嘅甜品，本身我對豆沙同埋黃豆興趣不大，但加埋糯米皮，竟然非常之有驚喜，難怪朋友大力推介啦！

之前去過銅鑼灣百樂中心，知道入面有好多特別餐廳，但點都估唔到原來呢個地方竟然有我最中意食既川菜，餐廳入面個裝修當然非常中式，雖然地方唔大，但環境都好靜同埋坐得好舒服，有別於其後他既中式茶樓。 招牌四川涼麵 上網睇原來呢個四川涼麵係招牌菜黎，一場黎到緊係要試一試喇，估唔到原來份量都幾大碟，輕輕將佢撈混已經令到每條麵都掛既汁，面頭有好多辣子，以為佢會好辣，但其實都接受得到，非常開胃。 四川擔擔麵 由於我地都唔知原來個四川涼麵咁大份，所以想叫多個麵，不過錯有錯著，無想過原來呢個擔擔麵都有驚喜，唔係一般餐廳既擔擔麵咁多湯，反而少少汁其實已經好夠味，而且重有濃濃既花生味。 酸菜魚 賣相非常吸引，酸菜份量多，好開胃，最重要係魚肉非常厚身同埋好滑，基本上唔需要用太多辣椒去調味，用魚熬出黎既湯係特別鮮甜，加上酸菜既酸，已經令到成件事好出色，另外個湯入面亦都加上粉絲墊底，非常夠飽。 紅燒牛肉 牛肉份量多，而且肉質非常淋，牛肉味道亦都好重，加上萵筍一齊整，絕對無話邊樣食物個味搶d，大家都色香味俱全，如果配飯會更加惹味！

今日約左朋友去土瓜灣搵食，朋友話呢間中東菜之前試過覺得可以encore，而我人生從來都無試過中東菜，好奇心驅使下決定去試一試。一入到餐廳，感覺唔算好大，但裝修好別緻同埋個感覺好舒服。職員好快為我地安排左座位，同埋叫我地可以用QR Code落單。 Lentil Soup 呢個味從來都飲過，覺得個口感幾好，好滑而且加左檸檬同洋蔥落去，令到成個層次提升左。 Jalapeño 墨西哥辣椒雜果仁醬配彼得包 我地覺得一場黎到點都要試下個彼得包，好香而且配埋個墨西哥辣椒雜果仁醬，味道一d都會太搶，兩樣野加埋非常夾。每次都可以大大啖加醬，簡直爽爆。 Lamb kebab 呢道菜係免治羊肉串，平時食免治雞肉串就食得多，無想過原來羊都烤得好香，非常有風味，最緊要係入面d肉汁爆多，佢既調味調配得好好，另外，呢道菜亦配上烤包同薯仔，佢本身已經好咸香，食落勁惹味。 AGLIO E OLIO 呢個素意粉賣相已經好出色，基本上每條意粉都好掛汁，啖啖都充滿住黑胡椒和橄欖油，感覺唔會好油，配合埋洋蔥、紅椒、番茜、青椒，令到味道更加提升。 Cake El Tamir 第一次食蜜棗蛋糕，估唔到原來咁好食，甜甜地又有口感，加上個雲尼那雪粒勁大舊，每食一口蜜棗蛋糕再配上雪糕，真係好食到停唔到口。

香港鮮有餐廳係宮廷式嘅設計，呢間餐廳無論係室內外都有精心嘅佈置，望落去真係好高級同埋夠哂浪漫，岩哂特別日子或者節日慶祝！我哋揀咗法式宮廷五道菜晚市套餐，而家OpenRice做緊訂座預付優惠，$538嘅價錢就可以食到$638嘅套餐！ 慢煮雞胸凱撒沙律 好欣賞佢個雞胸，超級嫩滑唔會嚡口，雖然係簡單嘅沙律前菜，但係一啲都唔馬虎，喺醬汁調配得宜，帶有酸味沙律汁令人相當開胃。 是日餐湯椰菜花湯及蟹肉龍蝦湯 我哋大推蟹肉龍蝦湯，湯頭好鮮甜，好重龍蝦膏味，而且入邊有粒粒龍蝦肉食落真係好有口感！ 煎焗美國野雞配牛肝菌意大利飯 發現呢一間餐廳烹調肉類有一手，呢個美國野雞一直落口好有咸香，勁嫩滑，而且份量一啲都唔孤寒，有2塊雞髀肉！而Risotto就真係食極都唔厭，最鍾意佢咬落質感軟稔中，加上牛肝菌嘅味道濃郁，好好食呀！！ 西班牙黑毛豬鞍架 黑毛豬用料上乘，油脂分佈平均，豬香濃郁而且質地柔軟，真係食到唔停口。佢嘅配料有一個好特別嘅香煎薯蓉，本身我以為佢係菠蘿，點知一食落口又好香嘅牛油薯蓉味，非常好食！ 飲品叫左Mixedberry smoothie同埋Passionfruit mint soda，飲落好香甜係非常之自然嗰種士多啤梨味，而熱情果梳打味道偏甜，但係配埋梳打就相得益彰啦！

上個月同朋友過開將軍澳先知原來呢區都好多美食，其中一間餐廳見到門口已經知道係人氣餐廳，一早已經mark低左要黎食飯。果然今日收工黎，入座率已經高達八成，一於就試下到底有幾特別。 炭燒香茅西冷牛肉 佢個秘製醬汁果然出色，有種酸酸辣辣又香甜既味道，加上西冷牛肉口醃得好香，輕輕沾上醬汁，成件事配合得好夾。而且份量剛剛好，建議要趁熱食，但係攤凍左都唔好硬。 泰式鹽焗燒魚 條魚燒到岩岩好熟，表面有大量鹽，打開層皮之後已經聞到好香噴噴既魚肉，重要有煙出架，食每一啖魚肉都好係食緊雞肉咁，好彈牙好juicy。不得不讚下廚房將個火喉控制得好好。 泰式青咖喱雞肉 怕辣既朋友一定必試既青咖喱，令次我地就揀左雞肉，雞肉同埋其後配菜既份量都好多，我地重叫多個酥餅，沾上咖喱汁味道簡直一流，個酥餅好香同好鬆化，叫多個都重得啊！ 鹹魚炒芥蘭 最近食得太多肉，想炒碟菜試下，今次我地揀左個難道幾高既鹹魚炒芥蘭，呢道菜非常有鑊氣，而且每啖都食到咸魚既香，可惜我地食到好飽，如果唔係配埋個飯簡直一流。

今日同朋友放工去九龍灣睇戲，朋友知道我好熱愛韓國料理，就二話不說就推介呢間濟州燒肉食堂，因為呢一間餐廳座位闊落，而且有高水準嘅韓國燒肉食！ 厚切牛小排 原本呢個牛小排上碟有三塊😆但係肉眼已經可以見到呢個牛小排嘅脂肪分布平均，所以急不及待將牛肉放上鐵板到燒啦，真係不負眾望，牛小排非常嫩滑多汁，係優質靚牛！ 濟洲特上豬拼盤 呢個豬拼盤我哋一致覺得係相當好食，由其係塊巨型厚豬扒，食落啖啖肉而且肉質鮮嫩好鬼Juicy！五花肉都好好食，肥而不膩。我哋都好鍾意呢間餐廳嘅醃料，甜甜地嘅醬汁，再配上新鮮嘅肉，簡直係一流呀！ 食堂蘋果梨汁雞肉 雞肉嘅蘋果同梨汁非常清甜醒胃，燒過嘅雞皮香脆，入面嘅雞肉嫩滑多汁，份量又夠哂大份，都係必叫之選！ 芝士明太子石頭飯 食韓國野小不了食石頭飯，貪佢夠哂熱辣又有小小飯焦，呢個石頭飯都無令我失望，明太子更添咸香，好惹味呀！ 朱古力棉花糖 食返個甜品作結，燒棉花糖真係好正，燒到外表變金黃微酥後，重有流心拉絲效果，超級邪惡呀！ 巨峰葡萄 柑橘鮮橙 呢2杯野飲意想不到都幾好飲，味道好清甜，飲到底重有果皮，所以應該係真正水果打成嘅果汁，好有誠意，好好味呀。

今日約咗個客喺土瓜灣開會，收工之後梗係要約返住附近嘅朋友食飯啦，朋友介紹喺啟岸呢度開咗好多新fusion餐廳，我哋見到呢間餐廳嘅門口裝修設計風格好特別，好多木行嘅傢俬，俾人感覺好清新、好文青。 餐廳呢度環境好舒服，燈光比較暗，私隱度極高，而且環境靜靜地，比我同朋友傾吓計敘吓舊。今次我同朋友揀咗二人餐，包括有餐前小食、九樣選三樣嘅頭盤、同埋四選一樣嘅主菜、仲有甜品㗎！ 招牌生牛肉他他 本身唔係好敢食生牛肉嘅我，見到賣相非常吸引，食落去唔會好腥，反而好香洋蔥味，配上佢嘅特製醬汁加上烤過嘅香脆多士，成個感覺好Fresh。 辣肉腸鵝肝醬迷你漢堡 職員上菜嘅時候會提我地可以配上特製嘅鵝肝醬，我同朋友都鍾意食辣肉腸，冇諗過叫醒鵝肝醬嘅感覺好夾，而且每一啖都充滿辣肉腸嘅肉汁，漢堡亦都輕輕烤過，識落有少少趣口。如果食到好濟嘅話，可以配上特製酸青瓜解濟。 香烤胡椒蟹肉餅 睇過賣相看似好熱氣，但原來唔係，切開佢，已經見到大量嘅蟹肉絲，而且蟹肉餅嘅面頭鋪滿蟹膏，食嘅時候慢慢會散發出胡椒嘅味道啊，份外惹味。佢嘅沙律菜亦都好好味好爽口。 北海道十勝豬肉眼 上菜嘅時候份量比想像中多，而且賣相非常吸引，店員非常誠意介紹呢道菜，側邊配上焦糖乳酪醬，令到味道更加提升，食嘅時候感覺非常脆口，而且豬肉油脂分布均勻，感覺唔會好油膩。 煙靭之選 日式蕨餅加西班牙甜油條，配上朱古力醬，西班牙油條簡直外脆內軟，食落嘅時候超鬆化，而且外面加上肉桂粉，令味道更加提升。 西班牙鮮果特飲 用上不同種類既水果調配而成既特飲，岩哂上班族收工後想chill既感覺，味道好清新，仲好解渴。 Still Sangria 第一次飲西班牙水果酒，好易入口，水果味濃郁，可自選紅酒或白酒，好岩女士飲既酒。