炑八韓烤親子餐廳 今日老公收早，趁有空檔時間帶埋個仔去搵食。我哋去咗炑八韓烤親子餐廳，因為媽媽group裏面好多人都推介，話又有得玩又有得食，媽媽解放雙手之選。 一上到去，全層都係呢間餐廳，或者隔住玻璃已經見到餐廳入面個遊樂場，已經大叫緊要入去玩😄 餐廳環境好闊落好大，座位與座位之間相距好多，可能因為方便小朋友走動，餐廳入面仲有多個遊樂場，睇見都好開心。 由於帶埋個仔嘅關係，兒童餐係必點㗎喇，點咗個蝸牛飯卷同埋兔仔蛋包飯套餐比個仔（其實兔仔蛋包飯我自己想食🤣） 蝸牛飯卷同兔仔蛋包飯套餐 蝸牛飯卷做得好靚，入面有火腿蛋同埋生菜，可能因為個樣太靚，平時唔食菜嘅阿仔好主動食晒😆我自己偷食咗一舊，感覺好清新好好食。 兔仔蛋包飯個賣相都係好靚，兔仔有條裙用滑蛋整成嘅，而且飯側邊仲有兩舊炸雞，仲有配埋一舊飯卷。炸雞好Juicy，而且果皮甜甜酸酸咁好開胃，個飯又係有啲甜甜酸酸嘅應該係蕃茄汁嚟嘅，啊仔都食咗好多飯，完全唔使煩我。 而大人方面，我哋揀咗以下嘅烤肉嚟食 和牛牛柳，和牛牛肩肉 和牛未燒已經見到雪花分佈好靚，而且份量絕對唔少，燒起上嚟牛味好重好香。配埋生菜同埋蒜頭片仲有青椒食超級好味！ 侍應仲會幫手燒牛肩肉，佢仲幫我哋將牛肉切到細舊方便入口。 韓式腹脅肉 呢個肉好鬼好食，佢用咗韓式嘅醬汁來醃製，燒起上嚟已經聞到嗰汁好香好香，仲有啲油脂嘅香味，識落口感好好，因為佢都幾厚身同埋油脂均勻。 蒜油蜜糖雞腿肉 佢會配埋個特製蜜糖汁俾你，比你配個雞腿肉你食。雞腿肉燒完好香，因為有埋雞皮嘅關係所以油香更重，點埋嗰個蜜糖汁非常之夾！ 另外韓式前菜無限refill，岩曬我呢個泡菜狂人 士多啤梨香蕉奶昔及士多啤梨乳酸梳打 奶昔係呀仔點既，飲落似係用香蕉打成嘅奶昔，唔係溝粉出嚟嘅，加埋士多啤梨肉好好飲好豐富口感。個乳酸梳打好解渴，用嚟襯烤肉，可以去油膩感，唔錯，唔錯！ 食到咁上下個仔已經屁股被針拮咁，已經係咁話要去落地玩，我哋當然二話不說，掉咗佢入去遊樂場啦，入場之前要除鞋用消毒液噴手，家長就安心啲啦！遊樂場入面有好多嘢玩，我完全解放雙手有得佢自己玩🤣 最後埋單時，送咗兩個金幣俾我哋去扭蛋，氹得牙仔非常開心！ 呢間餐廳我會推介俾朋友，除咗啱小朋友之外，仲好啱一大班朋友嚟飲野吹水，因為環境闊落，食物好味，食住烤肉飲下野都會係個好chill 既選擇。

今日朋友約左去佐敦買野，經過見到呢到有間餐廳門口裝修好神秘，有啲金壁輝煌既感覺，好奇心驅使下令我地去左嘗試！入到去餐廳職員好有禮貌地帶我地入座，向我地介紹餐牌，我地諗左陣先決定好！ 季節廚師發板套餐788 呢個餐包括沙律、前菜、海鮮兩品、澳洲牛柳、炒飯、麵豉湯及是日甜品 先講吓個沙律，個沙律有一舊超甜嘅菠蘿，仲有我第一次食嘅龍珠果，口感非常特別，酸酸甜甜，作為小食好開胃! 海鮮方面我揀咗鮑魚同埋帶子，廚師煎嘅時候已經聞到好香嘅味道，已經好急不及待想食佢，一上菜嘅時候每樣海鮮都有兩件，可以同朋友share黎食，鮑魚食嘅時候好彈牙爽口，帶子上面有黑松露，提升鮮味。 今次揀咗澳洲牛柳，我叫左五成熟，大大粒食落肉汁好多同好淋，調味亦都做得好好。 炒飯粒粒分明，炒到好乾身，配上大蝦。 晚市一人套餐 388 呢個餐都係包左沙律、刺身、越南特大虎蝦、廣島蠔、季節鮮魚、鐵板季節蔬菜野菜、海鮮炒飯、味噌湯同是日甜品。齋睇以上食物已知值回票價啦！ 特別想講下虎蝦，超大隻，廚師將佢切粒，虎蝦微微煎過，外表香脆，份外惹味。配上蔬菜有意大利瓜同翠肉瓜，可以減輕罪惡感🤭 鵝肝多士 個多士好大份，面頭除左舖上鵝肝之後，重塗上忌廉同菠蘿醬，食薄感覺好清新，唔會有種好油膩既感覺。 澳洲和牛厚切牛舌 燒到好口香，真係厚切架，食落既時候重票好爽口彈牙。讚！ 紅酒雪梨 雪梨上有檸檬味既忌廉，雪梨充滿啖啖既濃郁紅酒味，面頭加上薄荷朱古力，幾特別喎。 豆腐雪糕 雪糕上舖上紅豆爆珠，豆腐味勁濃，食薄好fresh, 紅豆爆珠第一次食，口感好煙韌好夾個雪糕。

今日約咗朋友去旺角shopping, 到時經過山東街就會發覺好多特色餐廳，今次特別想推介呢一間，其實一早已經想試，每次經過都見到入座率極高😁今日時間尚早，仲有少量位置，梗係即刻去試吓啦！ 今次又同朋友叫咗二人套餐，包括前菜、小菜、煲類及是日糖水 麻香四季豆 作為前菜，份量都幾多，差啲俾佢個名誤導左，原來係芝麻醬，食落覺得好清新，而且四季豆非常爽脆。 招牌酸菜魚煲 魚嘅份量好多，而且配菜亦都好充足，仲有我最鍾意嘅鹹酸菜，個湯配埋飯簡直一流。唔會太過咸或者酸，味道啱啱好，我仲要想喺度讚下啲魚冇骨㗎，食落仲要好滑身。每一件都係薄切，每件重要吸哂啲湯既精華！ 胡椒雙肚 雙肚包括左魚肚同埋豬肚，胡椒湯味道十分香濃，直頭好想就咁直接飲，魚肚同豬肚切到細細粒好易咬，口感好爽脆。 椰汁西米露(是日糖水) 職員見到我哋食到差唔多，好主動同我哋遞上糖水，係我最鍾意食嘅椰汁西米露，入面凍凍地，西米份量都唔少，為我哋呢個晚餐畫上句號。

樂天經典 今日約左個朋友係康城食午餐，係the lohas 搵野食，因為朋友大緊肚又就嚟生既關係我地想搵間闊落啲坐得舒服既餐廳。 經過樂天經典，望入去有卡位，枱與枱之間夠闊落，而且見到門口擺左Menu望左下見到有喇沙食，唔洗諗就入左去😁 侍應見到我朋友蘿咁大既肚即安排個好闊落既4人枱俾我地坐好貼心👍🏻 我地嗌左以下食物 喇沙海鮮米線 好香喇沙湯底，味道夠濃。海鮮有大蝦仁，魚片，魚片仲要兩大塊好厚身，仲有隻溏心蛋☺️米線份量都好多。好食 大蝦炆米粉 個米粉完全索曬佢個蝦汁同湯，好香好入味，配料有肉片同蛋仲有2隻大蝦🍤蝦肉好爽身好正！個米粉真係啖啖都有蝦味同豐富配料，抵食 黃金魚皮 朋友話臨生要放肆下，叫左呢味香口野😉超正好多咸蛋黃醬沾滿炸魚皮，而且炸得好脆食落又唔油膩，可能個魚皮太香口既關係，我地一塊接一塊咁食勁快清曬😂 海南雞半隻 好滑身既雞肉，唔會太肥岩岩好，配搭埋佢俾既醬汁同薑融，好想嗌多碗飯😋 飲品我地嗌左2杯無糖豆漿，因為食得太多所以飲返杯無糖既飲品感覺無咁大罪惡感😝 總括黎講呢間餐廳性價比幾高而且真係食物份量大而且好食，環境闊落，同朋友傾計一流。

The Captain’s House 上就係尖沙咀做完facial見都到lunch time, 叫左隻佬出嚟陪我食飯順便chill下😁 太懶既關係就係附近睇下有咩岩食，最後揀左呢間The Captain’s House因為記得朋友講過呢間野有shake shake 海鮮食😍 上到去就見到大大隻龍蝦公仔既招牌，餐廳環境好開揚，待應姐姐仲安排左窗口位置俾我地坐，睇到景之餘仲坐得好闊落下。 我同老公揀左個lunch set for two黎試下，黎到呢度緊係食佢海鮮啦！個Seafood combo我地揀左海蝦🦞，魷魚同埋青口，個汁緊係叫檸檬牛油汁啦最多人推薦架麻！湯就要龍蝦湯，小食揀左水牛城雞翼而main就揀左黑松露芝士蟹肉烤菇意大利飯。 飲品佢包紅白酒或汽水，老公要左白酒我就要ginger ale。 先黎2杯野飲跟著上湯，我杯ginger ale 好清新同埋唔太甜，岩曬我！ 上個湯果陣仲配埋香草麵包🥯，個龍蝦湯配個香草包食好夾，飲落佢個湯都幾重龍蝦味，似係熬左好耐既湯好好飲。 個水牛城雞翼有埋西芹同紅蘿蔔條做伴菜，佢仲配埋個他他醬咁俾你點黎食。雞翼有4隻每隻都大大隻，個水牛城汁同個炸雞翼好襯，加埋d西芹條黎食好開胃😁雞翼仲要炸到出面脆而入面juicy，正 跟著到我最期待個海鮮combo, 上既時候侍應哥哥提供埋圍裙，手套同濕紙巾俾我地，等我地食得乾手淨腳，貼心抵讚😘 侍應拎住個海鮮combo 搖左幾下跟着幫我地打開佢，佢一打開個袋勁香牛油味！仲要入面啲海鮮睇落都好新鮮而且份量真係唔少。佢仲要有埋薯仔同粟米仲有腸仔係入面，真係好豐富。海鮮好新鮮由其係個青口好重海水味，魷魚個size都好大隻，所有食材索曬個汁真係好好味😋 最後黎個黑松露芝士蟹肉烤菇意大利飯，其實頭先食完個海鮮已經飽左8成🤣個飯一黎已聞到好重黑松露味仲要望落都好足料，佢仲要將塊芝士煎過擺上個飯度做裝飾，睇落個擺盤好吸引。個飯煮得岩岩好唔會太淋或太乾硬，而且每粒飯都吸曬個黑松露汁仲要啖啖都有啡菇咁滯，好香口好好食🤤 今餐真係食得好飽同埋好滿足，下次要再encore😋

今日放工經過見到間鋪頭細細，但裝修幾骨緻即刻行埋去睇，個MENU 都幾岩心水，一於試試佢。雖然已經係夜晚8:30，但店內得番一張枱，我地坐低後有人想入黎都無位lu。 燒蠔 聞說呢度既蠔係幾出色，果然無令我失望，蠔肉厚身，加左香蒜之後更加香甜。 德島縣三品雞盛 睇Menu見到呢度有個「燒雞胸三角軟骨」有d興趣，一向都唔太鐘意雞胸肉鞋烚烚既感覺，但呢個雞胸三角軟骨好得意，食落脆卜卜好咬口；雞腎切得夠厚，好食；雞肝燒得岩岩好，少有地唔油膩，食多串都仲得! 喜之次一夜干(日本大眼雞) 第一次食呢種魚，魚唔算太大條，但魚肉夠實，唔會一夾就散果種，薰上特別配製既魚汁，食落魚味更濃。 燒羊架 肥瘦剛好，完全無蘇味，點埋芥辣更好味。 原條魔女茄子 平時好少會食茄子，除非係燒茄子啦，呢個魔女茄子好鮮甜，上面有d肉碎，用黎送飯應該都OK呀! 滑蛋牛拖羅飯 食完幾樣之後，覺得可能都需要d澱粉質，所以叫左呢個飯。牛肉既份量都幾多，for我同朋友share 係岩岩好! 總括黎講餐廳既性價比係高既，鋪仔細細但環境舒服，適合飲下啤酒食下野，同朋友傾下計，同時餐廳係無限制食用時間既，值得一去。

因為要慶祝小朋友生日，就帶咗仔仔去觀塘炑八韓烤親子餐廳，一入門口，仔仔就比個playroom吸引左入去玩啦，真係要大讚餐廳貼心既安排，座位前面就係一塊大玻璃，爸爸媽媽可以一面食一面望到小朋友入邊玩嘅情況，相當放心 職員亦好快放左三碟前菜係檯，有泡菜、大豆芽同海帶，全部可以refill ，之後我地亦都好快點左幾樣野食 特級牛肋骨 牛肋骨配上一隻大蝦，一放上烤網燒，已經傳來一陣好香牛味，肉汁豐富，燒完絕對唔會鞋口同韌 名品大王豬扒 非常推薦的一道菜，豬扒十分大塊，燒到外面金黃色，呢個時候再用佢附上既生菜包住點埋醬汁食，真係好惹味。同埋真係要讚一讚店鋪職員，繁忙時間仲會走過黎想幫我地燒同埋剪開一份份，真係好體貼。 月見韓牛前胸肉 雖然係薄切，但其實每一塊都好大片，而且食得出相當新鮮口感滿滿，點埋附上既醬油生雞蛋食，真係食到停唔到口 青醬雞腿肉 醃得好入味，雞肉好嫩滑，襯埋爐邊既粟米芝士同泡菜雞蛋一齊食，真係好夾，特別芝士控既我，都忍唔住要refill多次啲芝士 野飲就點左士多啤梨香蕉奶昔同士多啤梨朱古力奶 ，甜度剛剛好，而且仲相當大杯好抵飲 而小朋友我地就點左兒童套餐：有兔仔蛋包飯同企鵝泡泡浴，小朋友一見到超級開心，造型相當可愛，而且用蕃茄汁做底，十分開胃，仲有最愛既炸雞做配菜，小朋友好快就自己食哂啦。 臨走之前，職員都會送一個硬幣比小朋友去扭蛋機度扭蛋，簡直開心到唔想返屋企，呢度又有得玩又有得食仲有小禮物抽，仔仔話希望下次再黎呢間餐廳慶祝

同朋友響Yoho Mall行完，去附近搵下有無d 西餐食下，咁岩見到呢間鋪細細地，裝飾得幾靚，一於試一試佢啦。 入到餐廳，佈置同燈光都好浪漫feel，好適合情侶或朋友黎食下野，傾下計，好舒服。 打開Menu 都幾多選擇，花多眼亂，好多野都想試，最後同朋友決定叫兩個Set Dinner。 頭盤係柚子提子乾雜菜沙律，份量唔少，上面淋左d 檸檬汁，加上提子乾既甜味，作為頭盤係十分開胃。 是日餐湯係南瓜忌廉湯，難得地係熱辣辣的 (因好多餐廳都是暖暖的甚至凍既)，南瓜味很濃，入面有少許粟米粒，令湯更加香甜。蒜茸包上面蒜茸充足，包焗得十分香脆，值得一讚。 主菜方面我揀左燒澳洲頂級牛肉眼扒，賣相十分精緻，配上南瓜蓉及西蘭花，減低只食肉既油膩感。牛扒份量頗大，肉汁豐富，岩哂我呢d 食肉獸。 朋友既主菜揀左燕麥啤酒燉紐西蘭羊膝。第一次食羊膝，幸好地唔會好肥，亦都無羊羶味，同樣地配上南瓜蓉及西蘭花，食哂都唔會覺得膩，有機會都可以encore多次。 最後飲品我揀左蘋果玫瑰花茶，食完咁豐富既主菜後，再飲一壺清清地既花茶，十分舒服。朋友揀左新鮮芒果奶昔，開頭都有d 擔心會唔會落芒果醬，但朋友飲過後表示係新鮮芒果，而且十分清甜，好快就飲哂成杯。 整體黎講呢餐食得十分滿足，環境舒適，員工態度十分好，尤其滿意既係上菜速度，唔會一次過上哂所有菜俾你 (因為好多時食唔切就會灘凍哂其他野)，佢地會等你食哂頭盤先再上湯，所以湯 或者之後既主菜 上菜時都保持應有既溫度，非常欣賞佢地既細心。

朋友約我去食串燒，我即時想到呢間餐廳，之前已經想試好耐架喇！估唔到收左工既時段竟然重有位，因為以前經過都滿座，我同朋友一坐底緊係即時狂叫野食喇，由於太肚餓既關係，所以我地都叫得比較多野食。 點食物係需要用QR Code落單，十分方便，而且個app重有埋分類，比我地容易d睇，我地重可以清楚睇到相片同價錢，果然細心啊 燒五花腩肉串 食落好香好脆卜卜，而且肥瘦分怖好平均，本身勁驚佢會比勁多肥位我，食落就知我既擔心係多餘。 惹味蒜蓉茄子 勁香蒜蓉味，而且外皮都好薄，我地連d皮都食埋！而且入面既水份非常充足。 燒豬頸肉 食落會有少少乾，但個調味搭夠，絕對值得一試。 燒雞翼 一串有兩隻，燒到個皮好脆口，而且d肉又唔會好乾，十分抵食，值得推介。 花甲粉 我見個個都有叫呢個粉，我地都唔執輸，分量都幾大碗，湯底超級正，唔會太過辣，而且個粉好掛汁，花甲新鮮又冇沙。 巴蜀炒飯(辣) 由於太過肚餓，所以決定叫個炒飯食，非常欣賞呢個炒飯好有獲氣，亦都十分足料，加上有少少麻香，我地最終食晒成碗飯。

今日突然想食串燒，走到元朗一間有酒飲又有串燒食既「芝加哥串燒酒場」，一於試一試佢。當日係下午茶時間，餐廳唔算多人，相對座位都比較寬敞。 打開Menu 見到各式各樣既串燒，包括海鮮、肉類同蔬菜等。由於係海鮮控，所以一開波就揀左幾樣海鮮。 香蒜燒鮮鮑魚 一向都鐘意食鮑魚，清蒸食得多，估唔到燒鮑魚都可以咁有鮮味，配上炸過既蒜茸，確係幾惹味。 鹽燒鮮白鱔串 燒白鱔的確幾講求功夫，首先鱔一定要夠脆先好食，幸好呢次既鱔肉算脆身，加埋孜然粉，帶出左佢既鮮味。 原隻魷魚串: 以性價比黎講，$28 一隻魷魚的確幾抵，送到面前時，陣陣既魷魚香味帶起食慾，急不及待就馬上擺入口，的確幾香口。 招牌燒法國鵝肝 講得做招牌，無理由唔試掛? 鵝肝燒得香身之餘，又唔會太油，唔會覺得膩，好好食! 招牌燒牛骨髓: 牛骨髓算係比較冷門既選擇，味道比想像中好。 芝士黑松露大啡菇 每次食All day breakfast 或者燒野食，我都偏好大啡菇，燒出黎總係多汁好食，呢度既亦都唔例外，配上芝士後變得更香口，增加層次感。 極品即燒乳豬 未到餐廳前已見到客人對呢味乳豬讚口不絕，燒起上黎香噴噴的確係幾吸引，食落去塊皮仲係脆既添，老老實實一串真係未必夠喉。 蜜汁燒黑豚肉 這塊黑豚肉其實即係豬扒，不過肉質鮮嫩，加上蜜糖之後十分惹味，就好似食緊叉燒咁。 安格斯牛板腱珍珠飯 同行友人覺得唔夠飽，需要order一款主食，就揀左呢個珍珠飯。牛板腱份量一d都唔少，都有差唔多10塊，配上鰻魚汁後十分好送飯，友人好快就KO哂成碗。 時令即開生蠔 估唔到串燒店會有生蠔，生蠔肉質尚算鮮甜，叫做可以一解生蠔癮。 以酒場黎講，呢間鋪既串燒算屬於高質，性價比算高，環境十分闊落，適合飲酒吹水，再食少少野咁，值得推薦。