今朝約咗朋友攞嘢，朋友去過呢間飲過下午茶話ok，想試下呢度早茶，就去咗呢間飲。

兩條友去到，大廳冇位，侍應就開咗近窗果間大房，房入面全部細枱，座位都算舒服企理。

點左6 個點心，2個甜品：

6個點心：

1) 煎蝦米腸粉
好乾，好硬，一定唔係即煎，而係一早煎好一大堆，有人order果陣就再煎翻熱果啲，仲差過以前推車仔賣點心，因為上枱果陣只係暖暖地唔夠熱；

2) 煎芋頭糕
又係好乾好硬，上枱又係暖暖地唔夠熱，情況同上面煎蝦米腸粉一樣；

3) 蒸蝦腸
皮太厚，但蝦仲算有鮮味；

4) 鳯爪
啲汁好杰，食完「醬」住個口，又係唔得；

5) 山竹牛肉
個牛肉球好鬆散，撈粉撈得太多，一啲咬口都冇；

6) 春卷
炸咗放得太耐，索咗油，唔得。

2個甜品：

1) 芒果布甸
好食，好多果肉，唔太甜，啱健康人仕口味；

2) 紅豆糕
好食，又係唔太甜，好怕食呢啲糕點係咁落糖搞到甜耶耶，呢個啱啱好。

呢間嘢，早茶都做到咁差，我都唔會對午市同晚市有期望，唔會再去了。

响隔離打完邊爐，朋友話想食糖水，就走咗嚟呢間；
3個人叫咗 -- 1) 木瓜鮮奶 ($15)；2) 三Q喳喳冰(唔記得係咪咁叫) ($19)；3) 雜果黑糥米 ($24)；

食物質素OK的，朋友都話扺食，我食果個雜果黑糥米如果凍啲會更好。但係其中飲木瓜鮮奶嘅朋友睇到張單開佢$18，就叫咗落單果個哥哥仔過嚟問；個哥哥仔話呢杯係加大，要加$3，但係成個餐牌木瓜鮮奶就得一個價錢($15)，亦冇話加大要加錢，咁我地同佢理論咗一陣，佢無奈改番做$15，始終唔係我地錯，係佢冇講。

之後出去埋單...

埋單果個應該係老細，佢又係話果杯係加大，要比多$3，咁我又同佢講，個餐牌係寫$15，你要比加大要加錢應該一早開聲，唔係我地飲晒之後先講要加錢。跟住之前落單果個哥哥仔埋嚟講話係佢冇講清楚搞錯咗，最後先埋到單。

餐牌上有普通有加大應該寫明，唔係亂咁加大人地飲完就硬要人比多幾蚊，老實講幾蚊又唔係比唔起，但係咁搞法真係有啲比人搵笨嘅感覺，希望佢地可以改善一下。

食咗呢間嘅早餐幾次了，食物質素是OK以上的，但服務真是超差...

而家做緊特價早餐MAYO (其實都做咗好耐)，蛋 + 芝士 + 6吋麵包 = $10，加煙肉或火腿再 + $3，咖啡 $5，中環食到咁平早餐可算是超值了，味道唔錯，之前食係夾青瓜番茄的，今日夾西生菜，啲生菜唔多新鮮，有啲黃咁咁，似係琴日賣剩的，賣相唔多好，第一個失望；另外佢嘅onion sauce味道幾好，食落去酸酸地，個人好似醒一醒咁，雖然講得有啲誇張，但我嘅感覺就係咁樣。

由於係即砌仲要烘一烘，所以係要等幾分鐘的，今日個焗爐明顯預熱唔夠，攞上手微熱但食落入面就凍(應該都有少少熱先啱)，第二個失望。

以上嘅「失望位」係今日先係咁，之前唔係咁嘅，原因可能同今日嘅店員有關....

間鋪頭寫到明開8點，我都差唔多8:15先去到，入面個賓姐仲响度「開緊檔」(即係未埋位，仲執緊開工用嘅嘢)；我對人不嬲都有禮貎，入到去見佢開緊檔，都同佢講咗聲Good Morning，但係佢冇啋我，全程當我透明，我等咗3-4分鐘佢都仲執緊嘢，坦白講佢同我講聲please wait都好丫，粒聲都冇，咁我行咗出鋪頭睇下佢係咪真係開8點，之後返入去，佢可能知道我有啲唔耐煩，咁先問我係咪order，我覺得真係超吹脹囉，8點機呢啲返工時間個個都趕，真係唔知係咪賓姐適應唔到香港人節奏...

其實果度唔錯的，買完之後可以坐出面食，仲有得望海，環境真係一絕！

睇到呢度嘅食評，一早就想嚟試下，咁啱果日又轉冷，就同兩個friend嚟試咗。

好多人話大排檔搞buffet會唔會好污糟同埋啲嘢食唔新鮮，我可以答你：第二度可能會，呢度就一定唔會。

點解呢？因為呢度真係好多人食嘢，我7:30去到，我望一望都有成二百幾三百人食緊嘢，啲食物流量大，經常都有refill，所以唔洗擔心啲食物唔新鮮。

我地一行3人，7:30去到，因為冇枱，又同時有幾班人到，所以果啲職員就响啲邊皮位(其實係屋邨果啲公共範圍)開枱比我地。坐邊皮位唯一嘅唔好處就係冇乜光，不過都算ok啦。

我地叫咗鴛鴦湯底，味道都ok。食物方面我唔多講，火煱一般都係差不多，但係就唔好諗住$68會有貴價嘢食，有蝦有蟹算係咁。飲品就只有可樂芬逹同埋忌廉，啲忌廉去得好快，好快就冇晒。

我閒日去都咁爆棚，如果假日去我建議6點半要去到，如果唔係有排等。

聽人講話活蝦刺身好出名，我就記得我5年前去食過一次，真係好好味，所以今次就同成班同事去再試一次。

8個人點咗8個餸：

活蝦刺身：真係好失望！一睇啲蝦就唔新鮮，係死白色嘅，唔似佢張相咁係少少透明，我記得我5年前食嘅都唔係咁，摸埋裝蝦隻碟，係凍嘅，分明啲蝦係隔夜賣唔晒，之後就整定一碟碟放落雪櫃雪住等第二日賣。本來我想出聲，但係我同事一對筷子就夾咗嚟食，搞到我唔出得聲話換；

椰青焗飯：感覺好香，都幾好食，但係就覺得濕咗啲；

泰式牛肉炒河：我地問個老細話有啲乜嘢炒嘢食係辣嘅，佢介紹咗呢個，但係食落唔單只唔辣，仲要冇乜味；

大拼盤：我只係食咗蝦餅同埋香葉包雞(因為每樣只有6件，我地有8個人)，兩樣都幾好味，由其是係蝦餅，即炸熱辣辣好好味；

蟹膏炒大頭蝦：呢個都OK，但係就油咗啲，食完成咀都係油；

大冬蔭公湯：足料，酸辣適中，唔錯；

泰式鳳爪：唔錯。如果泰國餐廳做呢個都做得唔好，就執咗佢好過！

佢送咗個生菜包拼盤，但係生菜得幾片，都唔夠包嘢食，不過送嘅嘢冇得要求咁多，味道都還可以啦。

我覺得佢地有啲食物做得唔夠靈活，好似拼盤同埋串燒，佢一SET串燒同埋大拼盤係每樣6件，我問佢如果加多兩支可唔可以，佢話唔得，一叫就要成SET，但係要2 SET又太多，我覺得如果可以加錢加多兩支咁就最好。

我就只係食過呢度啲早餐。
早餐由$15蚊-$25蚊(而家做特價)，我推介羅宋湯通粉(特價後$20)，可以再加餐肉煙肉煎旦之類其中兩樣。個湯都算濃，份量夠(我男仔都食得飽，通常食呢個連湯都飲埋)。
但係雞絲湯河就麻麻，我一夾起啲河粉已經覺得唔妥，一食落去係硬身嘅，應該係炒河粉嚟，湯河粉應該係幼啲同埋淋啲嘅，佢地連呢啲都唔分又實係幾唔專業。
我見好多食評話佢服務差，我又唔多覺，可能因為我地食早餐冇乜人。

　　昨天(29/10)一共3個人去食，之前上嚟睇過話呢間嘢的食物細份，唔夠飽，所以我地order時己問waiter，個餐係咪好細，佢話其實好夠食，佢recommand我地叫「鑽石餐」，份量多啲。包3個頭盤及3個主菜、一個湯、一個芝士餅仔及甜品(或飲品)。
　　頭盤有10個左右可以選擇，主菜有廿多個，而頭盤及主菜都有廚師精選。
　　頭盤份量係細，但係始終係頭盤，而且有3個，太大份食完頭盤都飽到冇胃口食主菜，所以我唔介意。
　　跟住係湯，我飲咗個周打蠔湯，蠔味好重，好好味。
　　跟住上個「丁屎」咁細個的芝士飽仔，個size好似一個五蚊銀發脹咁大，有一碟芝士醬on side，個飽仔係熱的，外面脆裡面軟，我cut開佢放啲醬入去，就溶埋個飽度，我食飽時仲響個飽度飛咗啲芝士醬出來。芝士味好濃，一流。
　　主菜其實都唔可以話好細，可能人地覺得假假地都係主菜，比起出面食set嗰啲係細一啲，但係主菜有3個
其本上一定飽。
　　我地其中一個生日，所以訂位時order了一個火焰蛋糕，呢個味道就好似普通啲，火焰係用霖酒點火造，未食過就覺得幾得意，送蛋糕上枱時會播生日歌。
　　最後因為好飽，所以叫咗嘢飲冇食甜品。
　　所有食品都係即製的，唔係整定。出餐時間夾得唔錯，唔會話一次過出晒比你，搞到成枱都係碟。值得一讚的是店員的服務，每個都有笑容，唔係死下死下咁，仲有佢地記住每個人點過啲乜嘢食，唔會埋枱時又問一次，做到有高級餐的水準。