而家要搵D免開瓶費既餐廳越來越難，問過班酒友，話舊年食過北京老家幾得，又免收開瓶費，好！一於試試

中午打電話卜台，訂台問左可免開瓶費！三條友，梗係要每人帶一支酒。

去到先叫兩味涼菜送下酒

1. 牛展：不過不失，因為無乜特別味。

2. 醉雞：與其叫佢醉雞，不如叫鹽水雞，一致懷疑師傅唔記得落酒， 又或者係師傳用心良苦，怕花雕味會搶走左我地支酒既香味，所以做淡Ｄ。

之後主菜

1. 半隻片皮鴨

超高效率，叫左唔夠10分鐘就上枱，仲要片好曬。仔細望下，點解得個鴨胸同一兩件皮，個背隻脾同隻翼去左邊呢？於是搵個waitress技巧地問下隻片皮鴨上齊未；佢話上齊喇，係得一碟。於是我就問佢背隻脾同隻翼去左邊？佢話，可以做湯同點樣點樣整，要加８０蚊。唔緊要，我地話甘我地可唔可以拎番其他部位，個waitress好悔氣甘話得。奇怪既事又發生，唔使１分鐘，一大碟砍好左既鴨出左嚟，仲要有好多皮添，似乎早有準備！
留意到隔離兩枱唔問佢既，果半隻鴨既２／３就會人間蒸發
片皮鴨係炸既，唔係燒，同埋用左法式鴨胸既切法。個醬似加左老抽同鹽打茨，深色咸同無味。么么餅似食薄身面包，近年食過最差既一次片皮鴨。２.京蔥牛肉，ok正常，個汁算夠濃，肉就無肉味，配下酒還可以。

最後醫肚，就食左炒刀削面同餃子，落單前已經問過刀削面係現成定係師傅整既，既然waitress話佢地有師傅自己刀削，甘就比個機會試下你功力。出到嚟，成20cm長條條長度厚薄一致既刀削面，傻既都知係機制架啦。唉，又被昆。仲以為有商品說明條例之後，Ｄ人唔會亂噏當秘笈。
餃子就似自家制既，不過做皮個粉筋度唔夠，食落不過不失。

埋單喇，剩惠860...原來，佢收左我地一舊水開瓶費，個waitress話我地消費唔夠，要收番開瓶費。問番佢叫接電話訂位果個黎，公式答案，收左工。算，唔爭左比你昆多一野，比錢走人，以後不再回頭。

其實坐電梯上嚟，下面層層都有人出，出剩我一個人上七樓，都心知不妙....