又去呢度打邊爐，呢度最好係4、5點就可以打邊爐，啱晒我D時間，仲有9折優惠！ 今次叫左個桃膠雪燕椰子雞煲，個湯超好飲，我忍唔住飲左4碗😝😝😝，個煲仲要勁多桃膠同雪燕，食極都有，個響鈴係上次店員推介話即叫即炸，所以今次叫來試吓，店員放低碟響鈴已經好香，配埋呢個椰子雞湯真係超正 個海鮮拼盤D海鮮好新鮮，有半條海𩶘，5隻蝦，4隻貴妃蚌，馬刀貝、蟶子、鮑魚、元貝各有2隻$488，其實都唔貴，因為真係超新鮮超正，特別D蝦，超好食，元貝超厚肉，貴妃蚌同馬刀貝都好鮮甜，另外個手打蝦丸都好正好彈牙，不過個手切牛就有D蘇蘇地！ 呢間嘢真心誠意推介😋😋😋😋

因為去佐敦買洗頭水，之後就上OpenRice睇吓附近有冇咩食，就搵到呢間南洋，因為老公鍾意食喇沙，又見到其他人介紹個龍蝦好大隻好抵食，咁所以就入去試吓，首先叫咗半隻海南雞，但係呢個海南雞比較淡冇乜味，不過肉質好嫩滑之後就叫咗個波士頓龍蝦喇沙摻摻，一嚟到見到碗野好大碗，我哋兩個人都係食唔晒，龍蝦確實好大隻對得起呢個價錢，食落去重好鮮味好多膏，喇沙湯底好有椰香味！大骨肉骨茶，都幾大碗，我哋嗌嘅時候都有問佢大骨肉骨茶同金沙骨肉骨茶有咩分別，佢就話原來大骨肉骨茶就係佢嗰三款肉骨茶夾埋嘅，咁所以就大碗啲，佢另外兩款肉骨茶就有個雞腳肉骨茶同埋呢腩肉肉骨茶，但可能今日有雞腳，所以我見得金沙骨同腩肉，肉骨茶初時未食任何飲覺得好正，好重藥材味，但一食完其他嘢再飲就開始覺得咸左些少！整體成餐飯嚟講，性價比都高嘅！

太耐冇打邊爐，所以今晚就同男朋友出街打邊爐，本來想去牛大人，不過因為太多人，所以行左去兆萬搵，在樓下睇左一陣，見成日去壹火鍋，今次就試下第二間，因為時間都唔早，我見10:30後就可以食3小時，所以揀左呢間紅火，一出lift見到個環境其實唔太好，不過都幾多人食，我哋都要等左一陣先有位，坐低後就叫揀左個花膠海鮮煲，個煲一嚟到，我自己都覺得幾足料，有2大塊花膠，2隻蝦同幾隻蜆，D蜆好鮮甜，蝦又好新鮮，個湯係勁好味，本來諗住任食D質素應該麻麻，但佢呢個湯真係可以比美出面散叫果D花膠雞湯煲，真心值得推介，我哋加錢（每人$30）食埋刺身，不過其實刺身唔太好食，冇乜味嘅，所以決定下次再來就唔駛再加錢食刺身，火鍋配料都係大部份任食店有嘅嘢，另外一樣要讚係手打蝦丸同墨魚丸，蝦丸堅有蝦，2款丸都係爽口美味，因為覺得D蝦同蜆唔錯，所以叫左幾轉，牛就差左D，但黑毛豬肉反而仲好味！

做完facial就同男朋友行去屋企附近食嘢，見到呢間未試過，就行去門口睇下有咩食，企左一陣就有店員行出來話現在有折（忘記是9折定95折），見有折就行入去試下，我叫左個鹽酥雞扒肉躁米粉，男朋友就叫咗肉躁雜錦飯，之後再加多左個拍青瓜，另外叫多左杯珍珠奶茶！ D嘢食賣相唔差，杯珍珠奶茶個茶底就係港式奶茶味，有D奇怪，所以我只係飲左一啖。肉躁唔錯，肥瘦適中，米粉係新竹米粉，不過個雞扒就炸乾左D，有D鞋口、完全冇哂水份，男朋友試左一塊，佢睇到件雞扒係有反炸過，所以可能咁樣炸到亁哂！不過佢就大讚佢個飯，碟青瓜都唔差，本來店員話有小小辣，但食落完全唔覺辣！呢餐食完我跟男朋友一樣覺得呢間好食過老街百倍

今日收工突然想食酸菜魚，所以就同男朋友去食，原本想食第二間，但我行錯路，行左上呢間，一坐低覺得唔對路，點解地方咁細嘅，之前在open rice睇介紹話地方好大，再望下個餐牌，點解唔同嘅，openriceD人介紹又話有2人、3人份量咖，點解呢度冇嘅？點知原來我去錯左地方🤣🤣！咁坐低左就照叫嘢食啦，因為男朋友唔食辣，所以叫左個唔辣嘅酸菜魚，叫多左個清炒萵筍絲同叫左個冰釀桂花露，個酸菜魚好大盆，而且我加左個水晶扁粉，內裏有小量菇類及䈑筍片，勁多酸菜，同比較油，但味道唔錯，清炒萵筍絲第一啖覺得味道偏淡，但越食越好味，果個桂花露好重桂花味，勁正👍👍 環境迫左D，我見有人訂左位，但都冇枱比人

去食放題好多地方都係好逼，點好食但環境唔好都無用，但呢間唔同，唔逼食物又有水準，最讚係服務超好，已經係一個月內第二次幫襯，第一次係同男朋友去食，果日收工突然想食放題，上open rice睇就揀咗去呢間，先唔講嘢食先，我一坐低除低外套後，有個侍應走過來話見我件外套好大件，要唔要幫我掛起佢，驚阻住我，真係第一次食放題有侍應話要幫我掛起件外套！之後其他侍應服務都好好，見我哋未拎嘢飲，特登走過來同我地講飲品櫃在那裏，可以自己出去拎！食完諗住出去拎雪糕，一行出去有個侍應突然拎咗D雪條出來話請我食，話呢D要訂枱或加錢先可以食，就係因為服務太好，所以阿媽生日話要食散放題，二話不說就去返呢間，我book左8點，但因為我早左到，而阿媽細妹未到就坐在出面等啦！點知個侍應哥哥比我入左去先，話呢段時間唔限時間，所以唔使等齊人先入，我可以入去食住等，阿妹來到話要唔凍嘅飲品，個侍應哥哥拎過來時仲幫手開埋罐飲品，食物方面款色多，我有好多都冇影相，有韓日泰國菜，冬陰公湯唔錯，但人參雞湯就麻麻喇，燒大蝦隻蝦真係好大隻，不過有部份D肉梅梅地，但天婦羅蝦要讚咖，好掂，呢度上菜好快，冇漏單，又會勤收碟！我哋食完走喇，阿媽望住個雪櫃話罐椰汁好飲，個侍應其實幫我哋襟緊部lift,但見到我阿媽咁就話：可以拎走飲咖，唔緊要咖，拎啦！但阿媽話唔做呢D嘢，食完走就唔會再拎嘢，咁我哋就搭lift走，但其實我阿妹去左洗手間，點知佢落嚟後我見佢手上拎住罐椰汁，阿妹話佢等lift時個侍應哥哥話：佢哋話叫你拎罐走呀！所以阿妹先會拎！佢哋實在太好人，D服務真係好到一個點！我會再去幫襯的！

朋友同我食生日飯，呢排又食過韓燒、剌身、打邊爐，所以我選擇左呢間鳯雛燉雞，呢間嘢應該係韓國人開，因為一上到去拎位，係有個韓國人接待！我哋3個人，叫左3樣野，燉雞、牛肉包飯同海鮮煎餅！燉雞我哋叫左小小辣，入面有啲透明粉條，幾好味，碟嘢好大碟，好彩我哋3個人，如果唔係就唔可以叫埋牛肉包飯同海鮮煎餅，個海鮮煎餅個質感有D似薄餐咁，都幾足料，唔錯！呢度多D人來食會好D，因可以叫多幾款野食，但如果小人，食量又細嘅，咁就可能只係可以叫個燉雞食就夠！

呢間嘢第一次去覺得唔錯，所以幫襯第二次，但我唔會再幫襯第三次了！真係好耐未見過咁細粒蝦蛟，D咖喱魷魚好重皂水味，而且所有醬汁係0味道！酸汁冇酸味、鼓油冇咸味，辣椒油冇辣味，男友話究竟我食緊D乜嘢呢？ 個煎魚餅都叫ok嘅，不過衰在個喼汁又係冇味！第一次來時冇乜人，但今次來就全店爆滿，唔知係咪因為生意好左，質素都下降埋！

朋友生日決定去倫哥食，其實一直都想去食，終於因為朋友生日可以去試下，呢間有個好處係任飲任食唔限時，我同朋友7:00去到，因為未齊人，侍應問要唔要上住雞煲食住先，D雞煲係任食嘅，同埋雞煲份量唔算大，我見第二張枱叫左4轉雞煲！但我哋只係食左一煲啫，味道唔錯，等齊人後就開始上菜，先嚟過北寄貝沙律，花膠鮑魚，蒸聖子，我自己就覺得花膠冇乜味！ 湯底我就一早book定溫泉雞湯，中間放個冬瓜加小半隻雞同椰青肉，我地先飮碗湯，味道唔錯，不過隻雞肉就鞋左D，同埋有個唔好處係中間個位太細，放唔得太多嘢入去打邊爐，之後就有牛肉啦、海鮮盆、蔬菜盆、炸魚皮響鈴、雲吞九菜餃同魚皮餃、黑墨魚滑、蝦滑等等... 海鮮盆有蝦、蟹、蜆、青口、魚，海鮮都新鮮！ 特別要講下黑墨魚滑同蝦滑，堅好味，蝦滑入面有成隻蝦，而魚皮同響鈴就有D失望，唔夠脆！ 如果唔夠食可以再叫，仲有甜品，不過我哋實在太飽，所以連甜品都冇食！ 店內得2個侍應，見佢地忙於出菜、執嘢、落單，真係好忙

今日諗住氹下身邊人開心食D好嘢啦，所以就去左屋企附近嘅home sweet home 食呢個阿拉斯加皇帝蟹海鮮套餐，um........賣相真係幾吸引，不過隻蟹D肉係梅咖，同冇乜肉，拆左3隻蟹腳終於頂唔順要同侍應講，之後話換隻再大size d嘅比我哋，但要加錢，或換隻麵包蟹，咁怕另外果隻質素都係咁，所以決定換麵包蟹，但拆蟹拑時，係超多水、冇肉同梅嘅，即刻退返比侍應，佢話再換一隻，我已經怕怕，叫佢扣錢就算！其他海鮮都還可以，特別好食竟然係大大隻青囗！ 佢好就好在係可以換第二隻蟹，不過......可能都係一樣質素😩 最後退返隻蟹嘅錢，都尚可接受啦！不過我就應該唔會再去呢間野