星期六行完街差唔多9點先搵地方醫肚…
諗起媽咪冇試過呢間出名既雞扒~就帶佢去試下啦~
尚餘兩張枱~~唔駛等位~

o係諗食咩既途中..已經先後有兩個侍應埋黎話要落單~
其實座低左唔好係耐啫…又唔係有人等位~咁急趕收工嗎?

三個人order左個榮式雞粒炒飯-$38, 鱆魚蓮藕餅-$26,
榮式燒雞翼-$26,西蘭花炒雜菌-32

首先上枱既係榮式雞粒炒飯…賣相唔錯, 用左唔少材料~
有蝦,雞粒, 蛋絲, 生菜絲, 菠蘿粒~~炒飯炒得唔油又夠味~粒粒乾身..
而菠蘿粒酸酸甜甜好開胃,
蛋絲份量好少~但最失敗係d蝦~一食就知唔新鮮啦~又淋又霉…
雞粒d肉唔嚡…個味醃得幾好..但冇去皮…
寧願唔落蝦仲好~

西蘭花炒雜菌一食嚇親我~雜菌超鹹…好似食緊鹽咁~
出奇在西蘭花就係正常味道…
咁即係話兩樣野係分開炒….最後先撈番埋~
呢碟菜份量咁少…又炒得油~竟然收我30幾蚊…

唯一保持到水準既鱆魚蓮藕餅~同之前食既味道一樣..
煎得剛好~蓮藕夠多又爽…

要等約15-20mins既榮式燒雞翼終於黎喇…
以黑椒醃製..食落微辣..惹味~而且好細心咁先將雞翼既骨剪開~
一來更易入味..二來我地可以食得更方便~
不過今次就燒得唔好喇..肉已嚡晒…幾好既事前功夫都浪費了…

唔單止食物退步~連侍應都差左~
o係我地等緊食物黎既途中~突然將一大個杯盤擺o係我地張枱上…
吓~就算只係短時間都應該先講聲啦~
然後我地用餐時竟然問都冇問, 就拎走我仲未用既匙羮放回食具盒…
一來唔衛生~二來冇禮貌~

今日拎喊面係因為4款食品,有3款都唔理想~
客人比我上次黎食既時候多左~而老闆又唔o係度睇場~
難道就係導致退步既原因…

人人都話呢間分店既水準差~
本來都唔諗住試..但因為呀哥食過話好之後…
又提起我既興趣來~

夜晚10點幾唔駛排隊~話即叫即做…
但竟然一分幾鐘就有一底雞蛋仔~
有冇快得咁誇張呀~拎上手..又未至於話好熱~
唔通係一早做好~然後只係放落去reheat..
一搣~好脆~食半粒一睇~內裡冇蛋漿~
以致做唔到外脆而內有少少軟既感覺~
最令人嘆息係冇蛋味~……冇蛋味又點可以稱得上雞蛋仔呢~
如果只求香脆口感, 此店做到~
對我黎講真唔值排成半個鐘黎試……

幾年前有人講過P記既大蝦沙律pizza好食~
難得而家同DBS card做緊promotion…
當然捉埋屋企人一齊去食~
好少會成20:00去到都依然大把位..仲要o係門口派coupon吸引途人添..

要左個DBS二人餐: 龍蝦湯 x2. 葡汁焗蔬菜, 大蝦沙律星芝批, 香蒜肉絲意粉,飲品 x2- $210
加上用左o係門口派既coupon..食滿$200則送左濃汁卡邦尼意粉~

先上顏色橙橙既龍蝦湯..飲落好濃…杰身..有4-5粒爽口既龍蝦仔肉…
味道足夠~連我平時落慣既黑椒粉都要收番~

再黎既就係製法簡單既香蒜肉絲意粉…
曾於p記做過既屋企人話:咁快係因為只需用微波爐叮就攪掂…
蒜味好香,肉粒同雜豆都幾多~而意粉則硬左少少~

熱辣辣既葡汁焗蔬菜好多葡汁~..有西蘭花, 椰菜花, 甘荀條, 蜜糖豆~
味道冇咩特別..

我所期待既大蝦沙律星芝批黎喇…一上枱已聞到好香~賣相靚~
而且切開左一件件既pizza好似一個心形~好得意…
..食材既顏色配搭好: 有大蝦, 辣肉腸, 紅椒, 蜜桃, 菠蘿粒,
餡料夠多~每片都有3隻蝦..最讚係多芝士~
而蜜桃, 菠蘿粒又中和番芝士既溜…
星芝批既批底適中~圍邊既麵團少左~變左包住開邊既司華力腸..同兩種芝士~
仲要灑上黑白芝麻令到口感更豐富..焗出黎又香~
連平時唔愛食香腸既我都覺得好食~

送既卡邦尼意粉..白汁多..但唔夠味~
意粉比前者既軟身~又好多火腿條..但如果要我比錢去order就唔係幾抵喇…

兩杯drink, 一杯要普通既熱咖啡, 好大杯架…味道還可以,
而另一杯則加$5要冰震朱古力~..味道係幾濃…唔駛加糖水都已經好夠甜…

服務都唔錯~起碼比之前好~
可能因為客人少既關係…食物出得快~得閒又會加下水…
順帶一提..原來送既意粉係需要收番加一服務費架~!

O係沙田公園做左約一小時既運動後~
再到一田掃貨之前..當然要補充能量先啦..

要左個一田promotion price set: 炒麵+八爪魚丸-$24
炒麵份量唔多…幾油..多椰菜..用左帶甜既醬油去炒…
而八爪魚丸都好食~因為味調得好…而且勝在新鮮熱辣~
雖然粉漿偏厚..但多汁同配料..

行完街要解決埋dinner問題~
冇咩又快又抵既野選擇, 唔揀mos怕熱氣..
所以再次黎秀吉試埋其他款…
今次要set<b>, 奄列炒麵+日式燒餅+飲品-$28
紅豆大判燒-$7
奄列炒麵其實只係之前食既炒麵加蛋…
蛋皮煎得薄..但依然可以將炒麵包得幾靚…
日式燒餅則落得太多沙律醬~燒餅入面有好多雜菜絲~
如果唔係食落咁厚漿, 咁麵粉味~會好好食….

紅豆大判燒唔算好食~暖暖地..皮唔脆..不過就好香蛋味~
而紅豆則甜左少少….明白一分錢一分貨~
所以下次都係去番貴d既亞x家買好d~

今日人流多..食物流量快~
比上次o係TST分店食新鮮…

與舊同事聚舊~佢約左o係呢間ucc…因為o係harbour city入面夠方便~
因為冇得訂枱~所以7點已去到先拎位…
等齊人差唔多8點開飯…
叫左鮮菇帶子意粉-64, 芝士菠菜三文魚螺絲粉-$64, 煙肉香腸薄餅-64,
兩個pasta加$28轉set, 後加紅豆栗子waffle(中)-$34

第一時間當然出去勺沙律啦~好落力咁勺左主打既粟米,菠蘿,薯仔沙律…
而吞拿魚, 蕃茄仔同蜜桃則是配菜~
薯仔沙律依舊好食~不過今次竟然冇紅腰豆~
而啫喱糖亦只得藥水味既紅色, 所以冇食呀~

鮮菇帶子意粉唔駛5分鐘就上枱..有冇快成咁呀~
但我地都係等食完頭round沙律先食~當然係凍晒啦…
但撈意粉時依然好香, 味道剛好普通..唔多夠味~
我要加黑椒同芝士粉黎調味呢,
帶子好細隻, 冇口感…份量唔多…而意粉偏硬身…

個人就較欣賞芝士菠菜三文魚螺絲粉…好多芝士~
而且焗既意粉係特別好食~ 三文魚份量足又唔嚡…
D汁夠撈勻螺絲粉…今次粉既軟硬又剛好….
但唔知點解呢個食淨得較意粉多~唔通佢地覺得太多芝士會滯..?

第一次食呢度既pizza, 煙肉香腸薄餅真係好薄~ 焗到似脆餅…
餡料夠多~仲好多芝士添~分左6件~
因為唔想浪費既關係…食淨最尾o個一件…都幫手食埋,
但係d芝士已變硬…有汁既位置亦整淋左~

座到last order…其實大家都已經比沙律霸佔個胃~
所以意粉食淨少少…螺絲粉又食淨1/3~
但因為想食waffle既關係..都係叫左中size既後加紅豆栗子夾餅…
中size係兩大件, 只有少少栗子蓉o係綠茶雪糕上…
Waffle新鮮整, 微熱…少少脆.. 綠茶雪糕幾快溶,
栗子蓉唔夠栗子味, 而且份量少 .
而另上既紅豆蓉雖然較甜, 但夾埋waffle食都ok…
其實想試呢個夾餅好耐~整體都ok啦~

服務方面..waitress有禮..不過人手唔夠~好少主動加水…而且冇換碟既service,
不過呢度既好處係地點方便..又冇限定時間交枱…
可以慢慢座都唔會有人話或黑面~
仲要係又飽又抵食….!

一早已得知半島推出栗子卷~
但一直都冇有機會買黎一試…
今晚去開sogo shopping, 就下晝打去留定先~
費事去到冇晒….其實當我打去時都只剩番3件~
收工即刻過黎拎餅~因為呢度close 19:00…

定價$30/件..價錢可接受~
件頭唔細…大概吋半x三吋半.. 放上raspberry做presentation~
卷住既蛋糕好軟熟~入面既栗子蓉佔左7成~
栗子蓉口感好滑…唔太甜~食到少少栗子粒…
最好係完全冇Swiss roll既白色cream~

行完街..消耗左d體力~有呢件dessert做宵夜~真滿足~
唔知道它會供應到幾時呢….

一直都冇買過龍島朱古力, 但因為Openrice既$50現金卷禮物,
就當然唔會錯過一試此處之朱古力啦~
買之前上黎OR一睇其他食家點講啦~

就決定o係朱古力脆米片同原粒NUT既朱古力二選一.
服務員先比有杏仁片既朱古力脆米片我試…
幾脆, 杏仁味唔突出..朱古力都唔夠濃~

再試原粒杏仁dark chocolate, 就決定要呢款喇..
因為杏仁有薄薄既糖衣包住~令到杏仁唔會淋左..好脆~
而龍島既主角當然係朱古力啦~要慢慢嗒..好滑既感覺~
Dark Chocolate最得我同媽媽既歡心~

始終食靚既朱古力唔好太花巧~免得會失真呢~
再次多謝OR既禮物!

約左幾個小學同學同呀sir一齊聚一聚~
呀sir就揀左黎呢度食半席圍餐….夠方便喎~
因為今個星期較凍…差唔多全場都係打邊爐既客人…
而且門外仲有一大班人等位呢~幸好我地有訂位啫~
首先~枱好細..同隔離好逼~座得有d論盡呢….

第一道:鴻運乳豬半體….味道冇特別..但皮都燒得脆~

第二道:芝士乳龍蝦, 伴大量西蘭花~每人只得一球約有龍蝦丸咁大既龍蝦球..
肉質爽, 有d彈牙~幾欣賞個芝士汁..夠濃芝士味~如果用呢d汁煮意粉就正….嘻嘻~

第三道: 翡翠炒帶子, 一見到就已經冇咩興趣喇~因為係用我唔鍾意食既西芹炒細帶子~
帶子份量幾多~因為每粒只有一個拾蚊硬幣咁大..同埋呢道菜好油呢~

第四道係薯寶千網卷, 新鮮炸起熱辣辣~夠脆.. 今次有滴乾油先上碟~
入邊係撈左d雜菜粒既薯蓉..外脆內軟,唔錯~

第五道: 雞煲翅, 侍應分得幾平均, 每人有一條白菜膽..有d雞絲同一排翅~
雞湯味濃但多油~翅比咁多肯定唔係靚貨啦~
一煲湯分到7-8碗,而且侍應將剩下既湯料勺出黎, 雞都唔細隻~

第六道北菇海螺片, 同平時去飲既配搭一樣~以生菜墊底…
又係好多油..同埋個蠔油獻太多~呢個菜較濃味~
雖然個螺片唔韌~但完全冇味呢..難怪要用咁多汁啦~

第道係蒸雜斑, 不過魚唔大條~幸好食落都唔霉..又冇韌..

第八道既脆皮雞..賣相幾靚..灑左d炸蒜o係上面~
我唔食雞..唔知味道如何呢~

單尾係雪茶肉絲燘米..望落唔錯..濕濕地, 好夠味~最大問題係好油..
好大碟..d 朋友又話飽~所以自己都食左兩碗呢~

最後一人一個迷你壽包..好多蓮蓉..冇鹹蛋黃~
蓮蓉太多好甜~我食晒個包淨番d蓮蓉…

原來21:30前要還枱., 有一個半小時時間食半席..其實都夠時間..不過一開頭又上菜慢…
臨尾o個幾個菜又猛咁上…就食得有d急~
埋單都等成15mins, 比左錢之後先上果盤~
竟然凍冰冰仲要食一碟西瓜~
半席$666(全包)..講真唔抵食~用料唔靚~大部份既菜都太油..又座得唔舒服…
德興都係打邊爐好d

Das gute好少做discount, 但SOGO做緊週年特價..
o係呢度買包同樣有9折優惠~~
等我都買定呢個weekend既早餐同小食先~

每次必買麻糬波波-$11/5個
因為冇晒朱古力味..就買左藍莓x2, 黑芝麻x2, 紅豆x1
此店既麻糬波波夠煙韌…唔油…第二日食都冇硬到~
藍莓份量幾多~微甜…而黑芝麻就夠香…紅豆冇紅豆味~

另外買左兩個muffins-$15/2個 (原價$10/個)
藍莓鬆餅同小紅莓朱古力鬆餅~
Muffin質感差唔多~有d濕潤..鬆散程度剛好~
前者成個muffin被藍莓醬染成藍綠色, 加上粒粒藍莓~
真係食落啖啖香甜…
而後者則是原味muffin加上大量小紅莓同朱古力粒o係面..
小紅莓清甜..細細既朱古力粒有口感…微帶苦味~

買左個芝士高寶比哥哥食~佢話包好硬~
但就好香芝士味-我諗係佢唔鍾意類似法包感覺啫~

今日買滿$30麵包仲送兩個麥皮軟包添~
其實係一個幾軟熟既包..o係上面灑左d麥皮去焗~
包身冇乜味道~

咁既價錢又幾抵喎....

約左朋友黎附近dinner~
順路過黎睇下麵包啦~
都好耐冇黎過呢間lu..

因為星期三係麵包日~買麵包有9折~
當然比平時更多人啦~
買左一包已包裝好既紅豆小方包..
一包有8小片, 每片約有手掌心咁大,
望落紅豆份量唔多~就算有都係只得紅豆碎…

食落超軟熟~唔太甜…少少既紅豆味~
感覺唔錯…唔揀醬..或者搽栗子醬或花生醬都好食…
連家人都鍾意~

記得之前買過五穀麥包都係好滑架…