漢城美食 (尖沙咀)

成日睇韓劇見人地食啲黑麻麻既炸醬麵，好似好滋味咁，自己去韓國又冇機會試，難得香港有咁地道既食肆，就黎試下啦！星期六午飯時間人唔多，裝修過後既舖面光鮮好多哩！原本以為可以用下韓文點菜，點知個待應竟然係菲律賓人而且餐牌圖文並茂，唔使講野都得喇！
唔算好餓，我地叫左兩款食物：
1)炸醬麵(煙靱既麵身好有嚼勁，配上黑色既甜麵醬，味道唔錯。洋葱亦好易入口，唔多食洋葱既我都覺得可以。唯一不足係唔多夠熱喇！)
2)辣年糕辛辣麵(傳統韓式辣年糕味帶甜，幾惹味，但都好辣下)
總括黎講好唔好食就見仁見智，但的確係好有韓國特式，簡簡單單唔造作，令人感覺去左韓國一樣哩！
店內洗手間要上閣樓，好特別哩！

潮客 (鑽石山)

去完旅行好掛住香港既點心，住附近都從來冇幫襯過，就黎試下啦。星期六下午預左要等，但都ｏｋ喎，好快就有位喇！
睇門面似乎舖位唔大，但原來別有洞天，我地被安排坐最入既位，叫做比較靜啲啦！
講返食物，我地叫左：
1)蝦春卷(脆卜卜好香口，普普通通啦)
2)叉燒布拉腸粉(賣相特別，同平時食既滑嘟嘟腸粉唔同，好有層次感，但味道其實同一般叉燒腸冇分別)
3)梅菜豬肉包(個人好鍾意食梅菜豬肉，而呢個包內饀唔油，同埋細細個，食完都唔會話太飽食唔落其他野)
4)鳳眼餃(加左菜既蝦餃，好多地方都有得食，所以冇咩特別)
5)咕嚕肉炒麵(以酸酸甜甜既咕嚕肉作茨汁既炒麵，就好似平時食開既肉絲炒麵咁，麵身較粗硬，幼啲應該會好食啲)
呢度食物都算幾好食，而且幾好坐，我地坐到落場都冇人趕哩！

囍慶酒家 (沙田)

同事last day，老闆請黎呢度飲茶，呢度地點隔攝，唔係有車都好難黎到，今次都係第一次哩！一行六人由中大過黎都要十分鐘車程，真係唔野少架！
由於係午飯時間，我地被安排去新開果邊，更靜更舒適。我地叫左唔少點心，全部都好貼心地將醬由同食物分開，唔錯！
揀幾款比較特別既黎講下：
1)咸水角(好脆好新鮮，美味)
2)蝦腸(夠滑，蝦亦爽脆，配埋鼓油好好味)
3)炸奶皇包(包面刻意剪成菊花既形狀，不過剪得麻麻地，好求其。細細個的包炸得金黃香脆，可惜內裡既餡比想像中少，亦冇流沙既情況)
4)涼瓜烙(好似煎魚餅咁，不過加左一條條既涼瓜，唔算好苦易入口，配豆鼓蠔油汁恰到好處)
5)棗泥長壽包(即係壽包，但係用棗泥做餡。金黃色賣相很靚，可惜太飽冇食到)
6)小師妹炒麵(睇英文就估到係咩野，其實即係咕嚕肉抄麵，用咁古怪既名都係黎飲引我地呢啲貪新鮮既人即。咕嚕肉餸汁同炒麵分開上，唔會整淋啲麵，酸酸甜甜幾醒胃，但唔算突出。反而麵炸得夠乾身，又幼細，食落唔覺油膩，幾好)
整體黎講都幾好食，最緊要係啲野夠熱同新鮮，至於值唔值，因為有人請真係唔能夠評價了！
呢度停車場要轉五層樓，駕車人士要俾啲耐性喇！
7)()
8)()

津味小食 (旺角)

食左一串燒賣，以為蒸野唔會落味精，點食食落口就知食，食完喉嚨勁唔舒服，飲兩杯水都唔掂，啲鼓油又稀，地下又污漕，下次唔會再幫襯！

糖朝 (尖沙咀)

上一餐食唔飽，再黎呢度食　自從細細個黎過呢度，都幾乎十年冇幫襯過喇，今次黎發現搬左過隔離，環境大左闊左好多添！
一行六人叫左以下食物：
1)竹笙粟米粥(粥底好綿，食得出有火喉，味道亦好鮮，不過唔知係咪落左味精)
2)朱古力糯米糍(包住黑朱古力麥提莎既糯米糍口感特別，味道清新，唔錯！)
3)馬荳糕(好普通)
4)砂煲湯圓(原個砂煲上，熱辣辣，薑湯味唔算濃，不過芝麻湯圓好好味，煲耐左都唔會溶哩！)
5)馬蹄糕(質地比較削，如果硬返少少更好！味道尚可)
6)寶島珍珠鮮百合豆腐花(顧名思議，材料就係咁多，細細碗幾個人一人一啖就冇晒喇，但豆腐係好滑，珍珠亦煙靱，合格！)
另外朋友自己叫左個水餃麵，似乎都幾好味！
整體黎講食物普通，以遊客食店黎講價錢都算合理，係勝在地方夠大，慢慢坐開埋notebook睇相都冇人趕，係朋友聚埋傾計既好選擇哩！