Branto 印度素食餐廳 (尖沙咀)

同朋友補祝生日，當中有位食齋，所以就揀左呢度喇！
印度素食係第二次食，而呢間從來都冇黎過。餐廳位於商業大廈，要按門鐘先入到去，電視播住既都係印度既流行曲ＭＶ，原來啲歌都幾搞笑！呢度主要食客都係印度人，我地入到去真係有異類既感覺！
打開餐牌，全部都係唔懂既英文，真係考起，唯有看圖識字，不過有時都會出錯，其中一味以為係餸黎，點知係麵包，估佢唔到。
由於唔識叫，所以求其叫左幾款，不過共通點係全部都係麵粉製，好似薄餅、烤餅．．．可能呢啲就係印度特色吧！而且味道相若，都係辣既，食到一半已經有少許胃唔舒服喇！
咁多味我覺得最好食係一個似公司三文治既，好香牛油同沙律醬，但裡面有青豆，未必個個鍾意！另外好味既包括蕃茄薄罉同蕃茄脆餅，雖然兩者饀料一樣，但口感截然不同，後者帶有很重胡椒味，係典型既印度小吃，必試。
呢度真係好受印度人歡迎，本來想坐多陣，但見咁多人等位都唔好意思，就埋單走喇！
可能啲野比較辣，落到樓先發現原來大家都唔夠飽，只好轉戰別處，今次就當係感受下異國風情吧！
P.S.牆上有蟑螂，要小心

江南廚子 (羅湖地王)

難得要去深圳出trip，順便食埋晚飯。搭兩蚊地鐵去到大劇院站黎到呢個商場，除左好多香港都有既食肆，仲發現呢間特式菜。估唔到呢度幾乎間間食店都要排隊，好在呢度有安排等候座位，仲可以預先點定菜，雜誌任睇，尚算周到。
等左成粒鐘終於到我地喇，呢度裝修高雅，厠所亦好乾淨。入去先先有人兜售龍井茶葉，冇理佢就點菜喇，不過佢既餐前小吃小黃瓜同涼拌豬耳都幾好食！
叫左以下食物：
1)嫩椒牛柳(牛柳非常嫩滑美味，水準以上，配上嫩綠既青椒，鹹香味甘，可惜奇辣無比，如果換成豆角就好喇)
2)乾菜豬肉窩窩頭(乾菜即係甜梅菜，與腩肉同炒，一啲都唔肥膩。窩窩頭表面係個包，但內有乾坤，反轉就係一個碗，將梅菜豬肉釀入去同食，實在美味非常一份窩窩頭分別有三個啡色，同三個黃色，味道差唔多。問返杭州既朋友，原來當年窩窩頭係窮人先食既玉米麵製粗糧，但時至今日已成為高級食品，只有酒店先有得食，真係估佢唔到！)
3)寧式炒鱔(同平時食既炒鱔餬冇咩分別，好重胡椒味，偏油，面頭幾粒蝦爽口彈牙，唔錯！)
4)瑤柱炒飯(菜單內唯一既炒飯，炒飯乾身入味，夠鑊氣，放係鐵碗內更加可以保存佢既熱力，放耐左都仲咁好食哩！)
其實呢間食店都幾貴，尤其係咩都收錢，大廳餐費每位四蚊，餐前小吃每位六蚊，開壺最Cheap既龍井都要收廿八蚊，面紙，濕紙巾都逐樣計錢，真係未見官先打八十！可能因為係高級食肆先係咁吧！
個人覺得呢度比香港同類食店好食，如果唔介意稍貴同要等位，都可以再來！

Sopranos (愉景灣)

愉景灣一路都係高檔既地方，食肆既格調當然亦唔會低。時值大節，黎到呢度份外浪漫！如果坐室外，氣氛係會好好，但因為天氣凍，故選擇咗坐室內。時間尚早，店內客人唔算多，我地被安排係近門口既位置，雖然座位舒適，但亦難免成為玻璃門外好奇路人既注視對象。呢度全部都係外籍侍應，佢地都幾熱心，我叫佢額外俾多張櫈擺野都冇問題！
全英文既菜單對我呢啲極少食西餐既人嚟講的確有點難度。我以有限既知識叫左以下幾道菜，不過都好，可以順便練下英文！
1)Marinara- Seafood (即係海鮮pizza，唔想咁熱氣就叫左厚批，pizza香脆可口，海鮮亦食得出係新鮮既，加少少芝士粉同辣椒仔辣汁就更好。不過批底有少許靱，所以最好用手食，咁就原汁原味喇！)
2)Beef Tenderloin (燒牛柳，可配唔同既醬汁。大約一舊香皂咁大既牛柳好厚身，因為好怕血淋淋，所以叫左八成熟，食落有少許烤焦既味道，唔知係特色定係真係燒燶左而啲配菜都幾特別，有茄子同原條粟米，味道偏淡，不過可憐既粟米好難叉，結果食到一半碌左落地下)
3)Strawberry Smoothies(個人偏好果味既沙冰，呢度既Smoothies味偏淡，甜返啲會好啲)
可能自己口味偏東方，所以扒類就唔多識欣賞，反而pizza就幾好，而且價值係同區嚟講唔算貴，今次就當係見識下吧！
呢度都幾受年輕情侶歡迎，不過有趣係大部分男士既英文都麻麻，點菜既都係女士為主，所以建議有心嚟呢度既男士要做定功課先喇！
食飽飽再去海灘散散步，之後先坐船返去都唔遲！

風月堂 (旺角)

自從新世紀果間冇咗之後，就冇再食過風月堂喇，今次難得有機會就緊係要把握啦！
位於轉角位既入口唔多起眼，上到去係簡約既白色裝修，感覺舒適。平日未夠七點已經要等位喇，好在等左一陣就有。我地兩個女仔叫左以下食物：
1)洋風盛盒(材料包括芝士菠菜雞卷、炸帶字、釀忌廉蘑菇同羊柳粒。全部都好新鮮，炸帶子大大粒真材實料，唔係果啲魚肉扮的，蘑菇就好Juicy，羊柳粒冇乜羶味，亦唔靱，唔錯！係菠菜雞卷比較漏少少，但都係好味既)
2)海鮮湯意粉(呢味係風月堂既招牌菜，湯意粉平時好少食，估唔到茄汁湯底既意粉係咁鮮味既，酸酸甜甜非常醒胃，加上豐富既材料，有蝦、魚、青口，極力推介，我連湯都飲埋哩！)
3)鮮果紅豆酥盒(呢度甜品種類繁多，花多眼亂一時都唔知揀邊款好，睇見呢個賣相幾靚就叫佢啦！果然不負所望，同張相一樣咁靚！紅荳味既雪糕夾雜住大大粒紅荳，奶味濃郁，好好味啊！配合新鮮熱辣既酥皮底，雖然啲水果少少酸，但都唔會破壞整體美味，GOOD ^^)
呢度食物好好味，不過就坐得逼啲，同埋可能環境所限，人多時好似街市咁嘈，如果可以改善下就perfect喇！
另外服務都合格，期間仲見到一個大肚待應要捧餐，都替佢辛苦哩！

別府駅前料理 (旺角)

家姐雖然唔食生野，但就好喜歡食日本菜，所以今年生日都揀左黎呢度。怕冇位，一早book左四位。黎到被安排坐係望彌敦道既望窗卡位，唔錯！
今次都係叫左唔少野食：
1)火炙沙律醬三文魚壽司(三文魚略為燒過，呈半生熟，魚味唔濃，亦食唔出沙律醬味，一般)
2)吉列芝士白魚棒(外脆內軟，芝士味濃，必食之選)
3)鹿兒島洋葱汁粟米片蟹柳沙律(清清地，仲有愛吃既粟米片，幾好)
4)鹽燒三文魚腩(賣相唔錯，但個人唔太喜歡佢太淋既質感)
5)滑蛋蟹籽蟹柳撈讚崎手打烏冬(烏冬煙刃，但味道很淡)
6)土佐豆腐(似乎炸燶了，很乾，味道都唔係好夠，如果有醬點會好啲)
7)雞軟骨棒棒餃子(一咬開皮同饀就分離了，味道尚可)
8)蟹膏海鮮炒飯(又係偏淡，同埋碟頭略嫌較細）
9)茄汁pizza(mini size既pizza好新鮮，脆卜卜，茄汁亦夠味）
10)笨兔(士多啤梨+香蕉+忌廉打成既飲料，質感細滑，味道就好似細個時食既棉花糖，香甜味美）
總括黎講食物唔算好標青，一般般啦，如果鍾意清淡既人可以一試。值得一讚係呢度侍應既態度真係唔錯，好耐都冇見過咁有禮貌既侍應喇，所以俾佢加分。不過想唔到星期日晚生意都咁淡，只得幾枱客，真係令人深深感受到金融海嘯既影響！