呢間舖長期都好多人排隊，即使平日都一樣，企係街度等都幾辛苦，好彩等左半個鐘就有位喇！
因為舖位實在太細，難免要搭枱，仲要坐得好迫，你眼望我眼的確有點尷尬！呢次叫左九洲拉麵，香濃既豬骨湯加上彈牙有嚼勁既拉麵，味道出眾。而叉燒就偏肥，應該咁先叫正宗吧，因為我係日本食既都係咁。呢度既日本拉麵仲有得加底，唔怕肥可以落牛油添，果然同日本既一模一樣，難怪咁多人要等都要黎食啦！而且價錢唔貴，真係食得過！

屋企冇人煮飯，就同細佬黎食，平日冇咩人，幾乎係包場咁滯。呢度有好多款晚餐選擇，質素都唔錯，我通常食黎食去都係果幾款，細佬鍾意食肉，所以成日叫牛扒同豬手，份量都夠大架，佢咁大食都夠飽！
今次我叫左豬扒配焗帶子既餐，女仔食份量剛好，以前有時覺得呢度的野食唔夠熱，但呢幾次來都ｏｋ，算係咁了！講返食物，豬扒薄薄地唔肥，配上蒜蓉洋葱汁感覺不俗，焗帶子亦唔漏，我最欣賞佢既薯菜係薯餅切條，口感一流，唔會乾爭爭，又有我至愛的茄子，一個完整既套餐包餐湯，麵包同飲品，食晒真係好飽！嫌唔夠仲可以加錢叫小食，又係另一選擇！
服務方面，可能平日實在冇乜生意，侍應往往仲多過客人，有時會有發夢既情況，但尚可接受。
食飽飽又係回家的時候了！

座落冰場隔離既EXP散發出一股寒氣，係又一城裡面算係一間特色餐廳，食飯時一邊睇住人地踩冰，一邊聽住音樂，加上價錢合理，三五知己係度食野實在一樂也！
呢度係美心集團，主要食fusion菜，我地兩個女生叫左以下食物：
1)拼盤(包括軟殼蟹米卷，蔗蝦，炸魚蛋餅，串燒，冷豆腐。炸魚蛋餅白雪雪，初時仲以為係蝦餅，食落軟熟彈牙，好味！串燒既沙嗲汁都好好食，其他果啲都係中上水準！)
2)泰式柚子沙律(集合酸，甜，辣既菜式，紅肉柚子配上蝦球，好開胃！)
3)MAX Pizza(原來係煙三文魚Pizza，細細件份量岩岩好，香氣撲鼻，趁熱食是最好的！)
可能因為地方大，待應既警覺性唔多夠，要叫幾次才來，不過情況可接受！另外呢度既厠所零舍凍，好奇怪！
今次隔離枱坐左對韓籍情侶，好靚仔呀，個女既都唔差，簡直係郎才女貌，不禁多望兩眼！

呢度門面不什光鮮，只可以放得幾張枱，坐係樓梯邊好怕會碌左落去！不過由細食到大，而且亦係慈雲山區唯一既越式餐館，所以間中都會去食下。食客通常都會叫撈檬，今次我揀左食三寶飯。三寶即是香茅豬扒，雞翼同扎肉，配葱蒜同豉油汁，豬扒新鮮炸，香而唔靱，雞翼扎肉冇乜特別。啲餸係稍鹹左啲，但啲飯可以中和返，唔會有乾硬既感覺！簡簡單單一餐就係咁啦，仲包埋野飲添！

好幾年前黎食過一次，覺得麻麻地，今次機緣巧合下再黎到，發現食物水準上升了！尤其是小籠包，以前厚皮果啲已經不復再，換來是皮薄多汁的，做生意真是要與時並進！
除左小籠包，呢度既鍋貼都好好味，皮亦唔會太薄，保留返上海鍋貼應有既口感。
麵方面叫左酸辣麵，担担麵同三絲冷麵。酸辣麵同担担麵都係幼麵，味道唔錯，可惜麵身稍焾，偶然仲有黐埋一舊的情況添！而冷麵同京式果啲唔同，麵身係拉麵來，雖然都係落左麻醬，但就加左辣油，所以食到噴火，但都幾惹味，不過材料就唔多夠，只係雞絲，火腿絲同芽菜絲，外觀單調左啲喇！
我地仲叫左油豆腐粉絲湯同燻魚，味道亦唔錯，但燻魚好多骨，食時要小心！
呢度價錢唔算貴，有啲廿零蚊既客飯，午市黎食都幾抵！而待應態度都幾好，一叫就到，同埋裝修左感覺亦乾淨啲，有機會可以再來！

週末路經此地見到佢有午餐就入去喇，同朋友分別叫左牛腩金邊粉同雞絲金邊粉，個人好鐘意食泰式金邊粉，貪佢幼幼地易入口，由於由泰國人主理，呢度既湯粉都頗正宗，加上酸醋吊味，味道唔錯！雞絲質量亦中規中矩，算係咁啦！
服務方面亦只係不過不失，冇乜特別！

第一次食意粉屋既芝士火鍋，侍應話兩個人淨食會唔夠飽，就叫多左個意粉，點知最後都食唔晒！
講返芝士火鍋，我地揀左傳統芝士湯底，其實仲有蕃茄同黑松露，但都係覺得最傳統的比較好。配料可選海鮮或牛肉，因為肚子唔爭氣，所以都係食牛肉比較穩陣。火鍋包括一大碟配料，一籃麵包同一碗墨魚麵。配料除左主角牛肉，仲有雞肉，冬菇，本菇，蘑菇，意式肉腸等，二人份量剛好。初時都怕啲芝士湯煮唔熟啲食物，好彩送來的肉類都已經是半熟，所以只需稍微加熱就食得！芝士湯煮滾後質感濃稠，香噴噴的，用麵包同配料沾上簡直係人間極品，亦唔會覺得好漏！
呢度坐既環境唔錯，好適合傾心事，侍應態度良好，食物質素亦幾好，係要去商場厠所就麻麻地喇！
最後都要多謝好朋友請我食生日飯！

我最鍾意食雪糕，就算腸胃炎都照食可也！雖然病病地，但大壽又點可以冇雪糕呢？所以揀左黎呢度。平日晚上六點幾入座唔使等位就入得了，呢度地方光猛，又有水晶燈，感覺高級，食物價錢亦當然成正比啦！今次有個大食細佬一齊就唔可以叫得少了，我地四個人叫左六款食物如下：
1)西班牙海鮮炒飯晚餐(茄汁底既炒飯外表平平無奇，但內裡藏住新鮮既蝦，魷魚同魚塊，香氣撲鼻，好食！)
2)焗肉碎茄子(半條茄子上面舖滿肉碎，味道唔錯，但阿媽話唔抵食)
3)洋葱圈拼燒排骨(洋葱圈幾好，不過燒排骨有點靭)
4)日式雞扒定食晚餐(細佬食晒，所以唔知食味如何，睇個樣唔錯！)
5)牛肉雞柳石頭鍋飯(見好多食評都話呢個好就試下，上面隻蛋可以揀太陽蛋或生蛋，配以甜辣醬同鼓油，如果撈晒落去會幾辣。而餸既份量較少，似乎唔見牛肉既蹤影，唔知係咪變晒做肉碎呢？雖然好評如潮，我都係覺得CITY SUPER既石頭飯好食啲！)
6)繽紛嘉年華雪糕新地(四人份量既雪糕新地極之巨型，賣相已經有驚天動地既感覺，雪糕更有八球之多，加上新鮮水果同脆脆，口感豐富，連大食既細佬都覺得飽晒，唯一美中不足係件蜜瓜太生太硬了！)
Set Dinner送甜品同茶，係香蕉味雪糕慕絲，都好味呀！
高級cafe黎講呢度係幾好的，唔怪得平日晚上都座無虛席啦！而服務方面都幾細心，最後仲會問我地啲野岩唔岩食添，約人去九龍灣既話可以考慮一下。

生日難得有人請食buffet，真係一大驚喜！^O^
呢度係sell法日fusion，食物款式眾多，尤其是甜品種類更是琳瑯滿目。法式既鵝肝同田螺都係客人既首選，而我就比較喜歡日式食物，當中冷麵都有三款，味道清淡可口，而長蟹腳亦新鮮美味，食幾隻已經回本了，只係壽司同魚生質量麻麻，應該可以改善一下！
熱食方面款式一般，只有一款炒飯，而肉類既種類亦略嫌唔夠，反而係有好多蝦同蟹，凍蝦都有兩種，仲有椒鹽蝦，串燒蝦，全部都幾好味！蟹亦唔少，每人更加送一隻大閘蟹，我果隻超多膏，愛大閘蟹之人真係不能錯過。不過食咁多蟹好易咬崩牙，所以大家都係問佢拿把交剪好啲喇！同其他地方既自助餐一樣，呢度亦有麵檔同點心供應，符合了客人既喜好。
甜品方面，由於款式眾多，起碼有十幾廿款，所以全部都係的的骰骰的，咁就可以試到唔同款喇！推介既係朱古力慕絲同木糠布甸，仲有格仔餅，真係好好味架！當然唔少得我既至愛Haagendaz雪糕啦，記得早啲攞，唔係好快就俾人食晒喇！寧願食完佢再食熱野
見到咁多野食，不知不覺食左好多，唔想食完肚痛既話，真要量力而為！

呢度以食拉麵為主，人唔多時坐得都算舒服，亦有唔少遊客光顧，星期日既午市都有套餐供應，而且唔收加一，算係咁喇！我以叫左兩個拉麵套餐，包括：
1)鹵水三寶拉麵+紅油抄手(拉麵質感尚可，湯底亦唔錯，只係鹵水三寶除左隻雞翼同豆腐幾好之外，啲鹵肉很硬，肥膏又很多，扣晒分！而紅油抄手就幾得意，細細粒好易入口，味道就一般啦！)
2)擔擔麵+煎餃子四隻(擔擔麵湯底唔係好濃，都係拉麵底，份量唔多，男仔食可能唔夠飽。個煎餃就冇乜特別)
另，餐飲可配豆槳，是我和朋友的至愛！
其實呢度又未至於好難食，普普通通咁啦，不過侍應真係唔夠，咁大間舖得兩個樓面，人少少都應付唔來了，何況繁忙時段？
呢條街有好多食肆，下次試第二間先！